Семен Адлейба

"Сара схаҭа схы саԥшәымоуп": Семион Адлеиба 85 шықәса ихыҵра иазкны

21
(ирҿыцуп 19:03 01.01.2021)
Аԥсны зҽаԥсазтәыз ажурналист, Аԥсуа радио адиктор Семион Михаил-иԥа Адлеиба диит ажьырныҳәа 1, 1936 шықәсазы. Уи изку анҵамҭа ҳадылгалоит Sputnik акорреспондент Наала Гәымԥҳа.

Наала Гәымԥҳа, Sputnik 

Аԥсны зҽаԥсазтәыз ажурналист Семион Михаил-иԥа Адлеиба Аԥсуа радиоҟны ибжьы ирлас-ырласны иуаҳауан, уи дызлацәажәозгьы аинтереси актуалреи рыман. Иара Аԥсуа ҳәынҭқарратә телерадиоеилахәыра ахыҵхырҭаҿы дгылан. Қәҿиарала инаигӡоз ижурналистикатә усура зыдҳәалоу, раԥхьаӡа иргыланы, ахәыцреи, аинформациа аус адулареи роуп. Семион Михаил-иԥа иааинырсланы, обиективла адырраҭарақәа ҟаиҵон, ихатә гәаанагара ауаа ирыхьынмырҳалакәа. Иара изныкымкәан аредактор имаҵура идыргалахьан, аха иара излаиҳәо ала арепортиор иус еиӷьу ыҟам.

"Сара схаҭа схы саԥшәымоуп. Ауаҭахқәа ирыҩнатәаны аус зуа среиуаӡам, иагьсызныҟәгом уи анапынҵа. Арепортиори аредактори еиҿурԥшуазар, арепортиор еиҳа ихы дақәиҭуп, ҭыԥк аҟны дтәаны аус иуӡом аредактор иеиԥш", - ҳәа иҳәоит ажурналист.

Семион Адлеиба дрызҿлымҳан атуризм, аҭоурых, архитектуратә баҟақәа ирызку аматериалқәа. Дахьымнеиц ҭыԥк Аԥсны иҟаӡам, аспециалистцәа ирзымдыруа абаҟақәа ахьыҟоу аҭыԥқәа идыруеит.

Аамҭаказы екскурсиамҩаԥгаҩыс аус иуан. Амш актәи азбжазы арепортаж ирхиауан, ашьыбжьышьҭахь аекскурсиатә гәыԥ иманы амҩа дықәын Афон ҿыц ма Риҵаҟа. Семион Адлеиба дреиуоуп раԥхьаӡакәны Аԥсны еиҿызкааз аспелеологцәа ргәыԥ аԥшьгаҩцәа, х-нызқьынтә аҳаԥқәа рҭалара еиҿикаахьан.

Корреспондент абхазского радио Семен Адлейба
© Фото : из архива Екатерина Бебия
Семион Адлеиба аусураан

 

"Сара сзы абарҭ аҩ-заанаҭк ԥсшьаран", - иҳәоит ажурналист.

Иара игәалашәоит Аԥсуа радио аредактор хада Артиом Амқәаб раԥхьаӡакәны адҵа иҭаны данишьҭуаз. Усҟан Ростовынтәи Аҟәаҟа иааргеит аӡынрахгаразы азоопарк аҟынтәи агыгшәыгқәа. Ҿыц аусура иалагаз акорреспондент идырҵеит ахәыҷтәы дырраҭара "Аԥсны апионер" азы агыгшәыгқәа рыбжьы анҵара.

Сотрудники АР в 70-е годы, старший редактор Артем Амкуаб, корреспонденты Владимир Хашба, Елена Гунба, Семен Адлейба, выпускающая программ Тамара Хишба
© Фото : из архива Екатерины Бебия
Аԥсуа радио аусзуҩцәа 70-тәи ашықәсқәа раан: аредактор еиҳабы Артиом Амқәаб, акорреспондентцәа Владимир Ҳашба, Елена Гәынԥҳа, Семион Адлеиба, апрограммақәа рҭыжьҩы Ҭамара Хышԥҳа.

 

Уи атәы дазааҭгыло, ажурналист Семион Адлеиба игәалашәоит:

"Исиҭеит "арепортиор", усҟантәи аамҭазы иҟаӡамызт адиктофонқәа. "Арепортиорқәа" аа-кьылак рҟынӡа ркапануан. Избоит иҭаку агыгшәыгқәа. Аха схазы еилыскаароуми иарбақәан урҭ: уа иҟоуп Африкатәи алымқәа, Австралиатәи астраусқәа. Адиректор аброшиура сиҭан, урҭ зегьы закәыз еилыскааит. Амикрофон наҿаскын, авольер сназааигәахан, ацәажәара сналагеит - ари агыгшәыгқәа реиҳабы алым шакәу, нас егьырҭ агыгшәыгқәа, агиенақәа шракәу. Амикрофон ааигәара ианназга, абжьы ҭганы ихәааит. Егьырҭгьы снарзааигәахо, рыбжьқәа рынҵара саналагеит. Абас мацара хәлаанӡа аус зуан. Нас аԥшаҳәаҿы атекст еиқәсыршәон", - ҳәа игәалаиршәоит ажурналист.

Олег Шамба, Николаи Саӡба,Лиудмила Цобехьиа,Екатерина Бебиа,Семион Адлеиба, Анатоли Лагәлаа.
© Фото : из архива Екатерина Бебия :

Семион Михаил-иԥа Адлеиба аԥсуа жәлар рмилаҭ-хақәиҭратә қәԥара даветерануп, Жәлар рфорум "Аидгылара" далахәын. Иара Аԥсны жәлар рџьынџьтәылатә еибашьра 1992-1993 шш. раан аус иуан Аԥсуа радио аредакциаҿы, имаҷымкәа ианиҵахьан аиҿцәажәарақәеи арепортажқәеи аибашьра адәаҟынтә. Иара ирадиодырраҭарақәа реиҳарак Аԥсуа радио ахьтәы фонд ахыԥхьаӡараҿы иҟоуп.

Адлеиба Семион Михаил-иԥа ианашьоуп аорденқәа "Агәымшәарази" "Ахьӡ-аԥша" III аҩаӡара.

Иара убас шәаԥхьар ҟалоит:

21

Камкьиа: Миха Лакрба иҩымҭақәа, иновеллақәа сыԥсҭазаараҿы мҩақәҵагак исзаҩызоуп

0
(ирҿыцуп 14:26 19.01.2021)
120 шықәса раԥхьа диит ашәҟәыҩҩы Миха Лакрба. Аҿартә театр актиор Саид Камкьиа арадио Sputnik аефир аҿы иҳәеит аламыс азышәаҳәаҩ, Миха Лакрба иԥсҭазаараҿы иааникыло аҭыԥ.
Аԥсны еицырдыруа ахьыӡқәа: Камкьиа Миха Лакрба иаԥҵамҭақәа ирызкны

"Миха Лакрба иҩымҭақәа, иновеллақәа сыԥсҭазаараҿы мҩақәҵагак исзаҩызоуп. Иара нагарҭа амаӡамкәа ҳҵас, ҳқьабзқәа ааирԥшуеит. Саргьы сыԥсҭазаараҿгьы абас сыҟандаз, абри еиԥш схы мҩаԥызгандаз ҳәа сгәы ианаанаго ыҟоуп. Миха Лакрба ихьӡ аҿар ираҳахьеит, аха шамахамзар, урҭ ашәҟәыԥхьара рҭахым, иҟалаз асоциалтә ҳақәа ирхырҟьаны. Иара иновеллақәа ашколтә программаҿы иҟоуп, убасҟан ауп ухы-угәаҿы ианаанхо, анаҩс уаныҩеидаслак, еиҭа саԥхьандаз ҳәа агәазыҳәара узцәырыргоит. Атеатр аҿгьы зны-зынла ҳанааидтәалалак, иаҳгәалашәоит урҭ ановеллақәа. Убасҟантәи аамҭаз иара ифырхаҵа абас иҟаиҵеит, аха иахьазы уи ус ауама ҳәа еилҳаргоит. Ановеллақәа рыла иҭыху афильм кьаҿқәагьы акырӡа ибзиоуп, урҭ зегьы аинтернет аҿы иузыԥшаауам, аха иҟоу иахәаԥшхьоу рҟынтә исаҳахьеит ишыргәаԥхаз ала", - ҳәа еиҭеиҳәеит Камкиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

0

Аладатәи арратә округ аррамаҵзурауаа фымз рыҩныҵҟа COVID-19 аҟынтә алаҵа рзыҟаҵахоит

3
(ирҿыцуп 13:38 19.01.2021)
Аладатәи Арратә округ аруаа рҿы массалатәи алаҵаҟаҵара иалагоит. Урыстәылатәи алаҵа "Спутник V" актәи апартиа ааган Аԥсны иҟоу арратә базахь ԥхынҷкәын 2 рзы.

АҞӘА, ажьырныҳәа 19 - Sputnik. 225 000-ҩык рҟынӡа Аладатәи арратә округ аррамаҵзурауаа фымз рыҩныҵҟа COVID-19 аҟынтә алаҵа рзыҟаҵахоит ҳәа аанацҳауеит ААО апресс-маҵзура.

Алаҵа рзыҟаҵахоит аррамаҵзурауаа рҭаацәа, аграждантә персонал. Зынӡа шәнызқьҩык рҟынӡа.

Амассатә лаҵаҟаҵара хацыркхеит Аладатәи арратә округ аҿы. Актәи акомпонент рзыҟарҵахьеит 17 000-ҩык рҟынӡа, ҩ-компонентк рзыҟарҵахьеит фнызқьҩык.

Жәабран  15  2021 шықәсанӡа арратә округ амедусҳәарҭақәа иазыԥхьагәарҭоит аҽа 60 000-ҩык алаҵа рзыҟаҵара.

Алаҵа хатәгәаԥхаралоуп ишыҟарҵо, иззыҟарҵо уи азы ашәҟәы инапы аҵеиҩуеит.

Аденовирустә вектор шьаҭас измоу алаҵа нанҳәа 11 рзы Урыстәыла агәабзиарахьчара аминистрра ашәҟәы иҭанагалеит. Абасала иара адунеи аҿы ираԥхьатәиу коронавирус SARS-COV-2 иаҿагыло лаҵоуп.

3
Атемақәа:
Ачымазара ҿкы – акоронавирус Аԥсни адунеи аҿи: иалкаау