Аԥсны иҟоу урыстәылатәи амедицинатә усзуҩцәа ашәыри ацхеи ҳамҭас ирзынарышьҭит

10
Аԥсны аепидемиологиатә ҭагылазаашьа ахьыуадаҩу инадҳәаланы, Урыстәыла еиуеиԥшым ақалақьқәа рҟынтәи арахь цхыраара иааны иҟоуп амедицинатә усзуҩцәа. Аҟәа иаартуп хырхарҭарацәалатәи амобилтә госпиталь.

Аԥсны ауааԥсыра ари ацхыраара азхьаԥшра арымҭар рылшомызт. Гали Очамчыреи рхадарақәа уи аҭак шыҟарҵаз Sputnik аматериал аҿы.

Илана Амқәабԥҳа, Sputnik

Аҩыза ицхыраара

Жьҭаара 20 раахыс Аҟәа иаарту амобилтә госпиталь аҿы ирхәышәтәхьеит 100-ҩык инарзынаԥшуа COVID змоу ҳуааԥсыра.

2020 шықәса мшаԥымзаахыс Аԥсны ишрылшо ала акоронавирустә инфекциа иаҿагылоуп. Аԥхьанатә авирус змаз рхыԥхьаӡара маҷзар, ԥхынгәымза инаркны ирыцло иалагеит. Ԥшьымз инарзынаԥшуа Гәдоуҭатәи ахәышәтәырҭа Аԥсны COVID-центрны иҟоуп. Аҳақьымцәа ишрылшоз ала рус иаҿын, аха аҭагылазаашьа еиҳа ианыуадаҩха, Урыстәыла ацхыраара ҳнаҭеит. Гәдоуҭатәи агоспиталь ахь иаарышьҭхьеит 30-ҩык рҟынӡа аҳақьымцәа.

Ацхырааразы Аладатәи арратә округ амобилтә госпиталь ареспубликахь жьҭаара 19 рзы идәықәҵан акоронавирустә инфекциа COVID-19 змоу аԥснытәи апациентцәа рыхәышәтәраҿы ацхыраара аҟаҵаразы. Иара аус ауеит асасааирҭа "Аиҭар" аҵакыраҿы. Агоспиталь аус ауеижьҭеи 1,5 нызқь ПЦР-диагностика мҩаԥнагахьеит. Анализқәа нарышьҭуеит Аԥсны алабораториақәа рҟынтәи, аҭҵаарақәа рҭак уахь идырхынҳәуеит. Шәҩык инареиҳаны ҳчымазцәа хәышәтәны илырҩаахьеит.

Агәыҭбааразы аҭак

Урыстәылатәи амедицинатә усзуҩцәа рыцхыраара аҭакс Гали Очамчыреи рраионқәа рхадарақәа ирыӡбеит COVID-центрқәа рахь аҿамаҿа нарышьҭырц.

Раԥхьатәи аҳамҭа Гәдоуҭаҟа иаашьҭын Галынтәи. Араион ахада Константин Ԥлиа жьҭаара 28 рзы аҳақьымцәа рыхьӡала 200 кьыла амандарина, афеихоа, ахәырма, 20 литра аԥсуа цха ааишьҭит.

"Абри ауп иахьазы иҳалшо, авирус иаҿагыланы ҳчымазцәа зхәышәтәуа урыстәылатәи амедицинатә усзуҩцәа рзы. Ҭабуп ҳәа раҳҳәоит", - иҳәеит Sputnik зыҿцәажәоз Константин Ԥлиа.

Иара иҳәеит лшарак шыҟалалак, егьырҭ COVID-центрқәа рахьгьы асеиԥш анашьҭымҭақәа шыҟаҵахо.

© Foto / предоставила Тея Аршба
Аԥсны ауааԥсыра акоронавирус аҟынтәи рыхәышәтәразы иааз урыстәылатәи аҳақьымцәа рзы Гали Очамчыреи рхадарақәа ҭагалантәи аҽаҩра нарышьҭит

Абҵара 9 рзы ари аԥшьгамҭа адгылара анаҭеит Очамчыра араион.

"Ҳара ҳадгьыл иҳанаҭаз аахырхра наҳашьҭит "Аиҭар" игылоу амобилтә госпиталь, Гәдоуҭатәи агоспиталь, Очамчыратәи ахәышәтәырҭа рахь", - иҳәеит Очамчыра араион ахада Станислав Амҷба.

Иара иажәақәа рыла, COVID-центрқәа русзуҩцәа гәахәарыла ирыдыркылеит ирзынашьҭыз ашәыр-ақәыр.

Иахьазы акоронавирустә инфекциа змоу рыдыркылоит Гәдоуҭатәи агоспиталь, Аҟәатәи аҿкчымазаратә хәышәтәырҭа, Аҟәатәи амобилтә госпиталь, Очамчыратәии Гагратәии ахәышәтәырҭақәа. Гәдоуҭеи Аҟәеи иаартуп акоронавирус змоу рзы амбулаториақәа. Аҳақьымцәа ирыцхраауеит аволонтиорцәа – 39-ҩык Аҟәатәи амедицинатә коллеџь астудентцәа.

Иахьазы Аԥсны авирус рыдбалоуп 4898-ҩык. 3227-ҩык ргәы бзиахахьеит, рыԥсҭазаара иалҵит 58-ҩык.

Иара убас шәаԥхьар ҟалоит:

10

Емырхәба еиҭеиҳәеит Алакәымҳара ақыҭаҟны имҩаԥысуа аусурақәа ртәы

7
(ирҿыцуп 21:21 23.11.2020)
Гал араион ахада ихаҭыԥуаҩ Беслан Емырхәба арадио Sputnik арубрика "Раионк аԥсҭазаараҟынтә" аҿы еиҭеиҳәеит Алакәымҳара ақыҭаҟны ицо аиҭашьақәыргыларатә усурақәа ртәы.
Раионк аԥсҭазаараҟынтә: Емырхәба Гал араион аҟны аиҭашьақәыргыларатә усурақәа ртәы

"Алакәымҳара ашкол аҟны аусурақәа мҩаԥгатәны иҟоуижьҭеи акыр шықәса ҵуеит. Иҳәынҭқарратәым аиҿкаара ацхыраарала ахыб ԥсахуп, аиҭашьақәыргыларатә усурақәа мҩаԥысуеит ахыбра аҩныҵҟагьы. Быжь-километрак инацны амҩа аҟаҵара азгәаҭоуп Аберқыҭеи Алакәымҳареи рыбжьара, машьынала амҩасра уадаҩуп", - иҳәеит Емырхәба.

Шәазыӡырҩа аудио. Иаҳа инеиҵыху анҵамҭа шәаҳар шәылшоит арадио Sputnik аефир аҟны.

Иара убас шәаԥхьар ҟалоит:

7

COVID-19 Аԥсны: 62-ҩык аҿкы рыдырбалеит, ҩыџьа рыԥсҭазаара иалҵит

2
Иҳаҩсыз уахыки-ҽнаки рыла COVID-19 рылоу ирыламу аилкааразы 208-ҩык атестқәа рзыҟаҵан, урҭ рахьтә 62-ҩык акоронавирус рцәа ишалаз аадырԥшит.

АҞӘА, абҵара 23- Sputnik. Гәдоуҭатәи араионтә хәышәтәырҭа хадаҿы аԥсҭбарақәа ҩба ҟалеит абҵара 22 рзы, ҳәа аанацҳауеит Аԥсны ауааԥсыра COVID-19 рацәыхьчаразы аоперативтә штаб.

Иԥсҭазаара далҵит 64 шықәса ирҭагылаз ахаҵа. Иара ахәышәтәырҭа дҭашәеит абҵара 5 рзы акоронавирус ицәа иаланы. Изымҩаԥыргоз атерапиа иахьмырԥшкәа, апациент иԥсҭазаара далҵит игәеисра аԥсыҽхара иахҟьаны.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны лыԥсҭазаара далҵит 1940 шықәсазы ииз апациент. Иақәнагаз атерапиа шылзмҩаԥыргозгьы, лыдунеи лыԥсахит лгәеисра аԥсыҽхара иахҟьаны.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 72-ҩык ауааԥсыра, урҭ рахьтә 58-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 19-ҩык, ибжьаратәуп - 20-ҩык.

Аҟәатәи аинфекциатә хәышәтәырҭаҿы ирхәышәтәуеит 30-ҩык апациентцәа, хҩык рҭагылазаашьа уадаҩуп.

Амобилтә госпиталь аҟны ишьҭоуп акоронавирус зыдбалоу 31-ҩык апациентцәа. 27-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп.

Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 5374-ҩык ыҟоуп. Урҭ рахьтә ргәы бзиахеит 3623-ҩык, рыԥсҭазаара иалҵит 70-ҩык.

Акоронавирус иазку ажәабжьқәа зегьы шәрыԥхьар ҟалоит абра>>

2
Атемақәа:
Ачымазара ҿкы – акоронавирус Аԥсни адунеи аҿи: иалкаау