Аӡәы шәҩык данраҩсуа: хатәгәаԥхарала еибашьуаз ргәаладыршәеит Гагра

37
Нанҳәа 15 рзы, Гаграа иргәаладыршәеит Аԥсны Аџьынџьтәылатә еибашьраан хатәгәаԥхарала иааны еибашьуаз рахьтә иҭахаз аҵеицәа.

Саида Жьиԥҳа, Sputnik

Аибашьра аветеранцәеи, Гагра араион Ахадареи, анаплакқәеи, аусбарҭақәеи рхаҭарнакцәеи, Нхыҵ-Кавказынтәи арҭ амшқәа рзы ҳтәыла иаҭааны иҟоу ҳашьцәа-ахатәгәаԥхаҩцәеи гәыԥҩык ашьыжь ашәҭқәа шьҭарҵеит Ԥсахара ақыҭан ишьақәыргылоу, Аахыҵ-Уаԥстәылантәи иааны еибашьуаз, Гагра араион ахақәиҭтәраан иҭахаз Џьамал Сиукаеви, Роберт Петров-Кокоеви, Ацамаз Маргиеви рбаҟа амҵан.

© Foto / Дариа Архипова/Саида Жьиԥҳа
хатәгәаԥхарала еибашьуаз ргәаладыршәеит Гагра

Ашәҭ шьҭаҵара ацеремониа иалахәыз Нхыҵ Уаԥстәылатәи аделегациа анапхгаҩы Игорь Кокоев аԥсуа жәлар иҭабуп ҳәа реиҳәеит ари арыцхә амзар аҟны иахьадарбаз.

"Адунеи зегьы ирдырроуп, Аԥсны аӡәыр итәитәырц иҭаххар, уи Нхыҵ-Кавказ инхо аишьцәа изалҳмаршо. Ҳара аӡәк еиԥш еснагь ҳаидгылазароуп, ҳацәгьеи, ҳабзиеи акы акәзароуп. Аԥсны иабахьо арыцҳара азхазааит. Ари нахыс џьанаҭ тәыла ишәҭыкыкаҷлааит", - иҳәеит Аԥсны Аџьынџьтәылатә еибашьраан, хатәгәаԥхарала иааз Игорь Кокоев.

Ари абаҟа хылаԥшра ҷыда аҭоуп ақыҭа ахадара рганахь ала. Аԥсны Аџьынџьтәылатә еибашьра иадҳәалоу агәалашәаратә рыцхәқәа раан, ашәҭ шьҭаҵаразы раԥхьаӡакәны арахь ауп иахьааиуа.

Анаҩс еицыз зегьы ашәҭ шьҭаҵаразы ихалеит Мамзышьха. Нхыҵ-Кавказынтәи иааны еибашьуаз Ибрагим Науржанови, Нургали Канукови, Хасан Алхасови, Гәдоуҭа араион иалҵыз Валери Смыри ахьҭахаз аҭыԥаҿы ишьақәыргылоу абаҟахьы.

Нанҳәамза анҵәамҭазы, ақырҭуа мпыҵахалаҩцәа Гагра рымҽхакны ианыҟаз абраҟа аиҿагылара ӷәӷәа ҟалеит. Аӷацәа аҭак шрыҭазгьы, аԥсуа гангьы ацәыӡ аиуит.

Хасан Алхасов дҭахеит Гагра араион ахақәиҭтәразы, аҵыхәтәантәи ажәылараҿы, аха иҭаацәа ргәаҳәарала ибаҟа шьақәыргылан арҭ аибашьцәа рывара.

"Ҳҭоурых аҿы зышьҭа ӷәӷәа нзыжьыз ҳашьцәа-фырхаҵәа ҳгәалаҳаршәарц арахь ҳааиуеит есышықәса. Нхыҵ-Кавкази, Ҭырқәтәылеи уҳәа рҟнытә ҳашьцәа раара ҿамҩак аҳауацқьа иаҳзаҩызахеит. Рыцҳарас иҟалаз збаҟақәа ҳарҭааз аҵеицәа аибашьра алагамҭазы иҭахеит. Рыԥсы ҳмырԥхашьааит, ргәалашәара анаунагӡатәра ҳақәшәааит", - ҳәа азгәеиҭеит Гагра араионтә Еизара ахантәаҩы Асҭан Агрба.

Нанҳәа 1992 шықәсазы ақырҭуа мпыҵахалыҩцәа еибашьрала аԥсуа жәлар ианрықәла аҩбатәи амш аҽны Нхыҵ-Кавказынтә цхыраара иааит аҟабарда аофицар Сулҭан Сосналиев напхгара ззиуаз аешьаратә жәлар рхаҭарнакцәа раԥхьатәи ргәыԥ.

Аԥсны Аџьынџьтәылатә еибашьра иалахәын ҩ- нызқьҩык инареиҳаны хатәгәаԥхарала аԥсуа жәлар ирыдгылаз, урҭ рахьынтә 51 –ҩык "Аԥсны Афырхаҵа" ҳәа ахьӡ ҳаракы иаԥсахеит, 247-ҩык Леон иорден ранашьоуп, фышәҩык инареиҳаны "Агәымшәаразы" амедал. Аибашьраан иҭахеит 260- ҩык инареиҳаны хатәгәаԥхарала аԥсуа жәлар ирыдгылаз.

 

37

Sputnik апресс-центр аҟны еиҭарҳәоит аԥсуаа рҿы аӡахәааӡара аҭоурых

11
(ирҿыцуп 20:21 01.10.2020)
Жьҭаара 2 асааҭ 14:00 рзы Sputnik Аԥсны амультимедиатә пресс-центр аҿы имҩаԥгахоит Фарид Кәабахьиеи Николаи Ачбеи рышәҟәы "Ажәытәан аԥсуаа рҟны аӡахәааӡареи аҩыҟаҵареи" иазку апресс-конференциа.

Апресс-конференциа иалахәуп:

  • Фарид Кәабахьиа – аҭоурыхдырыҩ, Аԥсуаҭҵааратә институт анаукатә усзуҩ;
  • Николаи Ачба – "Аԥсны аҩқәеи аӡқәеи" адиректор хада.

Амассатә-информациатә хархәагақәа рхаҭарнакцәа ааҳаԥхьоит апресс–конференциахь (аҭыӡҭыԥ: ақ. Аҟәа, Пушкин имҩ. 16, абизнес-центр "Гәдоу Плаза", 5-тәи аихагыла).

Аккредитациа ҟалоит абри аҭел ала: +7(940) 926 00 00

Азыҳәа анашьҭразы аелектронтә ҭыӡҭыԥ: info.abk@sputniknews.com

Иара убасгьы шәара ишәылшоит апресс-конференциа алахәылацәа зинтерес шәымоу азҵаарақәа рышәҭарц Sputnik Аԥсны асоциалтә ҳа Facebook аҿтәи адаҟьаҿы мамзаргьы аелектронтә ԥошьҭахь инашьҭны: info.abk@sputniknews.com

11

Раионк аԥсҭазаараҟнытә: Гәынба "Акурорт "Пицунда" аԥсшьаҩцәа раҭаара иазкны

7
(ирҿыцуп 20:10 01.10.2020)
"Акурорт Пицунда" аиҳабы Фрикан Гәынба арадио Sputnik аефир аҿы еиҭеиҳәеит иахьазы аԥсшьарҭатә комплекс аҿы шаҟаҩы рыԥсы ршьо, насгьы уи иамоу ауадаҩрақәа ртәы.
Раионк аԥсҭазаараҟнытә: акурорт "Пицунда" аԥсшьаҩцәа раҭаара иазкны

"Иахьазы аԥсшьарҭатә комплекс аҿы рыԥсы ршьоит 1800-ҩык. Ҵыԥх уажәааны 1200 ракәын иҟаз. Уи зыбзоурахазгьы ҳәа ҳгәы иззаанаго Гьаргь Блаб ихьӡ зху абокс азы Пицунда имҩаԥысуа атурнир ауп. Амшқәагьы аԥсшьараамҭазы ибзиоуп, уи алагала ыҟоуп. Уажәазы азыҳәарақәа маҷуп иҟарҵо еиҭа аԥсшьаразы, аха амз аҵыхәанӡа аус аауп ҳәа ҳгәыӷуеит", - ҳәа еиҭеиҳәеит Гәынба.

Аԥсшьарҭатә комплекс аҿы иҟоу ауадаҩрақoа ртәы далацәажәо, Гәынба иҳәеит.

"Аӡыканал ацхыраара аҭахуп, уи аҳабла зегьы ӡыла еиқәнаршәоит иара аԥсшьарҭатә комплекс адагьы, иара анаплакы абаланс аҿы иқәгылоуп, иҟаҵатәу рацәоуп. Аӡыцрыҵқәа ракәзар, ақәра рымоуп, есԥхынра амчра ӷәӷәа роуеит, усҟан ана-ара иацәцо иалагоит. Уи аҭыԥ аԥшаара усҟак имариам, иҳақәҿиеит иара атәы здыруа Алексеи Кьетиа дахьҳамоу. Иара акыр шықәса аус иуеит, аԥсшьарҭатә комплекс аҿы аӡыцрыҵқәа шьышьықәгылоу атәы идыруеит", - ҳәа еиҭеиҳәеит Гәынба.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

Иара убас шәаԥхьар ҟалоит:

7