COVID-19 змоу рзы Пицунда астационар актәи асмена амедусзуҩцәа русура хдыркәшеит

16
Акоронавирустә инфекциа имариани ибжьаратәни изхызго апациентцәа ԥхынҷкәын 28 раахыс Пицундатәи ахәышәтәырҭаҿы иаарту астационар аҿы рыхәышәтәра мҩаԥыргар рылшоит.

АҞӘА, ажьырныҳәа 12– Sputnik, Бадри Есиава. COVID-19 змоу апациентцәа рзы Пицундатәи ҽынлатәи астационар амедусзуҩцәа ҩымчыбжьтәи рыҷаԥшьара ашьҭахь актәи асмена арҭеит, ҳәа ааицҳауеит ахәышәтәырҭа аҳақьым хада Савели Серетиди.

Серетиди иҳәеит амедеҳәшьцәа ахыԥхьакратә режим ахь ишцаз, акоронавирус азы иарҭаз атестқәа рҭакқәа ишырзыԥшу. Ажьырныҳәа 11 рзы аҽа ҩыџьа амедеҳәшьцәа асмена рыдыркылеит.

"Астационар ааҳартызар, 31 пациент рыхәышәтәра– аинфузиатә терапиа иахысит. Агәырқәа, акапельницақәа ҟарҵеит. Ичмазцәоу рхыԥхьаӡара акыр еиҳауп, аха урҭ ахәшәқәа рыдыркылоит, ҳара ҳахь иааиуам", - иҳәеит иара.

Аҳақьым хада иҳәеит иҟоу аҭагылазаашьаҿы аусура акыр ишыуадаҩу.

"Асааҭ 9:00 инаркны асааҭ 17:00 рҟынӡа ахыхьчагатә комбинезонқәа рышәҵаны, асабрадақәеи анапхаҵақәеи рымӷаҵаны, абахилқәа рышьаҵаны, ахылԥақәа рхаҵаны аус руроуп. Рыԥсы анеиҭаркуаҵәҟьагьы ишырҭаху изтәом изгылом. Арҭ ахыхьчагақәа зегьы гагратәи ахәышәтәырҭаҟынтә иҳауеит. Асмена ашьҭахь арҭ зегьы икарыжьуеит",- иҳәоит иара.

Ԥхынҷкәын 28 рзы Пицунда ҽынлатәи астационар COVID-19 змоу рзы иаадыртит. Арахь инеир алшоит ибжьаратәуи ицәгьами аҭагылазаашьа змоу. Дара ара апроцедурақәа ирхысыр ҟалоит. Уажәазы 12 иараҭыԥ амоуп, аха иалшоит 20 иараҭыԥ рҟынӡа арҭбаара.

Астационар аусура алагара аламҭалаз иԥсахын афымцатә цәаҳәақәа, иқәыргылан арԥхагақәа, Аҟәантәи акварц лампақәа наргеит.

Уаанӡа, аҵыхәтәантәи аҩымз рыҩнуҵҟа Пицунда ауааԥсыра рыбжьара акоронавирус зцәа иалоу ауаа рацәаҩхеит ҳәа иҳәахьан аҳақьым хада.

16
Атемақәа:
Ачымазара ҿкы – акоронавирус Аԥсни адунеи аҿи: иалкаау (981)

НАТО ҩаԥхьа Урыстәыла Аԥсни Аахыҵ Уаԥстәылеи разхаҵара мап ацәнакырц иаанаԥхьеит

3
Урыстәыла Аԥсни Аахыҵ Уаԥстәылеи рхьыԥшымра азханаҵеит 2008 шықәса нанҳәамзазы амч ахархәарала уаанӡатәи автономиақәа архынҳәырц азы иаԥшьнагаз ахҭысқәа рышьҭахь.

АҞӘА, ажьырныҳәа 22 – Sputnik. НАТО Урыстәыла Аԥсни Аахыҵ Уаԥстәылеи разхаҵара мап ацәнакырц ишаанаԥхьац иаанаԥхьоит иҳәеит НАТО аҳәынҭмаӡаныҟәгаҩ Иенс Столтенберг Бриуссель Қырҭтәыла ахада Саломе Зурабишвили дылԥылаанӡа имҩаԥигоз апресс-конференциаҿы. Абри атәы аанацҳауеит РИА Новости.

"Ҳара Урыстәыла Аԥсни Аахыҵ Уаԥстәылеи ррегионқәа разхаҵара мап ацәнакырц ишааҳаԥхьац иааҳаԥхьоит", - иҳәеит иара.

Столтенберг иара убас иациҵеит Урыстәыла "Қырҭтәыла аҵакыра акзаара ҳасаб азнауларц, жәларбжьаратә азин пату ақәнаҵаларц".

Уаанӡа адырра ҟарҵахьан Қырҭтәыла ахада Саломе Зурабишвили ажьырныҳәа 22 рзы Бриуссель иҟоу НАТО аштаб-квартира дшаҭаауа, иара убас НАТО-Қырҭтәыла еицырзеиԥшу акомиссиа аилатәара дшалахәхо.

Урыстәыла Аԥсни Аахыҵ Уаԥстәыла рхьыԥшымра азханаҵеит нанҳәа 26 2008 шықәсазы. Урыстәыла аиҳабыра изныкымкәа ирҳәахьан арҭ аҩтәылак рхьыԥшымра азхаҵара аиҭахәаԥшра ргәы ишҭам, уи аӡбамҭа иахьатәи аамҭа ишақәшәо. Қарҭ акәзар, урҭ рхьыԥшымра азханаҵарц агәы иҭам.

Нанҳәа 8 ауха 2008 шықәса рзы ақырҭуа ар "Градқәа", атанкқәа, авиациа рыла ихысуа аахыҵ Уаԥстәыла иажәлеит, аҳҭнықалақь Цхинвал абжа еилаԥырыххааит. Урыстәыла ауаԥс жәлар аӡәреи-аԥсреи ирцәыхьчо, ақырҭуа ир ирҿагылеит. Хәымш ицоз аибашьра ашьҭахь Аахыҵ Уаԥстәыла ахы иақәиҭтәын.

Ауаҩы изинқәа рзы Европатәи аӡбарҭа иацы ҵаҵӷәык аҵам ҳәа иаԥхьаӡеит 2008 шықәса нанҳәамзазтәи ахҭысқәа рзы Қырҭтәыла Урыстәыла иаднаҵо ахара.

Иара убас шәаԥхьар ҟалоит:

3

Иҳаҩсыз уахыки-ҽнаки рыла COVID-19 рыдырбалеит 112-ҩык, ԥсыҭбарак ҟалеит

9
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 11096-ҩык ыҟоуп, ргәы бзиахеит 8943-ҩык, рыԥсҭазаара иалҵит 157-ҩык.

АҞӘА, ажьырныҳәа 22 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 451-ҩык атестқәа рзыҟаҵан, урҭ рахьтә 112-ҩык акоронавирус рцәа ишалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

COVID-19 зцәа иалаз пациентк иԥсҭазаара иалҵит Гәдоуҭатәи ахәышәтәырҭаҟны ажьырныҳәа 20 рзы. !953 шықәсазы ииз апациент ахәышәтәырҭа дҭашәеит ажьырныҳәа 9 рзы, иара иахәҭаз ахәышәтәра дшахысуазгьы, ажьырныҳәа 20 рзы иԥсҭазаара далҵит. Изышьақәыргылан адиагноз "акоронавирустә инфекциа ҿыц", зыҽзыруадаҩыз ачымазара хада - "ҩганктәи аполисегментартә гәыҵәкра".

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 134-ҩык, рҭагылазаашьа бааԥсуп 35-ҩык, ибжьаратәуп - 48-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 37-ҩык апациентцәа, Очамчыра ирхәышәтәуеит 20-ҩык, Тҟәарчалтәи ахәышәтәырҭаҿы - 15-ҩык, Гагратәи ахәышәтәырҭаҿы - 20-ҩык, Аҟәатәи амобилтә госпиталь аҟны ишьҭоуп акоронавирус зыдбалоу 61-ы пациент.

Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 11096-ҩык ыҟоуп, ргәы бзиахеит 8943-ҩык, рыԥсҭазаара иалҵит 157-ҩык.

  • Акоронавирус иазку ажәабжьқәа зегьы шәрыԥхьар ҟалоит абра>>
9
Атемақәа:
Ачымазара ҿкы – акоронавирус Аԥсни адунеи аҿи: иалкаау (981)