Аԥсны ҷыдала иазыҟаз: Владимир Высоцки диижьҭеи 85 шықәса аҵра иазкны

30
(ирҿыцуп 23:03 25.01.2021)
85 шықәса раԥхьа, ажьырныҳәа 25 1938 шықәсазы диит асовет поет, актиор, ашәақәа равтор, ашәаҳәаҩ Владимир Высоцки. Иара изныкымкәа Аԥсны даҭаахьан. Sputnik ишәыднагалоит иара иԥсҭазаараҟынтәи иаагоу Аԥсны иадҳәалоу фактқәак.

Sputnik

Владимир Высоцки Аҟәа акырынтә даҭаахьан. Уи шаҟантә арахь даахьаз иара иҩызцәагьы иуацәагьы цқьа ирыздыруам, убас еиқәырццакны даалон.

Высоцки иҟазара иазку асаит аҟны ишырыҩуа ала, иара Аԥсны аҳҭнықалақь ахь еиҳарак даалон амшынеиқәатәи акруизқәа рыла атеплоходқәа дрықәтәаны. 1968 шықәса инаркны Ҟрым-Кавказтәи амаршрут ала иныҟәоз аӷбақәа Аҟәа есымша икыдгылон.

© Foto / Архив
Владимир Высоцки Аҟәатәи абаӷәазаҿы

Еиҳарак ауаа ргәалашәараҿы иаанхаз иара 1971 - 1973 шш. раан Аԥсны иаҭаарақәа роуп.

Лев Левитас игәалаиршәоит 1972 шықәса аԥхынразы Высоцки Аԥсныҟа дшааз Марина Влади длыцны атеплоход "Шота Руставели" ала. Усҟан апоет еиҳарак аӷбаҿы акәын иаамҭа ахьихигоз, акрыфаразы акаҳуажәырҭақәа рахь днеилон, хәылбыҽхала аконцертқәа аӷбаҿы имҩаԥигон.

Владимир Высоцкий с женой Марией Влади
© Sputnik
Владимир Высоцкии иԥшәма Марина Владии

1972 шықәсазы Высоцки иара убас ӷбала дааит Аҟәаҟа. Усҟан Марина Владии Павел Гурџьи ақьафурҭа "Нарҭаа" аҿы акрырфон.

Иара убас Владимир Высоцкии Марина Владии Пицундеи Аҟәеи иҭырхуаз рфотосахьақәа 1972 шықәсеи 1973 шықәсеи ҳәа арыцхәқәа рыҵаҩуп.

Аҟәатәи афизико-техникатә институт аҟны имҩаԥысхьан Высоцки иконцерт. Аԥсноуп аҭыхра ахьымҩаԥысуаз афильм "Хороший плохой человек".

Лауреат Государственной премии, актер театра и кино Владимир Высоцкий
© Sputnik / Галина Кмит
Владимир Высоцки

"Аконцерт маҷк ихьшәаны иалагеит. Высоцки иааира иазыԥшын. Асценахь днеит рацәак зоура ыҟамыз ауаҩы ԥшӡа. Асахҭан иалхыз кьаҿк ишәын. Иааишәыхны аҟәардә инхишьит. Еизаз аԥсшәа ааҳаҳәаны, иаразнакы иазгәеиҭеит ара иҟазаара агәахәара ду шинаҭо. Аконцерт цонаҵы изныкымкәа игитара арахәыцқәа ԥҵәеит, убасеиԥш ихы-иԥсы аҭаны дыхәмаруан", - Афизико-техникатә институт аҟны имҩаԥысыз аконцерт далацәажәеит ахәаԥшҩы Маргарита Селиванова.

© Foto / Архив
Владимир Высоцки Аԥсны даныҟаз

Елеонора Гилоиан - "Абаза-ТВ" акорреспондент, "Высоцкий и Абхазия" атемала апрограммақәеи алекциақәеи равтор - еиҭалҳәеит зегьы хацыркхеит афильм "Хороший плохой человек" аҭыхрала ишалагаз. Афильм аҟны Высоцки ароль хада неигӡон.

© Foto / Константин Мустафиди
Владимир Высоцки Аԥсны даныҟаз

Елеонора ишеиҭалҳәо ала, афильм аиҳарак Ҟрым иҭырххьан, Аԥсны иҭырхраны иҟаз ахәҭақәа рзы аҭыхратә гәыԥ Гагра иахьааиз ауадаҩра иақәшәеит. Дара аангылараны иахьыҟаз асасааирҭа "Гагрыԥшь" аҟны аҭыԥқәа ҟамлеит. Аномерқәа ааныркылеит ақырҭуа фильм "Амза амҵарсра" ҭызхуаз агәыԥ алахәылацәа. Гагра инхоз Григори Чепиа актиорцәа иҩныҟа инеиԥхьеит. Абра ахы акит урҭ реиҩызарагьы. Иахьагьы Чепиаа рҭаацәараҟны иахӡыӡаауа иҵәахны ирымоуп Марина Влади ҳамҭан инлыжьыз ашьали Высоцки дызлахәмаруаз агитареи.

© Foto / Константин Мустафиди
Владимир Высоцки Аԥсны даныҟаз

Елеонора Гилоиан еиҭалҳәеит Чепиаа рҭаацәареи Высоцкии шеизгәакьацәахаз. Уи аршаҳаҭуеит Валери Перевозчиков ишәҟәы "Ну здравствуй, это я" аҟны иааиго Высоцки Гаграҟа Чепиаа рахь 1974 шықәса рзы иааишьҭыз асалам шәҟәы:

"Бзиа избо диадиа Грышьеи тиотиа Лиубеи. Изыҩуа шәара ахәбатәи шәыҷкәын иоуп. Сара схы сымҩахо аусура саҿуп. Ташкенти Алма-Атеи сыҟан. Маринагьы Франциантәи салам шәылҭоит. Сшәыҳәоит, Сева Абдулов иан Елизавета Моисеевна дшәыдышәкыларц. Лыԥсы лшьарц лҭахуп аамҭақәак. Сара лара анык леиԥш дсыԥхьаӡоит. Сгәы иаанагоит шәаргьы бзиа дыжәбап ҳәа. Зегь салам сызрышәҭ. Бзиа шәызбоит. Шәыҳалалра схашҭуам. Ҳаиԥылараҟынӡа, Владимир Высоцки", - ҳәа ануп уи асаламшәҟәы ҳәа еиҭалҳәоит Елеонора Гилоиан.

Аԥсны еицырдыруеит Высоцки иажәеинраала "Знакомым в Гагре". Иара 1972 шықәсазы иҩит ҳәа иԥхьаӡоуп. Брежнев иеиҭагаҩ, Высоцки иҩыза Виктор Суходрев иажәақәа шьаҭас иҟаҵаны, Елеонора Гилоиан иазгәалҭоит Высоцки иашәа "Штормит весь вечер, и пока…" иҩит 1973 шықәса рзы Пицунда ҳәа.

Иааидкыланы, иумбарц залшом Высоцки Аԥсны ҷыдала дшазыҟаз.

Иара убас шәаԥхьар ҟалоит:

30

Урыстәыла Атәылахьчара аминистрра арратә госпиталь аҭыԥ ахь амҩа иқәлеит

0
(ирҿыцуп 12:21 09.03.2021)
2020 шықәса жьҭаара 20 рзы аусура иалагаз Урыстәыла Атәылахьчара аминистрра арратә мобилтә госпиталь ашәахьа хәажәкыра 1 азы Аԥсны аусура хнаркәшеит.

АҞӘА, хәажәкыра 9 - Sputnik, Бадраҟ Аҩӡба. Урыстәыла Атәылахьчара аминистрра арратә госпиталь, 2020 шықәса жьҭаара 20 рзы Аԥсны аусура иалагаз аҭыԥ ахь амҩа иқәлеит арратә техника аколонна иаланы.

Урыстәылатәи амедусзуҩцәа ҩымш рышьҭахь арратә техника аилазаара иаланы, 800 километра амҩа иахысны есқьаангьтәи ргыларҭа ҭыԥ иазыхынҳәуеит, Ставропольтәи атәылаҿацәахь.

Аколонна амҩатә ныҟәара ашәарҭадара ахылаԥшра арҭоит Аладатәи арратә округ арратә автоинспекциа.

Амобилтә медицинатә ҟәша аилазаара иалахәын шәҩык рҟынӡа амедусзуҩцәа, 30 ак арратә техника.

Аԥсны ауааԥсыра аҿкчымазара рацәыхьчаразы иҟанаҵаз аҳәарала Урыстәыла Атәылахьчара аминистрра арахь иаанашьҭит хырхарҭарацәалатәи амобилтә госпиталь шә-иарак зкышаз, ареспубликаҿ акоронавирустә инфекциа аҿагылара аҭаразы 2020 шықәса жьҭаара 20 рзы.

Иарбоу аамҭа иалагӡаны амбулатор-консультациатә цхыраара рыҭан хнызқьи быжьшәҩык инареиҳаны Аԥсны ауааԥсыра, амбулатортә дкылара рыҭан 3,3 нызқьҩык, астационартә – 450-ҩык рҟынӡа.

Иара убасгьы агоспиталь алабораториаҿ 18 000 рҟынӡа клиникатә ҭҵаара мҩаԥган, урҭ рҟынтәи 5,3 нызқь ПЦР-тест, 2 000 рентгенограмма.

Иара убас шәаԥхьар ҟалоит:

0
Атемақәа:
Аҿкычымазара – акоронавирус Аԥсни адунеи аҿи: иалкаау

Аԥсны аусура иалагараны иҟоуп атуристцәа рзы аинформациатә ресурс

5
(ирҿыцуп 11:42 09.03.2021)
Аурыс-аԥсуа проект "Хаба-Хаба" активла аԥсшьара бзиа избо атуристцәа рзы ицхыраагӡоуп.

АҞӘА, хәажәкыра 9 - Sputnik. Аԥсни Урыстәылеи ртуризм азы аинформациа-еилкааратә ресурс "Хаба-Хаба" аусура иалагалараны иҟоуп, ауснагӡатәқәа хыркәшоуп ҳәа арадио Sputnik иазеиҭеиҳәеит афонд "Ишьхатәылоу Аԥсны" анапхгаҩы Ҭенгиз Ҭарба.

Аресурс аԥҵареи арҿиареи рнапы алакын иактиву атуризм аусхк аганахьала аус зуа урыстәылатәи аҟазауаа, Ҭенгиз Ҭарба дрылахәны.

"Шьаҿа-шьаҿала активла атуризм мҩаԥызго ауаа рзы иманшәалоу ахархәагақәа аԥаҳҵоит. Ҳсаит иҭалан ицарц ахьырҭаху аԥшааразы алшара рымазаауеит. Уи азы иахәҭоу аинформациа рыҭахоит. Ирыҭахоит абжьгарақәа аныҟәара шымҩаԥыргашазы. Иара убасгьы, асаит аҿы иаархәар ҟалоит ирҭаххаша амаҭәа ҷыда", - иҳәеит иара.

Ҭарба иҳәеит "Хаба-Хаба" – иуникалу проектны ишыҟоу, атәылақәа жәпакы рҿы зеиԥш уԥымло шакәу.

Ҭарба иажәақәа рыла, апроект актәи ахәҭа ишаҵанакуа Урыстәылеиԥш Аԥсынгьы иактиву атуризм азы иахәҭаны иҟоу амаҭәа ҷыда ахьааухәаша аинтернет-дәқьан аартра. Аплатформа аамҭа-аамҭала ихарҭәаалахоит арҭ атәылақәа рҭыԥ ԥшӡарақәа рыӡбахә зҳәо аинформациала, хаҭала амаршрутқәа ирзааҭгыланы.

"Ари аурыс-аԥсуа проект авторцәа сыруаӡәкуп. Актәи аетап аан Аԥсны иазку аинформациа иаҳа еиҳауп. Нас –Алтаи, Камчатка уҳәа Урыстәыла егьырҭ арегионқәа ирылацәажәахоит", -  иҳәеит Ҭарба.

"Хаба-Хаба" иахәҭа ҷыданы иҟалоит аныҟәараан ашәарҭадара азхьаԥшразы аинформациа.

Афонд "Ишьхатәылоу Аԥсны" анапхгаҩы иҳәеит апроект ахьӡ –"Хаба-Хаба" иаанаго, Суахили абызшәаҟынтә уи "шьаҿа-шьаҿала" ма "маҷ-маҷла" ауп. Ари апроект аҵакы аанарԥшуеит.

Иара убас шәаԥхьар ҟалоит:

5