"Еиҭах ҩба": Аԥсны адистанциатә ҵара шымҩаԥысуа

21
(ирҿыцуп 11:21 29.10.2020)
2020 шықәса жьҭаара 15 инаркны абҵара 27-нӡа акоронавирус алаҵәара аԥкрази COVID-19 змоу рхыԥхьаӡара аларҟәрази ареспублика ашколқәа рҿы акарантин рылаҳәоуп.

АҞӘА, жьҭаара 28 – Sputnik. Акарантин аамҭа иацҵахар аҵаратә процесс аиҿкаара уадаҩхоит, абри атәы Sputnik иазеиҭалҳәеит Аҟәа ахадара аҵара Аусбарҭа аиҳабы Асҭанда Ҭаркьылԥҳа.

"Иҟоуп асоциалтә ҳақәа рхархәарала ахәыҷқәа адҵақәа рзыназышьҭуа арҵаҩцәа. Ахархәара рырҭоит Zoom, WhatsApp уҳәа егьырҭгьы, аха ус ахархәара зылшо ҩбаҟа процент роуп, егьырҭ 98% алшара рымам. Апрактика иаҳнарбеит онлаин-урокқәа реиҿкаара шыԥсыҽу. Аинтернет ресурсқәа рыла аҵаратә процесс мҩаԥысуеит ҳәа аҳәара ауам", - азгәалҭеит Ҭаркьылԥҳа.

Аҵара Аусбарҭа жьҭаара 26 рзы арҵаҩцәеи дареи реиқәшәара еиҿыркааит акарантин ашьҭахь иарбан ҵаратә формоу имҩаԥыргар алшо аилкааразы.

"Аҵаҩцәа ахьырацәоу ашколқәа рҿы иазыԥхьагәаҭоуп аклассқәа еихшаны аҵаратә процесс амҩаԥгара. Уажәы апрограмма аус адаауылоит. Ҳажәалагала Аҵара аминистрахь инаҳашьҭуеит, ирыдыркылар, уи ала аус ааулоит", - лҳәеит лара.

Адистанциатә ҵара апроблема ақыҭа школқәа рҟны акыр иҵарны иқәгылоуп. Уа агаджетқәа змам ыҟоуп, иҟоуп аинтернет ахаҭагьы змам.

Очамчыра, Тҟәарчал, Гал араионқәа рырҵаҩцәа адҵақәа WhatsApp ахь инарышьҭуеит избанзар Zoom дара рхаҭақәа ирзыуадаҩуп. Абри аҩыза аҭагылазаашьа ыҟоуп Гәдоуҭа араион аҿгьы.

"Ус акә, егьыс акә сынтәа адистанциатә ҵара ҳзаларҵәом. Уаанӡатәи арежим ала аус ааулоит. Еиҳа ихадоу амаҭәарқәа иҷыдоу азхьаԥшра роулоит. Ашколқәа рҿы сменала аҵара мҩаԥгахалоит", - лҳәеит Гәдоуҭа араион аҵара аҟәша аиҳабы лнапынҵақәа назыгӡо Светлана Аиԥҳа.

Гагра араион аҿы адистанциатә ҵара ахацыркра азыԥхьагәаҭоуп абҵара 2 инаркны.

"Ҳара ааԥынразы иҳауз аԥышәа ҳхы иаҳархәоит. Ҳраион раԥхьатәиуп абри аганахь ала аусура зҽазԥызшәаз. Усҟан зегь шаҳҭахыз иҟалеит ҳәа аҳәара иашам. Агхақәа рацәан, аха уажәы еиҳа еиӷьны ҳазыҟаҵоуп уҳәар ауеит", - лҳәоит Гагра араион аҵара аҟәша аиҳабы Мадина Ажьиԥҳа.

Лара лажәақәа рыла алагарҭатә классқәа рзы ари проблема дууп. Акарантин ашколқәа заҵәык рҿоуп иахьалагалоу. Аҭаацәа аус руеит. Ахәыҷқәа макьаназ ирзеиҿкаауам акомпиутер иадтәаланы аҵара рҵартә еиԥш аҭагылазаашьа. Абри аҩыза агәаанагара имоуп Гәылрыԥшь араион аҵара аҟәша аиҳабы Дмитри Габлиа.

"Аиҵбыратә классқәа рҟны 15-ҩык рҟынӡа ахьыҟоу ашкол ахь иныҟәар алшоит. Урҭ рҵаҩык лоуп ирымоу. Аԥсшьараамҭақәа реивыгара ауеит ахәыҷқәа меинырларц. Сара сгәанала алагарҭатә классқәа асанитартә нормақәа азгәаҭаны аҵара рҵар ауеит", - иҳәеит иара.

2020 шықәса жьҭаара 15 -абҵара 27 рзы акоронавирус алаҵәара аԥкрази COVID-19 змоу рхыԥхьаӡара аларҟәрази ареспублика ашколқәа рҿы акарантин рылаҳәоуп.

Иахьазы Аԥсны акоронавирус рыдбалоуп 3952-ҩык. 36 ԥсыҭбара ыҟоуп. 1474-ҩык ргәы бзиахахьеит.

21
Атемақәа:
Аҿкычымазара – акоронавирус Аԥсни адунеи аҿи: иалкаау (1206)

Аиааира Ду амш: Аԥсны ақалақьқәа рҿы Лаҵарамза 9 ишаԥыло

3
(ирҿыцуп 17:13 06.05.2021)
Аџьынџьтәылатә еибашьра Ду аҟны Аиааира амш есышықәса иазгәарҭоит Аԥсны араионқәеи ақалақьқәеи рҿы. Аныҳәатә уснагӡатәқәа рсиа Sputnik афишаҟны.

Sputnik

Аҟәа

Аныҳәатә ҽазыҟаҵарақәа Аҟәа ирылагеит лаҵара 3 рзы. Абри амш аҽны имҩаԥысит Аԥсны аҳәынҭқарратә камертә оркестри Москва аҳәынҭқарратә капеллеи рконцерт.

Аибашьра аветеранцәа алархәны афотоцәыргақәҵа "Аиааира ахаҿқәа. Ҳара ҳгәалашәареи ҳгәадуреи" Иван Папасқьыр ихьӡ зху Амилаҭтә библиотекаҿы лаҵара 5 рзы иаадыртит.

Лаҵара 6 рзы аҟәатәи ашколхәыҷқәа рзы аибашьра иазку акиносахьақәа дырбара мҩаԥысуан.

Лаҵара 9 рзы, Аиааира амш аҽны, Аҟәа Диоскураа рыԥшаҳәаҿы Идырым асолдаҭ ибаҟа аҿаԥхьа ашәҭшьыҵәрақәа рышьҭаҵара ацеремониеи амитинги аадыртуеит асааҭ 10:00 рзы. Асааҭ 11:00 рзы Аԥсни Урыстәылеи рыруаа рымҩасра еиҿкаахоит. Асааҭ 9:00 рзы итрадициахаз "Ԥсра зқәым архәҭа" ақалақь агәы иалсуеит. Асааҭ 14:00 рзы маланыҟәала аицлабра "Сабду, аиааираз иҭабуп" акциа мҩаԥгахоит. Амш ахи-аҵыхәеи ақалақь иалыҩуеит аибашьра аамҭазтәи ашәақәа, амузыка.

Гагра

Гагра аныҳәатә уснагӡатәқәа аадыртуеит Идырым асолдаҭ ибаҟа аҿаԥхьа ашәҭқәа рышьҭаҵара ацеремониала асааҭ 10:00 рзы. Нас имҩаԥысуеит акәашаратә ансамбльқәа рконцерт. Аветеранцәа аҳамҭақәа рыҭахоит.

Гәдоуҭа

Асааҭ 10:00 рзы В.И. Ленин ихьӡ зху апарк аҿы игылоу Идырым асолдаҭ ибаҟа амҵан ашәҭқәа шьҭарҵоит. Асааҭ 11:00 рзы Дәрыԥшь ақыҭан имҩаԥгахоит аҽырыҩрақәа.

Гәылрыԥшь

Гәылрыԥшь араион аҿы Аиааира амш азгәаҭара хацыркхоит Идырым асолдаҭ ибаҟа аҿаԥхьа ашәҭшьыҵәрақәа рышьҭаҵарала. Асааҭ 12:00 рзы Смецкои ихьӡ зху асанатори аҿы имҩаԥгахоит аконцерт. Гәылрыԥшь ауааԥсыра ирылшоит маланыҟәала аицлабра "Сабду, аиааираз иҭабуп" акциа иалахәхар. Лаҵара 9 ауха аныҳәатә салиут халарҵоит, ашәҭргьагьақәа амшынӡ ихырҵоит.

Очамчыра

Очамчыра араион аҿы аныҳәатә уснагӡатәқәа Кәтол ақыҭан аҽырыҩра амҩаԥгарала ихацыркхеит. Лаҵара 9 рзы Очамчыра, Идырым асолдаҭ ибаҟахьы инеиуеит араион ауааԥсыра. Асааҭ 11:00 рзы имҩаԥгахоит аконцерт.

Тҟәарчал

Тҟәарчал аныҳәа аадыртуеит асааҭ 12:00 рзы 1941-1945 шықәсқәа раан иҭахаз асолдаҭцәа рбаҟахьы анеирала. Анаҩс Акультура ахан аҿы имҩаԥысуеит аконцерт.

Гал

Гал ашҭа хадаҿы арратә музыка арҳәарала ауснагӡатәқәа ирылагоит. Имҩаԥгахоит ахәыҷқәа рыхәмаррақәа, асахьаҭыхратә цәыргақәҵа, акаҭран аҿы асахьа аҭыхра, имҩаԥгахоит "Ԥсра зқәым архәҭа" акциа, амитинг. Асааҭ 12:30 рзы галаа урыстәылатәи аҳәаахьчаҩцәа злахәу ауснагӡатәқәа рыдгалахоит.

Иара убас шәаԥхьар ҟалоит:

3

Аҟәа еиҿыркааит Аибашьра Ду иазку акиносахьақәа дырбара

3
(ирҿыцуп 16:13 06.05.2021)
Аиааира амшныҳәазы аибашьра иазку акиносахьақәа ашколхәыҷқәа дырбара еиҿкаауп Амилаҭтә библиотекаҿы мшаԥы 28 раахыс.

АҞӘА, лаҵара 6 – Sputnik, Асмаҭ Ҵәыџьԥҳа. Аҭаацәа рреспубликатә еилаки Аԥсны иҟоу Россотрудничество ахаҭарнакреи аҟәатәи ашколқәа рҵаҩцәа аибашьра иазку акиносахьақәа дырбара еиҿыркааит.

Аҭаацәа рреспубликатә еилакы аиҳабы Гәында Кәарҷиаԥҳа лажәақәа рыла, Россотрудничество Урыстәыла акиносахьақәа рҳәынҭқарратә архив аҟынтәи ашколхәыҷқәа рзы акиносахьақәа дырбара еиҿыркааит. Ахәыҷқәа ирбар рылшоит акинофильмқәа: "Орлионок", "В то далекое лето", "Девочка ищет отца", "Иваново детство", "Вступление".

Аҟәатәи абжьаратә школ №4 аҵаҩы Георги Кокаиа иклассаа дрыцны 13 шықәса зхыҵуаз ленинградтәи апартизанка Лариса Михеенко лфырхаҵара иазку афильм "В то далекое лето" дахәаԥшит. Иара ишиҳәо ала, акиносахьа даара аинтерес икит, гәахәарыла дахәаԥшит.

"Сара сҭаацәараҟынтә еибашьуаз ыҟан. Исзеиҭарҳәахьан аибашьра акыр ԥсҭазаара шагаз. Аҭоурых адырра даара иахәҭоуп ҳәа сгәы иаанагоит", - ҳәа иҳәеит иара.

Ахәбатәи акласс анапхгаҩы Анжела Дауҭиа илҳәеит акинофильмқәа рыхәаԥшра ахәыҷқәа рдыррақәа арҭбааит ҳәа.

"Ахәыҷқәа Аиааира Ду иазку аҭоурыхқәа иҵегь рдыруазар бзиан. Ирацәаҩуп аԥснытәиқәа – аибашьра иалаӡыз. Ибзиан ирдырыр дазусҭадаз апионер, акомсомолец, иара убас ихәыҷқәазгьы Аиааира амш аагара ишацхраауаз", - ҳәа лҳәеит лара.

Амилаҭтә библиотекаҿы афильмқәа дырбара мҩаԥысуеит лаҵара 7 рҟынӡа.

3