Афымцацәаҳәақәа ахьанҭара раҵхразы Аҟәа алашара арцәара асхема алагалоуп
(ирҿыцуп 09:32 24.12.2020)
Аҟәа ақалақь аҿы афымцалашара еиԥҟьарала анашьҭра ахьынӡаҟало макьаназ еилкаам. АҞӘА, ԥхынҷкәын 24 – Sputnik, Бадри Есиава. Аҟәа афымцалашара анашьҭра уадаҩхо иалагеит ԥхынҷкәын 23 инаркны. Уи зыхҟьаз астанциа маҷқәа рҿы аидара аҳаракыроуп ҳәа Sputnik иазеиҭеиҳәеит Аҟәатәи афымцеихшарҭақәа русбарҭа (СУЕС) аиҳабы Ҭемыр Џьынџьал.
"Астанциа маҷқәа Аҟәа-1, Аҟәа-2, Баслатәи рҿы аидара иахҟьаны ахьчага ацәара иаҟәыҵит. Уажәы аграфик алагалоуп. Уи инақәыршәаны аамҭа-аамҭала фидерк фидерк дырцәалоит, сааҭк, ҩ-сааҭк. Абас ала ақалақь аҿы ҭыԥ-ҭыԥла алашара дырцәалоит. Синоп ада", - иҳәеит Џьынџьал.
Асеиԥш ахьынӡаҟало ҳаздырам ҳәа иҳәеит иара. Раԥхьа иргыланы ацәаҳәақәа аидара раҵалара зыхҟьо амаининг ауп ҳәа азгәеиҭеит иара.
АУН "Амшынеиқәафымцамч" Facebook аҿы адырра ҟанаҵеит ацәаҳәақәа реидара уаанӡагьы аҭыԥ шамаз, уажәы уи ишацлаз закәаншьаҭада аҽаԥшьрақәа.
"Закәаншьаҭада афымцатә ҳақәа зҽырԥызшьуа раанкыларазы иҟаҳҵо аусурақәа шырацәоугьы, ҳаизхом. Избанзар ирацәаҩуп зҽаԥызшьуа", - ҳәа азгәаҭоуп адырраҭараҿы.
Афымцарцәара ареспублика араионқәа зегьы аҵанакуоу иаҵанамкуоу макьаназ еилкаам.
Абҵарамза аахыс Аԥсны аенергетикатә кризис иҭагылоуп. Апроблемақәа мҽхакы ҭбаала рхы ркит астанциа маҷ "Аҟәа-1" аҟны амцакра ԥхынҷкәын 5 рзы ианыҟалаз ашьҭахь. Убри иахҟьаны Аҟәа агәи мраҭашәаратәи ахәҭеи, иара убас Иашҭхәа ақыҭеи мышқәак фымцалашарада иаанхеит. Иҟалаз авариа ахҟьаԥҟьақәа раԥыхразы АУН "Амшынеиқәафымцамч" амчқәа зегьы адԥхьалан. Ԥхынҷкәын 11 инаркны Урыстәылантәи афымцалашара аарышьҭуа иалагеит. Мчыбжьык ашьҭахь, асабша, ԥхынҷкәын 12 рзы астанциа маҷ "Аҟәа-1" аҟны аусура иаларган атрансформаторқәа зегьы. Мышқәак рышьҭахь апроблема ӡбан.
Абҵара 15 рзы атәылаҿы иалагалан аамҭа-аамҭала афымцалашара арцәаразы аграфик. Амза анҵәамҭазы имҩаԥгаз ауснагӡатәқәа иалдыршеит закәаншьаҭада афымцатә ҳақәа рҽаԥшьра азин аҟамҵара. Уи ф-сааҭк рҟынтәи ԥшь-сааҭк рҟынӡа алашара арцәара, аамҭақәак рышьҭахь ҩ-сааҭк рҟынӡа иларҟәын.
Атемақәа:
Аԥсны COVID-19 рыдырбалеит даҽа 176-ҩык ауааԥсыра
АҞӘА, ажьырныҳәа 18 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 544-ҩык атестқәа рзыҟаҵан, урҭ рахьтә 176-ҩык акоронавирус рцәа ишалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.
Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 120-ҩык, урҭ рахьтә 105-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 35-ҩык.
Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 37-ҩык апациентцәа, Очамчыра ирхәышәтәуеит 20-ҩык, Тҟәарчалтәи ахәышәтәырҭаҿы - 15-ҩык, Гагратәи ахәышәтәырҭаҿы - 24-ҩык, Аҟәатәи амобилтә госпиталь аҟны ишьҭоуп акоронавирус зыдбалоу 60-ҩык апациентцәа.
Акоронавирус иазку ажәабжьқәа зегьы шәрыԥхьар ҟалоит абра>>
Река ақыҭа афельдшер: ажәлар рзы даара иуадаҩу аҭагылазаашьа шьақәгылеит
(ирҿыцуп 23:02 19.01.2021)
Река ақыҭа афельдшер Ламара Ҳашԥҳа-Қәычбериа арадио Sputnik аефир аҿы еиҭалҳәеит аҿкычымазара змоу ауаа рҭагылазаашьа атәы, насгьы илҳәеит ақыҭақәа рҿы амбулатортә ҭыԥқәа раартра азҵаара ишазхәыцтәу. Река ақыҭа афельдшер: ажәлар рзы даара иуадаҩу аҭагылазаашьа шьақәгылеит
"Ақыҭаҿы уажәазы 14-ҩык инарзынаԥшуа ачымазцәа ыҟоуп. Зегьы аҿкы рыхьны иҟоуп ҳәа ишьақәыргыланы иҟам, аха асимптоматикала иароуп уҳәар алшоит. Ахәшәқәагьы аиура цәгьахеит. Рыхәқәагьы еиҳахеит. Абри ачымазара ҟалеижьҭеи ахәшә 10 мааҭк иаԥсазҭгьы, 30 рҟынӡа инеит. Ажәлар рзы даара иуадаҩу аҭагылазаашьа шьақәгылеит. Ачымазаҩцәа рҟны мнеишьа сымаӡам, аҩны аҟара бжьазаргьы снеироуп, иага ихаразаргьы ус. Мышкы иалагӡаны 9-ҩык ауаа акапельница рзықәсыргылоит. Урҭ шьҭа мчыбжьык ҵуеит ирзыҟасҵоижьҭеи, дара алгар, нас еиҭа иззыҟаҵатәу ҟалоит. Река ақыҭа адагьы, Бедиа, Патрахәыҵа, уҳәа еиҭа ақыҭа ссақәа рҿгьы ачымазаҩцәа сымоуп. Ачымазара шысхызгахьоугьы, сҽацәысахьчоит, ҳәарада. Иаҭаху зегьы ҟасҵоит, сықәра злаҟоу ала еиҭа исыхьыргьы ауеит, еиҭа ачымазара ӷәӷәақәа схызгахьеит, абарҭ зегьы снарҿыԥшны зынӡа сзашьҭоузеи ҳәа схы сзыҟаҵом. Иара иааиуа зегьы ишахәҭоу иааиуеит. Ҳара ҳашшәо еиԥш даргьы шәоит", - ҳәа еиҭалҳәеит афельдшер.
Ламара Ҳашԥҳа-Қәычбериа илҳәеит ажьырныҳәамза мацара иалагӡаны 226-ҩык ауааԥсыра шлыдылкылахьо, урҭ рыбжаҩык атәым қыҭақәа рҟнытә иаауеит.
"Иҟоуп аҭагылазаашьақәа схала иаҭаху анрасҳәо, избанзар зегьы ақалақь аҟынӡа изцаӡом", - ҳәа азгәалҭеит афельдшер.
Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.
Акоронавирус иазку ажәабжьқәа зегьы шәрыԥхьар ҟалоит абра>>