Аԥстәкәа рыхьчара амш азы Пицундатәи ашколхәыҷқәа еиҿрыкааз акциа

Ахәбабақәа рыцхырааразы: аԥстәқәа ирызку агәыҳалалратә акциа мҩаԥысит Пицунда

376
(ирҿыцуп 15:22 04.10.2020)
Жьҭаара 4 адунеизегьтәи аԥстәқәа рыхьчара иамшуп. Ари арыцхә инамаданы Пицундатәи абжьаратә школ №2 аҟны, 1-тәи "а" акласс аҵаҩцәа раԥшьгарала имҩаԥган "Ахәбабақәа рыцхырааразы" захьӡыз агәыҳалалратә акциа.

Саида Жьиԥҳа, Sputnik

"Ахәбабақәа рыцхырааразы" захьӡыз агәыҳалалратә акциа аҳәаақәа ирҭагӡаны 1-тәи "а" акласс арҵаҩы Алиона Оҭар-иԥҳа Ҷанԥҳа имҩаԥылгеит акласстә сааҭқәеи аиҿцәажәарақәеи. Ахәыҷқәа аҩны ирымаз аԥстәқәа рсахьақәа ҭыхны, нас ирыдҳәалаз аҭоурых хәыҷқәа нацҵаны, ашкол актәи аихагылаҿы еиҿыркааит акәакь. Иара убраҟа ишьақәыргылан аурнагьы. Акциа иалахәын агәаҳәара змаз зегьы.

"Адунеизегьтәи аԥстәқәа рыхьчара амш, жьҭаара 4 амҽыша иақәшәоит аҟнытә, ҳара заа азгәаҭара ҳалагеит. Агәыҳалалратә акциа хықәкыс иамоуп ахәыҷқәа арыцҳашьареи, аҭакԥхықәреи рылааӡара, иара убас хылаԥшрада адәы иқәу аԥстәқәа рлахьынҵа аӡбара шаҭаху деилыркаара", - лҳәеит арҵаҩы Алиона Ҷанԥҳа.

Ахәыҷқәа ргәы хыҭ-хыҭуа иазыԥшын акциа. Агәаҳәарагьы рыман Цандрыԥшь аҳабла иаҵанакуа, Сальма ақыҭан иҟоу алақәа рыԥхьарҭа аҭаара, аха аҭагылазаашьа иалнамыршеит. Уеизгьы ргәы кармыжьит. Рыҩнатә ԥстәқәа ирыдҳәалаз ажәабжьқәа еиҭарҳәеит.

"Ааԥынра, сашьеи сареи агәамсамеизгарҭаҿы ҩ-цгәы хәыҷык ҳбеит, аиқәаҵәеи, аԥшьи. Аиқәаҵәа амузыкатә школ арҵаҩы Татиана Валентин-иԥҳа илаҳҭеит ибзианы ишылааӡоз ҳдыруан азы, егьи ҳара иаҳгеит. Иахьа ҳацгәы "Рыжик" идухеит, иӷәӷәахеит, ашәарыцара иалагеит", - ҳәа дгәырӷьаҵәа еиҭалҳәеит актәи акласс аҵаҩы Марина Прекраснова.

Аԥстәкәа рыхьчара амш азы Пицундатәи ашколхәыҷқәа еиҿрыкааз акциа
© Foto / Саида Жьиԥҳа
Аԥстәкәа рыхьчара амш азы Пицундатәи ашколхәыҷқәа еиҿрыкааз акциа

Ахәыҷқәа ражәақәа рыла иубаратәы иҟан рыҩнаҭақәа рҿы аԥстәқәа рахь арыцҳашьара шыҟоу. Уи угәы имахәарц залшом.

Алиона Ҷанԥҳа лҵаҩцәа рыдагьы акциа рхы аладырхәит  егьырҭ аклассқәагьы. Убас, 500 мааҭ аалышьҭит Алаҳаӡыхьтәи абжьаратә школ №1 аҵаҩы Олесиа Казанџьиан.

"Ахәыҷқәа, иԥшәымадоу аԥстәқәа ацхыраара рыҭаразы, акрыфарҭа иазкны ирымаз аԥарахәыҷқәа ирмеигӡаӡакәа аурна иҭарыԥсон. Џьоукы рҭаацәа иаархәаз алақәеи, ацыгәқәеи ирԥшшоу ахәы ааргеит. Иҟоуп ахәшәқәа назгаз", - ҳәа азгәалҭоит арҵаҩы.

Бжьышықәса зхыҵуа Елина Занҭариаԥҳа "Сара, ҽнак акрыфарҭахь сымнеир акагьы сыхьуам, аҩны змам алахәыҷы, мамзаргьы ацгәыхәыҷы сацхраар еиҳа еиӷьхоит" лҳәеит. Ахәшә аазгаз Лука Чихьериа аԥстәқәа зегьы ргәы бзиазар иҭахуп.

Аԥстәкәа рыхьчара амш азы Пицундатәи ашколхәыҷқәа еиҿрыкааз акциа
© Foto / Саида Жьиԥҳа
Аԥстәкәа рыхьчара амш азы Пицундатәи ашколхәыҷқәа еиҿрыкааз акциа

Иахьазы, ахәыҷқәа рымчала еидкылоуп 20 кьыла ирԥшшоу ахәы, 13 ҿаҳәара аконсервтә афатә, ахәшәтә препаратқәа ҩба, ԥарала 4115 мааҭ. Акциа уаҵәтәи амш азгьы иацҵахоит азы еиқәыԥхьаӡоу аизгақәа харҭәаахоит. Анаҩс, еидкылоу зегьы аҭахоит аԥстәқәа реиқәырхаратә агәыҳалалратә фонд "Багира".

"Алиона Оҭар-иԥҳа аҭел данысзас, аиашазы сгәы ԥшааит, сылаӷырӡқәагьы аахыҳәҳәалеит. Ауаҩы дшыхәыҷу арыцҳашьара илааӡазар, адунеи аҿы ацәгьара маҷхоит. Шаҟантәи сыла иабахьеи, аҭаацәа рхәыҷқәа ишырбо адәаны лак рбар, алаба, ма ахаҳә анагәыдырҵо. Ус иҟалаӡом. Ала ҭрысны ирыцҳар алшоит, нас иҿиоит ацәымӷшьара. Иԥшәымадоу аԥстәқәа рганахь агәыразра шаарԥштәу ҳәалатәуп аҩни, ашколқәеи рҿы. Сара сыхәҭаахьала акциа еиҿызкааз ахәыҷқәеи, рырҵаҩи иҭабуп ҳәа расҳәоит. Дара наҟ-наҟ ауаҩра шрылҵуа агәра згоит", - ҳәа лцәанырреи, лгәаанагареи ҳацеиҩылшеит агәыҳалаларатә фонд "Багира" аиҳабы Саида Оҭырԥҳа.

Сальма ақыҭан иҟоу аԥхьарҭаҿы алақәа хышә ыҟоуп. Пицундатәи ахәыҷқәа еидыркылаз афатә даара ицхыраагӡахоит урҭ рзы.

Саида Оҭырԥҳа "Ахәбабақәа рыцхырааразы" акциа иалахәыз арабадырразы данцо, лгәы иҭоуп афонд "Багира" ахьӡала асиурприз рзеиҿкаара.

Пицундатәи абжьаратә школ №2, 1-тәи "а" акласс арҵаҩы Алиона Ҷанԥҳа иазгәалҭеит, акциа ахықәкы нагӡахеит уҳәар шалшо. Абас еиԥш агәыҳалаларатә ҵакы змоу аусмҩаԥгатәқәа ахәыҷқәа ганрацәала иааӡоит.

 

 

376

Аԥсны даҽа 73-ҩык акоронавирус рыдырбалеит, ҩыџьа рыԥсҭазаара иалҵит

4
(ирҿыцуп 21:13 31.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4233-ҩык ыҟоуп. Урҭ рахьтә ргәы бзиахеит 2267-ҩык, рыԥсҭазаара иалҵит 42-ҩык.

АҞӘА, жьҭаара 31 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 367 ҟаҵан, урҭ рахьтә акоронавирус аарԥшын 73 тест рҟны ҳәа аанацҳауеит Аԥсны ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 132-ҩык ауааԥсыра, урҭ рахьтә 114-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 23-ҩык, ибжьаратәуп - 27-ҩык, илҩаауп жәаҩык апациентцәа. Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 60-ҩык апациентцәа. 57-ҩык рҭагылазаашьа бжьаратәуп ҳәа иԥхьаӡоуп, хҩык рҭагылазаашьа бааԥсуп.

Аоперштаб иара убас иаанацҳаит жьҭаара 31 рзы Аҟәа асасааирҭа "Аиҭар" аҟны иаарту урыстәылатәи хырхарҭарацәалатәи агоспиталь аҟны акоронавирус злаз ҩыџьа рыԥсҭазаара ишалҵыз.

Иԥсҭазаара далҵит COVID-19 ззышьақәырӷәӷәаз 1934 шықәса рзы ииз апациент. Иара ҩганктәи аполисегментартә гәыҵәкра ӷәӷәала илаҽны дыҟан. Иҭагылазаашьа акыр ибааԥсын. Жьҭаара 31 ашьыжь иара иԥсҭазаара далҵит игәы-шьадатәи иԥсыԥлагаҩагаратәи зымхара иахҟьаны.

1942 шықәсазы ииз COVID-19 ззышьақәырӷәӷәаз апациенткагьы жьҭаара 31 рзы лыԥсҭазаара далҵит. Лара ахәышәтәырҭанҭыҵтәи ҩганктәи асубтоталтә полисегментартә гәыҵәкра лыман, иара убас егьырҭ асоматикатә чымазарақәагьы лцәа иалан.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

  • Акоронавирус иазку ажәабжьқәа зегьы шәрыԥхьар ҟалоит абра>>
4
Атемақәа:
Ачымазара ҿкы – акоронавирус Аԥсни адунеи аҿи: иалкаау

Сангәлиа аԥсуа сериал "Алахьынҵа" азы: ҳазыԥшымызт ас ауаа ирыдыркылап ҳәа

7
Аԥсуа бызшәа аҿиара иазырхоу апроект ала имҩаԥысуеит асериал "Алахьынҵа" аҭыхрақәа. Апроект автор, арежиссиор-ақәрыгылаҩ, Саид Сангәлиа арадио Sputnik аефир аҿы еиҭеиҳәеит гәыԥҩык аҿар асериал аҭыхра шаԥшьыргаз атәы.
Сангәлиа аԥсуа сериал "Алахьынҵа" азы: ҳазыԥшымызт ас еиԥш ауаа ирыдыркылап ҳәа

"Аинтернет сериал аԥҵара схала исмыӡбеит, дсыцхрааит Мран Алҭеиба. Апроект иаалырҟьан иӡбоу ак акәӡам, акыраамҭа ҳазнеиуан. Ибзиангьы еилаҳкаауан ауадаҩрақәа рацәаны ҳшызцәырҵуаз, еиҳарак атехника аганахьала. Ҟәрышьқәак ааилаԥсаны иааҳхәеит амикрофонқәа уҳәа зыда ԥсыхәа ыҟам атехника. Иара ҳбызшәала иҭҳажьырц ҳҭахын, избанзар, аԥсшәа аӡыргара иацхраауеит. Асериал арԥыси аҭыԥҳаи рыбзиабара иазкуп. Сериак 5-7 минуҭк раҟара ицалоит, х-сезонк рыла ишьақәгылазаауеит, сезонк аҿы жәа-сериак ҟалоит. Асериал асоциалтә даҟьақәа рҿы уахәаԥшыр улшоит. Уаҟа ихәмаруа актиорцәа аҟазара злоу, абызшәа бзианы издыруа роуп, иҟоуп аҿар, хымԥада, аҟазара злоу, аха рбызшәа хьысҳауп, убри аҟнытә иаҳа иззымариоу аалаҳхын, аҭыхрақәа ҳрылагеит", - ҳәа еиҭеиҳәеит Сангәлиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Иара убас шәаԥхьар ҟалоит:

7