Аҟәа иаатит Алхратә комиссиа хада Жәларбжьаратәи апресс-центр

23
(ирҿыцуп 18:11 21.03.2020)
Ахада иеиҭалхрақәа мҩаԥысраны иҟоуп хәажәкыра 22 рзы Аԥсны, иара убас ақалақьқәа Москвеи Черқьесски.

АҞӘА, хәажәкыра 21– Sputnik, Бадри Есиава. Хәажәкыра 21 рзы Аԥсны Алхратә комиссиа Жәларбжьаратәи апресс-центр аатит Аҟәа.

АИХқәа рзы апресс-центр аартуа Аԥсны АКХ ахантәаҩы Ҭамаз Гогьиа иҳәеит атәыла ахада иалхрақәа 99% рыла рҽазырхианы ишыҟоу. Инхаз амаҷ-саҷ анагӡаразы аамҭа ыҟоуп иҳәеит иара.

Алхрақәа ирылахәхоит ҳәа ашәҟәы иҭагалоуп аделегациақәа ԥшьба – Аԥсны иҟоу Урыстәыла Ацҳаражәҳәарҭа аделегациа, аилазаара "Адемократиеи ажәларқәа рзини" аҳәынҭқарра-лахәылацәа Рпарламентбжьаратә Ассамблеиа аделегациа, Аахыҵ Уаԥстәылеи Приднестровиатәи Молдавиатәи Ареспубликеи рҟынтәи анаԥшыҩцәа.

Жәларбжьаратәи анаԥшыҩцәа рхыԥхьаӡара рацәак арацәамра акоронавирус алаҵәаразы иҟоу ашәарҭара иадҳәалоуп.

Ацентртә алхратә комиссиеи ауааԥсыра акоронавирус рацәыхьчаразы Аиҳабырабжьаратә штаби алхыҩцәа рыбжьара авирустә инфекциа аҭыԥ амоуразы иахәҭаны иҟаз ауснагӡатәқәа зегь мҩаԥыргеит ҳәа иҳәеит Ҭамаз Гогьиа.

Алхырҭатә ҭыԥқәа рҿы адезинфекциақәа мҩаԥыргоит, амедицинатә касыш-ҿаршәқәа рзыршоит.

Аҟәа рыӡахра иалагеит уаҩы иҿаиршәуа акасыш ҿаҳәагақәа. Актәи апартиа, 1500 цыра алхрақәа рымш азы анаԥшыҩцәеи акомиссиақәа рлахәылацәеи рзы АКХ иаҭоуп.

Абжьыҭара инеиуа азин рыҭоуп рхатә ҩыгақәа рыманы инеирц. Авирустә чымазарақәа раԥырҟәҟәааразы акомиссиақәа рлахәылацәа аамҭа-аамҭала аҩыгақәа дрыцқьалоит.

Асиақәа абжьыҭара иалагаанӡа жәамш шыбжьоу ирхиан.

"Иҟоуп аҵыхәтәантәи алхрақәа раахыс зыԥсҭазаара иалҵыз. Ҳара Аиустициа аминистрраҟынтәи адыррақәа ҳауеит, аха аҭыԥ аҿы ариашарақәа мҩаԥаагоит", - иҳәеит Ҭамаз Гогьиа.

Москвеи Черқьесски алхрақәа рымҩаԥгаразы проблема ыҟаӡам ҳәа азгәеиҭеит Гогьиа.

Аԥсны АКХ аҿы аккредитациа рыҭоуп аҳәаанырцәтәи АИХқәа– НТВ, Россия 24, Россия Сегодня ҳәа лҳәеит АКХ апресс-маӡаныҟәгаҩ Елена Лабахәуаԥҳа.

Иара убас шәаԥхьар ҟалоит:

 

23
Атемақәа:
Аԥсны ахада иалхрақәа -2020 (124)