Октаи Ҷкотуа Есеф Ҳапат изы: "Дуаҩы лашан, инымаалоз ҟазшьак идсымбалацызт"

114
(ирҿыцуп 14:24 06.01.2021)
Акыршықәса раԥхьа Ҭырқәтәылантәи зҭоурыхтә ԥсадгьыл ахь наӡаӡа нхара ҳәа ихынҳәыз ҳџьынџьуаҩ , Аԥсны Аџьынџьтәылатә еибашьра аветеран Есеф Ҳапат иаамҭанымкәа идунеи иԥсахит. Иҩыза гәыблыла дигәалаиршәоит Октаи Ҷкотуа.

Сырма Ашәԥҳа, Sputnik

90-тәи ашықәсқәа инадыркны Тырқәтәылантәи иааны зҭоурыхтә ԥсадгьыл аҿы инхоз Аԥсны Аџьынџьтәылатә еибашьра аветеран, Леон иорден занашьаз Есеф Ҳапат иаамҭанымкәа иԥсҭазаара дахьалҵыз даара игәыхьны ирыдыркылеит иара дыздыруаз зегьы. Еснагь зхы-зҿы еихалашоз, иуаҩы аамысҭашәаз, аҳәатәи аҳәашьеи иақәшәоз, пату-ҳаҭыр зқәыз Есеф Ҳапат доуҳала акыр дшыӷәӷәазгьы, адунеи иалаҵәаз аҿкычымазара дзацәымцеит. Ишьҭахьҟа иара инижьит игәазхара изымбацыз аҭаацәа ԥшӡа, ахьӡ бзиа, аиҩызара ҷыда.

"Есеф ихуҳәааша даара ирацәоуп, егьа ажәа ссир изукыргьы, имаҷуп. Уаҩԥсык иаҳасабала, ԥсыуак иаҳасабала уҳәа зегь рыла иҿырԥшыгаз уаҩын. Иара иҭаацәаратә еизыҟазаашьа, итәашьа-игылашьа, ицәажәашьа, ихымҩаԥгашьа акыр ухнахуан, зегь рыла дҿырԥшыган, дуаҩы лашан", - ҳәа азгәеиҭоит Есеф иҩыза бзиа Октаи Ҷкотуа.

Есеф Ҳапат иҭаацәа рыгәҭа

Есеф Ҳапати Октаи Ҷкотуеи еибадыруеижьҭеи 30 шықәса инареиҳауп. Аԥсуаа рҟны ишаԥу еиԥш, рыцәгьа-рыбзиа еилан, зегь рыла еиларсны иҟан.

"Есеф иҟынтәи сара ахаан ажәа кьаҳәк смаҳацызт, инымаало ҟазшьак идсымбалацызт. Иуадаҩуп, аиашазы ихәҭоу ажәа аҳәара, иԥсадгьыл абзиабара иара илан, иуаажәлар пату рықәиҵон, иаргьы ҳаҭыр-патула изнеиуан", - игәалашәарақәа ҳацеиҩишеит Октаи Ҷкотуа.

Зыԥсадгьыл ахь ахынҳәра зқәашьхаз, забдуцәа рџьынџь аҿы зыҵәҩаншьап азырсыз Есыф Ҳапат и-Аԥсны ԥшӡа бзиа ибон, иԥсы алан, ианаҭахха аамҭазгьы, бџьаршьҭыхла иҩызцәа дрывагыланы аӷа хәымга диҿагылеит, иԥсадгьыл ихьчеит.

Есеф Ҳапат иҩызцәа рыгәҭа

"Ҭырқәтәылантәи Аԥсныҟа раԥхьа ихынҳәқәаз ҳџьынџьуаа дреиуан Есеф. Убринахысгьы иԥсадгьыл аҿы дынхон-дынҵуан, даӡәыкны иуаажәлар дрылагылан, ижәлар рхьаа ихьаан, ргәырӷьара игәырӷьаран. Аха, илахьынҵа кьаҿын умҳәозар…" - дҳацәажәон Октаи Ҷкотуа.

2013 шықәса рзы Аԥсуа телехәаԥшрала ицоз адырраҭара "Агәыӷра" аҟны Есеф Ҳаԥаҭ абас иҳәеит:

"Аԥсны Аџьынџьтәылатә еибашьра ианалага сыԥсадгьыл аҟны сыҟан, Алашарбага аҳаблаҿы адгьылҭыԥқәа ҳарҭан, аҩны аргылара ҳаҿын, ус ауп ажәабжь хлымӡаах шҳалаҩызгьы. Иҳамаз-иҳахӡыз ала ҳҽааибаҳҭан Ацҳа ҟаԥшь аҿы ҳнеит, уаҟа еилагылан зегьы, ашәарыцага шәақь зкызгьы дубарын. "Аидгылара" аҿы ҳнеит, уа ауаа рацәа ыҟан, зегь ззыԥшыз абџьар акәын… Ус Ҭырқәтәылантәи арԥарцәа рҽеидкыланы иааит, уи анаҳба, ҳарҭгьы ҳгәы шьҭыҵит. Аҭыԥантәи аԥсуаа акыр иҳахӡыӡаауан, ҷыдала иаҳзыҟан ҳара", -ҳәа азгәеиҭон Есефи сареи ҳаиҿцәажәараҟны шықәсқәак раԥхьа.

Есеф Ҳапат ичымазара аҵыхәала аҵыхәтәантәи аамҭазы иҽихәышәтәуан Ҭырқәтәыла, иара уаҟоуп иԥсҭазаарагьы дахьалҵыз. Иҟоу аҭагылазаашьа акыр ишыуадаҩугьы, иара иԥсыбаҩ аагахоит Аԥсныҟа, иԥсы зыҿҳәараз иԥсадгьыл гәакьаҿ анышә дамардоит.

"Абри ахҭысгьы иунарбоит Есеф дзакәыз. Иуаажәлари иԥсадгьыли рахь иааирԥшуаз аизыҟазаашьа закәыз еилыкка иуанаҳәоит. Ҳгәаҵаҿы наӡаӡа ихы-иҿы лашаӡа даанхоит, даара ҳгәы далсит, иԥсаҭа бзиахааит", - хәа азгәеиҭоит Октаи Ҷкотуа.

Аԥсуара иагәҭылсаз, зыламыс цқьаз, зыуаҩра ҳаракыз Есеф Ҳаԥаҭ ихьӡ лаша ҳгәаҵаҿы гәыблыла иаанхоит.

114

Аԥсны акоронавирус 85-ҩык ирыдырбалеит, аӡәы лыԥсҭазаара далҵит

4
(ирҿыцуп 23:55 26.01.2021)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 11301-ы ыҟоуп, ргәы бзиахеит 9207-ҩык, рыԥсҭазаара иалҵит 161-ы.

АҞӘА, ажьырныҳәа 26 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 555-ҩык атестқәа рзыҟаҵан, урҭ рахьтә 85-ҩык акоронавирус рцәа ишалаз аадырԥшитҳәа аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәышәтәырҭаҿы лыԥсҭазаара далҵит 1947 шықәса рзы ииз апациентка. Илзықәыргылаз адиагноз хадаакоронавирустә инфекциа ҿыц ауп, иара убас илыдбалан ҩганктәи ахәышәтәырҭанҭыҵтә аполисегментартә гәыҵәкра.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 125-ҩык, урҭ рахьтә 107-ҩык акоронавирус адиагноз рзышьақәыргылоуп, рҭагылазаашьа бааԥсуп 33-ҩык, ибжьаратәуп - 54-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 33-ҩык апациентцәа, Очамчыра ирхәышәтәуеит 18-ҩык, Тҟәарчалтәи ахәышәтәырҭаҿы - 15-ҩык, Гагратәи ахәышәтәырҭаҿы - 25-ҩык, Аҟәатәи амобилтә госпиталь аҟны ишьҭоуп акоронавирус зыдбалоу 48-ҩык апациентцәа.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит аҿкычымазара рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

4
Атемақәа:
Аҿкычымазара – акоронавирус Аԥсни адунеи аҿи: иалкаау

Ҭарба апандемиа аамҭазы ансамбль "Кавказ" абзазашьазы: ҳусқәа еилажьны иҟоуп

11
(ирҿыцуп 20:58 26.01.2021)
Ансамбль "Кавказ" асахьаркыратә напхгаҩы, Аԥсны Жәлар рартист Арвелод Ҭарба арадио Sputnik аефир аҟны еиҭеиҳәеит аҿкычымазара иахҟьаны атәылаҟны иалагалоу аԥкрақәа ансамбль акәашацәа рҟазара ишаныԥшуа атәы.
Ҭарба апандемиа аамҭазы ансамбль "Кавказ" абзазашьазы: даара ҳусқәа еилажьны иҟоуп

Аԥсны Жәлар рартист Арвелод Ҭарба иҳәеит аҿкычымазара COVID – 19 шихьыз, аҳақьымцәа ирырҭо абжьгарақәа рыла аҩны иҭаацәеи иареи аҽыхәышәтәра ишахысуа.

"…ижәбоит акарантин ишацҵоу, даара ҳгәы хьаауеит, ансамбль аҟынтәи аҷкәынцәеи аӡӷабцәеи аҭел иасуеит, ҳанбаҭыҵуеи ҳәа иҵаауеит, ихьааргоит. Даара ҳусқәа еилажьны иҟоуп, азин ҳарҭар, аусура ҳанбалагои ҳәа иԥшуп. Ас еиԥш аҭагылазаашьа зынӡа ишьақәнарҟьагәышьоит, аха иҟаҳҵари? Досу хаҭала рҽазыҟарҵоит, аха уи ахәаӡом. Аусура ҳҭыҵыргьы мызкы-ҩымз аҽазыҟаҵара ӷәӷәа аҭаххоит, ижәбоит шаҟа аамҭа цахьоу. Мызкы аколлектив аԥсшьара ианауҳажьуаз, аусура ҿыц ҳалагазшәа ашьапеихгара ҳцәыцәгьан, уажәы шаҟа аамҭа ҵуа аус ҳамуеижьҭеи. Акәашаҩ ашьапылымпыласҩы диҩызоуп, иҽазыҟаимҵакәа ампыл иҭаны астадион дықәуҵар, ахы-аҵыхәа дызнеиӡом, игәы аангылоит, иԥсы акуеит, - ус иҟоуп акәашацәагьы", - иҳәеит Ҭарба.

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik аефир аҟны.

Иара убас шәаԥхьар ҟалоит:

11
Атемақәа:
Аҿкычымазара – акоронавирус Аԥсни адунеи аҿи: иалкаау