АҞӘА, цәыббра 25 - Sputnik. Аԥсны атәылауаҩ Џьемали Соселиа иӷьычра иалахәу ҳәа агәызҩара ззыҟоу аанкылоуп ҳәа аанацҳауеит Аԥсны ААР асаит.
"Имҩаԥгаз ауснагӡатәқәа ирылҵшәаны цәыббра 23 ауха Қырҭтәыла аҵакыраҿы иӷьычыз ауаҩы ихы дақәиҭтәын", - аҳәоит адырраҭараҿы.
Зых иақәиҭыртәыз Соселиа игәабзиара шәарҭам, иԥсҭазаара акгьы аԥырхагам.
"Аусҭҵаара-оперативтәи аоператив-ԥшааратәи уснагӡатәқәа мҩаԥаагоит ацәгьоура иалахәу рышьақәыргыларази раанкыларази", - аҳәоит Аԥсны ААР асаит.
Уаанӡа Соселиа ихы дшақәиҭтәу афакт шьақәҳарӷәӷәоит ҳәа Sputnik иазеиҭарҳәеит Апрокуратура хадаҿы.
1962 шықәсазы ииз Џьемали Соселиа дшырӷьычыз азы Аҩнуҵҟатәи аусқәа Гал араионтә аҟәша аҷаԥшьаратә хәҭахьы адырра ҟалеит цәыббра 6 ауха.
Ашьаусԥшаара-оперативтә гәыԥ ишеилнакааз ала, цәыббра 5 асааҭ 22 рзеиԥш Тҟәарчал араион Речхә ақыҭан амаҭәа еиқәаҵәа рышәҵаны, асабрадақәа рхаҵаны ари ақыҭа анхаҩы Џьемали Соселиа дзықәтәаз автомашьына BMW ааныркылеит, анаҩс урҭ еилкаам ахаҿқәа Соселиа дрыманы Гал араион Аберқыҭ аганахь идәықәлеит.
Аусҭҵааҩцәа ргәаанагарала "ахҭыс ахьыҟалаз аҭыԥ аҟынтәи ҩ-километрак ахьыбжьоу астанциа маҷ ЕгрыГЕС аҵакыраҿы идырым ахаҿқәеи Соселиеи рыбжьара аимак ҟалеит, дара гыршәала еицәҳауан, анаҩс аисра иалагеит, уи ашьҭахь дара мчыла Џьемали Соселиа даанкыланы, Қырҭтәылатәи Ареспублика аҳәынҭқарратә ҳәаахь идәықәлеит".
Азинхьчаратә усбарҭақәа русзуҩцәа Соселиа иавтомашьына рбеит Гал араион Алаҟәымҳара ақыҭа амҩақәа руак аҿы.
