Аԥсны абҵарамза нахыс Урыстәылантә афымцамч аиуразы иҟоу алшарақәа ҭырҵаауеит

10
2021 шықәса жәабранмзазы Егры ГЕС адеривациатә тоннель аҟны аиҭашьақәыргыларатә усурақәа ирылагоит, лаҵарамза аанҵәаанӡа астанциа зегьы аусура аанкылазаауеит.

АҞӘА, нанҳәа 19 - Sputnik. Аԥснытәи аган урыстәылатәи рколлегацәа алархәны иҭырҵаауеит ҳтәылахь афымцалашара аашьҭра азҵаара, Егры ГЕС аусура анаанкылахо аамҭазы адагьы, ҳазҭоу ашықәс абҵарамза нахысгьы ҳәа аҳәамҭа ҟаиҵеит АУН "Амшынеиқәафымцамч" адиректор хада Михаил Логәуа. Абри атәы аанацҳауеит Аԥсны аекономика аминистрра асаит.

Логәуа уаанӡагьы иазгәеиҭахьан "Амшынеиқәафымцамч" аҟны иҟарҵо азԥхьагәаҭақәа рыла Аԥсны анҭыҵынтә афымцамч аиура аҭахны иҟалоит абҵарамзазы ҳәа, избан акәзар Егры ГЕС иарҿио афымцамч аҟынтә 40% инаӡо ҳара ҳахәҭаа убри аамҭазы инаҳхуеит.

Аҩашаҽны, нанҳәа 18 рзы урыстәылатәи аспециалистцәа рделегациеи, Аԥсны аԥыза-министр ихаҭыԥуаҩ, аекономика аминистр Кристина Озгани, АУН "Амшынеиқәафымцамч" адиректор хада Михаил Логәуеи Егры ГЕС иаҭааит ари акомплекс иатәу аобиектқәа рҭагылазаашьа рбарц.

Астанциаҿы аремонт цонаҵы, 2021 шықәса жәабранмза инаркны лаҵарамзанӡа ҳтәыла фымцамчыла аиқәыршәара азҵаара аус адуларақәа цоит уажәы аҩтәылак рыбжьара.

Аҭҵаарақәеи агәаҭарақәеи зегь рышьҭахь урыстәылатәи аделегациа иазнархиоит Урыстәылантә афымцамч аашьҭра иазку атехникатә схемақәа рыҟаҵаразы абжьгарақәа.

ЗҲәА "Егры ГЕС" адиректор Леван Мебониа иазгәеиҭеит, арегламент ишаҳәо ала, астанциа ес-хәышықәса иаанкыланы игәаҭалатәуп, аремонт аҭахны иҟазаргьы, иҟаҵалатәуп ҳәа. Аҵыхәтәантәи аремонт ара иҟаҵан 2006 шықәсазы.

Нанҳәа 11 рзы Аԥсны аенергетикатә система аҭагылазаашьа аҭҵааразы ҳтәыла иаҭааит урыстәылатәи аделегациа, Аԥсны ахада Аслан Бжьаниеи Урыстәыла аенергетика аминистр Александр Новаки реицәажәара шыҟаз инақәыршәаны.

Аделегациа иалахәуп АО "Техническая инспекция ЕЭС" аекспертцәеи ПАО "Россети" атехникатә хылаԥшра ацентр аспециалистцәеи.

Иара убас шәаԥхьар ҟалоит:

10

Раионк аԥсҭазаараҟынтә: Гамгьиа авирус змоу Гал рыхәышәтәразы

30
(ирҿыцуп 20:03 28.09.2020)
Гал араион ахәышәтәырҭа хада аҳақьым хада Асҭамыр Гамгьиа арадио Sputnik аефир аҿы еиҭеиҳәеит акоронавирус змоу рзы Галтәи ахәышәтәырҭаҿы хазы аҭыԥқәа раартра аус шцо атәы.
Раионк аԥсҭазаараҟынтә: Гамгиа авирус змоу Гал рыхәшәтәразы

Аԥсны ахада ауааԥсыра акоронавирус рацәыхьчаразы акоординациатә штаб аӡбара шьаҭас иаҭаны аусԥҟа инапы аҵаиҩит. Уаҟа иазгәаҭоуп жьҭаара 5 инаркны массала аспорттә, агәмырҿыӷьратә, ацәыргақәҵатә уснагӡатәқәа ахыбрақәа рыҩнуҵҟа рымҩаԥгара мап ацәкра. Иара уи адагьы, агәабзиарахьчара аминистрра жьҭаара 15 рҟынӡа анапы ианҵоуп Аԥсны, Аҟәа ақалақьи араионқәеи иахьрыҵанакуа иҟоу амедицинатә усҳәарҭақәа рҟны авирус змоу ахаҿқәа рнагарҭа ҭыԥқәа разырхиара.

"Амза 15 рҟынӡа еиқәыршәатәуп аҟәша. Иҳаԥшааит аҭыԥ. Усҟан ацхыраара лас астанциа ахьыҟаз аҭыԥ аҿы 10 каруаҭк алаҳхырц азы. Асмета ҟаҳҵеит, иаҭаху азы ашәҟәқәа ҳҩит, иааиуа амшқәа рзы иҳашьҭуеит. Иаарласны ашоура змоу зегьы убри аҟәшахьы инаганы, акоронавирус азы анализқәа ҟарҵаанӡа уа иҟалоит. Аҳақьымцәа уаҟа аус зуло алҳаԥшаахьеит, амедиаҳәшьцәа ракәзар, урҭгьы ҟалоит. Иааиуа амзазы Гәдоуҭатәи ахәышәтәарҭахь иҳашьҭраны иҟоуп бригадак, урҭ еиқәҳаршәахьеит. Сгәы ианаагоит аҳақьымцәа уаарыдтәалан ишрыхәҭоу аинформациа дара рҟынӡа инаугар, аҿкы ахәышәтәра ҳҭахым ҳәа зҳәо даара имаҷхоит. Аибашьраан доусы иара иус идыруан, уажәы аҭынч ԥсҭазаараҿгьы џьара гәаҟрак ҟалар, аҳақьымцәа ирдыруазароуп дара рыда ажәлар ԥсыхәа шрымам", - ҳәа еиҭеиҳәеит Гамгьиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

Иара убас шәаԥхьар ҟалоит:

 

30

Аҭара ақыҭан иаадыртит Аԥсны Аџьынџьтәылатә еибашьраҿы иҭахаз рбаҟа

13
(ирҿыцуп 19:21 28.09.2020)
Цәыббра 30 рзы Аԥсны иазгәарҭоит 1992-1993 шықәсқәа рызтәи Аԥсныжәлар Рџьынџьтәылатә еибашьраҿы Аиааира 27 шықәса ахыҵра.

АҞӘА, цәыббра 28 – Sputnik. Очамчыра араион Аҭара ақыҭан имҩаԥган Аԥсныжәлар Рџьынџьтәылатә еибашьраҿы иҭахаз рбаҟа аартра ацеремониа.

Аԥсны ахада Аслан Бжьаниа ипресс-маҵзура ишаанацҳаз ала, ахада ихатә ԥараны 220 нызқь мааҭ алеигалеит иҭахаз рбаҟа аиҭашьақәыргыларазы.

Аҭара ақыҭан иаадыртит Аџьынџьтәылатә еибашьраҿы иҭахаз рбаҟа

Ацеремониа атәыла ахада идагьы иалахәын ахада Иусбарҭа анапхгаҩы Алхас Кәыҵниа, ихаҭыԥуаҩ Зураб Қаџьаиа, Очамчыра араион ахадара, Атәылахьчара аминистрра ахаҭарнакцәа, Апарламент адепутатцәа, Нхыҵ Кавкази Алада Урыстәылеи рҟынтәи хатәгәаԥхарала еибашьуаз, ауаажәларра рхаҭарнакцәа, ақыҭа ауааԥсыра.

Уаанӡатәи адыррақәа рыла, 1992-1993 шықәсқәа рызтәи Аԥсныжәлар Рџьынџьтәылатә еибашьраҿы аиааира 27 шықәса ахыҵра иазкыз ауснагӡатәқәа рыхәҭак аԥыхуп аепидемиологиатә ҭагылазаашьа иахырҟьаны.

Иара убас шәаԥхьар ҟалоит:

 

13