Сбор мандарин

Џьапуа: амандаринақәа сынтәатәи рекспорт аибашьра ашьҭахь иеиҳау рбагоуп

72
(ирҿыцуп 15:50 22.12.2020)
Уахыки-ҽнаки рыла аурыс-аԥсуа ҳәаа иахыргоит 1000 - 1900 тонна амандарина ҳәа иҳәеит аԥыза-министр ихаҭыԥуаҩ, ақыҭанхамҩа аминистр Беслан Џьапуа.

АҞӘА, ԥхынҷкәын 22 - Sputnik. Иахьазы Аԥснынтәи Урыстәылаҟа аҳәаа иахыгоуп 32,8 нызқь тонна амандарина, ари аибашьра ашьҭахь иеиҳау рбагоуп, ирекордтәуп ҳәа амаҵзура Аԥсныпресс иазеиҭеиҳәеит аԥыза-министр ихаҭыԥуаҩ, ақыҭанхамҩа аминистр Беслан Џьапуа.

"Сынтәа аҳауатә ҭагылазаашьагьы акыр иманшәалахеит, ахәаҷа-маҷа ирҿагыланы имҩаԥгаз ауснагӡатәқәагьы хәарҭахеит. Аҵыхәтәантәи ажәашықәса рыҩныҵҟа иреиӷьу аҽаҩра ҟалеит. Иахьазы Аԥснынтәи Урыстәылаҟа аҳәаа иахыгоуп 32,8 нызқь тонна амандарина, 2018 шықәса рзы –13,9 нызқь тонна,  2019 шықәсазы – 9,4 нызқь тонна",- иҳәеит аминистр.

Иара иазгәеиҭеит ахәаҷа-маҷақәа рнырҵәаразы ишныхыз 130 миллион мааҭ.

"Урыстәылеи Аԥсни аиҳабырабжьаратә еиқәшаҳаҭра рыбжьарҵеит. Уи аҳәаақәа ирҭагӡаны амармалташь пты, америкатәи ахьычԥаԥыр уҳәа егьырҭ аԥырхага ҟазҵо амаҵақәа рнырҵәаразы ауснагӡатәқәа мҩаԥган. 130 миллион мааҭ рзоужьын. Арҭ аԥарақәа, ф-миллионк рыда ҳхы иаҳархәеит", - иҳәеит Џьапуа.

Иара убасгьы ауааԥсыра ирзеихшан 20 000 литра амаҭәашьар, 400 хәшәықәҭәага, 12,5 нызқь аферомонтә каҭақәа. Ахәшә рықәҭәан 59 000 гектар адгьылқәа.

Аминистр иара убасгьы егьырҭ акультурақәа рекспорттә рбагақәа ртәы иҳәеит:

  • 2 000 тонна араса, 2019 ш.– 268 тонна,
  • 815 тонна ахәырма, 2019 ш. –59 тонна,
  • 991 тонна афеихо, 2019 ш. – 429 тонна,
  • 13 тонна акиви, 2019 шықәса рзы зынӡа иалгамызт.

Ацитрустә шәырқәа риагараан аԥснытәи аҳазалхырҭа иреиҵаӡоу аҳазалхратә хәыԥса шьақәнаргылоит – кьылак азы 19 мааҭ. Аҳазалхратә еизга аԥсуа ган аҿы 0,1 процент артәоит атауар аҳазалхратә хәыԥсаҟынтәи.

Аурыс ган аҿы ишьақәыртәоу хәыԥсак ыҟам. Ахәԥса еиҿыркаауеит атауар злаахәаз ҳәа адекларациаҿы иадырбо ахәԥсала. Уи адагьы Урыстәыла ашәыр алагалараан ахәԥсаҵазы ашәахтә (НДС) 10 процентк ахырхуеит.

72

Аԥсны COVID-19 рыдырбалеит даҽа 176-ҩык ауааԥсыра

11
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 10784ҩык ыҟоуп, ргәы бзиахеит 8513-ҩык, рыԥсҭазаара иалҵит 152-ҩык.

АҞӘА, ажьырныҳәа 18 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 544-ҩык атестқәа рзыҟаҵан, урҭ рахьтә 176-ҩык акоронавирус рцәа ишалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 120-ҩык, урҭ рахьтә 105-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 35-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 37-ҩык апациентцәа, Очамчыра ирхәышәтәуеит 20-ҩык, Тҟәарчалтәи ахәышәтәырҭаҿы - 15-ҩык, Гагратәи ахәышәтәырҭаҿы - 24-ҩык, Аҟәатәи амобилтә госпиталь аҟны ишьҭоуп акоронавирус зыдбалоу 60-ҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

 

11
Атемақәа:
Ачымазара ҿкы – акоронавирус Аԥсни адунеи аҿи: иалкаау

Река ақыҭа афельдшер: ажәлар рзы даара иуадаҩу аҭагылазаашьа шьақәгылеит

328
(ирҿыцуп 23:02 19.01.2021)
Река ақыҭа афельдшер Ламара Ҳашԥҳа-Қәычбериа арадио Sputnik аефир аҿы еиҭалҳәеит аҿкычымазара змоу ауаа рҭагылазаашьа атәы, насгьы илҳәеит ақыҭақәа рҿы амбулатортә ҭыԥқәа раартра азҵаара ишазхәыцтәу.
Река ақыҭа афельдшер: ажәлар рзы даара иуадаҩу аҭагылазаашьа шьақәгылеит

"Ақыҭаҿы уажәазы 14-ҩык инарзынаԥшуа ачымазцәа ыҟоуп. Зегьы аҿкы рыхьны иҟоуп ҳәа ишьақәыргыланы иҟам, аха асимптоматикала иароуп уҳәар алшоит. Ахәшәқәагьы аиура цәгьахеит. Рыхәқәагьы еиҳахеит. Абри ачымазара ҟалеижьҭеи ахәшә 10 мааҭк иаԥсазҭгьы, 30 рҟынӡа инеит. Ажәлар рзы даара иуадаҩу аҭагылазаашьа шьақәгылеит. Ачымазаҩцәа рҟны мнеишьа сымаӡам, аҩны аҟара бжьазаргьы снеироуп, иага ихаразаргьы ус. Мышкы иалагӡаны 9-ҩык ауаа акапельница рзықәсыргылоит. Урҭ шьҭа мчыбжьык ҵуеит ирзыҟасҵоижьҭеи, дара алгар, нас еиҭа иззыҟаҵатәу ҟалоит. Река ақыҭа адагьы, Бедиа, Патрахәыҵа, уҳәа еиҭа ақыҭа ссақәа рҿгьы ачымазаҩцәа сымоуп. Ачымазара шысхызгахьоугьы, сҽацәысахьчоит, ҳәарада. Иаҭаху зегьы ҟасҵоит, сықәра злаҟоу ала еиҭа исыхьыргьы ауеит, еиҭа ачымазара ӷәӷәақәа схызгахьеит, абарҭ зегьы снарҿыԥшны зынӡа сзашьҭоузеи ҳәа схы сзыҟаҵом. Иара иааиуа зегьы ишахәҭоу иааиуеит. Ҳара ҳашшәо еиԥш даргьы шәоит", - ҳәа еиҭалҳәеит афельдшер.

Ламара Ҳашԥҳа-Қәычбериа илҳәеит ажьырныҳәамза мацара иалагӡаны 226-ҩык ауааԥсыра шлыдылкылахьо, урҭ рыбжаҩык атәым қыҭақәа рҟнытә иаауеит.

"Иҟоуп аҭагылазаашьақәа схала иаҭаху анрасҳәо, избанзар зегьы ақалақь аҟынӡа изцаӡом", - ҳәа азгәалҭеит афельдшер.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Акоронавирус иазку ажәабжьқәа зегьы шәрыԥхьар ҟалоит абра>>

328
Атемақәа:
Ачымазара ҿкы – акоронавирус Аԥсни адунеи аҿи: иалкаау