Аслан Бжьаниа Башар Асад дидышшылеит Уалид Муаллем иԥсҭазаара иалҵра инамаданы

8
Шьамтәылатәи Арабтә республика аԥыза-министр ихаҭыԥуаҩ, Адәныҟатәи аусқәа рминистр Уалид Муаллем 79 шықәса дшырҭагылаз иԥсҭазаара далҵит абҵара 16 рзы.

АҞӘА, абҵара 16 - Sputnik. Аԥсны ахада Аслан Бжьаниа Шьамтәылатәи Арабтә республика ахада Башар Асад ихьӡала адышшыларатә шәҟәы ишьҭит Шьамтәылатәи Арабтә республика аԥыза-министр ихаҭыԥуаҩ, Адәныҟатәи аусқәа рминистр Уалид Муаллем иԥсҭазаара иалҵра инадҳәаланы.

"Аԥсны Аҳәынҭқарра ажәлари, хаҭала сара сыхьӡалеи Шәареи Шьамтәыла ажәлар зегьи ҳшәыдышшылоит Шьамтәылатәи Арабтә республика аԥыза-министр ихаҭыԥуаҩ, Адәныҟатәи аусқәеи аҳәаанырцә иҟоу аџьынџьуаа русқәа рзи аминистр Уалид аль-Муаллем иԥсҭазаара иалҵра инадҳәаланы. Уалид аль-Муаллем иԥсҭазаара зегьы Аԥсадгьыл аинтересқәа рыхьчаразы иҿырԥшыганы иҟан", - ҳәа аҳәоит адышшыларатә шәҟәаҿы.

Иара убас ҷыдала иазгәаҭоуп Аԥсны ахәшьара ҳарак аҭаны ишырыԥхьаӡоз Муаллем иҩызара.

Шьамтәылатәи Арабтә республика аԥыза-министр ихаҭыԥуаҩ, Адәныҟатәи аусқәа рминистр Уалид Муаллем 79 шықәса дшырҭагылаз иԥсҭазаара далҵит абҵара 16 рзы.

Иара убас шәаԥхьар ҟалоит:

8

Емырхәба еиҭеиҳәеит Алакәымҳара ақыҭаҟны имҩаԥысуа аусурақәа ртәы

7
(ирҿыцуп 21:21 23.11.2020)
Гал араион ахада ихаҭыԥуаҩ Беслан Емырхәба арадио Sputnik арубрика "Раионк аԥсҭазаараҟынтә" аҿы еиҭеиҳәеит Алакәымҳара ақыҭаҟны ицо аиҭашьақәыргыларатә усурақәа ртәы.
Раионк аԥсҭазаараҟынтә: Емырхәба Гал араион аҟны аиҭашьақәыргыларатә усурақәа ртәы

"Алакәымҳара ашкол аҟны аусурақәа мҩаԥгатәны иҟоуижьҭеи акыр шықәса ҵуеит. Иҳәынҭқарратәым аиҿкаара ацхыраарала ахыб ԥсахуп, аиҭашьақәыргыларатә усурақәа мҩаԥысуеит ахыбра аҩныҵҟагьы. Быжь-километрак инацны амҩа аҟаҵара азгәаҭоуп Аберқыҭеи Алакәымҳареи рыбжьара, машьынала амҩасра уадаҩуп", - иҳәеит Емырхәба.

Шәазыӡырҩа аудио. Иаҳа инеиҵыху анҵамҭа шәаҳар шәылшоит арадио Sputnik аефир аҟны.

Иара убас шәаԥхьар ҟалоит:

7

COVID-19 Аԥсны: 62-ҩык аҿкы рыдырбалеит, ҩыџьа рыԥсҭазаара иалҵит

2
Иҳаҩсыз уахыки-ҽнаки рыла COVID-19 рылоу ирыламу аилкааразы 208-ҩык атестқәа рзыҟаҵан, урҭ рахьтә 62-ҩык акоронавирус рцәа ишалаз аадырԥшит.

АҞӘА, абҵара 23- Sputnik. Гәдоуҭатәи араионтә хәышәтәырҭа хадаҿы аԥсҭбарақәа ҩба ҟалеит абҵара 22 рзы, ҳәа аанацҳауеит Аԥсны ауааԥсыра COVID-19 рацәыхьчаразы аоперативтә штаб.

Иԥсҭазаара далҵит 64 шықәса ирҭагылаз ахаҵа. Иара ахәышәтәырҭа дҭашәеит абҵара 5 рзы акоронавирус ицәа иаланы. Изымҩаԥыргоз атерапиа иахьмырԥшкәа, апациент иԥсҭазаара далҵит игәеисра аԥсыҽхара иахҟьаны.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны лыԥсҭазаара далҵит 1940 шықәсазы ииз апациент. Иақәнагаз атерапиа шылзмҩаԥыргозгьы, лыдунеи лыԥсахит лгәеисра аԥсыҽхара иахҟьаны.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 72-ҩык ауааԥсыра, урҭ рахьтә 58-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 19-ҩык, ибжьаратәуп - 20-ҩык.

Аҟәатәи аинфекциатә хәышәтәырҭаҿы ирхәышәтәуеит 30-ҩык апациентцәа, хҩык рҭагылазаашьа уадаҩуп.

Амобилтә госпиталь аҟны ишьҭоуп акоронавирус зыдбалоу 31-ҩык апациентцәа. 27-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп.

Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 5374-ҩык ыҟоуп. Урҭ рахьтә ргәы бзиахеит 3623-ҩык, рыԥсҭазаара иалҵит 70-ҩык.

Акоронавирус иазку ажәабжьқәа зегьы шәрыԥхьар ҟалоит абра>>

2
Атемақәа:
Ачымазара ҿкы – акоронавирус Аԥсни адунеи аҿи: иалкаау