Сухумский роддом

Аԥсны иахьаҵанакуа COVID-19 змоу 11-ҩык зцәа зтәым аҳәса ҭаҩуп

18
(ирҿыцуп 15:42 14.10.2020)
Хәажәкырамзаахыс Аҟәатәи ахшараиурҭаҿы акарантин рылаҳәоуп, убри аан уи аԥҟарақәа ирықәныҟәаны ԥкырада апациентцәа рыдыркылоит.

АҞӘА, жьҭаара 14 – Sputnik. Аҟәатәи ахшараиурҭаҿы ашәҟәы иҭагалоу 11-ҩык зцәа зтәым аҳәса COVID-19 рымоуп ҳәа Sputnik иазеиҭалҳәеит аҳақьым хада Белла Ԥлиаԥҳа.

"Дара аҳәса рконсультациаҿ аҳақьымцәа хылаԥшра рырҭоит. Рҭагылазаашьа еиҭашәар, Гәдоуҭатәи аковид-госпиталь ахь ирышьҭуеит", - лҳәеит лара.

Онлаин-консультациақәа акушер-гинекологи атерапевти дареи имҩаԥыргоит аудиорежим ала.

Рҭагылазаашьа ашәарҭара аиур Ацхыраара ласы ала Гәдоуҭаҟа иргоит.

"Рыхшароура Гәдоуҭа имҩаԥысуеит. Уа иҷыдоу ахшараиурҭа аус ауеит. Иахьазы COVID-19 змаз ҩыџьа Гәдоуҭатәи агоспиталь аҿы ахшара дроухьеит", - лҳәоит аҳақьым хада.

Лара лажәақәа рыла ахшараиурҭаҿы акоронавирустә инфекциа аӡәгьы имам. Иҟан ичмазцәаз аҳақьымцәа, аха урҭ анҭыҵ ишьҭыркааит. Ахшараиурҭаҿы зегьы аԥҟарақәа ирықәныҟәоит, асабрадақәа ныҟәыргоит, арзҩыдагақәа ықәгылоуп.

"Ахшараиурҭахь акоронавирус аҟазшьақәа лыманы, аха ишьақәырӷәӷәамкәа аӡә даанагар, хазы дышьҭаҳҵоит иаҭахны иҟалар, авирус азы анализ аагоит, нас уи ишаҳнарбо аиԥш ҳхы мҩаԥаагоит", - ҳәа лҳәеит Ԥлиаԥҳа.

Лара иазгәалҭеит апандемиа аамҭазы ахшара зауа рацәаҩхеит, избанзар Аҟәатәи ахшараиурҭа зегь ахахьы иагеит ҳәа.

Иахьазы Гәдоуҭатәи ахәышәтәырҭа иҭоуп 175-ҩык, 147-ҩык COVID-19 ззышьақәырӷәӷәоу пациентцәоуп, 21-ы иҭагылазаашьа бааԥсуп, 26-ҩык – бжьаратәуп.

Аԥсны авирус роухьеит 2430-ҩык, 1087-ҩык ргәы бзиахеит, 23-ҩык рыԥсҭазаара иалҵит.

Иара убас шәаԥхьар ҟалоит:

18

"Ковид" аԥырхагамхар: Гагра агәамсам аизгаразы атехника аахәара азыԥхьагәаҭоуп

2
(ирҿыцуп 15:40 29.10.2020)
Иазхоны иҟоу агәамсамеизакырҭа атехникеи аконтеинерқәеи раахәаразы 20 миллион мааҭ аҭахны иҟоуп.

АҞӘА, жьҭаара 29 – Sputnik, Бадри Есиава. Аԥхьаҟатәи акурорттә сезон азы Гагра агәамсам аизгаразы атехника аахәара азыԥхьагәаҭоуп акоронавирус апандемиа аԥырхагамхар, абри атәы Sputnik иазеиҭеиҳәеит Гагра араион ақалақьтә нхамҩа аусбарҭа аиҳабы Роман Чагәаа.

Иара иҳәеит иахьазы х-машьынак шракәу ирымоу, аха иахәҭаны иазыԥхьаӡоу ԥшьба-хәба шракәу.

"Асезон алагамҭаз амашьынақәа ҩба ракәын иҳамаз агәамсам ақәгаразы. Ахԥатәи амашьына аремонт азаауит. Аха урҭгьы азхом ақалақь арыцқьаразы аиҳарак аԥхынра аамҭазы. Ианамуӡа 4 ма 5 машьына ҳҭахуп. Иара убасгьы иаахәатәуп 400 цыра агәамсамҭаҵарҭақәа", - иҳәеит Чагәаа.

Чагәаа ишиԥхьаӡо ала иҿыцу атехника 3-4 миллион мааҭ иаԥсоуп. Иааидкыланы 15 миллион мааҭ рҟынӡа инаӡоит. Уи адагьы 5 миллион мааҭ рҟынӡа аинвентарь аахәатәуп.

"Ҳақәгәыӷуеит апандемиа шԥанымҵәари ҳәа. Иара убасгьы ҳгәыӷуеит апроблема аӡбразы атәыла аиҳабыра ҳацхраап ҳәа. Уи залмыршахар, абанк аҿы акредит гатәхоит, избанзар атехника ада ԥсыхәа ҳамам", - иҳәеит Чагәаа.

Акурорттә сезон аан агәамсам Гагра инахыкны иҟоу аполигон ахь иганы икарыжьуеит, мышкала 15-20 реис ҟарҵоит. Ари аполигон ахь инаргоит Гәдоуҭа араион аҿтәи агәамсамгьы. Ацрыҵқәа атехника ҷыдала анышә иарҭоит, агәамсам аус еиҭадулара ахьзалымшо азы.

2

Гоԥиа: аԥсшьаҩцәа атур ҿыцқәа рҭахуп, ҳаргьы ирыдаҳгалаша ҳамоуп

9
(ирҿыцуп 15:42 29.10.2020)
Аныҟәарақәа рымҩаԥгаҩ Денис Гоԥиа арадио Sputnik аефир аҿы иҳәеит аԥсшьаҩцәа рзы ҿыц еиҿыркаауа атурқәа зхылҿиаауа атуристцәа рҭахрақәа шракәу.
Гоԥиа: аԥсшьаҩцәа атур ҿыцқәа рҭахуп, ҳаргьы ирыдаҳгалаша ҳамоуп

"Амандарин аҿалара ианалагалак Урыстәылантә арахь ирацәаҩны аԥсшьаҩцәа аауеит. Иҟоуп атурфирмақәа Аԥсны "амандаринтә тур" ҳәа иахьырбо. Ҳара заа амандаринатә баҳчақәа змоу ҳрацәажәоит аԥсшьаҩцәа ҳаманы ҳашнеиуа ала. Аԥсшьаҩцәа рнапала амандарин ҿырхуеит, агьама рбоит, абаҳчаҿы афотоҭыхымҭақәа ҟарҵоит. Анаҩс урҭ асоциалтә даҟьақәа рҿы иӡырыргоит, уи акыр иацхраауеит Аԥсны аӡбахә аларҵәаразы. Уи збо ҳтәылахь аара иҭаххоит. "Амандаринатә тур" адагьы иҟоуп аџьырмыкьахь игоу аныҟәарақәагьы, ҳмилаҭтә чысқәа: аџьынџьыхәа, алаҳарҩа, аҵәарҩа, ахьырҭиуа аҭыԥқәа рҿы инеиуеит, ирзеиҭаҳҳәоит уи заку. Аԥсшьаҩцәа атур ҿыцқәа рҭахуп, ҳаргьы ирыдаҳгалаша ҳамоуп", - ҳәа еиҭеиҳәеит Гоԥиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Иара убас шәаԥхьар ҟалоит:

9