Расфасованное в свертки наркотическое вещество метадон

Афон ҿыц иаанкылоуп Аԥсныҟа иааргахьоу рахьтә аметадон иреиҳаӡоу апартиа

12
Азинхьчаратә усбарҭақәа рыхәшьарақәа рыла иаанкылоу анаркотиктә партиа ахәԥса 14 миллион рҟынӡа инаӡоит.

АҞӘА, цәыббра 25 – Sputnik. Аԥсны Аҩнуҵҟатәи аусқәа рминистрра анаркотикқәа реикәыршара ахылаԥшраз Аусбарҭа аусзуҩцәа аметадон Аԥсныҟа аара ԥыркит, аҭиҩцәа аанкылоуп ҳәа аанацҳауеит Аԥсны ААР апресс-маҵзура.

Имҩаԥгаз аоперациа иалнаршеит аметадон рацәа ареспубликахь алагалара аԥырҟәҟәаара.

"Аексперт-криминалистикатә центр аҿы иҭырҵааз амаҭәашьар акапан 350 грамм рҟынӡа инаӡоит. Ахәԥса 14 миллион мааҭ артәоит", - азгәарҭеит апресс-маҵзураҿы.

Аԥсны Аҩнуҵҟатәи аусқәа рминистрра Анаркотикқәа реикәыршара ахылаԥшраз аусбарҭа аиҳабы Асҭамыр Ԥачалиа еиҭеиҳәеит анаркотикҭиҩцәа раанкылашьа шыҟалаз.

Аусбарҭа аусзуҩцәа еилыркааит ареспубликаҿы даҽа каналк аусура ишалагаз. Анаркотик зхы иазырхәо иара "ацыгантә" ҳәа иашьҭан. Анаркотик аҭиҩцәа аметадон рыладырҵәон аҵәахырҭа ҭыԥқәа рыцхыраарала. Аиҳарак иалыркаауан ашколқәа рааигәара иҟоу адәқәеи, уаҩ дызхым ахыбрақәеи, афонартә шьаҟақәеи.

Аиҳарак дара "аус руан" Афон ҿыц. Иара убасгьы аҵәахқәа шьҭарҵон Аҟәа араион аҿы.

Анаркотикқәа зтәу ҳәа ишьоу Артур Никитини аҵәахқәа шьҭазҵоз Роман Сачкои аанкылан цәыббра 17 рзы Алада Ешыра 38 шықәса зхыҵуаз Сурам Кәакәасқьыр данааныркыла ашьҭахь. Уи иҩнаҿы имҩаԥгаз аимдара аан иԥшаан аметадон злаԥсаз афольгатә еилаҳәарақәа 19. Иара ишиҳәаз ала, анаркотикқәа аҵәахҭыԥқәа рҿы изышьҭарҵон.

"Абри ашьҭахь азинхьчаҩцәа аус адырулеит аоперативтә информациа. Адырҩаҽныҵәҟьа иаанкылахеит Артур Никитини Роман Сачкои. Анаркотикатә еилаҳәарақәа рыдбалан Сачкогьы Никитингьы. Анаркотикқәа реиҳарак рмашьынаҿы иҵәахын", - ҳәа иҳәоит Аԥсны Аҩнуҵҟатәи аусқәа рминистрра Анаркотикқәа реикәыршара ахылаԥшраз аусбарҭа аиҳабы Асҭамыр Ԥачалиа

Абри ашьҭахьтәи аоперативтә уснагӡатәқәа раан Сачкои Никитини ирымхын уаанӡа ирҵәаххьаз 54 грамм анаркотикатә маҭәашьар.

Ростов-на-Дону аҟынтәи анаркотикқәа рыҭиҩцәа Афон ҿыц алырхит, избанзар аԥхынтә сезон аан аԥсшьаҩцәа аҽрыларҩашьара мариоуп.

Артур Никитини Роман Сачкои аанкылоуп. Дара рганахьала аусҭҵаара хацыркуп. Ашьаусҭҵааратә оперативтә уснагӡатәқәа ирыцҵоуп.

12

Пицунда ахада атуристцәа рзы: 2020 шықәсазы аахәаратә лшара еиҳахеит

1
Аԥсны атуризм аминистрра адыррала 2020 шықәса нанҳәа 1 инаркны Аԥсны иаҭааит 600 нызқьҩык инареиҳаны атуристцәа.

АҞӘА, жьҭаара 29 – Sputnik, Бадри Есиава. 2020 шықәсазы Пицунда иаҭааз атуристцәа раахәаратә лшара еиҳахеит ҳәа Sputnik иазеиҭеиҳәеит  Пицунда ахада Алхас Шамба.

"Сара 50 шықәса ҵуеит Пицунда сынхоижьҭеи. Ибзианы исгәалашәоит Лиудмила Гурченкои Ельдар Риазановы неиааиуа ҳаԥшаҳәа иананыз. Дысгәалашәоит аолимпиатә чемпион Владислав Третиак ҳпансионат аҿы иԥсы шишьоз. Еиҿсырԥшыша сымоуп. Иахьатәи атуристцәа усҟантәи аамҭақәа рыҩаӡараҟынӡа раахәаратә лшара ҟаланы иҟоуп", - иҳәеит иара.

Шамба иажәақәа рыла, сынтәа, Пицунда иаҭааз ҵыԥх аасҭа рхыԥхьаӡара шеиҵоугьы нанҳәамзаахыс акаҳуажәырҭақәа, ақьафурҭақәа, ахатә сектор ҭәын.

Ақалақь ахада ари атенденциа адиҳәалоит апандемиа иахырҟьаны урыстәылаа адунеитә курортқәарахь рцара ахьыԥкхаз. Иаартыз атәылақәа иреиуан Аԥсны.

"Акаҳуажәырҭақәа рҭааҩцәа рацәаҩын, аплиажқәа, аотельқәа рҿы аномерқәа иара убасгьы иҭәын. Заҟаҩ ҳҭааз сызҳәом, аха абри аамҭазы уаанӡа  Пицунда иаҭаауаз рхыԥхьаӡара абжанӡа ыҟан", - иҳәеит Шамба.

Нанҳәа акы азы аурыс-аԥсуа ҳәаа аадыртызар, Аԥсны иаҭаахьеит 600 000-ҩык атуристцәа иҳәеит Аԥсны атуризм аминистр Ҭеимураз Хышба Аԥсуа телехәаԥшраҿы апресс-конференциа анымҩаԥигоз.

1

"Ковид" аԥырхагамхар: Гагра агәамсам аизгаразы атехника аахәара азыԥхьагәаҭоуп

2
(ирҿыцуп 15:40 29.10.2020)
Иазхоны иҟоу агәамсамеизакырҭа атехникеи аконтеинерқәеи раахәаразы 20 миллион мааҭ аҭахны иҟоуп.

АҞӘА, жьҭаара 29 – Sputnik, Бадри Есиава. Аԥхьаҟатәи акурорттә сезон азы Гагра агәамсам аизгаразы атехника аахәара азыԥхьагәаҭоуп акоронавирус апандемиа аԥырхагамхар, абри атәы Sputnik иазеиҭеиҳәеит Гагра араион ақалақьтә нхамҩа аусбарҭа аиҳабы Роман Чагәаа.

Иара иҳәеит иахьазы х-машьынак шракәу ирымоу, аха иахәҭаны иазыԥхьаӡоу ԥшьба-хәба шракәу.

"Асезон алагамҭаз амашьынақәа ҩба ракәын иҳамаз агәамсам ақәгаразы. Ахԥатәи амашьына аремонт азаауит. Аха урҭгьы азхом ақалақь арыцқьаразы аиҳарак аԥхынра аамҭазы. Ианамуӡа 4 ма 5 машьына ҳҭахуп. Иара убасгьы иаахәатәуп 400 цыра агәамсамҭаҵарҭақәа", - иҳәеит Чагәаа.

Чагәаа ишиԥхьаӡо ала иҿыцу атехника 3-4 миллион мааҭ иаԥсоуп. Иааидкыланы 15 миллион мааҭ рҟынӡа инаӡоит. Уи адагьы 5 миллион мааҭ рҟынӡа аинвентарь аахәатәуп.

"Ҳақәгәыӷуеит апандемиа шԥанымҵәари ҳәа. Иара убасгьы ҳгәыӷуеит апроблема аӡбразы атәыла аиҳабыра ҳацхраап ҳәа. Уи залмыршахар, абанк аҿы акредит гатәхоит, избанзар атехника ада ԥсыхәа ҳамам", - иҳәеит Чагәаа.

Акурорттә сезон аан агәамсам Гагра инахыкны иҟоу аполигон ахь иганы икарыжьуеит, мышкала 15-20 реис ҟарҵоит. Ари аполигон ахь инаргоит Гәдоуҭа араион аҿтәи агәамсамгьы. Ацрыҵқәа атехника ҷыдала анышә иарҭоит, агәамсам аус еиҭадулара ахьзалымшо азы.

2