Анасыԥ, агәреибагара: Урыстәыла Ацҳаражәҳәарҭа аԥсуа ҭаацәарақәа амедалқәа ранаршьеит

12
Аҭауад Пиотри иԥҳәыс Феврониеи ргәалашәара иазкны Аҭаацәа, анасыԥ, агәреибагара рымш Урыстәыла есышықәса иазгәарҭоит ԥхынгәы 8 рзы.

АҞӘА, цәыббра 25 – Sputnik, Асмаҭ Ҵәыџьԥҳа. Аԥсны иҟоу Урыстәыла Ацҳаражәҳәаҩ Алексеи Двинианин аԥсуа ҭаацәарақәа хәба агәалашәаратә медалқәа риҭеит Аҭаацәа, анасыԥ, агәреибагара рымш ахьӡала.

© Sputnik / Томас Тхайцук
Урыстәыла Ацҳаражәҳәарҭа аԥсуа ҭаацәарақәа амедалқәа ранаршьеит

Аҭаацәеи, абзиабареи, гәыкала аизыҟазаареи рымш официалла ишьақәырӷәӷәан 2008 шықәса ԥхынгәы 8 рзы. Уи аахыс есышықәса аԥшьақәа Пиотри Феврониеи рныҳәа абри амш азы иазгәарҭон, аха сынтәа акоронавирустә инфекциа иахырҟьаны аҿҳәара иахыган.

"Сара сгәаанагарала, аԥсҭазааратә мҩа ду шәеицанысра фырхаҵарак еиԥшуп. Исҭахуп хаҭа-хаҭала ишәзеиӷьасшьарц агәабзиара, ақәра ду, аҭаацәаратә маншәалара, ақәҿиарақәа", - иҳәеит ацҳаражәҳәаҩ Алексеи Двинианин.

Агәалашәаратә медалқәа ранашьан 62 шықәса еицынхо Тҟәарчалтәи аҭаацәара – Кирилли Маргаритеи Қәаранӡиаа. Кирилл 65 шықәса амашьына ныҟәицон, Маргарита ашкол аҿы абиологиа длырҵон, Аԥсны зҽаԥсазтәыз рҵаҩуп. Ианеибагоз, Кирилл 24 шықәса ихыҵуан, Маргарита – 17.

"Насыԥ ҳаманы ҳаицынхон. Ҩыџьа аԥацәа еицаҳааӡеит. Уажәы ԥшьҩык амоҭацәа ҳамоуп. Ҳхы-ҳгәы ҳақәгәырӷьоит", - лҳәеит Маргарита.

Лара илҳәеит аҭаацәараҿы еснагь аԥыжәара змаз лхаҵа шиакәыз, лара ииҳәо дшацныҟәоз, иаргьы лгәы дшеимыргацыз.

© Sputnik
Урыстәыла Ацҳаражәҳәарҭа аԥсуа ҭаацәарақәа амедалқәа ранаршьеит

"Еимакык анҳаулак, ҳаилацәажәон ҳнеидтәаланы. Ииашоу ииашаму еилҳаргон. Убас ала дасу ҳагхақәа ҳариашон", - лҳәеит лара.

Аҭауад Пиотри иԥҳәыс Феврониеи ргәалашәара иазкны Аҭаацәа, анасыԥ, агәреибагара рымш азгәарҭоит есышықәса Урыстәыла ԥхынгәы 8 рзы.

Символс аныҳәа иаиуит ашьхакакаҷ ашәҭ. Ашьҭахь аныҳәа ахатә медал азырхәыцит. Иара аганқәа руак аҿы ашәҭ анырҵеит, егьи аган аҿы – Пиотри Феврониеи рхаҿсахьақәа. Урыстәылеиԥш аныҳәа азгәарҭоит Болгариа, Белоруссиа, Азербаиџьан, Украина.

12

Раионк аԥсҭазаараҟнытә: Қәычбериа Гал ахадара азиндырратә ҟәша аусура иазкны

15
Гал араион ахадара азиндырратә ҟәша аиҳабы Инал Қәычбериа арадио Sputnik аефир аҿы еиҭеиҳәеит иарбан зҵаарақәоу ирызцәырҵуа араион ауааԥсыра, есыҽнытәи иусура шеиҿкаау атәы.

 

Раионк аԥсҭазаараҟнытә: Қәычбериа Гал ахадара азиндырратә ҟәша аусура иазкны

"Еиҳарак аусура ахьыҟоу араион ахадара ирыдыркыло аԥҟаԥҵәақәа реилыргараҿы ауп. Уи ҳауаажәлар ирызнагатәуп, рхы иахьадырхәаша, ишадырхәаша раҳәатәуп. Насгьы ҳара иаҳзаауа Аԥсны ахада идҵақәа роума, аԥыза-министр идҵақәа роума, дара зегьы еилырганы ажәлар ирызнагатәуп, урҭ адҵақәа инарықәыршәаны аусура мҩаԥысларц азы. Уи адагьы мчыбжьык ахь ҩынтә ауааԥсыра рызҵаарақәа рыла исыдыскылоит. Иара уи аамҭа абжьарагьы ианааиуа иҟоуп. Ауааԥсыра еиҳарак изыргәамҵуа атәылауашәҟәы аиура азҵаароуп, иҟоуп иара убас ашәахтәқәа ршәараҿы азҵаарақәа анрызцәырҵуагьы, анаҩс ауалафахәы ацҵара иаҵанакуа уҳәа, иаҳзааиуа рацәаҩуп, иахьынӡаҳалшо ҳрыхәоит", - ҳәа еиҭеиҳәеит Қәычбериа.

 

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Иара убас шәаԥхьар ҟалоит:

15

Асигареҭқәа S-класс ала: Аԥснынтәи Урыстәылаҟа иргоз аконтрабанда аанкылоуп

5
(ирҿыцуп 19:37 19.10.2020)
Атранспорттә хархәага агәаҭаратә комплекс ала игәаҭан, иагьыԥшаан атранспорт хархәага аконструкциа иаҵанамкуа аҭагәаҩарақәа рҿы иҭаз иҭагаламыз аҭаҭын. Аҭаҭын аалыҵ аконтрабандаз аусҭҵаара хацыркуп.

АҞӘА, жьҭаара 19 - Sputnik. Аҳазалхратә ҭыԥ "Адлер" аҿы аҳазалхратәи аҳәаахьчаратәи гәаҭараан иаанкылан аконтрабандатә аалыҵ зманы Аԥснынтәи Урыстәылаҟа ицоз автомашьына Мерседес-Бенц S450 ҳәа аанацҳауеит Шәача аҳазалхырҭа апресс-маҵзура.

© Foto / пресс-служба сочинской таможни
Аконтрабандатә аалыҵ зманы Аԥснынтәи Урыстәылаҟа ицоз автомашьына Мерседес-Бенц S450

Атранспорттә хархәага агәаҭаратә комплекс ала игәаҭан, иагьыԥшаан атранспорт хархәага аконструкциа иаҵанамкуа аҭагәаҩарақәа.

Ашьҭахьтәи апассаџьыртә тәарҭақәа анҭырга ашьҭахь, иԥшаан абылтәыҭгага ашьақәыргыларазы абылтәыҭра алиукқәа ҩба. Аха убри аан абылтәҭгагақәа ыҟамызт.

© Foto / пресс-служба Сочинской таможни

Абылтәыҭраҿы иҭаҵәахын аҭаҭын аалыҵ "HT Superslims", "NZ GOLDCOMPACT" аԥсуа акцизтә маркақәа рықәҵаны.

Даҽа ҵәахырҭакгьы ԥшаан абагаж аҟәшеи автомашьына асалони рыбжьара. Арагьы иҭаҵәахын 24 ҭоԥ асигареҭ "HTSuperslims".

Иааидкыланы иаарԥшын 864 пачка асигареҭ – 17280 цыра.

Мерседес арныҟәцаҩ, Шәача ауаҩԥсы, илҳәеит атауар Аԥсны ишаалхәаз акоммерциа хықәкыс иҟаҵаны. Аҳазалхратә ҳәааҟны аҭаҭын аалыҵ ахгара аԥкрақәа шамаз дырны иара лҵәахит.

Изакәаным атауари автомашьынеи лымхуп. Аҭаҭын аалыҵ аекспертизахь инашьҭуп. Абри ахҭыс аганахьала аусҭҵаара хацыркуп Урыстәыла АЗ ахәҭаҷ 16.1 ахәҭа 2 инақәыршәаны.

Иара убас шәаԥхьар ҟалоит:

5