АҞӘА, абҵара 13- Sputnik. Афедералтә ҩаӡараҟны изышьҭаз Урыстәыла атәылауаҩԥҳәыс Аԥсны аҳәааҿы дааныркылеит ҳәа аанацҳауеит Урыстәыла АШәМ Краснодартәи атәылаҿацә аҿы Аҳәаахьчаратә усбарҭа апресс-маҵзура.
Аԥҳәыс даанкылан апаспорт агәаҭараан Аԥснынтәи Урыстәылаҟа даниасуаз. Азинеилагаҩ дрырҭеит илышьҭазааз аусбарҭа – Урыстәыла Аҩнуҵҟатәи аусқәа рминистррахь.
Уаанӡа аҳәамҭа ҟаҵан аурыс-аԥсуа ҳәааҿы даанкылоуп ҳәа Аԥсны атәылауаҩ, анаркотикатә маҭәашьарқәа рыҟаҵара, рыҭира, рынашьҭра закәаншьаҭада имҩаԥызгоз.
Аусбарҭа апресс-маҵзура иазгәанаҭоит 2020 шықәса аҩнуҵҟала аҳәынҭқарратә ҳәаа аушьҭырҭатә ҭыԥ аҿы иаарԥшын 80-ҩык инарзынаԥшуа афедералтә, жәларбжьаратә, ҳәынҭқаррабжьаратә шьҭазаара змаз.
