Камера

Аԥсуа продиусер дызлахәу асериал маҷ Урыстәыла аԥхьахә аиуит

16
(ирҿыцуп 09:42 03.06.2020)
Асериал маҷ "Батальон" ҭыхын акиностудиа "Кит" аҟны ателеканал НТВ иҟанаҵаз аҿаҵала 2018 шықәса рзы. Асериал аԥхьарбара мҩаԥысит рашәара 9, 2019 шықәса рзы.

АҞӘА, рашәара 3 - Sputnik. Анагӡаратә продиусерс Аинар Лабахәуа дызмоу асериал "Батальон" Урыстәыла акинои ателехәаԥшреи Рассоциациа аԥхьахә аиуит аноминациа "Иреиӷьу асериал маҷ" азы.

Лабахәуа иажәақәа рыла, ԥшь-сериак иҟоу акиносахьа Иугославиа 1999 шықәсазы аҭыԥ змаз ахҭыс атәы еиҭанаҳәоит – Босниеи Герцоговинеи игылаз Жәларбжьаратәи аҭынчеиҿкааратә контингент иалаз Урыстәыла арратә мчрақәа рыҩныҵҟатә ар Приштина ақалақь ахь риагара, аҳаиртә баӷәаза "Слатина" ахылаԥшра аҭаразы.

"Ари аҭоурых еиҭанаҳәо 200-ҩык урыстәылатәи адесантникцәа НАТО ар зегьы рҿагылара шрықәшәаз ауп. Аҭоурых акыр иинтересуп. Сгәы иаанагоит ҳара иҳалшеит ҳәа урҭ аамҭақәа инарҵауланы раарԥшра. Ззынӡа абри аноминациаҿ иқәгылан асериалқәа хԥа. Иҟалап, аиааира иақәымгәыӷуаз ыҟазаргьы, аха сара хымԥада агәрагара сыман", - ҳәа иҳәеит иара.

Акиносахьа аҭыхрақәа мҩаԥысуан 2018 шықәса рзы мызки бжаки инарыцны Адыгатәыла, Маиҟәаԥтәи аҳаиртә баӷәазаҿи Каменномостск аҳаблаҿи.

"Аԥхьанатә ҳара Аԥсны аҭыхрақәа мҩаԥаагап ҳәа акәын. Аиԥшрақәа рацәан. Арежиссиори асахьаҭыхҩи гәырӷьан иԥсуан, аха 2018 шықәса рзы Урыстәыла ашьапылампыл азы Адунеи ачемпионат мҩаԥысуан. Аԥкырақәа ыҟан. Убри азы аҭыхрақәа Адыгатәылаҟа ииаагеит", - ҳәа еиҭеиҳәоит Лабахәуа.

Апродиусер қәыԥш изы асериал "Батальон" аԥшьбатәи проектуп.

"Сара аҭакԥхықәра сыдын абиуџьет азы, апроект ахаҭабзиаразы, аҭыхратә гәыԥ аҭагылазаашьа бзиа азеиҿкааразы. Акино аҿы аусура акыр аинтерес аҵоуп. Уаланахалоит. Ҳәарада, аҭакԥхықәрагьы дууп, аха агәахәара дугьы унаҭоит", - ҳәа иҳәоит иара.

Асериал аҭыхра иалахәын актиорцәа: Максим Шьчеголев, Дмитри Улианов, Александр Бухаров, Михаил Бабичев, Полина Иастребова, Андреи Стоианов. Арежиссер - Алексеи Быстрицки, асахьаҭыхыҩ - Игор Топчениук. Асериал ахәаԥшра алшоит интернет ала, YouTube аплатформаҿгьы.

Иара убас шәаԥхьар ҟалоит:

16
Верующие во время празднования дня Крещения Христова у источника Святого Василиска возле села Каман в Республике Абхазия

Аԥсны ауахәамақәа рыҟны Иаса Қьырса Иӡаахра иазку амҵаныҳәара мҩаԥыргоит

5
(ирҿыцуп 10:21 17.01.2021)
Иаса Қьырса Иӡаахра азгәарҭоит ажьырныҳәа 19 рзы. Аныҳәа азкуп Назареҭтәи Иаса Қьырса Иордан аӡы аҟны иӡаахра. Қьырса динаҭит Иоанн Анцәаиажәаҳәаҩ. Арҭ амшқәа рзы ауахәамақәа рҟны имҩаԥысуа аныҳәарақәа Аӡаахра иадҳәалоуп.

АҞӘА, ажьырныҳәа 17-Sputnik. Аиашахаҵаратә қьырсианра иаҵанакуа ауахәамақәа рҟны имҩаԥгахоит Иаса Қьырса Иӡаахра иазку анцәа имҵаныҳәара, абри атәы иҳәеит Аԥсны Аиашахаҵаратә уахәама аиҳабы аб Виссарион (Аԥлиа).

Арҭ амшқәа рзы ауахәамақәа рҟны имҩаԥысуа аныҳәарақәа Аӡаахра иадҳәалоуп. Ажәытәан Иаса Қьырса иирагьы иӡӡаахрагьы мышкы иазгәарҭон. Иара ихазы аҽӡаахра ԥсыхәа амамкәан иҟамызт. Аӡы иҽӡааихит, иҽҭишьит, уи ала адунеи аӡқәа зегьы ррыцқьаразы. Ари аныҳәазы ишыхьҭоугьы, изылшо, згәы иаҭаху аӡы иҭалоит ҩнуҵҟалагьы, цәеижьлагьы аҽрыцқьаразы.

Қьырса ныҳәа инаркны Аӡаахра аҟынӡа (ажьырныҳәа 7 инаркны 19-нӡа) иԥшьоу, ицқьоу амшқәа ҳәа ирышьҭоуп. Аныҳәа мышкы шыбжьоу чгара мшуп.

Аҽӡаахра амшныҳәаз Анцәа дхазҵо иргәаладыршәоит 30 шықәса ирҭагылаз Иаса Қьырса Галилеинтәи аӡиас Иордан ашҟа дышнеиз иҽӡааихырц азы. Иара аӡы данҭыҵуаз адунеи зегьы ирбарҭахеит Анцәа-Аб, Анцәа-Аԥа, аҳәыҳә асахьа зманы Иаса Қьырса ижәҩахыр иқәтәаз Анцәа-Иԥшьоу идоуҳа.

Аӡаахра амшныҳәа ақьырсианцәа иазгәарҭо иалагеит апостолтә аамҭақәа рзы. Ажәытәан Қьырсеи Анцәаибареи мышкны иҟан, аха аамҭақәак рыла ауахәама урҭ аныҳәақәа еиднагеит. Есышықәса Аӡаахра амш аҽни аухеи аиашахаҵаратә уахәамақәа рҟны аҵак дуӡӡа змоу аӡыԥшьара мҩаԥыргоит.

5
Линии электропередач

Аҟәа ахәҭак лашарада иаанхеит аҵла афымцацәаҳәақәа иахьрықәҳаз иахҟьаны

2
Аҭыԥ ахь инеит амашәыр ахҟьаԥҟьақәа аԥызхуа абригадақәа, афымцалашара амҽыша асааҭ 15:00 рҟынӡа инеиҭашьақәдыргыло рҳәеит.

АҞӘА, ажьырныҳәа 17 - Sputnik. Аҟәа адендропарк аҿы икаҳаз аҵла афымцацәаҳәақәа хәба аԥхасҭа рынаҭеит, уи иахҟьаны Синопи Турбазеи рыбжьара иҟоу араион фымцалашарада иаанхеит ҳәа аанацҳауеит АУН "Амшынеиқәафымцамч".

Иазгәаҭоуп аԥхасҭа шроуз 10-тәи, 11-тәи афидерқәа (аихшарҭатә цәаҳәақәа - азгә.).

Аҭыԥ ахь инеит амашәыр ахҟьаԥҟьақәа аԥызхуа абригадақәа, афымцалашара амҽыша асааҭ 15:00 рҟынӡа еиҭашьақәдыргылоит рҳәеит.

2