Ирахәымшхарц азы ирӡатәуан: Ашьа Дбарԥҳа-Жьиба ажә шырныҳәоз еиҭалҳәеит

588
(ирҿыцуп 10:23 24.05.2020)
Ажәытәан, аԥсуаа арахә рыдларц азы аныҳәарақәа мҩаԥыргон. Шықәсык аҟынӡа зхыҵуаз ажәҵыс рӡатәуан, ианхьалак ахш агьама рбаанӡа еиҭаныҳәон. Абарҭ акәамаҵамақәа ртәы ҳзеиҭалҳәеит Лӡаа ақыҭан инхо, 84 шықәса зхыҵуа, иахьагьы арҭ ақьабзқәа ныҟәызго Ашьа Дбарԥҳа–Жьиба.

Саида Жьиԥҳа, Sputnik

Аԥсуаа лымкаала арахә-ашәахә пату рзақәын. Имшны ирыдларц азы еиуеиԥшым аныҳәарақәа мҩаԥыргон. Зегь раасҭа ихадараны иԥхьаӡан аӡатәра.

"Шықәсыканӡа инеихьеит ҳәа иԥхьаӡаз, аԥшәмацәа ирымаз, мамзаргьы ҿыц ирыднагалаз аҿша рӡатәуан. Уи ахатәы кәамаҵамақәа аман. Аҩнԥҳәыс ашьыжь шаанӡа дгыланы ача лкәаҳауан, амажәа анымазеихалак, ашә агәылаҵаны лнапала ихаргьежьааны илӡуан. Адәахьы идәылылгоз аишәа хәыҷ иқәлыргылон аҩы цқьагьы. Ақьафынцқьа зыӷраз, ацәацқьа иалхыз ацәымза ҟаҵаны, ажә ныҳәаны илбылуан. Аӡатәра мҩаԥылгонаҵы, ажәҵыс ахәда ирымкыц ампахьшьы шкәакәа хылшьуан. Аҵыхәтәаны алымҳа ақәцә, уажәшьҭа иӡатәуп ҳәа идырҟьон", - еиҭалҳәоит аԥҳәыс бырг Ашьа Дбарԥҳа–Жьиба.

Аӡатәра иаанагоз, аԥхьаҟа ажә аҿша ариир, ирахәымшны аԥшәмацәа ирыдло, иаҭаххар инырҵо, мамзаргьы ашҭа иҭырго, ацәҵыс ариир - уи аӡәы имҭакәа, ишынҭаацәоу ҳазшаз иашьаԥкны, ишьны дара ишырӡатәхәхо акәын. Ари аныҳәара ҷыдарас иамоу, знык уалагазар, ааныжьра ахьыҟамло ауп. Убри аҟнытә иззынамгӡо даламгароуп.

© Foto / предоставлено Саидой Жиба
Аӡатәра иазку ажә

Ажә ҿыц ианхьалак, аԥсуаа ахш цқьахеит ҳәа ахԥатәи амш аҽны иныҳәаны акәын анаҩс ахшлых агьама абара ианалагоз.

"Аҩнԥҳәыс ашьыжь ицқьахаз ахш ала аманка қашь луеит. Ажәытәӡан ашыла иалырхуан, ачуан хәыҷ аԥсуа мца иахаргыланы. Ианааилашлак амшьҭа уҟәыҭхазааит ҳәа кәицқәак аладыршәуан. Иахьа агаз аҿы изуа, асԥычка ицқьоу аган былны иаларҵоит. Ашьҭахь ажә ныҳәаны, ақашь агьама лбоит, лара лаамышьҭахь иҿыхогьы ирҿалҵоит. Алаԥшцәгьа иацәылхьчоит ҳәа ажә аҵыхәеи, атәыҩеи ацаха ҟаԥшь алыркуеит, аӷаацгьы ахәда иакәлыршоит", - арахә шырныҳәоз далацәажәоит аԥҳәыс бырг.

Ҿыц ихьаз ажә иатәу ахшаалыҵқәа 40 мшы аҩны идәылугар ҟалаӡом. Насгьы ахшхырҵәы аџьыкҵәаҵәа акьурсыр ҵасымызт.

Ажәытәуаа разгәаҭарақәа даара аинтерес рыҵоуп, раԥхьа агәра узымгозаргьы, наҟ-наҟ зегь акоуп ишҵабыргу еилукаауеит.

Ажә анхьалак, аԥшәма раԥхьаӡакәны аӷаац ԥшқа баны, ибжьы ҭыганы, дгәырӷьо ицәаныррақәа ааирԥшыр, уи алеишәа бааԥсхоит рҳәоит. Ус шакәу хаҭала агәра згахьеит. Ҳан лгәырӷьабжь амшала, ҳаныхәыҷқәаз ҳацәҵыс ашҭа ҳҭанаҵомызт, иҩуа иҳашьҭалон.

Ашьа Дбарԥҳа–Жьиба илҳәеит, арахә ӷәӷәала алаԥш шраахо, аиҳарак ҿыц ихьаз ажә.

"Ажә ачыргә дуны ианырбалак, дхаҵоума, дыԥҳәысума, дара ирҭахымзаргьы рылаԥш аахар ауеит. Усҟан, ажә ахш маҷны иамҵуеит, аҳәыс аҵнацоит, ма аԥшәма ааигәара днанашьҭуам ҳәа иҵыгьуа иалагоит. Абарҭ зегьы, амшьҭа иҟанаҵеит ҳәа, аҭәҳәаҩы илышьҭалоит. Ианаамҭоу уацхраар, арахә шьақәгылоит. Хырҩа аумҭар иудлаӡом, иумоугьы умпыҵыӡӡаауеит", - лажәа иацылҵоит лара.

Иахьа, ас еиԥш иҟоу акәамаҵамақәа азгәазҭо аҳәса зынӡа имаҷҩуп. Ажә анхьалак, ахш цқьахеит ҳәа џьоукы ныҳәозаргьы, аӡатәра рхашҭхьеит уҳәар алшоит.

"Иаҳзымдыруа ҳаҭаимҵааит, ҳгаӡара ҳахимырҟьааит" ҳәауа, аԥҳәыс бырг Ашьа Дбарԥҳа–Жьиба икаҳажьуа ҳҵасқәеи ҳқьабзқәеи дрызхьаауеит.

Иара убас шәаԥхьар ҟалоит:

588
Абессалом Кварчия

Кәарҷиа: алхыҩ иазыҟаҵара хьысҳауп

4
Ауаажәларратә палата алахәыла Абессалом Кәарҷиа арадио Sputnik аефир аҟны игәаанагара иҳәеит алхыҩ изы иахьынӡахәарҭоу адепутатрахь акандидатцәа телехәаԥшрала рықәгылара.

Аԥсны Жәлар Реизарахь алхрақәа мҩаԥысуеит алхратә ҭыԥ хадақәа ԥшьба рҿы: Кындыӷтәи, Гәдоуҭатәи, Бзыԥтәи, Оҭҳаратәи.

Кындыӷтәи алхратә ҭыԥ хада №31 аҟнытә Жәлар Реизара адепутатрахь кандидатцәас иқәгылоуп: Аидар Кәыҵниа, Гарри Кокаиа, Џьансыхә Адлеиба; Гәдоуҭатәи алхратә ҭыԥ хада №18 ала - Асҭамыр Ахбеи Алхас Ҳагбеи; Бзыԥтәи алхратә ҭыԥ хада № 10 ала – Ҭамаз Леибеи, Ҭемыр Беиеи; Оҭҳаратәи алхратә ҭыԥ хада №14 аҟнытә Жәлар Реизара адепутатрахь кандидатцәас иқәгылоуп Робесҭан Габлиеи Алмасхан Барцыци.

Алхратә комиссиа хада имҩаԥнагаз аҵәҭаԥсарала адепутатрахь акандидатцәа Аԥсуа телехәаԥшраҟны аефиртә аамҭа рызшоуп. Бзыԥтәи алхратә ҭыԥ хада №10 ала адепутатрахь акандидатцәа Ҭамаз Леибеи, Ҭемыр Беиеи аефир аҟны иҟалоит уаха, ԥхынгәы 6 рзы.

 

Кәарҷиа ателедебатқәа рзы: заанаҵы ибжьы зиҭо здыруа алхыҩ изы иҵакыдоуп

"Ауаҩы уала-ҭахыла, мамзаргьы аиҳабыра идгылоума, ицхраауама, ҳара даҳтәума, егьырҭ дыртәума ҳәа ихәыцны далзхуа изы егьа теледебат ҟауҵаргьы, иара изы зегь дара роуп. Уи ателехәаԥшраҟны иибо спектакльк еиԥш дазыӡырҩуеит, аха игәы иҭеикыз, изиҭараны дыҟоу ибжьы ииҭоит. Ибжьы зиҭо ззымдыруа аӡәыр дыҟазар, Апарламент ахь днеир абри ихаҿсахьа зеиԥшрахои ҳәа ихәыцуа ауаҩы изы ибзиоуп, ихадоуп телехәаԥшрала иибо, аха иҟоуп ауаҩы иаразнакгьы иеилкаара анымариам. Убри аганахьала сгәаанагарала Алхратә комиссиа хада ахымҩаԥгашьа хәыҷык ихьысҳауп ҳәа ажәлар разыҟаҵаразы. Дара ирҳәароуп алхрақәа шус хадоу, абжьыҭара уала-ҭахыла акәымкәа ишазнеитәу ауаа азыҟаҵалатәуп есымша. Ауаа иахьа хәыҷык иҟьалашәа иҟоуп, рыбжьы зырҭара дрыздыруам, џьоукы-џьоук хьаасгьы ирымам, "иаҳнаҭеи Апарламент" зҳәогьы ыҟоуп. Абжьыҭарахь имнеиз ауаа рхыԥхьаӡара анырацәахалак, уи иаанагоит урҭ разыҟаҵара зыхәҭаз ауаа ажәлар рҟынӡа ишахәҭаз ирызнамгаӡеит ҳәа", - азгәеиҭеит Кәарҷиа.

 

Аԥсны Алхратә комиссиа хада иҭацәыз адепутаттә ҭыԥқәа рахь ԥхынгәы 12 рзы алхрақәа рымҩаԥгара ҿҳәарас ишьақәнаргылеит.

Азакәанԥҵаратә мчраҿы амандатқәа ԥшьба ҭацәуп - уаанӡа депутатцәас иҟаз атәыла ахада Аслан Бжьаниа, аԥыза-министр Александр Анқәаб, Аҩнуҵҟатәи аусқәа рминистр Дмитри Дбар, Гагра араион ахада инапынҵақәа назыгӡо Иури Хагәышь рҭыԥқәа.

Инеиҵыху анҵамҭа шәаҳар шәылшоит арадио Sputnik Аԥсны аефир аҟны.

Иара убас шәаԥхьар ҟалоит:

4

Пицунда амҩатә машәыр аҭыԥ аман

24
Пицундатәи амҩаҿы ашьыжь асааҭ 4:20 рзы автомашьына Toyota Сrown аԥсҟы зкыз имч ақәымхазт, имҩа дахҟьаны аҵла даахеит.

АҞӘА, ԥхынгәы 6 - Sputnik. Ҩыџьа ауаа амҩатә машәыр иахҟьаны рыԥсҭазаара иалҵит ҳәа аанацҳауеит Апрокуратура хада апресс-маҵзура.

"1991 шықәса рзы ииз Агәмаа Ремиз зыԥсҟы икыз амҩа атранспорттә хархәага Toyota Сrown имч ақәымхакәа, амҩа даныҵны аҵла даахеит. Агәмаа Ремизи ипассаџььыр Агрба Алхаси аҭыԥ аҟны рыԥсҭазаара иалҵит", - ҳәа аанацҳауеит Апрокуратура хада апресс-маҵзура.

Ахҭыс инамаданы аусҭҵаара мҩаԥысуеит.

24

Уахыки-ҽнаки рыла Урыстәыла 6611-ҩык COVID-19 рыдбалан

1
ВОЗ астатистика инақәыршәаны адунеи аҿы 11 миллионҩык авирус рыман, 528 нызқьҩык рыԥсҭазаара иалҵит. Ачымазара рылаҵәоуп еиҳарак ЕАА, Бразилиа, Индиа, Урыстәыла.

АҞӘА, ԥхынгәы 6 - Sputnik. Иаҳхысыз уахыки-ҽнаки рыла Урыстәыла 6611-ҩык COVID-19 рыдбалан, 135-ҩык рыԥсҭазаара иалҵит, 3579-ҩык ргәабзиара шьақәгылеит ҳәа аанацҳауеит апортал стопкоронавирус.рф.

Аиҳарак ачымазара змоу рацәоуп Москва (685), Подмосковье (292), Ханти Манцызтә Автономтә Округ (289), 280 – Санкт-Петербург, 270 — Свердловск, 239 — Иркутсктәи аобласт.

Зынӡа атәылаҿы иазгәаҭоуп 687 862-ҩык COVID-19 змоу, урҭ рҟынтәи 454 329-ҩык ргәы бзиахахьеит, 10 296-ҩык рыԥсҭазаара иалҵит.

Аԥсны ауааԥсыра коронавирус рацәыхьчаразы аштаб адыррала ареспубликаҿ 38 чымазара-хҭыс ыҟан, хҩык Гәдоуҭатәи ахәышәтәырҭа иҭоуп, 34-ҩык ргәы бзиахеит, аӡәы – лыԥсҭазаара далҵит.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

 

1