Дагомыстәи ахәышәтәырҭа азыхиоуп ичмазаҩхо Аԥснытәи атуристцәа рыдкылара

17
(ирҿыцуп 09:26 05.08.2020)
Урыстәыла агәабзиарахьчара аминистр лыцхырааҩ, ауааԥсыра амедицинатә цхыраара рыҭара азҵаара иацклаԥшуа Оксана Гусева еиҭалҳәеит Урыстәыла Аԥсны иацхраар шалшо акоронавирус аиааираҿы.

АҞӘА, нанҳәа 5 – Sputnik. Дагомыстәи ахәышәтәырҭа азыхиоуп COVID-19 заур алшо Аԥснытәи атуристцәа рыдкылара, иара убасгьы амчыбжь нҵәаанӡа ареспубликахь иаараны иҟоуп Сеченов ихьӡ зху ауниверситет аҟынтәи амедусзуҩцәа ҳәа лҳәеит арадио Sputnik аинтервиу азҭаз Урыстәыла агәабзиарахьчара  аминистр лыцхырааҩ, ауааԥсыра амедицинатә цхыраара рыҭара азҵаара иацклаԥшуа Оксана Гусева.

© Foto / Пресс-служба Министерства здравоохранения РА

Урыстәыла агәабзиарахьчара  аминистрра аҟазауаа Аԥсныҟа иааиит нанҳәа 4 рзы. Гусева лажәақәа рыла, аусутә аҭаара хықәкны иамоуп COVID-19 змоу ачымазцәа рыхәышәтәра аиҿкаара ахәшьара аҭара. Урыстәыла агәабзиарахьчара аминистрра аҟазауаа Гәдоуҭатәи агоспиталь аҿы иҟан, апациентцәеи рколлегацәеи ирыҿцәажәеит.

Иара убасгьы дара аҭааны ирбеит Аҟәатәи ацхыраара ласы аҟәшеи ахәыҷтәы поликлиникеи.

"Ҳара ирыдаагалеит ҳфедералтә центрқәеи аконсультативтәи ареанимациатәи центрқәеи ирнырларц", - лҳәеит Гусева.

Лара иазгәалҭеит, Аԥсны Аҳәынҭқарреи адипломшьҭахьтә ҵараз Амедицинатә академиеи аиқәшаҳаҭра ирыбжьоу шьаҭас иҟаҵаны, алшара шыҟоу авирус ахәышәтәра азҵааразы аконсультациақәа онлаин-режим ала рымҩаԥгара.

Урыстәыла агәабзиарахьчара аминистр лыцхырааҩ, ауааԥсыра амедицинатә цхыраара рыҭара азҵаара иацклаԥшуа Оксана Гусева иазгәалҭеит иахьазы Аԥсны иҟоу  аиарҭа-ҭыԥқәа макьаназы ишазхо.

"Уажәазы иҭацәу ашьҭаларҭақәа ыҟоуп. Ҳақәгәыӷуеит ԥхьаҟагьы ус иҟалап ҳәа.  Араҟагьы аусура мҩаԥысуеит урыстәылатәи асхемақәа инарықәыршәаны", - ҳәа лҳәеит лара.

Амчыбжь нҵәаанӡа ареспубликахь иаараны иҟоуп Сеченов ихьӡ зху ауниверситет аҟынтәи амедусзуҩцәа - апульмонологцәа, анестезиологцәа, ареаниматологцәа ҳәа лҳәеит арадио Sputnik аинтервиу аҭо Оксана Гусева.

Урыстәылантә Аԥсны зыԥсы зшьо атуристцәа чмазаҩхар рыдкылара азыхиара атәы далацәажәо, Дагомыстәи ахәышәтәырҭа №2 азыхиоуп урҭ рыдкылара ҳәа лҳәеит Оксана Гусева.

Иара убасгьы нанҳәа 4 рзы имҩаԥысит агәаҭара аихшьаалақәа рыҟаҵара иазкыз урыстәылатәи аделегациеи Аԥсны агәабзиарахьчара аминистр Ҭамаз Ҵахнакьиеи реилацәажәара.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

17
Атемақәа:
Ачымазара ҿкы – акоронавирус Аԥсни адунеи аҿи: иалкаау (713)
Кобахьиа Лаврик Амқәаб изы: агәаӷь змаз, пату зқәыз еибашьҩын

Кобахьиа Лаврик Амқәаб изы: агәаӷь змаз, пату зқәыз еибашьҩын

2
(ирҿыцуп 19:44 24.09.2020)
Иԥсҭазаара далҵит Аԥсны Афырхаҵа Лаврик Амқәаб. Аибашьраан Тҟәарчалтәи аполк адҵаҟаҵаҩыс иҟаз аибашьҩы арадио Sputnik аефир аҿы дигәалаиршәоит Аԥсны Афырхаҵа Аслан Кобахьиа.

 

Кобахьиа Лаврик Амқәаб изы: агәаӷь змаз, пату зқәыз еибашьҩын

Атәыла раԥхьатәи ахада Владислав Арӡынба Аԥсны Афырхаҵа ҳәа ахьӡ ду иабалак ириҭомызт ҳәа азгәеиҭеит Кобахьиа аиҿцәажәара алагамҭаз.

"Иара деибашьуан Мрагыларатәи афронт аҿы, Тҟәарчалтәи аполк командирс даман. Тҟәарчалаа ирылшаз рацәоуп аибашьраан, уи баша-маша далырхуамызт аполк еиҳабыс. Аибашьраҿы агәаӷь змаз, пату зқәыз аибашьҩы иакәын. Иареи сареи ҳаибадырит Егры ацҳаҿы Аиааира амш аҽны, убри аахыс аиҩызара ҳабжьан. Аибашьра ашьҭахь акыраамҭа Гал араион аус еицаҳаухьан. Иара аӷьеиҩҳәа иҟаз аԥсуа ҷкәына бзиа иакәын", - ҳәа иҳәеит Кобахьиа.

 

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

2

Аԥснытәи аҵарауааи Нхыҵ-Кавказтәи ауниверситети аусеицуразы еилацәажәеит

28
(ирҿыцуп 19:09 24.09.2020)
Нхыҵ-Кавказтәи афедералтә университет аусзуҩцәа рделегациа Аԥсны усутә ныҟәарыла иаҭааит.

АҞӘА, цәыббра 24 – Sputnik, Асмаҭ Ҵәыџьԥҳа. Нхыҵ-Кавказтәи афедералтә университет аусзуҩцәеи Аԥсны Аҭҵаарадыррақәа ракадемиа аусзуҩцәеи реиԥылара мҩаԥысит Аҟәа, цәыббра 24 рзы.

Аԥсны Аҭҵаарадыррақәа ракадемиа ахада Зураб Џьапуа иажәақәа рыла, рколлегацәа раара хықәкыс иамоуп Аԥсны Аҭҵаарадыррақәа ракадемиа аусуреи аиҿкааратә структуреи реилкаареи Нхыҵ-Кавказтәи афедералтә университети Аԥсны Аҭҵаарадыррақәа ракадемиеи русеицура алацәажәареи.

Ԥхьаҟатәи аусеицура аԥеиԥшқәа дрылацәажәо, Џьапуа иазгәеиҭеит Аԥсны агеографиатә ҭагылазаашьеи аҳауатә ҷыдареи ареспублика аексперименттә ҭҵаарақәа рзы иҭыԥ бзианы ишыҟарҵо. Иара игәаанагарала, Аԥсны иалшоит ананотехнологиатә институти ареабилитациатә центри раԥҵара.

"Ҳара ҳхырхарҭақәа ирхадароу аинырра акурси аусеицуреи роуп. Асовет аамҭазы иҟаз аҭҵаарадырратә усҳәарҭақәа ирымаз аимадарақәа зегь реиқәырхара залмыршахеит. Дара еиԥҟьеит СССР анеилаҳа ашьҭахь, Аџьынџьтәылатә еибашьра иахҟьаз аполитикатәии аекономикатәии ҭагылазаашьақәа рышьҭахь, Урыстәыла Аҭҵаарадыррақәа ракадемиа ареформақәа рышьҭахь. Убри азы ирацәоуп изызхәыцтәу, иҟаҵатәу", - иҳәеит иара.

Нхыҵ-Кавказтәи ауниверситет аректор Дмитри Беспалов иҳәеит ауниверситет ишазԥхьагәанаҭо "аԥеиԥш змоу ахырхарҭақәа аус рыдулара".

"Ҳара иахьа Аҭҵаарадыррақәа ракадемиа ҳаҭааит ԥхьаҟатәи аусеицуразы апланқәа ҳрылацәажәарц. Ҳуниверситет азыхиоуп Аԥсны Аҭҵаарадыррақәа ракадемиеи иареи афизика, ахимиа, ананотехнологиақәа, агротехнологиақәа, афатәаалыҵ атехнологиақәа, аполитологиа русхк аҟны аусеицура. Аԥсны агеографиатә ҭагылазаашьа ҷыда инадҳәаланы иалшоит иаԥҵахар атуризм, амедицина, ареабилитологиа русхк иатәу ацентр аԥҵара", - иҳәеит иара.

Нхыҵ-Кавказтәи ауниверситет аԥҵан 2012 шықәса рзы - Нхыҵ-Кавказтәи аҳәынҭқарратә техникатә университет, Ставропольтәи аҳәынҭқарратә университет, Пиатигорсктәи аҳәынҭқарратә гуманитар-технологиатә университет рышьаҭала.

Нхыҵ-Кавказтәи афедералтә университет ахь иаҵанакуеит: агуманитартә, анџьныртә, азиндырратә, аматематикеи аинформациатәи технологиақәа, Адгьыл азы аҭҵаарадыррақәа, аҵареи асоциалтәи ҭҵаарадыррақәа, аекономикеи анапхгареи, асервис, атуризми адизаини, афизика-техникатәи, ахимиа-фармацевтикатәи факультетқәеи арра-ҵаратә центри.

Иара убас шәаԥхьар ҟалоит:

28