Алхрақәа ртәыла…

108
(ирҿыцуп 14:01 28.03.2020)
Аԥсны аҳәынҭқарра ахада иҭоубашьҭаҵара ашьҭахь Жәлар реизарахь иҟаларан иҟоу алхрақәа рзы лгәаанагара лҳәоит Sputnik аколумнист Елеонора Коӷониаԥҳа.

"Ихыркәшоуп Аԥсны ахада иалхрақәа, оф, гәышьа" ааҳҳәоны, ицәырҵит аиааира згаз ирыдгылоз адепутатцәа анагӡаратә мчы ашҟа ицар, иҭацәуа адепутатцәа рҭыԥ азы алхарақәа рымҩаԥгара ишалаго азҵаатәы.

Ишаҳдыруа еиԥш, атәыла ахадас иалху Аслан Бжьаниа ддепутауп, иара убас, уи аԥыза-министрс зыӡбахә иҳәаз Александр Анқәабгьы ддепутатуп. Азакәан инақәыршәаны, дара рдепутаттә ҭыԥқәа ааныжьны анапхгарахь ианцалак ашьҭахь, АКХ алхрақәа аҽазыҟаҵара иалагароуп, избанзар Жәлар реизара адепутат истатус иазку азакәан 4-тәи ахәҭаҷ инақәыршәаны, иара азин имоуп заа инапынҵақәа рааныжьра.

Анаҩсан, Жәлар реизара ирыланаҳәоит иҭацәыз алхырҭатә ҭыԥқәа рҿы алхрақәа. Макьаназы, ҳара иаҳдыруа ҩ-ҭыԥк ҭацәыр шалшо ауп, аха ари алхратә кампаниаҿы еикәагьежьуаз адгылаҩцәа-адепутатцәа баша иааԥсарымызт, урҭ рахьтә ԥыҭҩык ачынтә портфельқәа раҿа ианылашт, убри аҟынтә, ҳгәы злазҩо ала, хәба, ма фба депутатә ҭыԥқәа ҭацәыр алшоит.

Иабаҳԥырхагоу ари? Акы, ҵыхәаԥҵәара змам алхрақәа ажәлар ршьара иқәнарҟьоит, насгьы афинанстә уадаҩрақәагьы ҳзаанагоит. 2019-тәи апрезиденттә алхрақәа Аԥсны абиуџьет аҟынтәи ирыхҭынҵан 15 миллион, уажәтәи аиҭалхрақәа ракәзар 8 миллионк рҟынӡа ныхуп. Иаҳҳәап, хәба-фба ҭыԥ рҿы аиҭалхрақәа аныҟала, миллионки аашә мааҭи рҟынӡа ахарџь аҭахуп. Ажәакала, акыр имаџьаноу ҳбиуџьет ҳахасуеит, даҽакала иаҳҳәозар, иҳамам аԥара аныхра ҳаҿуп.

Адепутат истатус ҭаҳҵаауазар, иамхра азин алхҩы имам, насгьы, уи ааныжьны чынуаҩра данцо азы далызхых рызҵаарагьы аҭахым. Абас иҟоуп иахьатәи ҳзакәан.

Ишыжәдыруа еиԥш, адепутатрахь акандидатцәа иалырхаанӡа, аҭыԥ аҿы инхо ауааԥсыра агәра ддыргоит, иалхырхыр, иреиӷьу азакәанқәа шрыдыркылало, уи ауаа рсоциалтә ԥсҭазаара анырра шанаҭо азы. Аамҭак азы, ауаажәларра ашәҟәқәа рыҩуан Жәлар реизара адепутат имоу альготқәа рӷьырак имхразы, иаҳҳәап имаҷым итәанчахәы, зыхә маҷым амашьына уҳәа "Адепутат истатус азы азакәан" 19-тәи ахәҭаҷ инаркны а-27–тәи аҟынӡа ашәахтәшәаҩцәа рыбзоурала изыԥҵәоу абзазарақәа.

Ари азакәан бзианы издыруа ибарҭоуп, ҳдепутат акыр дшыхьчоу, илакьысра шыҟамло, ацәгьара иургьы имандат аанкылара даара имариам акы акәны ишыҟоу азинхьчаратә усбарҭақәа рзы. Уи азы хара ицатәым, уаанӡатәи адепутат Нодик Кәыҵниа иҭоурых уи бзианы ишьақәнарӷәӷәоит.

Хыхь зыӡбахә сымаз ауаажәларра рышәҟәы Апарламент ашҟа ишышьҭызгьы, хаҵгылара дук амоуит, избанзар уи зыриашарц зыхәҭоу дара адепутатцәа роуп. Нас изҭахыда альготқәа мап рыцәкра? Акырынтә сазхәыцхьеит, Аԥсны Жлар реизара истатус иазку азакәан аҿы иалагалазарц, адепутат чынуаҩра ацара азин имызхуа ахәҭаҷ, избанзар аԥсҭазаара ишаҳнарбо ала, алхыҩцәа ргәыӷрақәа иреижьаны иаанхоит, иалырхыз ачынуаҩратә мардуан аҳаракырақәа рахь даҿалоит далызхыз зынӡагьы дырзымҵаақәа.

Абасала, апрезиденттә алхрақәа ҳрылгазаргьы, ҳаԥхьаҟа ишьҭоуп иҭацәу адепутаттә ҭыԥқәа рзы алхратә еиндаҭлара ҿыцқәа, ажәлар уи қьарс ирзалоузеи ҳамҳәозар.

Дырҩагьых абиуџьеттә ԥара ныхра, дырҩагьых аоппонентцәа реибаррахарақәа уҳәа, игәыԥҵәагаз алхрақәа ирыцҵахоит.

Автори аредкциеи ргәаанагарақәа еиқәымшәозар алшоит.

Иара убас шәаԥхьар ҟалоит:

108

COVID-19 злаз даҽа пациенткак лыԥсҭазаара далҵит Гәдоуҭатәи ахәышәтәырҭаҿы

14
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 15006-ҩык ыҟоуп, ргәы бзиахеит 14025-ҩык, рыԥсҭазаара иалҵит 226-ҩык.

АҞӘА, лаҵара 15 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 176-ҩык атестқәа рзыҟаҵан, урҭ рахьтә 22-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәышәтәырҭаҿы лаҵара 14 рзы лыԥсҭазаара далҵит 1939 шықәса рзы ииз акоронавирус злаз апациентка.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 51-ҩык, урҭ рахьтә 41-ҩык акоронавирус адиагноз рзышьақәыргылоуп, рҭагылазаашьа бааԥсуп 28-ҩык, ибжьаратәуп - 12-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 31-ҩык апациентцәа, рҭагылазаашьа бааԥсуп хәҩык. Очамчыра ирхәышәтәуеит 16-ҩык, Гагратәи ахәышәтәырҭаҿы - 17-ҩык, Тҟәарчалтәи ахәышәтәырҭаҿы - ԥшьҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

14
Атемақәа:
Аҿкычымазара – акоронавирус Аԥсни адунеи аҿи: иалкаау

Едуард Быҭәба Гәдоуҭатәи ахәышәтәырҭа даҭааны аусушьа гәеиҭеит

8
(ирҿыцуп 19:59 15.05.2021)
Едуард Быҭәба Аԥсны агәабзиарахьчара аминистрс дҟаҵан аҩаша лаҵара 11 рзы Аԥсны Аҳәынҭқарра ахада иусԥҟа инақәыршәаны.

АҞӘА, лаҵара 15 – Sputnik. Аԥсны агәабзиарахьчара аминистр Едуард Быҭәба Гәдоуҭатәи араионтә хәышәтәырҭа хада даҭааит ахәаша лаҵара 14 рзы ҳәа аҳәоит Аԥсуа телехәаԥшра адырраҭара.

Иара игәеиҭеит ахәышәтәырҭа ашҭаҿы игылоу акоронавирус азы анализқәа ахьрыдыркыло аҭыԥ, адкыларҭа, апалатақәа. Ахәышәтәырҭа аусзуҩцәа аминистр изеиҭарҳәеит акоронавирустә инфекциа злоу апациентцәа, убарҭ рхыԥхьаӡараҿы COVID-19 адиагноз ззықәыргылоу зцәазтәым аҳәсагьы, рыхәышәтәра шеиҿкаау.

Быҭәба иара убас игәеиҭеит аҵәыҵәри анашьҭразы еиқәыршәоу астанциа, уантәи ауп аковид-госпиталь апалатақәа рахь аҵәыҵәри зланеиуа. Игәеиҭеит аҳауеиҭарсра асистема шыҟам, уи азҵаара шыӡбатәугьы азгәеиҭеит.

Иҷыдоу ахыхьчага маҭәа ишәҵаны аминистр "азона ҟаԥшь" ахь днеит, хаҭала апациентцәа рҭагылазаашьа ибарц, драцәажәарц азы. Иара дразҵаауан иаҭаху зегьы рымоу ирымаму, иаарласны ргәабзиара шьақәгыларц рзеиӷьеишьеит.

"Анцәа иҳәааит иаарласны шәгәы бзиахо, уи ауп зегь реиҳа ихадоу. Шәҭаацәа рахь ԥшӡала шәхынҳәааит. Ҳара, ҳколлегацәа, аҳақьымцәа, ҳашәзыӡырҩлоит, ишәҭаху аҿы ҳшәывагылоит", - иҳәеит аминистр.

Аԥсуа телехәаԥшра анҵамҭаҿы иара убас иарбоуп Едуард Быҭәба амедицинатә усзуҩцәа рџьабаазы иҭабуп ҳәа шреиҳәаз, агоспитальгьы лассы-лассы даҭаалоит ҳәа ажәа шриҭаз, аҳақьымцәеи ахәышәтәырҭа анапхгареи иареи аусутә еиԥыларақәа мҩаԥаагалоит ҳәа шиҳәаз.

Гәдоуҭатәи араионтә хәышәтәырҭа аҳақьым хада Ҳаџьараҭ Шамба лаҵара 14 рзы иҟаиҵаз адыррала, аковид-госпиталь аҿы ишьҭоуп акоронавирустә инфекциа злоу апациентцәа 38-ҩык, урҭ рахьтә 16-ҩык рҭагылазаашьа бааԥсуп. Иара убас ара ареабилитациа иахысуеит COVID-19 иаиааихьоу 11-ҩык апациентцәа.

Аԥсуа телехәаԥшра аматериал аҿы иара убас иазгәаҭоуп агәабзиарахьчара аминистр атәыла амедусҳәарҭақәа зегьы дырҭааны рҭагылазаашьа гәеиҭарц игәы ишҭоу.

Аԥсны Аҳәынҭқарра ахада иусԥҟа инақәыршәаны Едуард Быҭәба Аԥсны агәабзиарахьчара аминистрс дҟаҵан аҩаша лаҵара 11 рзы. Иара диԥсахит зхатәгәаԥахарала змаҵура аанзыжьыз Ҭамаз Ҵахнакьиа.

8
Атемақәа:
Аҿкычымазара – акоронавирус Аԥсни адунеи аҿи: иалкаау