Аԥсны ахшараиурҭақәа рҿы Ашықәс ҿыц ауха шымҩаԥысыз

59
2020 шықәса ҳанҭалоз Ашықәс ҿыц ауха Аԥсны ахшараиурҭақәеи ахшараиурҭатә ҟәшақәеи рҿы иит фҩык ахәыҷқәа.

АҞӘА, ажьырныҳәа 1 — Sputnik, Бадри Есиава. Ашықәс ҿыц ауха Аԥсны ӡӷабк диит ҳәа Sputnik акорреспондент изеиҭарҳәеит атәыла амедусбарҭақәа рҟны ахәаша, ажьырныҳәа 1 азы.   

Асаби диит Гагратәи ахәышәтәырҭа ахшараиуратә ҟәшаҿы. Гагратәи ахәышәтәырҭа аҳақьым хада Индира Арсалиаԥҳа ишылҳәаз ала, аӡӷаб д-Гыцԥҳауп, лыкапан х-кьылак иҟоуп, лоура - 54 сантиметра. Асабии лани ргәы бзиоуп.

Аҟәатәи ахшараиурҭа аҳақьым хада Белла Ԥлиаԥҳа ишылҳәаз ала, ажьырныҳәа 1 шьыжьынӡа дара рҿы аӡәгьы дмиӡацызт. Ҵыԥх абри амш азы иит хҩык ахәыҷқәа, урҭ рахьтә раԥхьа ииз Бганаа рҭаацәара аҳҭнықалақь ахада иҟынтәи шә-нызқь мааҭ иҟаз аԥаратә ҳамҭа роуит. Сынтәагьы абри аҩыза аҳамҭа шырзыршәо рҳәеит, аха макьана уи зауа деилкаам.

"Иацы, ԥхынҷкәын 31 рзы ҳара ҳҿы хҩык иит - ҩыџьа аӡӷабцәеи ҷкәынаки. Ажьырныҳәа 1 ҳҭалеижьҭеи макьарна аӡәгьы дмиӡацт. Асабицәеи ранацәеи рыгәқәа бзиоуп", - ҳәа лгәалаҟара ыҟаны дцәажәеит Ԥлиаԥҳа, иагьацылҵеит иҳаҩсыз 2020 ашықәс азы Аҟәатәи азшараиурҭаҿы ишиз 1128-ҩык ахәыҷқәа.

Гәдоуҭатәи ахәышәтәырҭа 2020 шықәса ааԥынразы аковид-госпиталь ҳәа иҟаҵан, убри аҟнытә уа ирыдыркыло акоронавирус зыдбалоу зцәазтәым аҳәса роуп ҳәа лҳәеит ахшараиурҭатә ҟәша аиҳабы Емма Ҭаркьылԥҳа. Уажәтәи Ашықәс ҿыц ауха рыҟәшаҿы иҭынчны имҩасит.

"Апандемиа ааҟалеижьҭеи ҳара ҳҿы COVID-19 злаз аҳәса ахшара дроуит. Апандемиа ҟалаанӡа 18-ҩык ҳаман, ашықәс иаалагазар, жәабран-хәажәкыра рзы", - лҳәеит Ҭаркьылԥҳа.

Лара илгәалалыршәеит аибашьра ҟалаанӡа Гәдоуҭатәи ахәышәтәырҭа ахшараиуратә ҟәшаҿы шықәсык ала 1300-ҩык ахшара шроуаз.

Тҟәарчалтәи ахәышәтәырҭаҿы ԥхынҷкәын 31 ажьырныҳәа 1 рзы аӡәгьы дмиӡеит, уажәы уа раамҭа иазыԥшуп ԥшьҩык зцәазтәым аҳәса, руаӡәк ахәбатәи ахшара дизыԥшуп лҳәеит аҟәша аиҳабы Елисо Кәарҷиаԥҳа. Галтәи ахәышәтәырҭаҿгьы Ашықәс ҿыц ауха "ҭынчран".

Очамчыратәи ахәышәтәырҭа ахшараиуратә ҟәшахьы уажәы зцәазтәым аҳәса рыдыркылаӡом, избанзар уажәы уа аковид-чмазаҩцәа роуп ирхәышәтәуа. Аҟәша аиҳабы Екатерина Џьопуаԥҳа излалҳәаз ала, мышкы уажәаԥхьа Очамчырантәи Аҟәаҟа дышьҭын зымза иҭагылоу ԥҳәыск.

59

Аԥсны атуристтә бренд алоготип аус адулараз аицлабраҿ иаиааиз далкаауп

3
Аԥсны атуризм азы аминистрра ареспублика атуристтә бренд алоготип азы амакетқәа ралхразы ирыланаҳәаз аицлабра афинал ахь х-усумҭак неит, аусбарҭа асаит аҟны абжьыҭара алҵшәақәа рыла.

АҞӘА, ажьырныҳәа 23 – Sputnik, Асмаҭ Ҵәыџьԥҳа. Аԥсны атуризм азы аминистрра ареспублика атуристтә бренд алоготип азы амакетқәа ралхразы ирыланаҳәаз аицлабра афинал аҿы аиааиҩы далнакааит.

Ажиури рыбжьыҭарала аиааира игеит Санкт-Петербургтәи адизаинер, иара абжьқәа реиҳарак иоуит онлаин-бжьыҭараангьы. Аха убри аан ажиури ирҳәеит амакет еиҭа аус адулатәуп ҳәа.

Зегь раасҭа иалацәажәан амакет ианыз амандарина асахьа. Ажиури алахәылацәақәак ирҳәеит акцент зҭатәу Аԥсны аҭоурых-культуратә ҭынхоуп, аха егьырҭ ргәаанагарала ацитрус шәыр абренд ианаалоит, иареи ареспубликеи еиԥшныршьалоит азы ҳәа.

"Азеиԥш гәаанагара ацныҟәара аҭахым. Сара сзы амандарина аҳәаа аркра, аидара амҩангара, ауаа рӷарра ауп ианарԥшуа. Еиҳа аинтерес зҵоу асимволқәа ҳамоуп. Ақьырсиан культура ду ҳалаҽхәартә иҳамоуп", - ҳәа иҳәеит Баҭал Кобахьиа.

Иара диқәшаҳаҭхеит абрендинг азҟаза Анастасиа Краттлигьы.

"Абренд аамҭа иақәшәозар ауп, аха убри аан атәыла акультура аныԥшуазароуп", - ҳәа лҳәеит лара.

Аԥсны Апарламент адепутат Асҭамыр Аршба игәаанагарала амандарина аблокада аамҭа акәӡам изыдҳәалатәу, иԥсеиқәырхаганы акәын ишыҟаз, уи адагьы иара алоготип аҿы амра асахьоуп ианыԥшуа.

Аԥсны атуризм аминистр Ҭеимураз Хышба ажиури алахәылацәа иреиҳәеит абренд еиуеиԥшым аҭыԥқәа ишырныԥшуа: ацәашәҵатәы, аплиажтә хархәагақәа уҳәа реиԥш иҟақәоу. Аԥсуа орнамент ма афрескақәа абри аан рхархәара проблемахоит ҳәа иҳәеит иара.

Ажиури анеилацәажәа ашьҭахь иӡбан алоготип автор апроект аус еиҭадиуларц изырхынҳәра.

  • Туристический бренд Абхазии
    © Sputnik / Асмат Цвижба
  • Туристический бренд Абхазии
    © Sputnik / Асмат Цвижба
1 / 2
© Sputnik / Асмат Цвижба
Туристический бренд Абхазии

Аԥсны атуризм аминистрра ҳтәыла атуристтә бренд аус адуларазы аицлабра алахәхаразы арзаҳалқәа рыдкылара иалагеит абҵара 15 рзы. Аицлабраз иаашьҭын 54 макет. Аԥсны атуризм азы аминистрра ареспублика атуристтә бренд алоготип азы амакетқәа ралхразы ирыланаҳәаз аицлабраҿ иалнакааит ԥхынҷкәын 28 рзы жәа-макетк. Дара аминистрра асаит аҿы иқәыргылан.

Афинал ахь, ажьырныҳәа 22 рзы х-усумҭак неиит. Аиааира игеит абжьеиҳа зауз автор, иагьианашьахеит 50 000 мааҭ.

3

НАТО ҩаԥхьа Урыстәыла Аԥсни Аахыҵ Уаԥстәылеи разхаҵара мап ацәнакырц иаанаԥхьеит

7
Урыстәыла Аԥсни Аахыҵ Уаԥстәылеи рхьыԥшымра азханаҵеит 2008 шықәса нанҳәамзазы амч ахархәарала уаанӡатәи автономиақәа архынҳәырц азы иаԥшьнагаз ахҭысқәа рышьҭахь.

АҞӘА, ажьырныҳәа 22 – Sputnik. НАТО Урыстәыла Аԥсни Аахыҵ Уаԥстәылеи разхаҵара мап ацәнакырц ишаанаԥхьац иаанаԥхьоит иҳәеит НАТО аҳәынҭмаӡаныҟәгаҩ Иенс Столтенберг Бриуссель Қырҭтәыла ахада Саломе Зурабишвили дылԥылаанӡа имҩаԥигоз апресс-конференциаҿы. Абри атәы аанацҳауеит РИА Новости.

"Ҳара Урыстәыла Аԥсни Аахыҵ Уаԥстәылеи ррегионқәа разхаҵара мап ацәнакырц ишааҳаԥхьац иааҳаԥхьоит", - иҳәеит иара.

Столтенберг иара убас иациҵеит Урыстәыла "Қырҭтәыла аҵакыра акзаара ҳасаб азнауларц, жәларбжьаратә азин пату ақәнаҵаларц".

Уаанӡа адырра ҟарҵахьан Қырҭтәыла ахада Саломе Зурабишвили ажьырныҳәа 22 рзы Бриуссель иҟоу НАТО аштаб-квартира дшаҭаауа, иара убас НАТО-Қырҭтәыла еицырзеиԥшу акомиссиа аилатәара дшалахәхо.

Урыстәыла Аԥсни Аахыҵ Уаԥстәыла рхьыԥшымра азханаҵеит нанҳәа 26 2008 шықәсазы. Урыстәыла аиҳабыра изныкымкәа ирҳәахьан арҭ аҩтәылак рхьыԥшымра азхаҵара аиҭахәаԥшра ргәы ишҭам, уи аӡбамҭа иахьатәи аамҭа ишақәшәо. Қарҭ акәзар, урҭ рхьыԥшымра азханаҵарц агәы иҭам.

Нанҳәа 8 ауха 2008 шықәса рзы ақырҭуа ар "Градқәа", атанкқәа, авиациа рыла ихысуа аахыҵ Уаԥстәыла иажәлеит, аҳҭнықалақь Цхинвал абжа еилаԥырыххааит. Урыстәыла ауаԥс жәлар аӡәреи-аԥсреи ирцәыхьчо, ақырҭуа ир ирҿагылеит. Хәымш ицоз аибашьра ашьҭахь Аахыҵ Уаԥстәыла ахы иақәиҭтәын.

Ауаҩы изинқәа рзы Европатәи аӡбарҭа иацы ҵаҵӷәык аҵам ҳәа иаԥхьаӡеит 2008 шықәса нанҳәамзазтәи ахҭысқәа рзы Қырҭтәыла Урыстәыла иаднаҵо ахара.

Иара убас шәаԥхьар ҟалоит:

7