Ареформақәа рымҩала: иӡыргоуп апрограмма "Аԥсны аԥеиԥш"

15
(ирҿыцуп 19:07 13.11.2020)
Ареформақәа рыпрограмма "Аԥсны аԥеиԥш" аус адырулеит аиндаҭлара "Аԥсны агәадура" афиналистцәа Урыстәыла афинансқәа рминистрра аҭҵаарадырратә институт ацхыраарала.

АҞӘА, абҵара 13 – Sputnik. Аиндаҭлара "Аԥсны агәадура" аҟны аиааира згаз Саид Беиа иӡыригеит астратегиатә программа "Аԥсны аԥеиԥш". Абри атәы аанацҳауеит асоциалтә платформа "Аԥсны аԥеиԥш" асаит.

Беиа еиҭеиҳәеит ареформақәа рыпрограмма аус шадырулаз аиндаҭлара "Аԥсны агәадура" афиналистцәа Урыстәыла афинансқәа рминистрра аҭҵаарадырратә институт ацхыраарала.

Иара иазгәеиҭеит аиндаҭлара аихшьаалақәа анрыларҳәа ашьҭахь афиналистцәа аусура нап шадыркыз, ишалацәажәоз аԥеиԥш змоу аидеиақәа еидызкыло иаку аконцепциа аус адулара атәы.

"Ҳара хықәкы хадас иҳамоу ҳауаажәлар ҳаԥсҭазаара еиҭазкыр зылшо хра змоу ауснагӡатәқәа рыдгалароуп. Убри инадҳәаланы иалаҳкааит аус хадақәа: атәылаҿ ареформақәа аус рыдулареи аус рыруреи, аҿар амчрахь рнагара, ринтересқәа рыхьчара, аинформациатә технологиақәа раларҵәара, иара убасгьы аҳәынҭқарратә напхгараҭараҿы акыр рылшоны", - иҳәеит Беиа.

Апрограмма аҳәаақәа ирҭагӡаны аус рыдулоуп Аԥсны асоциал-економикатәи ауаажәларратәи ҿиара алзыршо, атәылаҿ асоциал-политикатә ҭагылазаашьа ҭышәынзыртәало ауснагӡатәқәа ркомплекс ҳәа иҳәеит иара.

Саид Беиа иажәақәа рыла, атәыла аҿиара иаԥырхагоуп анапхгареи ауаажәларреи реинырра алзыршо аинститутқәа рыҟамзаара, аиҳабыра рҿы зымҽхак ҭбаау акоррупциа, акриминогентә ҭагылазаашьа, ашәшьыра иҵаркуа бизнес уҳәа егьырҭгьы.

Иара убасгьы иҳәеит асоциалтәи аекономикатәи проблемақәа ишрыцу аполитикатә проблемагьы.

Апрограмма азырхоуп адунеи азы Аԥсны аартра, уи азы аҳәынҭқарра аҩнуҵҟа атехнологиақәа раԥҵара ацхыраара ҳәа иҳәеит Беиа.

Апрограмма ахырхарҭақәа ируакуп анагӡаратә мчра рнапхгаҩцәа, араионқәа рхадацәа иаартны аҳасабырбақәа рырҟаҵара. Саид Беиа иазгәеиҭеит ареформақәа рыпрограмма ишазԥхьагәанаҭо аҳәынҭмаҵзурақәа рыҭаразы иаку ахырхарҭарацәатә центр аԥҵара.

Уи адагьы "Аԥсны аԥеиԥш" аҵак ду анаҭоит жәларбжьаратәи амедиапроект "Abkhazia – Land of Soul" аҳәаақәа ирҭагӡаны Аԥсны иазку авидео-роликқәа рыцхыраарала атәыла еиҳа инарҭбааны ауаа дырбара.

Саид Беиа иазгәеиҭеит атәыла аҿиаразы ишхымԥадатәиу ареспубликахь аинвестициақәа радԥхьаларазы аҭагылазаашьақәа раԥҵара, еиҿкаау ацәгьоура аҿагыларазы азакәан аԥҵара.

"Аинвестициақәа радԥхьаларазы Аԥсны ахада иинвестициатә офисқәа раԥҵара ахәҭоуп еиуеиԥшым атәылақәа рҿы. Инвестофисқәа русзуҩцәа – анаплакыҩцәа, адипломатцәа, Ахәаахәҭра-ааглыхратә палата аусзуҩцәа ахада иеиҭозароуп, даргьы русуразы иара иҿаԥхьа аҳасабрбара ҟарҵозароуп", - иҳәеит иара.

Уи адагьы ареформа апрограмма иаднагалоит "Аԥсны Аҳәынҭқарра аҿар рполитиказы" азакәан иалагалазарц есышықәса аԥхьагылацәа ҿарацәа реиндаҭлара "Аԥсны агәадура" амҩаԥгара, уи аҿы  аиааиҩцәа аҳәынҭқарратә маҵзурахьы радԥхьалара.

Апрограмма аԥҵаҩцәа иара убасгьы иавымсит аҭаацәара азҵаарақәа рылацәажәара, урҭ альготатә кредитқәа рыҭаразы алшарақәа рыдыргалоит.

Ареформақәа рыпрограмма иалагалоуп ареспубликаҿы IT-парк аԥҵаразы апункт. Апарк иаусдҵақәоу иреиуоуп иҷыдоу арҵаратә программақәа рымҩаԥгара, анапхгараҭаратә школ апроект аҳәаақәа ирҭагӡаны анаплакыҩцәа, анапхгаҩцәа разыҟаҵаразы акурсқәа раԥҵара, жәлар рынхамҩеи аҳәынҭқарратә маҵзуреи Ракадемиеи Сколково абизнес-школ апрофессорцәеи рлекциақәа рымҩаԥгара. Иара убасгьы иазԥхьагәаҭоуп аҟыбаҩ злоу ахәыҷқәа рзы аҵаратә программақәа раԥҵара.

Иазԥхьагәаҭоуп абизнес маҷи абжьаратә бизнеси акредит рыҭараан, иаҳҳәап ақыҭанхамҩаз, альготақәа рзаԥҵара (10-15% шықәсыктәи акредитқәа), анаплакыҩцәа ҿарацәа р-IT-стартапқәа аҳәынҭқарратә дгылара рыҭара.

Уи адагьы ареформақәа рпрограммаҿ иазгәаҭоуп абизнес маҷи абжьаратә бизнеси, Урыстәыла аҳәынҭқарратә корпорациақәа рхаҭарнакцәа, аҭҵаарадырратәи астартап-коллективқәеи рзы аофисқәа рыргылара.

Иара убас шәаԥхьар ҟалоит:

15

Аиааира Ду амш: Аԥсны ақалақьқәа рҿы Лаҵарамза 9 ишаԥыло

3
(ирҿыцуп 17:13 06.05.2021)
Аџьынџьтәылатә еибашьра Ду аҟны Аиааира амш есышықәса иазгәарҭоит Аԥсны араионқәеи ақалақьқәеи рҿы. Аныҳәатә уснагӡатәқәа рсиа Sputnik афишаҟны.

Sputnik

Аҟәа

Аныҳәатә ҽазыҟаҵарақәа Аҟәа ирылагеит лаҵара 3 рзы. Абри амш аҽны имҩаԥысит Аԥсны аҳәынҭқарратә камертә оркестри Москва аҳәынҭқарратә капеллеи рконцерт.

Аибашьра аветеранцәа алархәны афотоцәыргақәҵа "Аиааира ахаҿқәа. Ҳара ҳгәалашәареи ҳгәадуреи" Иван Папасқьыр ихьӡ зху Амилаҭтә библиотекаҿы лаҵара 5 рзы иаадыртит.

Лаҵара 6 рзы аҟәатәи ашколхәыҷқәа рзы аибашьра иазку акиносахьақәа дырбара мҩаԥысуан.

Лаҵара 9 рзы, Аиааира амш аҽны, Аҟәа Диоскураа рыԥшаҳәаҿы Идырым асолдаҭ ибаҟа аҿаԥхьа ашәҭшьыҵәрақәа рышьҭаҵара ацеремониеи амитинги аадыртуеит асааҭ 10:00 рзы. Асааҭ 11:00 рзы Аԥсни Урыстәылеи рыруаа рымҩасра еиҿкаахоит. Асааҭ 9:00 рзы итрадициахаз "Ԥсра зқәым архәҭа" ақалақь агәы иалсуеит. Асааҭ 14:00 рзы маланыҟәала аицлабра "Сабду, аиааираз иҭабуп" акциа мҩаԥгахоит. Амш ахи-аҵыхәеи ақалақь иалыҩуеит аибашьра аамҭазтәи ашәақәа, амузыка.

Гагра

Гагра аныҳәатә уснагӡатәқәа аадыртуеит Идырым асолдаҭ ибаҟа аҿаԥхьа ашәҭқәа рышьҭаҵара ацеремониала асааҭ 10:00 рзы. Нас имҩаԥысуеит акәашаратә ансамбльқәа рконцерт. Аветеранцәа аҳамҭақәа рыҭахоит.

Гәдоуҭа

Асааҭ 10:00 рзы В.И. Ленин ихьӡ зху апарк аҿы игылоу Идырым асолдаҭ ибаҟа амҵан ашәҭқәа шьҭарҵоит. Асааҭ 11:00 рзы Дәрыԥшь ақыҭан имҩаԥгахоит аҽырыҩрақәа.

Гәылрыԥшь

Гәылрыԥшь араион аҿы Аиааира амш азгәаҭара хацыркхоит Идырым асолдаҭ ибаҟа аҿаԥхьа ашәҭшьыҵәрақәа рышьҭаҵарала. Асааҭ 12:00 рзы Смецкои ихьӡ зху асанатори аҿы имҩаԥгахоит аконцерт. Гәылрыԥшь ауааԥсыра ирылшоит маланыҟәала аицлабра "Сабду, аиааираз иҭабуп" акциа иалахәхар. Лаҵара 9 ауха аныҳәатә салиут халарҵоит, ашәҭргьагьақәа амшынӡ ихырҵоит.

Очамчыра

Очамчыра араион аҿы аныҳәатә уснагӡатәқәа Кәтол ақыҭан аҽырыҩра амҩаԥгарала ихацыркхеит. Лаҵара 9 рзы Очамчыра, Идырым асолдаҭ ибаҟахьы инеиуеит араион ауааԥсыра. Асааҭ 11:00 рзы имҩаԥгахоит аконцерт.

Тҟәарчал

Тҟәарчал аныҳәа аадыртуеит асааҭ 12:00 рзы 1941-1945 шықәсқәа раан иҭахаз асолдаҭцәа рбаҟахьы анеирала. Анаҩс Акультура ахан аҿы имҩаԥысуеит аконцерт.

Гал

Гал ашҭа хадаҿы арратә музыка арҳәарала ауснагӡатәқәа ирылагоит. Имҩаԥгахоит ахәыҷқәа рыхәмаррақәа, асахьаҭыхратә цәыргақәҵа, акаҭран аҿы асахьа аҭыхра, имҩаԥгахоит "Ԥсра зқәым архәҭа" акциа, амитинг. Асааҭ 12:30 рзы галаа урыстәылатәи аҳәаахьчаҩцәа злахәу ауснагӡатәқәа рыдгалахоит.

Иара убас шәаԥхьар ҟалоит:

3

Аҟәа еиҿыркааит Аибашьра Ду иазку акиносахьақәа дырбара

3
(ирҿыцуп 16:13 06.05.2021)
Аиааира амшныҳәазы аибашьра иазку акиносахьақәа ашколхәыҷқәа дырбара еиҿкаауп Амилаҭтә библиотекаҿы мшаԥы 28 раахыс.

АҞӘА, лаҵара 6 – Sputnik, Асмаҭ Ҵәыџьԥҳа. Аҭаацәа рреспубликатә еилаки Аԥсны иҟоу Россотрудничество ахаҭарнакреи аҟәатәи ашколқәа рҵаҩцәа аибашьра иазку акиносахьақәа дырбара еиҿыркааит.

Аҭаацәа рреспубликатә еилакы аиҳабы Гәында Кәарҷиаԥҳа лажәақәа рыла, Россотрудничество Урыстәыла акиносахьақәа рҳәынҭқарратә архив аҟынтәи ашколхәыҷқәа рзы акиносахьақәа дырбара еиҿыркааит. Ахәыҷқәа ирбар рылшоит акинофильмқәа: "Орлионок", "В то далекое лето", "Девочка ищет отца", "Иваново детство", "Вступление".

Аҟәатәи абжьаратә школ №4 аҵаҩы Георги Кокаиа иклассаа дрыцны 13 шықәса зхыҵуаз ленинградтәи апартизанка Лариса Михеенко лфырхаҵара иазку афильм "В то далекое лето" дахәаԥшит. Иара ишиҳәо ала, акиносахьа даара аинтерес икит, гәахәарыла дахәаԥшит.

"Сара сҭаацәараҟынтә еибашьуаз ыҟан. Исзеиҭарҳәахьан аибашьра акыр ԥсҭазаара шагаз. Аҭоурых адырра даара иахәҭоуп ҳәа сгәы иаанагоит", - ҳәа иҳәеит иара.

Ахәбатәи акласс анапхгаҩы Анжела Дауҭиа илҳәеит акинофильмқәа рыхәаԥшра ахәыҷқәа рдыррақәа арҭбааит ҳәа.

"Ахәыҷқәа Аиааира Ду иазку аҭоурыхқәа иҵегь рдыруазар бзиан. Ирацәаҩуп аԥснытәиқәа – аибашьра иалаӡыз. Ибзиан ирдырыр дазусҭадаз апионер, акомсомолец, иара убас ихәыҷқәазгьы Аиааира амш аагара ишацхраауаз", - ҳәа лҳәеит лара.

Амилаҭтә библиотекаҿы афильмқәа дырбара мҩаԥысуеит лаҵара 7 рҟынӡа.

3