Аофициалтә еихшьалақәа ҟалаанӡа: алхрақәа рзы еилкаау

29
(ирҿыцуп 10:16 23.03.2020)
Аԥсны иацы ихыркәшахеит ахада иалхрақәа. Раԥхьатәи аофициалтә дыррақәа рылаҳәахоит иахьа, асааҭ 11:00 рзы. Аха иофициалтәым аихшьалақәа иаханатәгьы иҟаҵоуп.

Аԥсны ахада иалхрақәа рҿы абжьыҭара шымҩаԥысуаз, инықәырԥшу аихшьалақәа зеиԥшроу, акандидатцәа ирылоу аамысҭашәара уҳәа ртәы шәаԥхьарц ишәыдаагалоит Sputnik аматериал аҿы.

Актәи атур ала

Аԥсны алхратә ҭыԥқәа зегьы адыркит хәажәкыра 22, асааҭ 20:00 рзы. Алхратә комиссиа хада иаразнакала абжьқәа рыԥхьаӡара нап адыркит. Аха ус шакәугьы, раԥхьатәи аофициалтә дыррақәа Ҭамаз Гогьиа ишәылаҳҳәоит иҳәеит ашәахьа, асааҭ 11:00 рзы. Акандидатцәа рыштабқәа рҟынгьы абжьқәа рыԥхьаӡара иалагеит.

Раԥхьатәи иофициалтәым адыррақәа рыланаҳәеит Аслан Бжьаниа иштаб. Урҭ инарықәыршәаны, аоппозициатә блок аԥыза 59% рҟынӡа абжьқәа иоуит, ус анакәха актәи атур аҟны аиааира игоит.

Бжьаниа иштаб инықәырԥшу рдыррақәа рыла, Адгәыр Арӡынба 35% раҟара абжьқәа иоуит, Леонид Ӡаԥшьба – 2% инархыҳәҳәаны. Зегьы ирҿагыланы рыбжьы рҭиит 1%, даҽа 3% абиуллетенқәа ԥхасҭартәит.

Адгәыр Арӡынба иштаб аҟны уи аамҭазы макьана ҿырҭуамызт. Иофициалтәым абжьыԥхьаӡара ацашьа амонитор аҿы уахәаԥшыртә ицәырҵуамызт. Асистема иахароуп рҳәон.

Леонид Ӡаԥшьба иштаб алаҳәара ҟанаҵеит АКХ аофициалтә дыррақәа ирзыԥшуеит ҳәа. дара рхатә бжьыԥхьаӡара алҵшәақәа рыларымҳәеит.

Аидныҳәаларақәа

Раԥхьатәи инықәырԥшу аихшьалақәа анрыларҳәа Аслан Бжьаниа иштаб аҟны хыԥхьаӡара рацәала еизаз идгылаҩцәа акырӡа ргәы шьҭыҵит. Sputnik акорреспондент гәаартыла ишиарҳәахьаз ала, аҵыхәтәанынӡа агәҭынчымра рыман. Шьоукы-шьоукы аштаб аҿы иҟаз аибарххара афондтә биржаҟны ахәаахәҭрақәа анцо реибарххара иаҿдырԥшуан.

Асааҭ 22:30 рзы аштаб ахь дааит акандидат ихаҭа. Уи аамҭазы иара аиааира шигаз азы аӡәгьы агәҩара имамызт, аидныҳәалара иазыхиан. Аха зегь акоуп, макьанагьы ауаа рылаԥшқәа хан иофициалтәым абжьыԥхьӡара алҵшәақәа знылоз амонитор ахь.

Адгәыр Арӡынбагьы иштаб ахь дааит. Иара идгылаҩцәа иҭабуп ҳәа реиҳәеит иҟарҵоз ацхырааразы, анаҩс ихаҭа дшаҵахаз азхаҵауа, Аслан Бжьаниа иааира идиныҳәалеит.

Абри ашьҭахь Адгәыр Арӡынба иконкурент хада иштаб ахь амҩа дықәлеит, Бжьаниа хаҭалагьы ииааира идиныҳәаларц. Иара иҳәеит Бжьаниа ипрограммаҿы дызлацәажәоз агәҭакқәа зегьы нагӡахозар Арӡынба икомандагьы рыжәҩахыр аҭара ишазыхиоу.

"Ҳтәыла аҿаԥхьа еиқәылеит апроблемақәеи аусқәеи рацәаны, урҭ зегьы рыӡбара алшом аидгылара ҟамлакәа. Ҳгәы иҭоу зегьы наҳагӡаразы ана-ара игылоу ажәлар аӡәыкны еидкылатәуп, хәышықәса рышьҭахь Аԥсны зыхьӡаз ҳәа алҵшәа бзиақәа рыӡбахә ҳҳәартә азы", - ҳәа азгәеиҭеит Арӡынба.

Аслан Бжьаниа адныҳәаларазы иҭабуп ҳәа иаҳәо, раԥхьа иргыланы активла абжьыҭара зхы алазырхәыз Аԥсны жәлар иҭабуп ҳәа реиҳәеит.

"Ҳара ҳҿы иаҵахаз дҟалаӡом, избанзар хыԥхьаӡара рацәала иҳамоу апроблемақәа рыӡбаразы аԥышәа змоу ауаа рацәаны рџьабаа аҭахуп. Сара даара сақәгәыӷуеит ҳамч еидкыланы акыр шҳалшо", - иҳәеит Бжьаниа.

Иара иазгәеиҭеит убасгьы ишигәаламшәо абас акандидатцәа ианеидырныҳәалоз.

Аштаб аҟны иеизаз Аслан Бжьаниа идгылаҩцәа иҵегь акыраамҭа еимпуамызт. Ауаа еидныҳәалон, ркандидат ахада иалхрақәа рҿы иигаз аиааира иалагәырӷьон.

Алхрақәа шьақәгылеит

Алхрақәа иофициалтәу реихшьалақәа ртәы уҳәозар, макьаназы иҟоу ааишьазы адыррақәа роуп, дара урҭгьы ҵыхәтәантәиӡам. Алхратә комиссиа хада адыррақәа рыла, 18:00 сааҭ рзы ауаа рааира 58,85% артәон.

Алхратә ҭыԥқәа рахь инеит 77 573-ҩык алхыҩцәа. Абасала, ааишьа ахыԥхьаӡарала алхрақәа шьақәгылеит ҳәа иуԥхьаӡар ауеит. Реиҳа активра аазырԥшыз Гал араион шакәыз иаанхоит, иреиҵаӡоу абжьыҭара алкаауп Гагра араион аҟны.

Аԥсны апрокурор хада актәи ихаҭыԥуаҩ Дамеи Кәыҵниа АКХ Жәларбжьаратәи апресс-центр аҟны имҩаԥысыз абрифинг аҿы иазгәеиҭеит алхыҩцәа рыбжьыҭаратә зин аилагарақәа ыҟан ҳәа аинформациа шырмоуз. Аԥсны Аҩнуҵҟатәи аусқәа рминистр Раули Смыр иазгәеиҭеит алхрақәа раан џьарамзаракгьы зинеилагарак шыҟаҵамыз.

Жәларбжьаратәи анаԥшцәа ракәзаргьы, абжьыҭараан аилагарақәа ыҟаны ирымбеит ҳәа ахҳәаа ҟарҵеит. Аахыҵ Уаԥстәылантә аделегациа ахаҭарнакцәеи аилазаара "Адемократиеи амилаҭқәа рзини" аҳәынҭқарра-алахәцәа рпарламентбжьаратә ассамблеиа ахаҭарнакцәеи иазгәарҭеит абжьыҭара ишацыз азеиԥш гәалаҟара бзиа.

Иара убас шәаԥхьар ҟалоит:

29
Атемақәа:
Аԥсны ахада иалхрақәа -2020 (125)

Ажьиԥҳа аҭыԥантәи адепутатцәа рзы: рҵарагьы ыҟазароуп, аԥсшәагьы рдыруазароуп

5
Тҟәарчал араион алхратә комиссиа алахәыла Рита Ажьиԥҳа арадио Sputnik арубрика "Раионк аԥсҭазаараҟынтә" аҳәаақәа ирҭагӡаны аҭыԥантәи ахаланапхгараҭаратә усбарҭақәа рахь алхрақәа реихшьаала ҟалҵеит.
Раионк аԥсҭазаараҟынтә: Ажьиԥҳа ахаланапхгараҭарақәа рахь алхрақәа ирызкны

Аԥсны аҭыԥантәи ахаланапхгараҭарахь алхрақәа мҩаԥысит мшаԥы 11 рзы.

"Адепутатрахь иқәгылаз акандидатцәа ҩажәаҩык рахьынтә 15-ҩык алхын. Иманшәаланы еилагарада имҩаԥысит алхрақәа. 5196- ҩык ашәҟәы иҭагалаз алхыҩцәа рҟынтәи 2052 -ҩык алхрақәа рхы рыладырхәит. Уи аԥхьа иҟаз ас еиԥш алхрақәеи дареи еиҿурԥшуазар, усҟан 2800-ҩык ыҟан алхыҩцәа. Актәи аилатәара мҩаԥысраны иҟоуп иааиуа ашәахьаҽны мшаԥы 19 рзы. 15-ҩык адепутатцәа рахьынтә ҩыџьа аҳәса ыҟоуп. Уи аԥхьа иҟаз адепутатцәа рахьынтә ҩыџьа ықәгылан, руаӡәк ҩаԥхьа далырхит, уи Тҟәарчалтәи араионтә хәышәтәырҭа аиҳабы Лали Гаргәылиа лоуп", - лҳәеит Ажьиԥҳа.

Ажьиԥҳа лгәаанагара лҳәеит аҭыԥантәи ахаланапхгараҭарақәа рахь инеиуа адепутатцәа зеиԥшразар акәу.

5

Аԥсны Атәанчахәытә фонд аҿы ашәарақәа зеиԥҟьо атәы рҳәеит

3
(ирҿыцуп 20:14 14.04.2021)
Аԥсны Атәанчахәытә фонд Аԥсны атәылауаа рҿаԥхьа руал 55 миллион мааҭ ыҟоуп. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы.

АҞӘА, мшаԥы 14 - Sputnik. Аԥсуа тәанчахәқәа ршәара апандемиа аамҭа иахҟьеит, избанзар 2020 шықәсазы Атәанчахәытә фонд 130 миллион мааҭ амоуӡеит. Абри атәы радио Sputnik иазеиҭеиҳәеит Аԥсны Атәанчахәытә фонд ахантәаҩы Денис Гәылариа.

2020 шықәсазы акоммерциатә еиҿкаарақәа ашәахтәқәа рықәырхит апандемиа инадҳәаланы. Ари афонд ахь аԥаранашьҭра анырра анаҭеит.

Ахантәаҩы иажәақәа рыла Атәанчахәытә фонд ахь аԥара назмышьҭуаз акоммерциатә еиҿкаарақәа рымацара ракәым, аҳәынҭқарратә еиҿкаарақәагьы рыдҵақәа нарыгӡомызт.

Убас ауал ду ақәны иҟоуп АУН "Амшынеиқәафымцамч", иҳәеит Гәылариа.

"Аха дара ишьақәырӷәӷәоу аграфик ҳзаарышьҭит, ирҳәеит ЕгрыГЕС аусура ишалагалак Атәанчахәытә фонд ахь ахыԥхьаӡаларақәа ишрылаго", - иҳәеит Гәылариа.

Иахьазы реиҳа ауал ду зықәны иҟоу еиҿкаароуп АУН "Амшынеиқәафымцамч".

Ашәарақәа еиҵахоит иара убасгьы ареспубликаҿы аԥсуа тәанчахәы зауа рхыԥхьаӡара иацло иахьалагаз ҳәа иҳәоит Гәылариа.

2020 шықәса алагамҭаз ари ахыԥхьаӡара 6656-ҩык инаӡозар, шықәса анҵәамҭазы 8592-ҩык ҟалеит.

Иахьа Атәанчахәытә фонд аамҭа-аамҭала ашәарақәа мҩаԥнагоит. Аԥхьа иззыршәо категорианы иҟоу Аԥсны жәлар реибашьра аинвалидцәа роуп.

"56 миллион мааҭ ауал ҳақәуп. Ари хәажәкырамза иатәуп. Аха иара есыҽны еиҵахоит. Раион-раионла аԥарақәа ҳшәоит. Аибашьра иадҳәало акатегориақәа рҿаԥхьа Аҟәа, Аҟәа араион, Очамчыратәии Тҟәарчалтәии араионқәа рҟны ҳуал ҳшәеит, иаанханы иҟоуп Гагреи Гәылрыԥшьи араионқәа", - иҳәеит афонд ахантәаҩы.

Гәылариа иажәақәа рыла Афонд ахь аԥаралагалара адинамика аныԥшуа иалагеит. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы ҳәа иҳәоит иара.

3