Саида Жиба

Машәыршақә иҟамлеит: Саида ахьӡ аныҟәгара лахьынҵас ишсоуз

347
(ирҿыцуп 21:37 04.07.2020)
Ахьӡ аиура иадҳәалоу, аинтерес зцу лхатә ҭоурых ҳзеиҭалҳәеит Sputnik аколумнист Саида Жьиԥҳа.

"Ауаҩы иоуп ахьӡ зырԥшӡо" рҳәоит аԥсуаа ражәа иалаҵаны. Аха зегь акоуп асаби даниуа иани иаби, изгәакьоуи зегьы рҽазыршәоит ахьӡ ԥшӡа изыԥшаара, "ухьӡ уаԥсахааит" ҳәа анаҩс ражәа иалаҵо. Ажәларқәа разгәаҭарақәа рыла, ахьӡ адоуҳатә мчы амоуп. Убри азы, ахьӡ иашьагәыҭу ҭҵааны ауп рхәыҷқәа ишрырҭо. Сара исоуз ахьӡ Саида аҭоурых ҷыда амоуп. Уи аӡәгьы исыхьӡыимтәит, ахала саԥшааит.

Саида Жьиԥҳа, Sputnik

Жьҭаарамзазы, аԥхынтәи ашәырқәа ахыӡӡаахьан, аха санду (саб иан) Ната Ԥкьынԥҳа ашьыжь шаанӡа ашҭа данықәла, авара игылаз аҵәаҵла ду аҵыхәтәантәи ашәыр, ааигәа иҟалазшәа иҟаԥшьӡа инҿшәаны икаҳаит. "Ари абзиара иатәуп, гәырӷьаҿҳәашоуп", - лҳәан игәыдыҳәҳәало аҩны дааҩналеит. Аҽны амоҭа длоуит, сиит сара.

Иахьа асаби ихьӡ аиҳарак ани аби роуп изҭо. Усҟан, аԥсуа ҭаацәараҿы ишаԥыз еиԥш аиҳабацәа, андуи абдуи ракәын иалызхуаз.

Сан, Дали сыхьӡылҵарц лҭахын, аха "Асида лыхьӡзааит" ҳәа санду аҳәара аныҟалҵа, аӡәгьы мап изымкит. Ус саб анапынҵа иҭаны, аиразы аршаҳаҭга ҟаиҵарц аҭар АҬАР ахь дрышьҭит. Аха убра иҟалеит слахьынҵа ианыԥшыз ахҭыс. Саб, Асида иҳәарц шиҭахыз дааҿаҳаҿасын Саида ҳәа имхаҳәеит. "Сҩашьашәа сгәы иабоит", - ҳәа АҬАР аусзуҩ ишлаиҳәазгьы, лара иаразнак ақьаад ианылҵеит.

Схы здыруа саныҟала, аинтерес кны сҭаацәа сразҵааит, шәыуа ахьӡ сызҭада ҳәа. "Аӡәгьы, ахала баԥшааит", - анырҳәа џьашьатәыс исзыҟалеит.

Астуденттә шықәсқәа раан, алекциақәа рҿы еиуеиԥшым атемақәа ҳанрылацәажәоз, ахьӡқәеи, урҭ рхылҵшьҭрақәеи ҳарзааҭгылалон. Сара "ахала сызԥшааз" ахьӡгьы аҭоурых аҭҵаара салагеит. И. Папасқьыр ироман "Аԥҳәыс лыпату" афырԥҳәызба хада Саида ахлыхьӡыз азы мацара ахы инаркны аҵыхәанӡа аԥсышәалеи урыс бызшәалеи саԥхьеит усҟан.

Исаҩсыжьуамызт ахьӡқәа ирызкыз нҵамҭак, дырраҭарак. Ус сышнеиуаз еилыскааит, Саида араб хьӡы шакәу, насыԥ змоу ҳәа шаанаго, Кавказ иашьашәалахеижьҭеи хышә шықәса раҟара шҵуа. Аиашазы сгәы иаахәеит. "Ахала сызԥшааз" ахьӡ насыԥ амазаап, аха уи сыԥсҭазаара иахьынӡаныԥшуа маӡаны инхарц сҭахуп.

Санду иалылхыз Асида ажәытә бырзен хьӡуп, аҵыс ауп иаанаго ҳәа салҳәеит ари ахьӡ змоу сҩызак.

Дали - ақырҭуа шьаҭа амоуп, ашәарыцара анцәахәҭыԥҳа ауп иаанаго ҳәа хыҵхырҭақәак рҟны иануп.

Сара сыхьӡ Саида аныҟәгара лахьынҵас анцәа иахьсиҭаз азы иҭабуп сҳәоит. Машәыршақә ишыҟамлазгьы агәра згоит.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

 

347

Аҟәатәи ашкол адыркит акоронавирус злаз арҵаҩы лыԥсҭазаара даналҵ ашьҭахь

11
(ирҿыцуп 23:25 20.09.2020)
Апандемиа ааҟалеижьҭеи Аԥсны акоронавирус зцәа иалоу 939-ҩык аарԥшын. Цәыббра 20 рызтәи аоперштаб адыррақәа рыла, Гәдоуҭатәи ахәышәтәырҭаҿы ишьҭоуп 97-ҩык апациентцәа.

АҞӘА, цәыббра 20 — Sputnik, Асмаҭ Ҵәыџьԥҳа. Баграт Шьынқәба ихьӡ зху Аҟәатәи абжьаратә школ №1 аҵаҩцәа акарантин ахь аҩныҟа иоушьҭуп ҩымчыбжь ҳәа, ашкол аҿы аепидемиологиатә ҭагылазаашьа ахьеицәахаз инамаданы, абри атәы Sputnik иазеиҭалҳәеит ашкол адиректор Нонна Делԥҳа.

Лара лажәақәа рыла, иахьа ашкол адирекциахь адырра ҟарҵеит акоронавирус зцәа иалаз рырҵаҩцәа руаӡәк, даҽа хроникатә чымазаракгьы зцәа иалаз, лыԥсҭазаара дшалҵыз. Иара убасгьы рышкол аҿы аклассқәа хәба рҟны ари аҿкы чымазара зцәа иалаз ачымазцәа азгәарҭахьан. Уи адагьы аҭаацәа аӡәырҩы  рхәыҷқәа COVID-19 асимптомқәа шрыдырбало адиректор иларҳәарц азы аҭел ишылзасыц илзасуеит.

"Сара аҵара аминистр аҭел сизасит, иҟоу аҭагылазаашьа иеилсыркаарц азы. Иара аҵаҩцәа ҩымчыбжьа ҳәа иоушәышьҭ акарантин ахь иҳәеит, избанзар ҳашкол аҿы актәи, аҩбатәи, ахԥатәи аклассқәа рҿы ада, егьырҭ аклассқәа зегьы рҿы аҿкы злалаз ахәыҷқәа ыҟоуп, урҭ зегьы аишьцәа, аиҳәшьцәа рымоуп егьырҭ аклассқәа рҟны. Иара убас ҳарҵаҩцәа быжьҩык акарантин аҿы иҟоуп, саргьы сыбжьы иахьа исгәаԥхом", - лҳәеит Делԥҳа.

Иара убас лара иазгәалҭеит иахьа Асанитартә епидемиологиатә станциа анапхгара лыҽрымалдарц дшаҿыз, аха аӡәгьы аҭел шьҭимхит ҳәа. Делԥҳа ишылҳәаз ала, уажәы ашкол адирекциа аилкаара иаҿуп шаҟаҩык рҵаҩцәеи рырҵаҩцәеи акоронавирус рыхьыз, макьана урҭ рхыԥхьаӡара рыздыруам.

Аԥсны агәабзиарахьчара аминистрра апресс-маҵзура COVID-19 зыхьны иҟаз арҵаҩы лыԥсҭазаара дшалҵыз азы аинформациа Sputnik иазышьақәнарӷәӷәеит, иагьазгәарҭеит лара Қырҭтәыла дшырхәышәтәуаз, уаҟа шакәу лыԥсҭазаара дахьалҵыз.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

11
Атемақәа:
Ачымазара ҿкы – акоронавирус Аԥсни адунеи аҿи: иалкаау
Старший научный сотрудник Отдела этнологии Абхазского государственного музея, этнолог Инга Шамба. Архивное фото.

Аҭоурых иагәылаҵәаху: Шамԥҳа ԥшь-ҿык змоу ампахьшьы иазкны

8
(ирҿыцуп 19:36 20.09.2020)
Аԥсуа ҳәынҭқарратә музеи аетнологиа аҟәша аҭҵаарадырратә усзуҩ еиҳабы Инга Шамԥҳа арадио Sputnik аефир аҟны еиҭалҳәеит 2015 шықәсазы Елена Гордиенко-Леиба амузеи ҳамҭас иалҭаз ампахьшьқәа рҭоурых атәы.

 

"Аҭоурых иагәылаҵәаху": Шамԥҳа ԥшьҿык змоу ампахьшьы иазкны

Шәазыӡырҩла арубрика "Аҭоурых иагәылаҵәаху" есмҽыша арадио Sputnik Аԥсны аефир аҿы.

 

Иара убас шәаԥхьар ҟалоит:

8