Сухумский аэропорт

Атуризм аминистр: аҳаиртә баӷәаза аартра акыр иуадаҩуп

13
(ирҿыцуп 11:16 29.10.2020)
2019 шықәсазы Владислав Арӡынба ихьӡ зху жәларбжьаратәи аҳаиртә баӷәаза "Сухум" жәларбжьаратә анбантә код аиуит.

АҞӘА, жьҭаара 29 – Sputnik, Бадраҟ Аҩӡба. Аҟәатәи аҳаиртә баӷәаза хымԥада иаарттәуп, аха уи аҟаҵара уадаҩуп иҳәеит Аԥсны атуризм аминистр Ҭеимураз Хышба.

"Изныкымкәа иҳаҳахьеит абаӷәаза абыржәы-абыржәы иаадыртуеит ҳәа. Убри аан иазгәаҭатәуп Аграждантә авиациа Жәларбжьаратәи ассоциациа Чикаго ақалақь аҿы иҟоу аҟны Владислав Арӡынба ихьӡ зху жәларбжьаратәи аҳаиртә баӷәаза "Сухум" Қырҭтәыла иатәны ашәҟәы ишҭагало. Ари аус аҿы лассы еиҭакра бзиак ҟалап ҳәа сақәгәыӷуам",- иҳәеит иара.

Уи адагьы аҳаиртә баӷәаза аус ауырц азы аус ауроуп авиаеилахәыра.

"Жәларбжьаратәи анормақәа инарықәыршәаны авиеилахәыра Урыстәыла ма Аԥсны иҭаҩзароуп, убри аан ареисқәагьы Урыстәылеи Аԥсни рыҩныҵҟа имҩаԥысуазароуп. Ари апроект хра ахьынӡамоу сара сакәым ахәшьара азҭаша. Ҳара иҳалшон Аҩадатәи Кипр амҩала ҳцар (Кипрынтәи аҳаирпланқәа аԥхьанатә Ҭырқәтәыла итәоит, нас уантәи адунеи егьырҭ атәылақәа рахь иԥыруеит-аред.) аха уи дипломатиатә шьаҿоуп", - иҳәеит аминистр.

Аԥсны аус зуа авиаеилахәырақәа жәларбжьаратәи ареисқәа рахь инарышьҭуам, уи адагьы реилахәырақәа рсервисқәа рҿы аремонттә усурақәа рзымҩаԥгом иҳәеит Хышба.

"Аҳаирплан дырбаандаҩуеит аоккупациа зызу аҵакырахь иԥыруеит ҳәа",  - иҳәеит иара.

2019 шықәсазы Владислав Арӡынба ихьӡ зху жәларбжьаратәи аҳаиртә баӷәаза "Сухум" жәларбжьаратә анбантә код аиуит. Апроект инақәыршәаны иазыԥхьагәаҭан аинвесторцәа абаӷәаза шьаҭанкыла еиҭашьақәдыргылоит ҳәа.

Иара убас шәаԥхьар ҟалоит:

13

Емырхәба еиҭеиҳәеит Алакәымҳара ақыҭаҟны имҩаԥысуа аусурақәа ртәы

6
(ирҿыцуп 21:21 23.11.2020)
Гал араион ахада ихаҭыԥуаҩ Беслан Емырхәба арадио Sputnik арубрика "Раионк аԥсҭазаараҟынтә" аҿы еиҭеиҳәеит Алакәымҳара ақыҭаҟны ицо аиҭашьақәыргыларатә усурақәа ртәы.
Раионк аԥсҭазаараҟынтә: Емырхәба Гал араион аҟны аиҭашьақәыргыларатә усурақәа ртәы

"Алакәымҳара ашкол аҟны аусурақәа мҩаԥгатәны иҟоуижьҭеи акыр шықәса ҵуеит. Иҳәынҭқарратәым аиҿкаара ацхыраарала ахыб ԥсахуп, аиҭашьақәыргыларатә усурақәа мҩаԥысуеит ахыбра аҩныҵҟагьы. Быжь-километрак инацны амҩа аҟаҵара азгәаҭоуп Аберқыҭеи Алакәымҳареи рыбжьара, машьынала амҩасра уадаҩуп", - иҳәеит Емырхәба.

Шәазыӡырҩа аудио. Иаҳа инеиҵыху анҵамҭа шәаҳар шәылшоит арадио Sputnik аефир аҟны.

Иара убас шәаԥхьар ҟалоит:

6

COVID-19 Аԥсны: 62-ҩык аҿкы рыдырбалеит, ҩыџьа рыԥсҭазаара иалҵит

2
Иҳаҩсыз уахыки-ҽнаки рыла COVID-19 рылоу ирыламу аилкааразы 208-ҩык атестқәа рзыҟаҵан, урҭ рахьтә 62-ҩык акоронавирус рцәа ишалаз аадырԥшит.

АҞӘА, абҵара 23- Sputnik. Гәдоуҭатәи араионтә хәышәтәырҭа хадаҿы аԥсҭбарақәа ҩба ҟалеит абҵара 22 рзы, ҳәа аанацҳауеит Аԥсны ауааԥсыра COVID-19 рацәыхьчаразы аоперативтә штаб.

Иԥсҭазаара далҵит 64 шықәса ирҭагылаз ахаҵа. Иара ахәышәтәырҭа дҭашәеит абҵара 5 рзы акоронавирус ицәа иаланы. Изымҩаԥыргоз атерапиа иахьмырԥшкәа, апациент иԥсҭазаара далҵит игәеисра аԥсыҽхара иахҟьаны.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны лыԥсҭазаара далҵит 1940 шықәсазы ииз апациент. Иақәнагаз атерапиа шылзмҩаԥыргозгьы, лыдунеи лыԥсахит лгәеисра аԥсыҽхара иахҟьаны.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 72-ҩык ауааԥсыра, урҭ рахьтә 58-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 19-ҩык, ибжьаратәуп - 20-ҩык.

Аҟәатәи аинфекциатә хәышәтәырҭаҿы ирхәышәтәуеит 30-ҩык апациентцәа, хҩык рҭагылазаашьа уадаҩуп.

Амобилтә госпиталь аҟны ишьҭоуп акоронавирус зыдбалоу 31-ҩык апациентцәа. 27-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп.

Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 5374-ҩык ыҟоуп. Урҭ рахьтә ргәы бзиахеит 3623-ҩык, рыԥсҭазаара иалҵит 70-ҩык.

Акоронавирус иазку ажәабжьқәа зегьы шәрыԥхьар ҟалоит абра>>

2
Атемақәа:
Ачымазара ҿкы – акоронавирус Аԥсни адунеи аҿи: иалкаау