АҞӘА, ажьырныҳәа 29 – Sputnik. Аԥсны ахәҭак фымцалашарада иаанхоит асабша, ажьырныҳәа 30 рзы астанциаеиҵақәа рҟны имҩаԥырго аремонттә усурақәа ирыхҟьаны, абри атәы аанацҳауеит "Амшынеиқәафымцамч".
Лашарада иҟазаауеит Аҟәеи Гәдоуҭеи рраионқәа рыхәҭак, Афон ҿыц ақалақьи.
Аремонттә усурақәа мҩаԥгахоит астанциа маҷ "Аҟәа-1" аҟны асааҭ 10:00 инаркны 13:00 рҟынӡа, иаҿыхзаауеит аҳауатә цәаҳәа "Баӷмаран-2". Иара убас астанциа маҷ "ИЕПиТ" аҟнытә афымцалашара зауа ауаа лашарада иҟазаауеит абри аамҭазы.
Убри аҽны асааҭ 13:00 инаркны 15:00 рҟынӡа иаҿыхзаауеит аҳауатә цәаҳәа 110 "Баӷмаран-1". Фымцамчда иаанхоит астанциа маҷқәа "Аҟәа-2", Афон ҿыц", "Мҵара", "Дәрыԥшь", "Гәдоуҭа" (Т2).
Афымцаҳақәа акыр иажәхьеит, ирықәу аидара рзышьҭыхуам- абарҭ роуп атәыла аенергетика проблема дуны иамоу. Аԥсуа аенергосистема шәарҭарыда аус аурц азы 21 миллиард мааҭ еиҵамкәа аԥара аҭахуп. Абри атәы иҳәеит Аслан Бжьаниа Апарламент актәи ааԥхьара адепутатцәа рԥылараан.
