Афымцалашара арцәара ахәышәтәырҭақәа ишырныԥшуа

11
Абҵара 15, 2020 шықәса инаркны Аԥсны иахьаҵанакуа аамҭа-аамҭала афымцалашара арцәара иалагеит ишьақәыргылоу аграфик инақәыршәаны.

АҞӘА, абҵара 15 - Sputnik. Аԥсны аамҭа-аамҭала афымцалашара арцәара ахәышәтәырҭақәа русура анырра анаҭоит, еиҳарак акоронавирус ззышьақәырӷәӷәоу апациентцәа ахьыҟоу.

Гәдоуҭатәи ахәышәтәырҭа аҳақьым хада Ҳаџьараҭ Шамба иажәақәа рыла, афымца арцәара амедицинатә маругақәа бжьнахыр ҟалоит, адизельтә генератор цхыраагӡас ишрымоугьы.

"Ҳусура ианымԥшырц залшаӡом, иара усгьы ианыԥшуеит. Агенератор аҿалаанӡа ҳаппаратура зегьы русура аанкылоит. Ас иҿало-иҿыҵуа иҟалар ҳмаругақәа ԥхасҭахоит", - иҳәеит иара.

Шамба иҳәеит афымцамч аусзуҩцәа дрықәгәыӷуеит амедицинатә аппаратқәа агенератор аҿалаанӡа русура еиламгартә еиԥш аҟаҵара рылшап ҳәа.

Ацхыраагӡа рымоуп Гагратәи ахәышәтәырҭаҿгьы, иааиԥмырҟьаӡакәа алашара ҟалоит аҟәшақәа зегьы рҿы, агенератор уи еиԥш амч амоуп иҳәеит ахәышәтәырҭа аҳақьым хада Виачеслав Аргәын.

"Агенератор сааҭк ахы-аҵыхәала 70 литра асолиарка абылуеит. Уи аҟара ахарџь аиура ҳалшартә ҳаҟам, аха ахәышәтәырҭа афымцалашарада иаанхар ҟалом. Араион ахадара азҵаара аӡбараҿы иҳацхраап ҳәа ҳгәыӷуеит, абылтәы инеиҳаны иҳарҭалап", - ҳәа иҳәоит Аргәын.

Аргәын дгәыӷуеит араион ахадара ахәышәтәырҭа фымцалашарада иаанрыжьрам ҳәа.

Аҟәатәи аҿкчымазаратә хәышәтәырҭаҟны ааигәа иқәдыргылеит адизельтә генератор, уи азы афымцалашара арцәара ҳусура уамак ианыԥшуам, ҳәа иҳәеит аҳақьым хада инапынҵақәа назыгӡо Асҭамыр Гәниа.

"80 киловатт иҟоу агенератор ҳзықәдыргылеит хымчыбжь раԥхьа, уи амч ахәышәтәырҭа зегьы иазхоит", - азгәеиҭеит иара.

Аҿкы чымазара зыдбало рзы Очамчыратәи ахәышәтәырҭаҟны иаартуп иҷыдоу аҟәша, аха афымца еиԥҟьарада аҟазааразы еиқәшәам, уи ахәышәтәырҭа зегьы аусура ианымԥшырц залшом, лҳәеит аҳақьым хада Мадонна Кьышьмариаԥҳа.

Лара лажәақәа рыла араион анапхгара ирдыруеит иҟоу ауадаҩрақәа ртәы.

Кьышьмариаԥҳа илҳәеит, аҟәша ҷыда 27 ҭыԥ рыла ишеиқәыршәо, иахьазы уаҟа рҽырхәышәтәуеит 18-ҩык.

Тҟәарчалтәи аполиклиникаҟны иаартхоит акоронавирус зыдбало рзы аҿкытә ҟәша иааиуа амчыбжь азы, лҳәеит Тҟәарчалтәи ахәышәтәырҭа аҳақьым хада Лали Гаргәлиа. Араҟагьы, адизельтә генератор ашьақәыргылара азԥхьагәаҭам.

Абҵара 15, 2020 шықәса инаркны Аԥсны иахьаҵанакуа аамҭа-аамҭала алашара дырцәалоит уахыки-ҽнаки рыла хынтә.

Аграфик алагалоуп "Аԥсны Аҳәынҭқарра афымцамчтә система аусура аҭышәныртәаларазы ауснагӡатәқәа рзы" Адҵа инақәыршәаны. Уа ҷыдала иҳәоуп афымцамч изакәанымкәа зҽаԥызшьуа ахархәаҩцәа раарԥшразы агәаҭаратә усмҩаԥгатәқәа ирыцырҵаларц, анаҩс урҭ Аԥсны афымцамчтә система уаҳа аҽаԥшьра рылымшартә еиԥш иаҿырхларц азы.

АУН "Амшынеиқәафымцамч" адыррақәа рыла, Аԥсны афымцацәаҳәақәа ажәит, рҭагылазаашьа нагарҭа амамкәа ибааԥсуп, арахь афымцамч ахархәара есышықәса иацлоит 5-9% рыла, уи иахҟьаны уажәы иҟоу амчхара азхом иахьатәи аамҭазы ахархәара змоу афымцалашаразгьы.

Иара убас шәаԥхьар ҟалоит:

 

 

 

 

 

11
Атемақәа:
Аԥсны аенергетика апроблемақәа (155)

Џьынџьал еиҭеиҳәеит Аҟәа ариаҵәаразы имҩаԥырго аусурақәа ртәы

7
Аҟәа ахадара ариаҵәаратә усбарҭа агроном хада Гоча Џьынџьал арадио Sputnik аефир аҟны еиҭеиҳәеит арҭ амшқәа рзы имҩаԥырго аусурақәа ртәы.
Џьынџьал еиҭеиҳәеит Аҟәа ариаҵәаразы имҩаԥырго аусурақәа ртәы

"Аԥхьа инаргыланы ҳаибашьцәа анышә иахьамадоу апарк аҟны еиҭаҳҳаит 65 шьапы аԥсаҵлақәа, акамфортә ҵлақәа -13. Аҵлақәа ӡынгьы-ԥхынгьы аиаҵәара амоуп, ашәшьыра ҟанаҵоит. Ҳгәаанагарала ҳажәларгьы ргәы иаҳа иаахәар ҟалоит. Ирацәахеит уаҟа ихыԥсааз аҵлақәа. Убасгьы, администрациа аҿаԥхьа иҟоу апарк аҟны еиҭаҳахоит аҵлақәа, уаҵәы-уаҵәашьҭахь афилармониа ааигәа еиҭаҳҳараны ҳаҟоуп, аҵлақәеи аҵиаақәеи рзы аҭыԥқәа ҳархиахьеит Баграт Шьынқәба ихьӡ зху апарк аҟны, насгьы амшын аԥшаҳәа иахьагу аҵлақәа еиҭаҳҳарц ауп. Сынтәа, 165 ҵла иреиҳаны еиҭаҳҳауеит, уаҳа изалҵуам, аха аԥхьаҟа ҳгәыӷуеит даҽа 500 шьапы реиҭаҳара ҳалшап ҳәа. Амагнолиақәеи, аԥсақәеи, акамфортә ҵлақәеи, османтусқәеи роуп, аҵлақәа очамчырантәи иааҳгеит, агәыӷра ҳамоуп урҭ аднакылап ҳәа", - иҳәеит Џьынџьал.

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik аефир аҟны.

7

Акоронавирус зыдбалаз даҽа хҩык рыԥсҭазаара иалҵит Аԥсны

12
(ирҿыцуп 19:48 30.11.2020)
Иҳаҩсыз уахыки-ҽнаки рыла COVID-19 рылоу ирыламу аилкааразы 308-ҩык атестқәа рзыҟаҵан, урҭ рахьтә 87-ҩык акоронавирус рцәа ишалаз аадырԥшит.

АҞӘА, абҵара 30 - Sputnik. Аҵыхәтәантәи уахыки-ҽнаки рыла ахәышәтәырҭақәа рҟны аҿкычымазара зыдбаланы ишьҭаз хҩык апациентцәа рыԥсҭазаара иалҵит, ҳәа аанацҳауеит Аԥсны ауааԥсыра COVID-19 рацәыхьчаразы аоперативтә штаб.

Гәдоуҭатәи ахәышәтәырҭа аҟны иԥсҭазаара далҵит 1954 шықәсазы ииз апациент. Ахаҵа ахәышәтәырҭа дҭашәеит акоронавирустә инфекциа ицәа иаланы жьҭаара 16 рзы. Иақәнагаз атерапиа шизмҩаԥыргозгьы, идунеи иԥсахит абҵара 29 рзы.

Гәдоуҭатәи аковид-госпиталь аҟны иԥсҭазаара далҵит 1936 шықәсазы ииз апациент. Ахаҵа ахәышәтәырҭа дҭашәеит акоронавирустә инфекциа ицәа иаланы абҵара 22 рзы. Ареанимациа аҟәшахьы диаган иҭагылазаашьа акыр ианыӷәӷәаха абҵара 26 рзы. Иақәнагаз атерапиа шизымҩаԥыргозгьы, идунеи иԥсахит абҵара 29 рзы.

Абҵара 29 рзы аҟәатәи амобилтә госпиталь аҟны иԥсҭазаара далҵит 1940 шықәса рзы ииз апациент. Иара акоронавирустә инфекциеи ҩганктәи аполисегментартә гәыҵәкреи иманы ахәышәтәырҭа дҭашәеит. Иақәнагаз атерапиа шизымҩаԥыргозгьы, апациент иԥсҭазаара далҵит игәеисра аԥсыҽхара иахҟьаны абҵара 29 рзы. 

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 79-ҩык ауааԥсыра, урҭ рахьтә 65-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 23-ҩык, ибжьаратәуп - 16-ҩык.

Аҟәатәи аинфекциатә хәышәтәырҭаҿы ирхәышәтәуеит 35-ҩык апациентцәа.

Аҟәатәи амобилтә госпиталь аҟны ишьҭоуп акоронавирус зыдбалоу 43-ҩык апациентцәа. 40-ҩык рҭагылазаашьа бжьаратәуп ҳәа иԥхьаӡоуп, хҩык рҭагылазаашьа бааԥсуп.

Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 5970-ҩык ыҟоуп. Урҭ рахьтә ргәы бзиахеит 3845-ҩык, рыԥсҭазаара иалҵит 84-ҩык.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

12
Атемақәа:
Ачымазара ҿкы – акоронавирус Аԥсни адунеи аҿи: иалкаау