Архивное фото СИЗО Дранда

Апрокуратура хадеи Аҩнуҵҟатәи аусқәа рминистрреи: азаҭ ацәгьоура бааԥсқәа аҵанакыр ауеит

12
(ирҿыцуп 11:20 29.09.2020)
Аԥсны Апарламент адепутатцәа цәыббра 24 рзы Аиааиреи Ахьыԥшымреи рымш 27 шықәса ахыҵра ахьӡала азаҭ аҭараз ақәҵара рыдыркылеит. Азаҭ ахь иаҵанакыр алшоит 50-ҩык рҟынӡа иҭаку ҳуааԥсыра.

АҞӘА, цәыббра 28 – Sputnik. Аԥсны Апрокуратура хадеи Аҩнуҵҟатәи аусқәа рминистрреи рҿы ашәара аадырԥшуеит адепутатцәа ирыдыркылаз азаҭ аҭаразы азакәан апроект ахь ацәгьоура бааԥсқәа ҟазҵаз аҵанакыр ҟалоит ҳәа.

"Азаҭ азы ақәҵара ахԥатәи апункт аҿы иаҳәоит аусмҩаԥгара аанкылахоит аинвалидцәеи ачымазцәеи рганахьала ҳәа, аха ара иарбам ацәгьоура ахьанҭара алкааны. Иалшоит ацәгьара бааԥс зузгьы аҵанакыр", - ҳәа арадио Sputnik иазеиҭеиҳәеит апрокурор хада ицхырааҩ Даур Амҷба, Апарламент адкыламҭа ахҳәаа аҭо.

Апрокуратура хада ацәшәара амоуп аибашьра алахәрази ачымазаратә ҭагылазаашьази иԥаршеиу адыррақәа ахархәара роур ҟалоит ҳәа. Убри азы адокументқәа зегьы иныҭкааны иҭҵаалатәуп ҳәа иҳәеит иара.

Аҩнуҵҟатәи аусқәа рминистр ихаҭыԥуаҩ Беслан Ҷкадуа Аԥсуа телехәаԥшра аефир аҿы иазгәеиҭеит аибашьра аветеранцәа ҳаҭыр ду шрықәиҵо, аха Дранда иҭаку реиҳараҩык румҭақәа ацәгьоура хьанҭахьы ишаҵанакуа, убри азы ирхырымгац аамҭа аркьаҿра ҵаҵӷәы шамам.

Ҷкадуа иара убасгьы иҳәеит азаҭ СИЗО ахьҭәу ауп ари ақәҵара зрыдыркыло ҳәа мзызс иааргаз шьаҭара шазымуа.

Иара иажәақәа рыла, иахьазы Дранда иҭакуп 310-ҩык зус ӡбоу. Ҷкадуа иазгәеиҭеит ара 500-600-ҩык рҟынӡагьы аамҭак ала ианҭакыз шыҟаз.

Ашәарҭара ыҟоуп азаҭҭараан Кәыдрытәи аиҩхаа ахақәиҭтәра иалахәыз рсиа аиашара иацәыхарахар алшоит, абри аоперациа иалахәымызгьы ахақәиҭра роур ауеит ҳәа иҳәеит Апарламент адепутат Баҭал Аиба.

Аԥсуа телехәаԥшра аефир аҿы иара иҳәеит азаҭҭара даҿагыланы ибжьы шиҭииз. Азаҭҭара амассатә ҟазшьа аиуит ҳәа азгәеиҭеит иара. Игәаанагаралагьы аҳәынҭқарра аҳаҭыр ланарҟәуеит. Адепутатцәа ауаажәлар рҿаԥхьа аҭакԥхықәра рымазароуп ҳәа иазишьоит Аиба.

"Аибашьра аветеранцәа адгылара рыҭо ԥхьаҟазы рнапқәа ԥҳартлоит. Дара ирдырлоит уажәшьҭарнахыс уаҵәгьы ацәгьа рур азаҭ иаҵанакыр шалшо", - иҳәеит апарламентари.

Апарламент ақәҵара инақәыршәаны арахь иаҵанакуеит Аԥсны 1992-1993 шықәсқәа раантәи Аџьынџьтәылатә еибашьра алахәылацәа, арезервистцәа, 2008 шықәсазы Кәыдрытәи аиҩхааҿы имҩаԥысуаз аоперациа алахәылацәа.

Ацәгьоура бааԥсы ма ацәгьоура бааԥсӡа зуз ирхыргараны иҟоу ашықәсқәа рҟынтәи рхы иақәиҭыртәуеит азаҭ инақәыршәаны.

Апарламент иаднакылаз азакәан амчра аиуеит иара официалла ианкьыԥхьха инаркны, ҩымз рыҩнуҵҟа инагӡахароуп.

"Ҩымз ҳамоуп амедицинатә документациа аилыргаразы. Ауаа актәии аҩбатәии агәыԥқәа иртәу иринвалидцәоу, Аԥсны 1992-1993 шықәсқәа раантәи Аџьынџьтәылатә еибашьра иалахәылацәоу, 2008 шықәсазы Кәыдрытәи аиҩхааҿы имҩаԥысуаз аоперациа иалахәылацәоу аилыргаразы", - иҳәеит арадио Sputnik аҿы Амҷба.

Даур Амҷба ақәҵара анагӡара рықәҵоуп ҳәа иҳәеит:

"Ахарадҵа анагӡара ахәҭаҿы уи аҩнуҵҟатәи аусқәа русбарҭақәа ирықәҵоуп, ахараԥса ашәара ахәҭаҿы – аӡбарҭа анагӡаҩцәа. Аха арҭ аусқәа зегьы аӡбарҭахь рынашьҭраан еилыргахоит хымԥада апрокурор иалахәрала. Уи адагьы аусҭҵаараҿ иҟоу аусқәа ахьчара аган азыҳәалеи зус рыӡбо иақәшаҳаҭралеи ирыхәаԥшраны иҟоуп. Хымԥада азаҭҭара иақәшаҳаҭзароуп. Апрокурор ихаҭыԥуаҩ дақәшаҳаҭу дақәшаҳаҭму азгәеиҭароуп", - ҳәа иҳәеит Амҷба.

Ауаҩытәыҩса изинқәа рыхьчара знапы иану Асида Шьаҟрылԥҳа АТ аефир аҿы илҳәеит Драндатәи абахҭа ауаҩытәыҩса иҟазаара анормақәа ишрықәымшәо, аха ауаажәларра рҿы ирыдыркылаз ақәҵара еиуеиԥшымкәа ишрыдыркылаз.

"27 шықәса рыҩнуҵҟа ари ажәбатәи заҭуп. Урҭ рҟынтәи фба Аиааира амш аламҭалаз ирыдкылан. Иуҳәар ауеит есхышықәса азаҭ ҳадаҳкылоит ҳәа. Ҳара азаҭ азы азакәан ҳамам. Сгәы иаанагоит адепутатцәа абри азҵаараҿы аветеранцәа рхы иархәаны абасеиԥш иҟоу агуманитартә акциа аҳаҭыр ладырҟәуеит ҳәа", - лҳәеит лара.

Шьаҟрылԥҳа оумашәа илбоит адепутаттә корпус ахымҩаԥгашьа. Ганкахьала анаркотикқәа реикәыршаразы ахара дырӷәӷәеит, даҽа ганкахьала еимактәу азаҭ рыдыркылеит.

"Апарламент иахьа асанкциақәа арӷәӷәоит, уаҵәы ацәгьа зуз рахьырхәра иацәцартә иҟарҵоит. Исзеилкаауам", - лҳәеит лара.

Аԥсны ахада Аслан Бжьаниа анапынҵа ҟаиҵеит азаҭ азы азҵаара иныҭкааны иҭҵаазарц.

Цәыббра 24 рзы Аԥсны Апарламент адепутатцәа Аиааиреи Ахьыԥшымреи рымш 27 шықәса ахыҵра ахьӡала азаҭ аҭараз ақәҵара рыдыркылеит.

Ақәҵара ауаажәларра рҿы еиуеиԥшым агәаанагарақәа цәырнагеит. Аҩнуҵҟатәи аусқәа рминистрраҿы аҳәамҭа ҟарҵеит азакәан ахәҭақәак рынагӡара азинхьчаратәи аӡбарҭатәи системақәа адискредитациа рырҭоит, аҳәынҭқаррахьгьы агәрамгара цәырнагоит ҳәа.

Цәыббра 28 рзы Апарламент аҳәынҭқарра-зинтә политиказ аилак ахантәаҩы Валери Агрба апресс-конференциа мҩаԥигеит, азаҭ азы азакәан аганахьала акритикцәагьы аҭакқәа риҭеит.

12

Аԥсны даҽа 73-ҩык акоронавирус рыдырбалеит, ҩыџьа рыԥсҭазаара иалҵит

4
(ирҿыцуп 21:13 31.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4233-ҩык ыҟоуп. Урҭ рахьтә ргәы бзиахеит 2267-ҩык, рыԥсҭазаара иалҵит 42-ҩык.

АҞӘА, жьҭаара 31 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 367 ҟаҵан, урҭ рахьтә акоронавирус аарԥшын 73 тест рҟны ҳәа аанацҳауеит Аԥсны ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 132-ҩык ауааԥсыра, урҭ рахьтә 114-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 23-ҩык, ибжьаратәуп - 27-ҩык, илҩаауп жәаҩык апациентцәа. Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 60-ҩык апациентцәа. 57-ҩык рҭагылазаашьа бжьаратәуп ҳәа иԥхьаӡоуп, хҩык рҭагылазаашьа бааԥсуп.

Аоперштаб иара убас иаанацҳаит жьҭаара 31 рзы Аҟәа асасааирҭа "Аиҭар" аҟны иаарту урыстәылатәи хырхарҭарацәалатәи агоспиталь аҟны акоронавирус злаз ҩыџьа рыԥсҭазаара ишалҵыз.

Иԥсҭазаара далҵит COVID-19 ззышьақәырӷәӷәаз 1934 шықәса рзы ииз апациент. Иара ҩганктәи аполисегментартә гәыҵәкра ӷәӷәала илаҽны дыҟан. Иҭагылазаашьа акыр ибааԥсын. Жьҭаара 31 ашьыжь иара иԥсҭазаара далҵит игәы-шьадатәи иԥсыԥлагаҩагаратәи зымхара иахҟьаны.

1942 шықәсазы ииз COVID-19 ззышьақәырӷәӷәаз апациенткагьы жьҭаара 31 рзы лыԥсҭазаара далҵит. Лара ахәышәтәырҭанҭыҵтәи ҩганктәи асубтоталтә полисегментартә гәыҵәкра лыман, иара убас егьырҭ асоматикатә чымазарақәагьы лцәа иалан.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

  • Акоронавирус иазку ажәабжьқәа зегьы шәрыԥхьар ҟалоит абра>>
4
Атемақәа:
Ачымазара ҿкы – акоронавирус Аԥсни адунеи аҿи: иалкаау

Сангәлиа аԥсуа сериал "Алахьынҵа" азы: ҳазыԥшымызт ас ауаа ирыдыркылап ҳәа

8
Аԥсуа бызшәа аҿиара иазырхоу апроект ала имҩаԥысуеит асериал "Алахьынҵа" аҭыхрақәа. Апроект автор, арежиссиор-ақәрыгылаҩ, Саид Сангәлиа арадио Sputnik аефир аҿы еиҭеиҳәеит гәыԥҩык аҿар асериал аҭыхра шаԥшьыргаз атәы.
Сангәлиа аԥсуа сериал "Алахьынҵа" азы: ҳазыԥшымызт ас еиԥш ауаа ирыдыркылап ҳәа

"Аинтернет сериал аԥҵара схала исмыӡбеит, дсыцхрааит Мран Алҭеиба. Апроект иаалырҟьан иӡбоу ак акәӡам, акыраамҭа ҳазнеиуан. Ибзиангьы еилаҳкаауан ауадаҩрақәа рацәаны ҳшызцәырҵуаз, еиҳарак атехника аганахьала. Ҟәрышьқәак ааилаԥсаны иааҳхәеит амикрофонқәа уҳәа зыда ԥсыхәа ыҟам атехника. Иара ҳбызшәала иҭҳажьырц ҳҭахын, избанзар, аԥсшәа аӡыргара иацхраауеит. Асериал арԥыси аҭыԥҳаи рыбзиабара иазкуп. Сериак 5-7 минуҭк раҟара ицалоит, х-сезонк рыла ишьақәгылазаауеит, сезонк аҿы жәа-сериак ҟалоит. Асериал асоциалтә даҟьақәа рҿы уахәаԥшыр улшоит. Уаҟа ихәмаруа актиорцәа аҟазара злоу, абызшәа бзианы издыруа роуп, иҟоуп аҿар, хымԥада, аҟазара злоу, аха рбызшәа хьысҳауп, убри аҟнытә иаҳа иззымариоу аалаҳхын, аҭыхрақәа ҳрылагеит", - ҳәа еиҭеиҳәеит Сангәлиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Иара убас шәаԥхьар ҟалоит:

8