АҞӘА, нанҳәа 24 – Sputnik, Сариа Кәарцхьиаԥҳа. Аԥснытәи акоманда актәи аҭыԥ ааннакылеит атанктә биатлон аҟны актәи аицлабраан "Арратә хәмаррақәа-2020" аҟны Подмосковие. Абри атәы Sputnik акорреспондент илзеиҭеиҳәеит атәылахьчара аминистр ихаҭыԥуаҩ Нодар Аҩӡба.
Аԥснытәи акоманда 32 минуҭи 8 секундки рыла алҵшәа аанарԥшит.
"Аҩбатәи адивизион аҟны актәи аицлабра аихшьалақәа рыла, ҳара ҳкоманда актәи аҭыԥ агеит. Ҳаҷкәынцәа алҵшәа бзиақәа аадырԥшит, ацәҟьарақәагьы ирықәшәеит, аамҭагьы рыҽҭарыгӡеит", – иҳәеит Аҩӡба.
Аԥснытәи аделегациа атәылахьчара аминистр Владимиром Ануа раԥхьа днаргыланы Москваҟа ицеит ажәларбжьаратәи арратә хәмаррақәеи афорум "Арра 2020" рҟны рхы аладырхәырц. Аҩӡба иажәақәа рыла, иацы Урыстәылатәи Афедерациа атәылахьчара аминистри иара убас Иран атәылахьчара аминистри иареи аофициалтә еиԥыларақәа рыман.
"Аиԥылараан иззааҭгылаз зҵааран Сергеи Шоигу ааԥхьара ахьыҟаиҵаз азы иҭабуп ҳәа аиаҳәара. Уи ашьҭахь, Аԥсны ахада идҵала, Шоигу ианашьан Афырхаҵара аорден. Уажәы Атәыла ахьчаҩцәа руахәамеи апаркт "Патриот" аҿы Ахьӡ-аԥша аллеиеи ҳарҭаараны ҳаҟоуп", – иҳәеит Аҩӡба.
Атәылахьчара аминистр ихаҭыԥуаҩ иазгәеиҭеит Владимир Ануа уаҵәы, нанҳәа 25 рзы Москва иҟазаара шхыркәшахо. Аха "Арратә хәмаррақәа" макьана ирыцҵахоит.
"Аицлабрақәа аҩбатәи рыхәҭа амза анҵәамҭазы иҟалоит. Урыстәыла еиуеиԥшым арегионқәа рҿы, иаҳҳәап Пенза, аицлабрақәа "Абџьар азҟаза", "Ишәарҭоу араион", "Адәынтәи ахәыҟаҵара" ҟалоит. Арҭ аицлабрақәа зегьы Аԥсны рылахәхоит", – ҳәа азгәеиҭеит Аҩӡба.
Жәларбжьаратәи арратә хәмаррақәа мҩаԥысуеит нанҳәа 23 инаркны цәыббра 5 рҟынӡа. Аартра ацеремониа мҩаԥысит нанҳәа 23 рзы Москватәи аобласт Аконгресс-цәыргақәҵатә центр "Патриот" аҟны.
Иара убас шәаԥхьар ҟалоит:
-
Шоигу: Аԥсны - Алада Кавказ иҟоу ҳҩызеи ҳастратегиатә партниори ауп
