Аԥсны ашәахтәқәеи аизгақәеи рзы аминистрра аамзтәи аусуразы аҳасабырба ҟанаҵеит

15
Аԥсны аԥыза-министр Александр Анқәаб дидикылеит Аԥсны ашәахтәқәеи аизгақәеи рзы аминистр ихаҭыԥуаҩ Мераб Логәуа. Аиԥылараҿы иалацәажәеит 2020 шықәса аҩнуҵҟатәи алагалақәа рыплан анагӡара азҵаарақәа.

АҞӘА, цәыббра 9 - Sputnik. 2020 шықәса аамзтәи алагалақәа рыплан анагӡара иартәеит миллиардки 341 миллиони 829 нызқь мааҭ. Ари аплантә рбага аҟынтәи 81% иҟоуп ҳәа аԥыза-министр Александр Анқәаб иеиҳәеит ашәахтәқәеи аизгақәеи рзы аминистр ихаҭыԥуаҩ Мераб Логәуа.

Логәуа иазгәеиҭеит аамзтәи арбагақәа рҿы ишарбам акурорттә усхк ахашәалақәеи ашәарақәеи. Иара иажәақәа рыла, атуризм аусхк аобиектқәа рфинанстә усура заанаҵтәи аихшьаалақәа аныԥшраны иҟоуп цәыббрамзатәи аҳасабырбақәа рҟны, избанзар аусурақәа нанҳәамза инаркноуп ишрылагаз.

"2019 шықәса ажьырныҳәа 1 инаркны нанҳәа 31 рҟынӡа ареспублика абиуџьет ахь иаланагалеит шәахтә ҳасабла миллиардки 565 миллиони 928 нызқь мааҭ. Уи 14% рылоуп излеиҳау 2020 шықәсазтәи абри аамҭатә рбагақәа. Аха 2020 шықәсазтәи арбагақәа ирылам атуристтә усхк ахашәалақәеи ашәарақәеи", - ҳәа иҳәеит иара.

Логәуа иара убасгьы иазгәеиҭеит Очамчыра, Аҟәа, Гәылрыԥшь араионқәа рыплан шынарыгӡаз. Ипроблеманы иҟоу Гагра араион ауп. Уа аплан анагӡара 46% рылоуп ишынагӡоу.

Иара убас шәаԥхьар ҟалоит:

15

Асы ааигәахоит: Аԥсны ажьырныҳәа аҽеиҩшамҭа ашьҭахь амш зеиԥшрахо

1
(ирҿыцуп 13:23 17.01.2021)
Аԥсны аекологиеи аԥсабарахьчареи рзы Аҳәынҭкомитет иатәу аҳауагәаҭаратә ҟәша аспециалист хада Лариса Ахԥҳа уаанӡа ажьырныҳәамзазы иҟаҵаз амш азԥхьагәаҭаразы адыррақәа халырҭәааит.

АҞӘА, ажьырныҳәа 17 – Sputnik, Бадри Есиава. Аԥсны ақәабаа-сабаа, анаҩс маҷк асгьы леиуеит ажьырныҳәа 17 ауха ҳәа лҳәеит Аԥсны аекологиеи аԥсабарахьчареи рзы Аҳәынҭкомитет иатәу аҳауагәаҭаратә ҟәша аспециалист хада Лариса Ахԥҳа.

"Ажьырныҳәа аҩбатәи азбжа еиҳарак шәшьызаауеит, избанзар ациклонқәа амч рымоуп. Ахьҭақәа ҟалеит, урҭ еиҳагьы рыҽдырӷәӷәоит. Амала иахьазы макьана ациклон ыҟоуп, уи аан аҳауа еиҳа иԥхоуп, антициклон аан аасҭа. Аха уажәшьҭа аҳауа хьшәашәақәа дәықәлеит ҳа ҳахь, аҩадантәи ахьшәашәара лбааит. Иара Амшын еиқәа аҿықә зегь амҽханакуеит. Уаха уи афронт ҳхысраны иҟоуп, уаҵәы ахәылԥазынӡа ақәабаа-сабаа, анаҩс асгьы леип ҳәа ҳгәыӷуеит амшын ага иахьаҵанакуа, аха ишьҭалаӡом", - ҳәа азгәалҭеит лара.

Лара лажәақәа рыла, амшын аҿықә аҟынтәи 5-10 километр инахыганы, амшын аҩаӡараҟынтәи 200 метра аҳаракыраҿы аҳауаԥхарра -2°С инаркны -5°С рҟынӡа илеир ҟалоит. 200 инаркны 500 метра рҟынӡа аҳаракыраҿы аҳауаԥхарра лаҟәуеит -6 инаркны -8°С рҟынӡа. Уи -8°С инаркны -10°С рҟынӡа илеиргьы ҟалоит. Ашьхараҿы -10°С инаркны -15°С рҟынӡа иазыԥшуп.

"Уажәаԥхьа иҟаҵаз азԥхьагәаҭара иаҿурԥшуазар, аҭагылазаашьа аҽаԥсахит. Алышәшәақәа аангылар ауп ажьырныҳәа 22 рзы, аха еиҳа ихьҭахоит. Амза нҵәаанӡа амш шәшьызаауеит. Макьана антициклон ҟалоит ҳәа ҳбом", - лҳәеит Ахԥҳа.

Ахәаша ажьырныҳәа 15 рзы Аԥсны араионқәак рҿы акырцх леит, аха аспециалист ишазгәалҭаз ала, уи акырцх акәӡамызт, асырҳәы акәын.

1
Верующие во время празднования дня Крещения Христова у источника Святого Василиска возле села Каман в Республике Абхазия

Аԥсны ауахәамақәа рыҟны Иаса Қьырса Иӡаахра иазку амҵаныҳәара мҩаԥыргоит

7
(ирҿыцуп 10:21 17.01.2021)
Иаса Қьырса Иӡаахра азгәарҭоит ажьырныҳәа 19 рзы. Аныҳәа азкуп Назареҭтәи Иаса Қьырса Иордан аӡы аҟны иӡаахра. Қьырса динаҭит Иоанн Анцәаиажәаҳәаҩ. Арҭ амшқәа рзы ауахәамақәа рҟны имҩаԥысуа аныҳәарақәа Аӡаахра иадҳәалоуп.

АҞӘА, ажьырныҳәа 17-Sputnik. Аиашахаҵаратә қьырсианра иаҵанакуа ауахәамақәа рҟны имҩаԥгахоит Иаса Қьырса Иӡаахра иазку анцәа имҵаныҳәара, абри атәы иҳәеит Аԥсны Аиашахаҵаратә уахәама аиҳабы аб Виссарион (Аԥлиа).

Арҭ амшқәа рзы ауахәамақәа рҟны имҩаԥысуа аныҳәарақәа Аӡаахра иадҳәалоуп. Ажәытәан Иаса Қьырса иирагьы иӡӡаахрагьы мышкы иазгәарҭон. Иара ихазы аҽӡаахра ԥсыхәа амамкәан иҟамызт. Аӡы иҽӡааихит, иҽҭишьит, уи ала адунеи аӡқәа зегьы ррыцқьаразы. Ари аныҳәазы ишыхьҭоугьы, изылшо, згәы иаҭаху аӡы иҭалоит ҩнуҵҟалагьы, цәеижьлагьы аҽрыцқьаразы.

Қьырса ныҳәа инаркны Аӡаахра аҟынӡа (ажьырныҳәа 7 инаркны 19-нӡа) иԥшьоу, ицқьоу амшқәа ҳәа ирышьҭоуп. Аныҳәа мышкы шыбжьоу чгара мшуп.

Аҽӡаахра амшныҳәаз Анцәа дхазҵо иргәаладыршәоит 30 шықәса ирҭагылаз Иаса Қьырса Галилеинтәи аӡиас Иордан ашҟа дышнеиз иҽӡааихырц азы. Иара аӡы данҭыҵуаз адунеи зегьы ирбарҭахеит Анцәа-Аб, Анцәа-Аԥа, аҳәыҳә асахьа зманы Иаса Қьырса ижәҩахыр иқәтәаз Анцәа-Иԥшьоу идоуҳа.

Аӡаахра амшныҳәа ақьырсианцәа иазгәарҭо иалагеит апостолтә аамҭақәа рзы. Ажәытәан Қьырсеи Анцәаибареи мышкны иҟан, аха аамҭақәак рыла ауахәама урҭ аныҳәақәа еиднагеит. Есышықәса Аӡаахра амш аҽни аухеи аиашахаҵаратә уахәамақәа рҟны аҵак дуӡӡа змоу аӡыԥшьара мҩаԥыргоит.

7