Гагра иҭҟәаны ишьыз аԥсуа еибашьцәа ргәалашәаразы ахаҳә шьақәыргылан Жәаҩакәара

391
(ирҿыцуп 18:33 06.10.2020)
Гагра араион аӷа имацәаз ианҭакыз иҭҟәаны аӷацәа ԥсышьацәгьа ззыруз аԥсуа еибашьцәа ргәалашәаразы ахаҳә шьақәыргылан Жәаҩакәаратәи аиҩхааҟны жьҭаара 6 рзы.

Саида Жьиԥҳа, Sputnik

Аԥсны Аџьынџьтәылатә еибашьраан, Гагра араион аӷа инапаҵаҟа ианыҟаз, аԥсуа еибашьцәа жьҭаарамзанӡагьы аиҿахысрақәа, ажәыларақәа мҩаԥыргон. Амчқәа ахьеиҟарамыз инамаданы аоперациа хаданӡагьы ҳганахьала аԥсҭбара ҟалон. Имаҷҩымызт ихәны аҭҟәара иақәшәозгьы. Урҭ рыԥсы шҭаз, ақырҭцәа Жәаҩакәаратәи аиҩхааҟны ирҳәацәаны, гыгшәыграла иҭадырхон.

Убасҟан, аиҩхаа алаларҭаҟны инхоз аурыс бырг Николаи иԥшәмаԥҳәыс Евдокиеи Губариоваа лабҿаба ирбеит автомат ала иреихсуа, рыԥсахәага шҭаз абылтәы рықәҭәаны амца шрыцрарҵоз. Аԥҳәыс уи иахырҟьаны лыпсихика кәадахеит. Николаи иакәзар, изыгәаӷьуамызт ишьыз рыԥсыбаҩқәа ус рааныжьра. Дкылԥшны, ақырҭцәа цазшәа анибалак, абнатә ԥстәқәа рылакьысаанӡа аԥсцәа ижуан.

"Снапала быжьҩык анышә иамаздеит. Руаӡәы ибзианы издыруаз Аркади Пасаниа иакәын", - игәалашәоит иахьа 85 шықәса ирҭагылоу Николаи Губариов.

Абырг иажәақәа рыла, аҭҟәацәа ргәаҟны рыԥсҭазаара иалызхуаз анаркоманцәа ракәын. Аԥсыжразы даннеиуаз зехьынџьара агәырқәа иԥыхьашәон.

Гагра аӷа даналцаха, Николаи Губариов аҭаацәарақәа аԥсыҵхра анымҩаԥыргоз дрывагылан, идирбон доусы анышә дахьамаидаз.

Иахьа, жьҭаара 6 рзы, Гагра араион ахақәиҭтәра амш аҽны, Жәаҩакәаратәи аиҩхааҟны гыгшәыграла ишьыз аибашьцәа Вадим Чамагәуеи, Аркади Пасаниеи, Григори Гәынбеи, Георги Ҳалуашьи, Витали Ақырҭааи, Нодар Адлеибеи ргәалашәара ахьӡала араҟа иаартын ахаҳә.

© Foto / Музаффар Останов
Гагра иҭҟәаны ишьыз аԥсуа еибашьцәа ргәалашәаразы ахаҳә шьақәыргылан Жәаҩакәаратәи аиҩхааҿы

 

 

Ашәҭшьҭаҵара аофициалтә церемониа иалахәын аибашьра аветеранцәа, иҭахаз рҭаацәа, араион Ахадара.

"Абраҟа ишьыз ҳашьцәа еиҳабацәа иахьа рыԥсы ҭаны иҳавагылазҭгьы, ирылшоз рацәахон Аԥсны ԥхьаҟа агараҿы. Рыуацәеи рҭынхацәеи шәахь схы нарханы ишәзеиӷьасшьоит рымшра шәзынхарц, агәра шәсыргоит арҭ аҵеицәа хьӡырҳәагақәа рыхьӡ кашәара шақәым", - иҳәеит Гагра араион Ахадара аиҳабы ихаҭыԥуаҩ Алхас Барцыц.

© Foto / Музаффар Останов
Ахаҳә аартра ацеремониа иалахәын Гагра араион Ахадареи, Араионтә еизареи, аветеранцәеи, иҭахаз рҭаацәеи, ауаажәларреи

 

Иара убас ахаҳә аартра иалахәыз Николаи Губариов иахь ихы нарханы аџьшьара ииҭеит ихатә ԥсҭазаара ашәарҭара иҭаргыланы, ақырҭцәа дызҿыз иҵхны ишишьҭашәарацозгьы аԥсуа еибашьцәа рыԥсыбаҩ рҭаацәа рзы иахьеиқәирхаз. Гагра араион Ахадара рыхьӡалагьы ианеишьеит аԥаратә ҳамҭа. Николаи Павел-иԥа Гагра араион аӷа имацәаз ианҭакыз иааирԥшыз агәымшәаразы Аԥсны атәылахьчара аминистрраҟнытә ианашьан амедал. Гагра Араионтә еизара ахантәаҩы Асҭан Агрба аҳаҭыртә шәҟәы иаҭәеишьеит.

Гагра араион ахақәиҭтәра иалахәыз Нодар Адлеиба Ԥсахара ақыҭан аӷацәа иҭадырхаз БРДМ дақәтәан. Иара иҭаацәа аибашьыгатә машьына дҭаблит ҳәа, иитәны ирбаз абласаркьа уҳәа маҭәарқәак ганы иржит. Аамҭакы ашьҭахь ауп ианеилыркаа уи иԥсыбаҩ Жәаҩакәаратәи аиҩхааҟны ишблыз.

© Foto / Музаффар Останов
Гагра иҭҟәаны ишьыз аԥсуа еибашьцәа рҭынхацәа

Ахаҳә аартра иаҭааз аибашьҩы иашьа гәакьа Анзор Адлеиба ари агәалашәаратә ус иахаҵгылаз Гагра араион Ахадареи, Араионтә еизареи, ауаажәларреи иҭабуп ҳәа реиҳәеит. Раԥхьаҟа аҭынч ԥсҭазаареи, анасыԥ лашеи рзеиӷьеишьеит.

"Иахьа, абри аҭыԥ аҿы ахаҳә анызба, ҩаԥхьа ацәыӡ иацу ахьаа снырит. Саҭашәымҵан, аха сылаӷырӡ сзынкылом. Ари нахыс Аԥсны абзиарақәа ҟалааит. Ахысра ҟалозаргьы аԥа иира иазкхааит", - лҳәеит аиҩхааҟны иҭархаз Аркади Пасаниа иԥшәмаԥҳәыс Аза Лакәарԥҳа-Пасаниа.

Жәаҩакәаратәи аиҩхааҟны иргәаҟны ишьыз аибашьцәа ргәалашәара иазкны ишьақәыргылоу ахаҳә иахьанахыс даҽа ҭоурыхтә хҭыск арҵабыргуеит.

Иара убас шәаԥхьар ҟалоит:

391

Уахыки-ҽнаки рыла 106-ҩык акоронавирус шрылаз аадырԥшит Аԥсны

8
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4058-ҩык ыҟоуп. Урҭ рахьтә ргәы бзиахеит 2071-ҩык, рыԥсҭазаара иалҵит 36-ҩык.

АҞӘА, жьҭаара 28 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 458 ҟаҵан, урҭ рахьтә акоронавирус аарԥшын 106 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 137-ҩык ауааԥсыра, урҭ рахьтә 118-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 40-ҩык, илҩаауп 15-ҩык апациентцәа. Гәдоуҭатәи агоспиталь иҭашәеит жәҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 51-ҩык апациентцәа. 47-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп. Амобилтә госпиталь аҟынтәи илҩаауп быжьҩык.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

8
Атемақәа:
Ачымазара ҿкы – акоронавирус Аԥсни адунеи аҿи: иалкаау

Џьынџьал Тҟәарчал аџьықәреи аҽаҩразы: аибашьра еилгеижьҭеи ас еиԥш ҳамбацт

4
(ирҿыцуп 20:06 28.10.2020)
Тҟәарчал араион ақыҭанхамҩа аусбарҭа аиҳабы Амиран Џьынџьал арадио Sputnik аефир аҿы еиҭеиҳәеит сынтәа араион анхацәа рџьықәреи аҽаҩра зеиԥшроу.
Голанӡиаԥҳа акоронавирус азы: абыржәгьы агәра зымго хәыҷык ихшыҩ днанамгозар акәхап

"Ҳраион аҿы ари аҩыза аҽаҩра ҟамлацызт уҳәар ҟалоит. Сынтәа аџьықәреи ахаҭабзиара бзиоуп, алаҵараангьы аҭагалараангьы амшқәа ақәшәеит, зынӡа ахьы иаҩызоуп. Иааидкылан 950 гектар аџьықәреи лаҵаны иҳаман. Гектаркнтә ҩ-тоннаки бжаки ҟалар акәын. Аибашьра еилгеижьҭеи ас еиԥш аҽаҩра ҳамҩбацызт. Аҽаҩра амш иахьыԥшуп, ажәларгьы ибзианы аус адырулан, ҳәарада, алҵшәагьы ҟалеит. Ажәакала, аҭагылазаашьақәеи зегьы еиқәшәеит, ауаа ахагьы роуит, аԥсабарагьы иара атәы ҟанаҵеит", - еиҭеиҳәеит Џьынџьал.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Иара убас шәаԥхьар ҟалоит:

4