Sputnik амчыбжь: ахадеи аиҳабыреи реилатәара, Михаил Бабич иаара

13
(ирҿыцуп 09:35 24.08.2020)
Иҳаҩсыз амчыбжь азы Аслан Бжьаниа аиҳабыра рхаҭарнакцәа алархәны аилатәара мҩаԥигеит, уа агәабзиарахьчара, атурсезон, Аинвестпрограмма анагӡашьа уҳәа ирылацәажәон, иара убас Аԥсныҟа усуратә ныҟәарала Михаил Бабич дааит, уи адагьы аҵарашықәс ианалаго арыцхә еилкаахеит.

Абарҭи нанҳәа 17-23 ирыбжьаркыз аамҭазы аҭыԥ змаз егьырҭ ахҭыс хадақәеи аинформациатә агентра Sputnik Аԥсны есымчыбжьатәи ахҳәааҟны.

Сариа Кәарцхьиаԥҳа, Sputnik

Нанҳәа 19 рзы Аҟәа имҩаԥысит Аԥсны Аминистрцәа Реилазаара ахаҭарнакцәеи Аслан Бжьаниеи реилатәара. Атәыла ахада агәабзиарахьчара, атуризм, Аинвестпрограмма анагӡашьа уҳәа азҵаарақәа дрылацәажәеит.

Агәабзиарахьчара:

  • Ҵахнакьиа: Аԥсны Агәабзиарахьчара аминистрра алаҵа "Спутник V" аагара иазхәыцуеит
  • Аԥсны 200-ҩык инареиҳаны COVID-19 рыхьхьеит.
  • Акоронавирус аҿагылара рнапы алакуп 125-ҩык аҳақьымцәа, аха иазхом аспециалистцәа - апульмонологцәа, ареаниматологцәа, аинфекционистцәа, акардиологцәа, атерапевтцәа.
  • Гәдоуҭатәи COVID-центр 300-ҩык рҟынӡа ачымазцәа аднакылар алшоит.
  • Гәдоуҭатәи ахәышәтәырҭаҿы ишьақәдыргылараны иҟоуп акомпиутертә томограф.
  • Аԥсны 5900 експресс-тест ыҟоуп.
  • Аԥсны иазхәыцуеит Урыстәыла иаԥырҵаз акоронавирус иаҿагылоу алаҵа ҳтәылахь аагара азҵаара.

Акоронавирус иадҳәалоу аҵыхәтәантәи ажәабжьқәа шәрыԥхьар ҟалоит абра>>

Атурсезон:

  • Гагра араион аԥсшьарҭаҩнқәа 90% рыла ихарҭәаауп, Аԥсны агәҭантәи ахәҭа акәзар - 35% рыла.
  • Риҵатәи ареликттә милаҭтә парк иаҭааз рхыԥхьаӡара ҵыԥхтәи ашықәс абыржәааны аасҭа 1,7% рыла еиҵахеит. Аха нанҳәа анҵәамҭазы аҭагылазаашьа аҽаԥсахуеит. Убас, ҵыԥхтәи арбагақәа зегьы ааидкыланы раасҭа сынтәатәи адинамика еиҳахоит ҳәа азԥхьагәарҭоит Атуризм азы аминистрраҟны.
  • Афонҿыцтәи аҳаԥы аҭааҩцәа рхыԥхьаӡара акәзар, ҵыԥх абри аамҭа иаҿырԥшны арбагақәа 47% рыла еиҵахеит. Уи мзыз хадас еиҳараӡак иаиуз аҳаԥы аквотақәа рыла аҭаара ахьаҭаху азоуп.
  • Аԥыза-министр Александр Анқәаб аилатәара иалахәыз азхьаирԥшит абнатә ԥстәқәа атурсезон аан аԥара рыларҳара азҵаара, "урҭ ауаа рнапаҿы иақәнагам аҭагылазаашьа иахьҭагылоу" гәаҭатәуп иҳәеит. Иара ажәалагала ҟаиҵеит ари азҵаара аӡбаразы аекологиатә прокуратурагьы адԥхьалатәуп ҳәа.
  • 2020 шықәса рашәара 1 инаркны нанҳәа 17 рҟынӡа иҭаҩуп 208 цәгьоура, урҭ рахьтә иаарԥшуп 178, уи 85,5% артәоит, иаарԥшымкәа иаанхеит 30, 2019 шықәсазы 160 зинеилагара ыҟан, урҭ рахьтә иаарԥшын 124, уи аиртәоит 77,5%.
  • Нанҳәа 1 инаркны аԥсшьаҩцәа рганахьала 12 цәгьоура ҟарҵеит, уи ацәгьоурақәа зегьы рзеиԥш хыԥхьаӡараҟынтәи 27,9% дыртәоит, урҭ рахьтә иаарԥшуп 5.
  • Урыстәылатәи Афедерациаҟынтәи иааны зыԥсы зшьо ауаа ртранспорттә хархәагақәа иахәҭаӡамкәа раанкылара ахҭыс иазку Аҩнуҵҟатәи аусқәа рминистр идҵа анагӡаразы хҩык аусзуҩцәа русура иамхуп, 15-ҩык алеишәатә ԥарахьырхәра рықәҵоуп.

Иара убас шәаԥхьар ҟалоит:

Аинвестпрограмма:

  • Аинвестпрограмма анагӡаразы азинмчы змоу Аԥсны аусбарҭақәа аргыларақәа рхарџьынҵатә хәыԥсақәа ахьынӡаиашоу агәаҭаразы аныҟәарақәа мҩаԥыргеит, акапиталтә ремонт аиҭашьақәыргыларақәа рымҩаԥысшьа ҭырҵааит.
  • 2020-2022 шықәсқәа рызтәи Аинвестпрограмма аобиектқәа 2020 шықәсазы рфинансркра амҩаԥгара алзыршо 35 експерттә лкаақәа ҟаҵоуп.
  • Иахьатәи аамҭазы аҳәынҭқарратә еиқәшаҳаҭрақәа 35 рыбжьаҵоуп, урҭ рзеиԥш хәыԥса 888 миллион мааҭ ыҟоуп.
  • Аԥсны аиҳабыра Аинвестпрограмма анагӡаразы анардадаҩцәа ралԥшаашьа аԥҟара шьақәнаргылеит. Уи инақәыршәаны иаҭахуп: адокументациаҟны иазԥхьагәаҭоу аусурақәа рынагӡараҟны аԥышәа бзиеи урҭ рынагӡара зылшо аҟазауаа рыҟазаареи.
  • Ахада Аслан Бжьаниа инаҵшьны иазгәеиҭеит Урыстәылантәи афинанстә цхыраара ишахәҭоу аныхразы уи ҭакԥхықәрала ишазнеитәу, ажәалагалагьы ҟаиҵеит Аинвестпрограмма аобиектқәа рпроектқәа реиқәыршәараан агхақәа ҟазҵо ахьырхәлазарц.

Михаил Бабич усуратә ныҟәарала иаара

Нанҳәа 20 рзы Аҟәа имҩаԥысит Аԥсны ахада Аслан Бжьаниеи Урыстәыла аекономикатә ҿиара аминистр актәи ихаҭыԥуаҩ Михаил Бабичи реиԥылара.

Бжьаниа агәыӷра ааирԥшит Михаил Бабич иаара уаанӡа изныкымкәа алацәажәара заухьаз азҵаарақәа аимпульс ҿыц рынаҭап ҳәа.

Михаил Бабич иазгәеиҭеит макьана иҵегь еиқәыршәатәу аобиектқәа шыҟоу – ашколқәеи ахәыҷбаҳчақәеи.

Мшыбзиа, ашкол!

Аԥсны аҵарашықәс ҿыц цәыббра 1 азы иаладыргарц ргәы иҭоуп, аепидемиологиатә ҭагылазаашьа маншәалахар.

Асанепидемстанциа абжьгарақәа рыла:

  • Аклассқәа рҟны 18-20-ҩык иреиҳаны аҵаҩцәа рыдрымкылароуп.
  • Арҵаҩратә еилазаара рыбжьара зықәра 65 шықәса еиҳам роуп аус зур зылшо. Аха акадрқәа азымхоны иҟалозар, иаҭаху ахыхьчагатә маҭәарқәа рхы иархәаны аус руроуп.

Иара убас шәаԥхьар ҟалоит:

Аиҭалхрақәа

Аԥсны Алхратә комиссиа хада Бзыԥтәи алхратә ҭыԥ хада №10 аҟны адепатутрахь кандидатцәас иҭанаҩит Ҭамази Леибеи Ҭемыр Беиеи АКХ аилатәараҟны аԥшьаша, нанҳәа 20 рзы.

Ԥхынгәы 12 рзы имҩаԥысыз аиҭалхрақәа раан урҭ рыҩџьагь рахьтә аӡәгьы алхыҩцәа рыбжьқәа реиҳарак рмоуит. Убри инамаданы Алхратә комиссиа хада ари алхратә ҭыԥ хада ала аиҭалхрақәа ҩаԥхьа шымҩаԥнаго рыланаҳәеит.

Абокс амчыбжь

Нанҳәа 22 рзы аԥсуа боксиорцәа Харитон Агрбеи Баҭал Ҷежьиеи Казан имҩаԥысуаз абокс ахәылԥаз "Столото. Вечер бокса WBC" аҟны иқәԥон, Игор Адлеиба иакәзар - Екатеринбургтәи аицлабра RCC Boxing Promotions аҟны.

Харитон Агрба, аӡбаҩцәа еицҿакны ишырыӡбаз ала, дииааит Сослан Тедеев ашоу "Столото. Вечер бокса WBC" аҟны, абри атәы аанацҳауеит Аԥсны Аспорт азы аҳәынҭқарратә еилакы. 

Баҭал Ҷежьиа, аӡбаҩцәа изларӡбаз ала, аурыс спортсмен Сергеи Кожухар иҟны даҵахеит атитул WBC Youth азы реиндаҭлараҿы.

Игор Адлеиба Екатеринбург имҩаԥысуаз аицлабра RCC Boxing Promotions аҟны Кантемир Калажокови иареи еиҭахарала еилгеит. Аԥсуа боксиор ахԥатәи араунд аан ааха иоуит, аха уи азы аиқәԥара аанкыламызт.

13

Аналитикеи акритикеи рыҟамзаара аибарҽхәара анарҿио

27
(ирҿыцуп 11:37 20.09.2020)
Аԥсуа театртә, алитературатә, амузыкатә аналитикеи акритикеи рҭагылазаашьа азы лгәаанагара лҳәоит Sputnik аколумнист Елеонора Коӷониаԥҳа.

Асовет аамҭа амалырқәа амазаргьы, зегь акоуп абырҵкал икылнахуаз рацәан ацензура бааԥсы шуԥылозгьы. Иаҳҳәап, атеатр аҿы аспектакль ахәаԥшыҩцәа рахь ицәырыргаанӡа, акультура аминистрра ахаҭарнакцәеи, атеатр асахьаркыратә еилазаареи, аинтеллигенциеи адгаланы, имҩаԥыргон ахәаԥшра. Иҟан Аԥсны анҭынҵынтәи атеатрҭҵааҩцәа ааԥхьара анроуазгьы. Наҟынтәи иаауаз апрофессионалцәа иаахтны ргәаанагара рҳәон, аҭыԥантәиқәагьы аспектакль иагыз-иабзаз ҳәаны, ма аус адуларахьы ирышьҭуан, мамзаргьы ахәаԥшцәа дырбаразы амҩа арҭон.

Иахьа аспектакль ахаҭа аҭыҵра акыр агзаргьы, заа иӡырыргоит, заа ахәшьара арҭоит знапы иҵыҵуа. Алитература амҩақәҵараҿгьы иҟан амҩақәа, иҭыҵуан акритикатә статиақәа знылоз аизга "Ажәеи аамҭеи", иара убас, ажурнал "Алашараҿы" ицәырҵуан еиуеиԥшым иҵарыз ақәгыларақәа. Амузыка аганахьгьы ашәақәа рҭыҵра ахә зшьоз амузыкантцәа ыҟан.

Хымԥада, аҟазацәа рахьтә аӡәы еиҳа илшарақәа ҭбаан, даҽаӡәы дхьысҳазар ауан, аха, зегь акоуп, хылаԥшрак аман. Иахьеиԥш инеиужьны аибарҽхәареи ахырҽхәареи ыҟамызт сҳәар сылшоит урҭ аамҭақәа ирхааныз лаҳасаб ала.

Иаҳбозеи иахьа? Аспектакль ықәзыргыло ихаҭа ирҽхәо асоциалтә ҳақәа рҿы даацәырҵуеит, ашәҟәы зызҭыжьыз аӡыргара мҩаԥигоит, уаҟа ихырку ажәақәа рҳәар рылшоит абжьааԥны ианимаҳауа дҵәылызхуа.

Араӡара даара имариам усхеит ҳазҭагылоу аамҭазы. Аԥҳа иҟалҵо ан илырҽхәоит, нас ауацәеи аҭынхацәеи аҷаққәа (алаикқәа) аақәдыргылоит, убри аан ахҳәаа даҽа хырхарҭак аҭан изҩызгьы ижәлоит уи иазку арҽхәаҩцәа. Акыр иџьбараз акритик Владимир Аҵнариа истатиақәа руак аҿы иҩхьан "ҳара ҳаиуареи ҳҭынхареи шыҟоу ала, акритика уамак анарха амам" ҳәа. Аҵарауаҩ Владимир Агрба иакәзар, ирониатә ҟазшьала ихы дахлафаауа иҳәахьан "акритика шамуаз анызба, арҽхәарахьы сиасит" ҳәа.

Шәара шәазхәыц, арҭ ахыбаҩқәа акритика аԥеиԥш шамамыз рҳәозҭгьы, азҵаара заҟа ихьанҭахаз? Апоет Таиф Аџьба дышхәыдамызгьы, "Пушкин ишьҭахь ажәеинраала аҩра цәгьоуп" иҳәон, аклассик иҩаӡара аҽахьыгӡара шыуадаҩыз еилкааны. Пушкин анаҳҳәа, хыԥхьаӡарала аурыс гени ишәҟәқәа раҵкыс ҭзыжьхьоугьы ануԥыло ыҟоуп ҳара ҳҿы, ахыԥхьаӡара мацара иаанаго ыҟазар. Ҳазҭагылоу аамаҭазы "споет бзиоуп" зҳәаз дпоетхоит, "срежиссиор дууп" зҳәаз дрежиссиоруп, скомпозиторуп зҳәазгьы ус.

Абри аамҭазы, аҟазараҵәҟьа злоу ашәшьыра ианыҵахогьы ҟалоит, избанзар дара рхы ирзаҭәашьом ахӡыргара. Аколонкақәа равтор лаҳасабала, исгәаԥхо аспектакль иагу иабзоу атәы мацара сыҩуа салагеит, иара убас, даара дҟазоуп ҳәа ззысыԥхьаӡо изкны ажәа сҳәоит. Даараӡа исҭахын зны, арежиссиор Мадина Аргәынԥҳа лықәыргыламҭа Г. Лорка ипиеса "Бернарда Альба лыҩны" иазкны сгәаанагара сҩырц. Аспектакль цәгьа исгәаԥхеит, ҳаԥсҭазаара иашьашәалоуп. Иҟан иара убас сгәы еихьызшьуазгьы, уигьы сҳәарын, аха уаҟа ароль хадақәа руак саҳәшьа иналыгӡон азы, исыҩуа ԥсыуаҵас ииашахом сҳәан, савсит.

Акырынтә исҳәахьеит, хаҭала атеатрқәа русуразы Аԥсны анҭыҵынтәи атеатрҭҵааҩцәа ааганы, ҳтеатрқәа зегьы ррепертуар иахәарԥшны, "аҩеи-аӡеи" еилырхыр бзиан ҳәа.

Аибарҽхәареи ахырҽхәареи акультура абзиахь икылнагом, аԥхьаҩи, ахәаԥшҩи ироуроуп алшара, раҵкыс здыруа ианализ аԥхьара, азыӡырҩра, уи акыр иацхраауан агьама бзиа ашьҭкаара. Иахьа асоциалтә ҳақәа рҿы иубоит аԥсуаа иҳацәтәымыз ацәырҵрақәа, урҭ ирылыскаауеит ауацәеи аҭынхацәеи еицлабны рҭахцәа ахьдырҽхәо. Зҭынха дминистрхаз Facebook адаҟьаҿы адныҳәалара ҟалҵар лылшоит, аҩны днеины ималырҽхәар амуашәа. Абас, асоциалтә ҳақәа рцәырҵра ҳабҩарақәа цәырнаго иалагеит, аха, зегь реиҳа ихьаагатәу, аҟазараҿы аибарҽхәара аҳра ауа иахьалагаз ауп.

Аҵарауаҩ Валери Бигәаа абри азҵаатәы хьааганы, мышқәак раԥхьа абас ахҳәаа ҟаиҵон Facebook аҿы: "Еибарҽхәарыла ҳдоуҳатә культура инхаз ахәыҷгьы ҳалгоит. Аԥсышәала иҭыҵуа - газеҭума, журналума, шамахамзар аинтеллекттә зыҟаҵара рныԥшӡом. Ҩышьа ззымдыруа авторцәа, аҩымҭа еихҳәеиҵҳәа иананырҵо рацәоуп. Ак сҳәоит ҳәа уаналага, уԥсыр уҵәыуара иааӡом. Ас ҳаналага, ҳсахьаркыратә литературагьы ҟалом, ҳмилаҭтә журналистикагьы".

Ари зыҩуа аҵарауаҩ Бигәаа ихы дацәшәаны акәым, иаргьы ибарҭоуп ҳазну амҩа азоуп дызгәамҵуа. Аҵарауаҩ абри азҵаатәы азы аилацәажәара аҭахуп ҳәа агәаанагра имоуп. Зегьы иреиӷьуп, иҟоу аҟазара ахырхарҭақәа, алитературагьы уахь иналаҵаны, атәы здыруа ахҳәаа арҭалар, апрофессионал иажәа акраҵанакуеит, ҳазҭагылоу ирҩашьагоу аамҭазы.

Ус сҳәаргьы, иахьа атеатртә, алитературатә, амузыкатә аналитика хықәкыла иаҿу дарбану? Ари аганахь аҵара змоугьы рацәаҩым, ари амҩа хра шалам баны уи занааҭс ишьҭызхуагьы маҷҩуп. Абас ҳашцо ҳанца, зынӡа ҳҩашьоит, аграфоман ҳаԥхашьаны апремиа иаҳҭар ҟалоит, аҵарадыррахь ус змам имҩа ааҳартыр ауеит.

Избан изалымшои? Ԥынгыла дук ыҟоума? Ацензура бааԥс акәымкәа, хра злоу аналитика ир, иԥсыҽу аган иаванархар ҟалоит, аха уи иаҭахуп агәаӷьра ду атәы здыруа рганахьала.

Аԥсуа драматә театр асценаҿы. Архивтә фото
© Sputnik / Томас Тхайцук Рада Ажиба

Шәазхәыц, иаҳҳәап аҳәынҭқарра ахарџь ала ҵакы змам ашәҟәы аҭыжьра ахарџь баша аӡы ишҭаԥсо... Шәазхәыц, ҳара, зекономика хьысҳау ҳзыҳәан, уи заҟа иаахоу. Аамҭа цар, зегь акоуп ихьысҳау канаԥсоит, ахҷаҭқәа роуп иаанхо.

Аԥхын ақыҭаҿы аԥсшьара азы санцо, есышықәса иаасыртуеит Алықьса Гогәуа иҩымҭақәа реизга. Ҿыц избазшәа сеиҭарыԥхьоит иҩымҭақәа. Саԥхьацыԥхьаӡа исныруеит, урҭ рхыԥша заҟа иҵаулоу. Аԥсшәа ахаҭа мыӡыр, Гогәуа иҩымҭақәа наунагӡоуп, егьырҭ аклассикцәа Баграт Шьынқәба, Иуа Коӷониа, Миха Лакрба уҳәа аамҭа иԥнашәахьоу арҿиаҩцәагьы рырҿиамтақәа налаҵаны. Аамҭа ахаҭа зеиӷьыҟам бырҵкалуп, аха усгьы, аибарҽхәареи ахырҽхәареи ҳазмырҿио ҟазшьа бааԥсуп…

Автори аредакциеи ргәаанагара еиқәымшәозар ҟалоит.

27

Аԥсны ахада Ихраҿа агаразы аҽырыҩра мҩаԥысит Бзыԥҭа

3
(ирҿыцуп 09:49 20.09.2020)
Атәыла ахада Ихраҿа ҳәа хьӡыс измоу аҽырыҩраҿы аҽыҩҷкәынцәа еиндаҭлон еиуеиԥшым адистанциақәа ззыԥҵәаз быжь-еиԥхныҩларак рҟны.

АҞӘА, цәыббра 20 – Sputnik. Аԥсны ахада Ихраҿа агаразы аҽырыҩра мҩаԥысит Бзыԥҭатәи аҽырҩырҭаҟны асабша, цәыббра 19 рзы ҳәа адырра ҟаиҵеит аҽырыҩра аӡбаҩ хада Џьарназ Бениа.

Аиааира згақәаз алыркаауан аиԥхныҩларақәа быжьба рҟны. 1941-1945 шықәсқәа рзтәи Аџьынџьтәылатә еибашьра Ду аҟны Аиааира иазкыз, 1200 метра инаӡоз адистанциаҿы еиԥхныҩлон ҩышықәса зхыҵуа, Аԥсны иааӡоу аҽқәа.

Абри адистанциаҿы актәи аҭыԥ игеит Дмитри Қардиа, иҽы "Мира Баи" – Нодар Ҵышәба итәуп, иара д-Оҭҳаратәуп. Аҩбатәи аҭыԥ ааникылеит Оскар Ҭраԥшь, уи дзықәтәаз аҽы "Абрагь Барс" иаԥшәымоу Тариел Саманџьиа Лыхнынтәуп. Ахԥатәи аҭыԥ ааникылеит Демур Чхебелиа аҽы "Ваимон Дели" дақәтәаны, ари аҽы ртәуп Мгәыӡырхәатәи аишьцәа Алиаси Дауҭи Жьиаа.

1400 метра инаӡоз адистанциаҟны аиааира згақәаз аҳамҭа ранаршьон Аԥсны Аџьынџьтәылатә еибашьраҿы иҭахаз афырхацәа ргәалашәара ахьӡала. Араҟа актәи аҭыԥ игеит ҳтәылаҿы еицырдыруа аҽыбӷаҟаза Анзор Саманџьиа, уи дзықәтәаз аҽы "Офицер Кинсон" ахьӡуп, Алхас Лакоба итәуп, иара д-Лыхнытәуп.

Аҩбатәи аҭыԥ ааникылеит Џьубеи Аҩӡба – Урыстәылатәи Афедерациа аҽыбӷаҟаза, Аԥсны зҽаԥсазтәыз аспорт азҟаза, дзықәтәаз аҽы "Наваро" Ӷәада анхаҩы Ешсоу Ашәба итәуп. Ахԥатәи аҭыԥ ааникылеит Адам Шегушев, Урыстәылатәи аҽыҩҷкәын, Нодар Ҵышәба иҽы "Аиааира" дақәтәаны.

1941-1945 шықәсқәа рзтәи Аџьынџьтәылатә еибашьра Ду аҿы иҭахаз ргәалашәаразы аиԥхныҩлара иалахәын Аԥснытәи аҽқәа мацара. Ари адистанциа 1600 метра инаӡон. Араҟа актәи аҭыԥ игеит Џьубеи Аҩӡба, уи дзықәтәаз аҽы "Аҳкәажә" Аацы анхаҩы Баграт Аҩӡба итәуп.

Аҩбатәи аҭыԥ агеит Пицунда инхо Беслан Барганџьиа иҽыҩ "Мира", аҽы дақәтәан аҽыҩҷкәын Саир Гәынба. Ахԥатәи аҭыԥ игеит Адам Шегушев, иара дзықәтәаз аҽы "Леди Босс" даԥшәымоуп Ҷлоу анхаҩы Руслан Логәуа.

1800 метра инаӡоз адистанциаҿы еиԥхныҩлон Аԥсны иҟоу Урыстәыла ацҳаражәҳәаҩ Алексеи Двинианин иҳамҭазы. Актәи аҭыԥ игеит Мурзабек Каппушев, Анри Лакәиа иҽы "Боджеро" дақәтәаны (Лыхны), аҩбатәи аҭыԥ ааникылеит Витали Агрба аҽы "Адель Фокс" дақәтәаны, аҽы аԥшәма Даур Сабуа Пицундатәуп. Ахԥатәи аҭыԥ ааникылеит Адам Шегушев, иара дзықәтәаз аҽы "Орхидеиа" зтәу Рашьыҭ Ҵнариа Кәтолтәуп.

Аԥсны Раԥхьатәи ахада Владислав Арӡынба игәалашәара иазкыз аиԥхныҩлара 2000 метра адистанциа азыԥҵәан. Араҟа аиааира игеит аҽыҩҷкәын Витали Агрба, аҽы "Саимон Шорец" дақәтәаны, аҽы аԥшәма  Милор Шәлымба Пицундатәуп, Аԥсны Аҽыбӷаҟазаратә федерациа деиҳабуп. Аҩбатәи аҭыԥ игеит Саир Гәынба аҽыҩ "Бекер" дақәтәаны – аҽы итәуп Пицунда анхаҩы Беслан Барганџьиа. Ахԥатәи аҭыԥ ааникылеит Дмитри Қардиа, аҽы "Макулени" дақәтәаны, уигьы Беслан Барганџьиа итәуп.

Аԥсны ахада Аслана Бжьаниа ихраҿа аиааиразы еиԥхныҩлон 2400 метра инаӡоз адистанциаҟны. Актәи аҭыԥ игеит Џьубеи Аҩӡба аҽыҩ "Фаст Киорл" дақәтәаны, аҽы даԥшәымоуп Ӷәада анхаҩы Ахра Ашәба. Аҽырыҩра аӡбаҩ хада Џьарназ Бениа ишиҳәаз ала, "Фаст Керл" уажәшьҭа ахынтә раан ахада ихраҿа иаиааиуеит – 2017, 2019, 2020 шықәсақәа рзы зегь раԥхьа иааит.

Аҩбатәи аҭыԥ игеит Камзат Улубаев – Кәтол инхо Беслан Аԥҳазоу иҽы "Мисти Дрим" дақәтәаны, ахԥатәи – Витали Агрба, аҽыҩ "Графит" дақәтәаны, уи зтәугьы Милор Шәлымба иоуп. 

Аԥсны аҩбатәи ахада Сергеи Багаԥшь игәалашәаразы аиԥхныҩлара мҩаԥысуан 3200 метра рҟны. Араҟагьы актәи аҭыԥ игеит Џьубеи Аҩӡба, уи дзықәтәаз аҽы "Нарҭ" Алмасхан Хышба итәуп, Пицундатәуп, аҩбатәи аҭыԥ ааникылеит Мурзабек Каппушев аҽы "Доцент" дақәтәаны, аҽы итәуп Беслан Гәынба. Ахԥатәи аҭыԥ игеит Дмитри Қардиа "Лемон Харт-Хром" ҳәа хьӡыс измоу Асҭамыр Сангәлиа иҽы дақәтәаны.

Скачки на кубок президента Абхазии
© Sputnik / Томас Тхайцук
Скачки на кубок президента Абхазии

Аԥсны ахада Ихраҿа агаразы аиԥхныҩлара иаиааиз 200 000 мааҭ иоуит, аҩбатәи аҭыԥ згаз –  100 000 мааҭ, ахԥатәи – 50 000 мааҭ. Егьырҭ аиԥхныҩларақәа рҟны актәи, аҩбатәи, ахԥатәи аҭыԥқәа рзы ирырҭон 50, 30, 20 нызқь мааҭ.

3