Михаил Мишустин Александр Анқәаб имш иира идиныҳәалеит

15
(ирҿыцуп 10:16 29.12.2020)
Аԥсны аԥыза-министр Александр Анқәаб диит ԥхынҷкәын 26, 1952 шықәсазы Аԥснытәи АССР ақалақь Аҟәа. Иара 68 шықәса ихыҵуеит.

АҞӘА, ԥхынҷкәын 26-Sputnik. Урыстәыла аԥыза-министр Михаил Мишустин аԥснытәи иколлега Александр Анқәаб имш иира идиныҳәалеит, абри атәы аанацҳауеит Аԥсны Аминистрцәа Реилазаара асаит.

Мишустин иазгәеиҭеит Аԥсни Урыстәылеи реизыҟазаашьақәа аҿиареи, арӷәӷәареи аус аҟны Александр Анқәаб илагала атәы.

"Агәра згоит аиҳабырабжьаратә усеицура ԥхьаҟа ишцо, ишеизҳауа. Ахәаахәҭра-економикатә, акультура-гуманитартә хырхарҭақәа рыла аусеицура иалдыршоит еиуеиԥшым апроектқәа рынагӡара. Уи азы Аԥсни Урыстәылеи иалшо ҟанаҵоит, ринтересқәа азгәаҭаны", -  аҳәоит адныҳәалараҿы.

Мишустин Аԥсны аԥыза-министр Александр Анқәаб изеиӷьеишьеит агәабзиареи ақәҿиарақәеи.

Александр Анқәаб, иара убас, имш иира идиныҳәалеит Аԥсны иҟоу Урыстәыла ацҳаражәҳәаҩ Алексеи Двинианин.

Александр Анқәаб диит ԥхынҷкәын 26, 1952 шықәсазы Аԥснытәи АССР ақалақь Аҟәа.

1974 шықәсазы далгеит Ростовтәи аҳәынҭқарратә университет, иара убас ЦК КПСС иатәу Ауаажәларратә ҭҵаарадыррақәа ракадемиа.

1975-1981 шықәсқәа рзы Аԥснытәи АССР Аиустициа аминистрраҿы аус иуан, Акомсомол Аԥснытәи аобком аҿы, дыҟан Гәдоуҭатәи араионтә комсомол актәи амаӡаныҟәгаҩыс, Аҩнуҵҟатәи аусқәа Гәдоуҭатәи рраионтә ҟәша аиҳабыс.

1981-1983 шықәсқәа рзы Қарҭ ақалақь аҿы Қырҭтәыла ЦК Акомпартиа административтә усбарҭақәа рыҟәша аинструкторс, ақыҭанхамҩа аҟәша аҭҵаарадырреи аекономикатә анализи рсектор аиҳабыс, административтә усбарҭақәа рыҟәша аиҳабы ихаҭыԥуаҩыс дыҟан.

1984-1990 шықәсқәа рзы Александр Анқәаб напхгара аиҭон Қырҭтәылатәи ССР Аҩнуҵҟатәи аусқәа рминистрра аполитаппарат (аминистр ихаҭыԥуаҩ изинқәа иманы). 1991 шықәсазы Аԥсны Иреиҳаӡоу Ахеилак адепутатс далхын.

1992-1993 шықәсқәа рзы Александр Анқәаб Аԥсны Аҳәынҭқарра аҩнуҵҟатәи аусқәа рминистрс дыҟан.

1994-2000 шықәсқәа рзы Анқәаб дынхон Москва, ауаажәларра-политикатә усура, агәыҳалалра, абизнес инапы рылакын.2000 шықәса раахыс Аԥсны ауаажәларра-политикатә ҵысра "Аиҭаира" аиҿкааҩцәеи анапхгаҩцәеи дыруаӡәкуп.

2005 шықәса жәабранмза инаркны 2010 шықәса жәабранмзанӡа Аԥсны Аҳәынҭқарра аԥыза-министрс дыҟан.

Жәабран 12, 2010 шықәса рзы Аԥсны Аҳәынҭқарра ахада ихаҭыԥуаҩыс дҟалеит.

Нанҳәа 26, 2011 шықәсазы Александр Анқәаб Аԥсны ахада имаҵура ааникылеит. Ԥхьатәара дцеит 2014 шықәсазы атәылаҿы аҭыԥ змаз аполитикатә кризис иахҟьаны.

2017 шықәсазы Александр Анқәаб Аԥсны Жәлар Реизара - Апарламент адепутатс далхын.

Мшаԥымза 24 2020 шықәсазыАслан Бжьаниа иусԥҟа инақәыршәаны Аԥсны аԥыза-министрс дҟаҵан.

15

Аԥсны COVID-19 рыдырбалеит даҽа 176-ҩык ауааԥсыра

11
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 10784ҩык ыҟоуп, ргәы бзиахеит 8513-ҩык, рыԥсҭазаара иалҵит 152-ҩык.

АҞӘА, ажьырныҳәа 18 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 544-ҩык атестқәа рзыҟаҵан, урҭ рахьтә 176-ҩык акоронавирус рцәа ишалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 120-ҩык, урҭ рахьтә 105-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 35-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 37-ҩык апациентцәа, Очамчыра ирхәышәтәуеит 20-ҩык, Тҟәарчалтәи ахәышәтәырҭаҿы - 15-ҩык, Гагратәи ахәышәтәырҭаҿы - 24-ҩык, Аҟәатәи амобилтә госпиталь аҟны ишьҭоуп акоронавирус зыдбалоу 60-ҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

 

11
Атемақәа:
Ачымазара ҿкы – акоронавирус Аԥсни адунеи аҿи: иалкаау

Река ақыҭа афельдшер: ажәлар рзы даара иуадаҩу аҭагылазаашьа шьақәгылеит

327
(ирҿыцуп 23:02 19.01.2021)
Река ақыҭа афельдшер Ламара Ҳашԥҳа-Қәычбериа арадио Sputnik аефир аҿы еиҭалҳәеит аҿкычымазара змоу ауаа рҭагылазаашьа атәы, насгьы илҳәеит ақыҭақәа рҿы амбулатортә ҭыԥқәа раартра азҵаара ишазхәыцтәу.
Река ақыҭа афельдшер: ажәлар рзы даара иуадаҩу аҭагылазаашьа шьақәгылеит

"Ақыҭаҿы уажәазы 14-ҩык инарзынаԥшуа ачымазцәа ыҟоуп. Зегьы аҿкы рыхьны иҟоуп ҳәа ишьақәыргыланы иҟам, аха асимптоматикала иароуп уҳәар алшоит. Ахәшәқәагьы аиура цәгьахеит. Рыхәқәагьы еиҳахеит. Абри ачымазара ҟалеижьҭеи ахәшә 10 мааҭк иаԥсазҭгьы, 30 рҟынӡа инеит. Ажәлар рзы даара иуадаҩу аҭагылазаашьа шьақәгылеит. Ачымазаҩцәа рҟны мнеишьа сымаӡам, аҩны аҟара бжьазаргьы снеироуп, иага ихаразаргьы ус. Мышкы иалагӡаны 9-ҩык ауаа акапельница рзықәсыргылоит. Урҭ шьҭа мчыбжьык ҵуеит ирзыҟасҵоижьҭеи, дара алгар, нас еиҭа иззыҟаҵатәу ҟалоит. Река ақыҭа адагьы, Бедиа, Патрахәыҵа, уҳәа еиҭа ақыҭа ссақәа рҿгьы ачымазаҩцәа сымоуп. Ачымазара шысхызгахьоугьы, сҽацәысахьчоит, ҳәарада. Иаҭаху зегьы ҟасҵоит, сықәра злаҟоу ала еиҭа исыхьыргьы ауеит, еиҭа ачымазара ӷәӷәақәа схызгахьеит, абарҭ зегьы снарҿыԥшны зынӡа сзашьҭоузеи ҳәа схы сзыҟаҵом. Иара иааиуа зегьы ишахәҭоу иааиуеит. Ҳара ҳашшәо еиԥш даргьы шәоит", - ҳәа еиҭалҳәеит афельдшер.

Ламара Ҳашԥҳа-Қәычбериа илҳәеит ажьырныҳәамза мацара иалагӡаны 226-ҩык ауааԥсыра шлыдылкылахьо, урҭ рыбжаҩык атәым қыҭақәа рҟнытә иаауеит.

"Иҟоуп аҭагылазаашьақәа схала иаҭаху анрасҳәо, избанзар зегьы ақалақь аҟынӡа изцаӡом", - ҳәа азгәалҭеит афельдшер.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Акоронавирус иазку ажәабжьқәа зегьы шәрыԥхьар ҟалоит абра>>

327
Атемақәа:
Ачымазара ҿкы – акоронавирус Аԥсни адунеи аҿи: иалкаау