Асанитартә ҳақьым хада Лиудмила Скорик Аԥсны ауааԥсыра рахь ааԥхьара ҟалҵеит

19
(ирҿыцуп 19:23 18.05.2020)
Ареспублика СЕС адыррақәа рыла, 2020 шықәса мшаԥымзаахыс акоронавирустә инфекциа Аԥсны 21-ҩык ироухьеит.

АҞӘА, лаҵара 18 – Sputnik, Бадри Есиава. Ареспублика асанитартә ҳақьым хада Лиудмила Скорик Аԥсны ауааԥсыра рахь ааԥхьара ҟалҵеит аҽыԥхьакра арежим еилазго рзы Агәабзиарахьчара аминистрра аҭел ҷыдахь адырра ҟарҵаларц.

Лара лажәақәа рыла, ари аҭахуп аҳәаа иахысуа зегь ргәаҭара шымҩаԥысуагьы ртәылауаҩшәҟәы иану аҭыӡҭыԥ аҿы инымхозар ахьауазы.

"Ҳара атәылауаҩшәҟәы адыррақәа ҳарҭоит, аха ауаҩы уа днымхозар ауеит. Зыхдырра ҳараку ауаа иҟоу аҭагылазаашьазы адырра ҳарҭар, ҳус еиҳа идырманшәалоит", - лҳәоит Скорик.

Иаку аинырратә центр аҭел: 0303, ақалақьтә номерқәа рыла иасуа рзы: +7 940 789 03 03.

Лара илҳәеит аҟәатәи аҭаацәара зныруаз зегьы шьақәыргылахаанӡа аепидемиологиатә ҭагылазаашьа уашәшәыроуп ҳәа.

Скорик далацәажәеит иахәҭоу ашәарҭадаратә хымҩаԥгашьа шхымԥадатәиу, асабрадақәа, анапҭарԥақәа рныҟәгара, анапқәа рырзҩыдара.

"Уажәы асабрадақәа рныҟәгара хымԥада иаҭахуп. Асанитар-епидемиологиатә маҵзура аусура иаҿуп аҭаацәа зныруаз рышьақәыргыларазы. Иахьатәи аамҭазы ареспублика аҩнуҵҟа 21-ҩык ачымазцәа ҟалахьеит", - азгәалҭеит Скорик.

Акарантин ааларгалазар аҽыԥхьакра арежим иахысхьеит 800-ҩык.

Скорик илҳәеит СЕС аҟазауааи Аԥсны ААР аусуҩцәеи рҽеимаданы Аԥсныҟа иҭало ауаа аҳәааҿы ирырҭо аинформациа аиашара шгәарҭо.

Скорик иара убасгьы илҳәеит пациентцыԥхьаӡа рыхәышәтәра ахатә ҟазшьақәа шамоу. Џьоукы рзы ари ачымазара аҽарыцәгьаӡом, иаҳҳәап аҩныҟа ихынҳәыз акурсантцәа рзеиԥш. авирус акыр ишәарҭоуп зықәра нықәсхьоу ауаа ачымазарақәа зцәа иалоу ауааи рзы. Зегь неибеиԥшны ирхәышәтәуеит ҳәа аҳәара зынӡа ииашам ҳәа лҳәоит аҳақьым.

Лаҵара 17 азтәи аоперштаб адыррақәа рыла COVID-19 зыхьыз рыхәҭак Урыстәылантәи иааз аԥсуа студентцәа роуп, даҽаӡәы - Даӷьсҭанынтәи иааз Абыжьбатәи аурыс база аррамаҵзурауаҩ иоуп, уи ашьҭахь акоронавирус рыхьит ҳәа ирылаҳәаз ҩыџьа Москвантәи иааз Бамбора инхо атәылауаа роуп, аҵыхәтәаны акоронавирус злаҽыз хҩык Аҟәа иқәынхо Шәачантәи иааз ҭаацәарак роуп.

Мшаԥымзазы Аԥсны акоронавирус рыдбалан хҩык Гагра ақалақьуаа. Ҩыџьа ргәы бзиахеит, 1925 шықәсазы ииз ахԥатәи ачымазаҩ лыԥсҭазаара далҵит.

Агәабзиарахьчара аминистрра лаҵара 16 азтәи адыррақәа рыла Гәдоуҭатәи ахәышәтәырҭаҟынтәи акурсантцәа руаӡәк дҭырҩааит.

Лаҵара 17 рзы акоронавирус азы атестқәа ирхысит 73-ҩык. Игәарҭаз ауаа ахьырацәоу инамаданы адыррақәа ҟалоит ашәахьаҽны иалагӡаны.

Мшаԥымза инаркны лаҵара 18 рҟынӡа Аԥсны имҩаԥгоуп 730 тест акоронавирус агәаҭаразы.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

19
Атемақәа:
Ачымазара ҿкы – акоронавирус Аԥсни адунеи аҿи: иалкаау (461)

Шларба Сергеи Багаԥшь изы: ҳиқәгәыӷуан, иаҭаххаргьы, абџьар кны дышҳавагылоз ҳдыруан

3
Жәшықәса раԥхьа идунеи иԥсахит Аԥсны аҩбатәи ахада Сергеи Багаԥшь. Иара ихатәы хьчаҩы Рустам Шларба арадио Sputnik аефир аҿы Сергеи Багаԥшь идҳәалоу игәалашәарақәа ртәы еиҭеиҳәеит.
Шларба Сергеи Багаԥшь изы: ҳиқәгәыӷуан, иаҭаххаргьы, абџьар кны дышҳавагылоз ҳдыруан

"Асҟак аамҭа ҵит ҳәа сызҳәом, ҳала дыхгылоуп иахьеи-уахеи. Иҭеиҭыԥш шыҟаз акәын игәаҭагьы шыҟаз, уи Аԥсны анҭыҵгьы деицгәарҭахьан. Иара иҷкәынцәа реиԥш, иашьцәа аиҵбацәа реиԥш пату ҳаиқәиҵон. Аашықәса инеиԥынкыланы есыҽны иара ҳицын. Ари аамҭа иалагӡаны иҟан ацәгьагьы, абзиагьы, алаф зцыз ахҭысқәагьы. Убри аҟынӡа ҳаишьцылахьан, ауаҩы илакҭа ҳхыԥшылан ииҭаху ҳдыруа аҟынӡа ҳаилаҵәахьан. Ҳала дынхыԥшылалак, иаразнак иаҳдыруан ииҭахыз", - ҳәа азгәеиҭеит Шларба.

Рустам Шларба иҳәеит џьара цәгьарак ҟаларгьы, Сергеи Багаԥшь ишиқәгәыӷуаз, иаҭаххаргьы, абџьар кны дышрывагылозгьы.

"Ахьыԥшымра ҳауаанӡа лымҳаҭасла иҳаҳаит Аԥсны гәыԥк алалеит, ҭаацәаныла атәыла ахада дықәызхыр зҭаху ҳәа. Џьгьарда ҳаҟан уи аамҭазы. Иара даасыԥхьеит аҩны аҩнуҵҟа. Ауаџьаҟ аԥхьа дтәаны атапанча арыцқьара даҿын. "Шәгәышәҽаныз, ҳаит рҳәар, ахәыҷқәеи аҳәсеи лбаажәг, ҳара ара ҳаивагылоит. Шәара ахы шәаҿаргылан, шәкажьны џьаргьы сцаӡом", - ҳәа ҿааиҭит. Ҳара даара ҳиқәгәыӷуан иара, аха уи ажәала иансаҳа, убасҟак сгәырӷьеит, иара аҷкәынцәагьы ианраҳа, ргәы ааҭгәырӷьааит. Зыӡбахә ыҟаз аҭагылазаашьа ҟалазҭгьы, дҳавагылан, иирыцқьоз абџьар ахы шыҭирҟьоз ҳдыруан", - ҳәа игәалаиршәеит Шларба.

Иаҳа инеиҵыху аиҿцәажәара шәазыӡырҩы аудио аҿы, мамзаргьы арадио Sputnik Аԥсны аефир аҿы.

Иара убас шәаԥхьар ҟалоит:

3

Саида Быҭәԥҳа ахада Иусбарҭа анапхгаҩы ихаҭыԥуаҩыс дҟаҵоуп

10
Уаанӡа, лаҵара 12 рзы ахада Иусбарҭа анапхгаҩы ихаҭыԥуаҩыс дҟаҵан афинансқәа рминистр Џьансыхә Нанба.

АҞӘА, лаҵара 29 - Sputnik. Саида Быҭәԥҳа ахада Иусбарҭа анапхгаҩы ихаҭыԥуаҩыс дҟаҵоуп ҳәа аанацҳауеит ахада иофициалтә саит.

Абри азы аусԥҟа инапы аҵаиҩит Аслан Бжьаниа лаҵара 28 рзы.

Аԥсны ахада Иусбарҭа анапхгаҩыс дыҟоуп Алхас Кәыҵниа.

Саида Быҭәԥҳа 2009 шықәса раахыс Аԥснытәи аҳәынҭқарратә университет азиндырратә факультет аҟны административтә зин рылҭоит. Иара убасгьы Аҟәатәи иаарту аинститут аҿы аус луеит.

Аус луан Адыга Хасэ аҳәынҭеилакы аппарат аҿы, Ареспублика Адыгеиа иҟаз Аԥсны Аҳәынҭқарра Ахаҭарнакраҿы, Аԥсны Ашәарҭадаратә маҵзураҿы.

Аԥсны ахада иеиҭалхрақәа мҩаԥган хәажәкыра 22 рзы. Ахадарахьы иқәгылан хҩык акандидатцәа - аоппозициатә блок аиҳабы Аслан Бжьаниа, апартиа "Акзаара" ахантәаҩы Леонид Ӡаԥшьба, Аԥсны аекономика аминистр Адгәыр Арӡынба.

Аслан Бжьаниа аиааира игеит, уи изы рыбжьы арҭеит 56,5% алхыҩцәа. Ахада ҿыц иҭоубашьҭаҵара ацеремониа мҩаԥысит мшаԥы 23 рзы.

Иара убас шәаԥхьар ҟалоит:

10