"Амшынеиқәафымцамч" аплан анҭыҵ алашара арцәара зыхҟьо еиҭарҳәеит

10
(ирҿыцуп 12:00 27.11.2020)
Аграфик ҿыц инақәыршәаны абҵара 26 инаркны Аԥсны афымцалашара арцәара аамҭа ԥшь-сааҭк рҟынтәи ҩ-сааҭк рҟынӡа иркьаҿуп.

АҞӘА, абҵара 27 – Sputnik, Бадраҟ Аҩӡба. АУН "Амшынеиқәафымцамч" апресс-маӡаныҟәгаҩ Алхас Гагәылиа Sputnik иазеиҭеиҳәеит ареспубликаҿы лассы-лассы алашара арцәара зыхҟьо.

"Аграфик анҭыҵ алашара ҳарцәоит афымцаҳақәа рҿы авариақәа аныҟало. Аграфик ала арцәараан ахархәага хадақәа ырцәалатәуп, избанзар алашара аннеиуа аҳақәа аидара иаҵалоит, авариақәагьы ҟалоит",- иҳәеит иара.

Амаининг фермақәа рыдагьы аҳақәа зҵало аидарақәа еиуеиԥшым ҳәа иҳәеит Гагәылиа.

"Амаининг ҟалаанӡагьы аҭагылазаашьа ус иҟан. Ҳәарада, аҳақәа ахьажәхьоу ауп авариақәагьы ахьыҟало", - иҳәеит иара.

Иара иазгәеиҭеит авариатә рцәарақәа рыдагьы аграфик ала алашара шдырцәало.

Аԥсны иахьаҵанакуа аамҭа-аамҭала афымцалашара арцәара аграфик алагалан абҵара 15 рзы. Аханатә ҩба-ҩба сааҭ – ҩынтә.

Абҵара 26 инаркны Аԥсны афымцалашара арцәара аамҭа ԥшь-сааҭк рҟынтәи ҩ-сааҭк рҟынӡа иркьаҿуп.

Атәыла афымцамчсистема аидара аҵхра алыршахеит закәаншьаҭада ацәаҳәақәа рҽахьаԥыршьуаз аҭыԥқәа раарԥшра. Арҭ ауснагӡатәқәа роуп аиҭакра алшарагьы ҟазҵаз.

Убас Ареспубликатә унитартә наплакы "Амшынеиқәафымцамч" абҵара 16-23 рыҩныҵҟала 85 маининг ферма русура ааннакылеит. Ари аамҭала афымцамч иаҿыхын 46 265 киловатт згоз, закәаншьаҭада аҳақәа ирҿаԥшьыз ахархәагақәа.

Ахаша, абҵара 25 рзы акриптавалиута ҟазҵо амаининг хархәагақәа аарԥшын аекономика аминистрра анапаҵаҟа иҟоу аобиектқәа: Аҟәатәи ачазауад №2, ЗЖБИ-1 (Бзыԥ аҳабла), "Аԥснеихамҩа" (Аҟәа, адепо), ДРСУ №3 (Аҟәа), Аҟәатәи аӡахырҭатә фабрика рҿы.

Иара убас шәаԥхьар ҟалоит:

10
Атемақәа:
Аԥсны аенергетика апроблемақәа (201)

Аԥсны Аҳәынҭстатистикаҿы ахныҟәгаратә минимум шьақәдыргылеит

1
(ирҿыцуп 10:20 23.01.2021)
Ииасыз ашықәс азы ишьақәыргылаз ахныҟәгаратә минимум иаҿурԥшуазар, сынтәатәи 4,6 процент рыла еиҳахеит.

АҞӘА, ажьырныҳәа 22 – Sputnik. Аусура зылшо Аԥсны атәылауаҩ ажьырныҳәа 1, 2021 шықәсазтәи аҭагылазаашьала ихныҟәгаратә минимум иартәеит 7398,6 мааҭ ҳәа аанацҳауеит Аԥсны Аҳәынҭқарра Аҳәынҭқарратә статистика аусбарҭа.

Ахныҟәгаратә минимум рахь иаҵанакуеит 5060,7 мааҭ рыхә афатә-ажәтә, акрыфара иадҳәалам атауарқәа 1450,1 мааҭ рыхә, ашәахтәқәеи ихымԥадатәиу ашәарақәеи – 887,8 мааҭ рыхә.

Иазгәаҭоуп ииасыз ашықәс азы ишьақәыргылаз ахныҟәгаратә минимум иаҿырԥшны, сынтәатәи 4,6 процент рыла ишеиҳахаз.

Аҳәынҭстатистика иара убас ицәырнагеит хаз игоу афатә-ажәтә хкқәа 2019-2020 шықәсқәа рзы иҟаз рыхәԥса ахьарбоу атаблица.

1

Аԥсны атуристтә бренд алоготип аус адулараз аицлабраҿ иаиааиз далкаауп

5
Аԥсны атуризм азы аминистрра ареспублика атуристтә бренд алоготип азы амакетқәа ралхразы ирыланаҳәаз аицлабра афинал ахь х-усумҭак неит, аусбарҭа асаит аҟны абжьыҭара алҵшәақәа рыла.

АҞӘА, ажьырныҳәа 23 – Sputnik, Асмаҭ Ҵәыџьԥҳа. Аԥсны атуризм азы аминистрра ареспублика атуристтә бренд алоготип азы амакетқәа ралхразы ирыланаҳәаз аицлабра афинал аҿы аиааиҩы далнакааит.

Ажиури рыбжьыҭарала аиааира игеит Санкт-Петербургтәи адизаинер, иара абжьқәа реиҳарак иоуит онлаин-бжьыҭараангьы. Аха убри аан ажиури ирҳәеит амакет еиҭа аус адулатәуп ҳәа.

Зегь раасҭа иалацәажәан амакет ианыз амандарина асахьа. Ажиури алахәылацәақәак ирҳәеит акцент зҭатәу Аԥсны аҭоурых-культуратә ҭынхоуп, аха егьырҭ ргәаанагарала ацитрус шәыр абренд ианаалоит, иареи ареспубликеи еиԥшныршьалоит азы ҳәа.

"Азеиԥш гәаанагара ацныҟәара аҭахым. Сара сзы амандарина аҳәаа аркра, аидара амҩангара, ауаа рӷарра ауп ианарԥшуа. Еиҳа аинтерес зҵоу асимволқәа ҳамоуп. Ақьырсиан культура ду ҳалаҽхәартә иҳамоуп", - ҳәа иҳәеит Баҭал Кобахьиа.

Иара диқәшаҳаҭхеит абрендинг азҟаза Анастасиа Краттлигьы.

"Абренд аамҭа иақәшәозар ауп, аха убри аан атәыла акультура аныԥшуазароуп", - ҳәа лҳәеит лара.

Аԥсны Апарламент адепутат Асҭамыр Аршба игәаанагарала амандарина аблокада аамҭа акәӡам изыдҳәалатәу, иԥсеиқәырхаганы акәын ишыҟаз, уи адагьы иара алоготип аҿы амра асахьоуп ианыԥшуа.

Аԥсны атуризм аминистр Ҭеимураз Хышба ажиури алахәылацәа иреиҳәеит абренд еиуеиԥшым аҭыԥқәа ишырныԥшуа: ацәашәҵатәы, аплиажтә хархәагақәа уҳәа реиԥш иҟақәоу. Аԥсуа орнамент ма афрескақәа абри аан рхархәара проблемахоит ҳәа иҳәеит иара.

Ажиури анеилацәажәа ашьҭахь иӡбан алоготип автор апроект аус еиҭадиуларц изырхынҳәра.

  • Туристический бренд Абхазии
    © Sputnik / Асмат Цвижба
  • Туристический бренд Абхазии
    © Sputnik / Асмат Цвижба
1 / 2
© Sputnik / Асмат Цвижба
Туристический бренд Абхазии

Аԥсны атуризм аминистрра ҳтәыла атуристтә бренд аус адуларазы аицлабра алахәхаразы арзаҳалқәа рыдкылара иалагеит абҵара 15 рзы. Аицлабраз иаашьҭын 54 макет. Аԥсны атуризм азы аминистрра ареспублика атуристтә бренд алоготип азы амакетқәа ралхразы ирыланаҳәаз аицлабраҿ иалнакааит ԥхынҷкәын 28 рзы жәа-макетк. Дара аминистрра асаит аҿы иқәыргылан.

Афинал ахь, ажьырныҳәа 22 рзы х-усумҭак неиит. Аиааира игеит абжьеиҳа зауз автор, иагьианашьахеит 50 000 мааҭ.

5