Аминистрцәа реилазаара аҵаратә процесс азыгьежьразы иаҭаху рҳәеит

35
(ирҿыцуп 12:10 27.01.2021)
Аԥсны иахьаҵанакуа акоронавирус аламырҵәаразы аԥкрақәа ирыҵанакит ашколқәраҟынӡатәии абжьараҵаратәии аусҳәарҭақәа, аԥкрақәа амч рымазаауеит жәабран 10 рҟынӡа.

АҞӘА, ажьырныҳәа 27 - Sputnik. Аԥсны Аминистрцәа реилазаараҿ аҵаратә процесс жәабранмзазы азыгьежьра алзыршо аҭагылазаашьақәа ирылацәажәеит ҳәа аанацҳауеит аиҳабыра рсаит.

Аԥыза-министр аамҭала инапынҵақәа назыгӡо Владимир Делба аҩашаҽны дырԥылеит Агәабзиарахьчара аминистр, Ареспублика асанитартә ҳақьым хада, Аҵареи абызшәатә политикеи рминистр. Аиԥылараҿы иалацәажәан етап-етапла аԥкрақәа рырԥсыҽра алыршара азҵаара.

Аиԥылараҿы иалкаан аҵаратә процесс ахацыркразы ихымԥадатәиу афакторқәа.

"Ари азҵаараҿы ихадоу ароль назыгӡо жәабран 10 рҟынӡа ачымазара аҿиара адинамика зеиԥшрахо ауп. Уи адагьы хадара ауеит агәабзиарахьчара асистема ахьынӡазыҟаҵоу, ахәшәқәа рымазаара, аныхратә материалқәеи ахыхьчагатә материалқәеи рыҟазаара. Ашколқәеи егьырҭ аҵаратә усҳәарҭақәеи раартра азҵаара ахәаԥшраҿы ишьаҿа хаданы иҟоуп иара убасгьы аҭыԥқәа рҿы аҭагылазаашьа – аҵаҩцәа рхыԥхьаӡара, арҵаҩцәа рыбжьара ичмазцәоу рхыԥхьаӡара", - иҳәеит Владимир Делба.

Иара анапынҵа ҟаиҵеит аусбарҭабжьаратә еинырра аҳәаақәа ирҭагӡаны аиԥыларақәа мҩаԥыргаларц, аҵаразы араионтә усбарҭақәа ирымадазарц, аҵаратә процесс аиҭахацыркра аконцепциа аус адыруларц аҵаратә усҳәарҭақәа зегьы рзы хазы-хаз аепидемиатә ҭагылазаашьа азгәаҭо.

"Ахәыҷбаҳчақәа, абжьараҵаратә школқәа, абжьара-профессионалтә усҳәарҭақәа раартра алацәажәара макьаназы изаауп. Уажәы ҳара иаҳуалу ахада иусԥҟаҿы иарбоу аҿҳәара аҽазырхиароуп. Аҵаратә процесс ҳзалагар ихадараны ҳҿаԥхьа иқәгыло азҵаара иара аиҭеиԥҟьара алмыршароуп. Апланқәа, ажәалагалақәа азырхианы Акоординациатә штаб изаамҭанытәиу аилатәараз инагатәуп", - иҳәеит Делба.

Ҭамаз Ҵахнакьиеи Лиудмила Скорики иахьазы иҟоу аепидемҭагылазаашьа ахәшьара аҭо иазгәарҭеит аԥкратә уснагӡатәқәа ишалдыршаз ачымазцәа рхыԥхьаӡара аиҵахара.

Аминистрцәа реилазаара аҵаратә процесс азыгьыжьра аҭагылазаашьақәа ирылацәажәеит

"Астационартә хәышәтәразы ауаа еиҳа имаҷны инанаго иалагеит. Ахәышәтәырҭақәа ирыдҵаало рхыԥхьаӡарагьы еиҵахеит", - рҳәеит агәабзиарахьчаратә система ахаҭарнакцәа.

Аԥсны иахьаҵанакуа акоронавирус аламырҵәаразы аԥкрақәа ирыҵанакит ашколқәраҟынӡатәии абжьараҵаратәии аусҳәарҭақәа, аԥкрақәа амч рымазаауеит жәабран 10 рҟынӡа.

Иара убас шәаԥхьар ҟалоит:

35
Атемақәа:
Аҿкычымазара – акоронавирус Аԥсни адунеи аҿи: иалкаау (1090)

Аԥсны Аџьынџьтәылатә еибашьра аветеранцәа ргәыԥк ахада ԥхьатәара дцарц ааԥхьара ирҭеит

2
(ирҿыцуп 13:30 09.03.2021)
Ҩышәҩык инарзынаԥшуа Аԥсны Аџьынџьтәылатә еибашьра аветеранцәа атәыла ахада Аслан Бжьаниа иахь ааԥхьара рнапы аҵарҩит.

АҞӘА, хәажәкыра 9 - Sputnik. 1992-1993 шықәсқәа рызтәи Аԥсны Аџьынџьтәылатә еибашьра аветеранцәа ргәыԥк ахада Аслан Бжьаниа ԥхьатәара дцарц ааԥхьара ирҭеит.

Ааԥхьараҿы аветеранцәа иазгәарҭеит 2020 шықәсазтәи анапхгареиҭакреи уи ашьҭахьтәи алхрақәеи атәылаҿ аҭагылазаашьа шеиҭарымкыз, 2004 шықәса раахыстәи аполитикатә кризис еиҳагьы аҽшарҭбааз.

"Ақәԥара ахьӡала ақәԥара ҳарааԥсеит. Адәныҟатәи ашәарҭарақәа ракәӡам ҳазҿагылогьы, ҳара ҳара ҳаиҿагылоуп. Иахьа зегьы еилыркаахьеит иалху амҩа, аиаша уҳәозар амҩа аҟамзаара, хара имгакәа аҳәынҭқарра ацәыӡрахь ҳашкылнаго", - аҳәоит аԥшьгаратә гәыԥ ирыладырҵәаз ааԥхьара.

Аҳәынҭқарразы ишәарҭоу ахылҿиаақәа ралмыршаразы, амилаҭ ԥхьаҟатәи рыҿиараз аҭагылазаашьа бзиақәа раԥҵаразы аветеранцәа ааԥхьара руеит:

  • Аслан Бжьаниа ԥхьатәара ацаразы аӡбра идикыларц,
  • Хара имгакәа ахада иалхрақәеи аҭыԥантәи ахаланапхгараҭаратә усбарҭақәа рахь алхрақәеи еицымҩаԥгазарц,
  • Аполитикатә партиа "Амцахара", аветерантә еиҿкаара "Аруаа", егьырҭ аветерантә еиҿкаарақәа ахада иалхраан акандидат иқәыргылара ма акандидатцәа руаӡәк далкааны идгылара рҽацәхьаркырц,
  • Аполитикатә партиа "Амцахара", аветерантә еиҿкаара "Аруаа", егьырҭ аветерантә еиҿкаарақәа алхрақәа раан алхратә закәанԥҵара анормақәа рықәныҟәашьеи аполитикатә етика азгәаҭашьеи хылаԥшра рыҭаразы акомиссиа (аринахыс – Акомиссиа) еицаԥырҵарц,
  • Акомиссиа иалнаршароуп ахадарахьы акандидатцәа рыбжьара аиқәшаҳаҭра анапаҵаҩра – иаиааиуа алхрақәа рышьҭахь ажәлар реидкылара аҭакԥхықәра рхахьы ишырго, аҿиаразы аҳәынҭқарратә программа аус шадыруло азы.

Аҩаша, хәажәкыра 9 рзы аветеранцәа атәылаҿ иҟоу аполитикатә ҭагылазаашьазы Аҟәа апресс-конференциа мҩаԥыргеит.

2

Аԥсны иҟоу Урыстәыла Ацҳаражәҳәарҭа Аҩӡба иаанкылара аҩныҵҟатә ус акәны иахәаԥшуеит

6
Хәажәкыра 4 рзы иааныркылаз Ахра Аҩӡбеи дзыхьчоз хәҩык иҩызцәеи Аԥсны Ашәарҭадаратә маҵзура аҳәамҭала Аԥсны аҳәынҭқарратә мчра аиҭакра аҽазышәара рыгәҭакын.

АҞӘА, жәабран 9 - Sputnik. Аԥсны иҟоу Урыстәыла Ацҳаражәҳәарҭа Ахра Аҩӡба иаанкылара Аԥсны аҩныҵҟатә ус акәны, азинхьчаратәи аӡбарҭатәи усбарҭақәа ркомпетенциа иаҵанакуа усны иахәаԥшуеит. Абри азы Ацҳаражәҳәарҭа Facebook аҿтәи адаҟьаҿы аҳәамҭа ҟаҵоуп.

"Аҭагылазаашьа амилаҭтә закәанԥҵара инақәыршәаны аҭышәныртәалара мҩаԥысып ҳәа агәыӷра ҳаманы ааԥхьара ҟаҳҵоит, ауаажәларра-политикатә еиҿкаарақәа рахь азиндырратә аспектқәа рхы рыларымгалаларц, аҳәынҭқарра аҩныҵҟа аҭынчра аиқәырхаразы", - азгәаҭоуп аҳәамҭаҿы.

Агәыԥ "Пятнашка" акомандир, Аԥсны ахада уаанӡатәи ицхырааҩ Ахра Аҩӡба даанкылан хәажәкыра 4 рзы. Азинхьчаратә усбарҭақәа русзуҩцәа хәажәкыра 4 рзы Ахра Аҩӡба дахьынхоз аҩнаҟны иаадырԥшит иҵәахыз абџьар, аџьаԥҳаны, ахархәага ҷыдақәа, арадиодырраҭара мҩаԥызго ашьақәгылақәа.

Ахра Аҩӡбеи дзыхьчоз иҩызцәа хәҩыки рганахьала ашьаус хацыркуп уаанӡа еиқәшаҳаҭханы абџьари аџьаԥҳани азакәаншьаҭа рымамкәа раахәара, рыҵәахра, рымҩангара, рныҟәгара ахьымҩаԥыргоз азы.

Хәажәкыра 7 рзы Аҟәатәи ақалақьтә ӡбарҭа Ахра Аҩӡбеи ихьчаҩцәа: Талех Гасанов, Аслана Гуатижев, Андреи Локтионов, Станислав Культа мызкы ҭакрала ирхыргарц аӡбамҭа аднакылеит.

Владимир Шьербаков, административтә зинеилагара мҩаԥигеит ҳәа даанкылоуп хәажәкыра 9-нӡа.

Иара убас шәаԥхьар ҟалоит:

6