Араионтә штабқәа амаининг аҿагыларазы мчыбжьыктәи русура ахада иҿаԥхьа еихыршьалеит

16
(ирҿыцуп 10:05 30.01.2021)
Иҳаҩсыз ахәаша ажьырныҳәа 22 рзы атәыла ахада араионқәа рҿы изакәанымкәа афымцалашара ахархәара аанкыларазы аоперативтә штабқәа аԥҵазарц адҵа ҟаиҵеит, уи азы алҵшәақәа ртәы мчыбжьык иалагӡаны иҟалароуп ҳәагьы реиҳәеит.

АҞӘА, ажьырныҳәа 30 - Sputnik, Асмаҭ Ҵәыџьԥҳа. Аԥсны ахада Аслан Бжьаниа араионтә оперштабқәеи аҳәынҭқарратә усбарҭақәеи алархәны аиԥылара мҩаԥыргеит изакәанымкәа акриптовалиута амаининг ахылаԥшра азҵаара иазкны.

Гагра араион ахада иажәақәа рыла, ажьырныҳәа 23 инаркны 32 криптоферма аҿыхын, зеиԥшла 26 мегаватт афымцамч ахы иақәиҭтәын, алашара џьара ԥхасҭак ҟалар ауп иандырцәо.

Гәдоуҭа араион аҟны иаҿыхын 37 криптоферма. Зеиԥшла ахы иақәиҭтәын аа-мегаваттк. Аха убри аан "Амшынеиқәафымцамч" гәдоуҭатәи аҟәша ахаҭарнак иҳәеит 34 криптоферма ракәын иаҿыхыз ҳәа. Атәыла ахада игәамԥхеит гәдоуҭатәи аоперштаб алахәылацәа рарбагақәа ахьеиқәымшәаз, иара убас "Амшынеиқәафымцамч" ахаҭарнак ажьырныҳәа 22 раахыс араион аҿы афымцалашара андырцәо аамҭеи шаҟа аамҭа ицәаны иҟоуи ҳәа ииҭаз азҵаарагьы аҭак ахьизыҟамҵаз.

"Даҽазнык абас ишәҳәо еиқәымшәар, шәызҵаара даҽакала иӡбахоит. Абри аҩыза еиқәымшәо аинформациа аиура сара исҭахӡам, шәҽазыҟаҵаны шәааилароуп. Ицәырымҵроуп шәара зҭак шәзыҟамҵо зҵааракгьы", - иҳәеит Бжьаниа.

Очамчыра араион ахада Станислав Амҷба иажәақәа рыла, иаҿыхын 43 ферма, урҭ рахьтә ҿыц зҽаԥызшьыз ҳәа акгьы аарԥшым. Аха убри аан иара иазгәеиҭеит араионтә оперштаб ақыҭақәа зегьыҵәҟьа рхысра ишахьымӡац.

Аҟәатәи араион аҿы ажьырныҳәа 22 рҟынӡа 32 криптоферма аҿыхын, анаҩс ахада иҿы аилатәара ашьҭахь даҽа 11 ԥшаан ахатәыҩнқәа рҿы. Урҭ зегьы раҿыхра ашьҭахь, араион аҿы ф-мегаваттк афымцамч ахы иақәиҭтәын.

"Ақыҭақәа рхадацәа есҽны ҩнаҭацыԥхьаӡа инеиуеит, аҳасабырбақәа ҟарҵоит. Џьара-џьара ауаа уахьынармышьҭуагьы ыҟоуп, аха акаҿы ҳааибагарц ҳаҿуп", - иҳәеит Аҟәа араион ахада Алхас Ҷыҭанаа.

Гал араион ахада Константин Ԥлиа иажәақәа рыла, иаарԥшын 13 маининг-маругак, урҭ рахьтә акы - аӡәы иҩны иқәгылан, даҽа 12 - атехникатә маҵзура астанциаҟны. Ауааԥсыра алашара еиԥҟьарада ироуеит.

Гәылрыԥшь араион аҿы ажьырныҳәа 22 рзы афымцамч ахархәара 41,3 мегаватт иҟан. Мчыбжьык иалагӡаны 20 криптоферма ахьаҿыхыз иабзоураны афымцамчхара лаҟәхеит 10,6 мегаватт рыла, убри аан анорма 33 мегаватт иҟоуп. Аамҭа-аамҭала алашара арцәарақәа ыҟам, уаанӡатәи ашықәсқәа раан еиԥш иҳәеит араион ахада Аслан Бараҭелиа.

Тҟәарчал араион ахада ихаҭыԥуаҩ Владислав Аршба иажәақәа рыла, ажьырныҳәа 22 рҟынӡа араион аҟны азеиԥш фымцамчхархәара иартәон 31 мегаватт. Мчыбжьык иалагӡаны иаҿыхын ззеиԥш мчхара 5,8 мегаватт артәоз акриптофермақәа.

Аҟәа ақалақь ахада Беслан Ешба иажәақәа рыла, аҳҭнықалақь аҟны акриптофермақәа рыԥшааразы аус руан 15 бригада. Зынӡа ирԥшааит 904 критомашьына, урҭ рахьтә аус зымуаз асасааирҭақәеи акаҳуажәырҭақәеи рҟны иԥшаақәаз ыҟан. Амаинингтә аппаратқәа ахьырԥшаауаз иреиуан иара убас 483 уаҭах, 603 хатәыҩны, 130 ҩнаҵаҟеи ахыбқәеи.

"Ҳусура алҵшәақәа рыла, ҳара ҳфымцамчхархәара 2 – 2, 5 мегаватт раҟара иагхар акәын. Аха ажьырныҳәа 29 рызтәи аҭагылазаашьала уи лаҟәит 15,8 мегаватт рыла. Абас ирацәаны алаҟәра мзызс иамоу макьана еилкаам, избанзар уиаҟара мыруга ҳамбаӡеит. Абригадақәа макьана русура иацырҵоит", - иҳәеит Ешба.

Иара излазгәеиҭаз ала, уи аилкаара ахьрылымшо зыхҟьо аҳҭнықалақь астанциақәа рҟны ахылаԥшреи аҳасаббареи ҟазҵо асистема ахьыҟам ауп.

Аслан Бжьаниа иазгәеиҭеит хаҭала раионцыԥхьаӡа дшырҭаауа, аԥыза-министр инапынҵақәа назыгӡои араион ахадеи дрыцны, иагьшгәеиҭо иааргаз ахыԥхьаӡарақәа ахьынӡаиашоу.

"Шәара ишәҳәази ҳара иаҳбои еиқәшәозар ауп. Ус анакәымха, шәгәы иалсуа аҭагылазаашьақәа аԥаҳҵоит. Уажәазы абри аҩыза азнеишьада ԥсыхәа ыҟам", - иҳәеит атәыла ахада.

Аԥсны аҩнуҵҟатәи аусқәа рминистр Дмитри Дбар араионтә оперштабқәа рлахәылацәа иҟарҵаз аҳасабырбақәа рылҵшәақәа шԥаубо ҳәа атәыла ахада иқәиргылаз азҵаара аҭак ҟаҵо, иҳәеит ишигәамԥхаз. Анаҩс аилатәара иацҵан ажурналистцәа аламырхәӡакәа.

Ԥыҭрак ашьҭахь атәыла ахада ипресс-маҵзураҿы Sputnik ишазеиҭарҳәаз ала, Аслан Бжьаниа араионтә штабқәа аус шыруц ируларц адҵа риҭеит.

Иҳаҩсыз ахәаша ажьырныҳәа 22 рзы Аԥсны ахада Аслан Бжьаниа араионқәа рҟны амаининг изакәанымкәа ахархәара аҿагыларазы аоперативтә штабқәа аԥҵазарц адҵа ҟаиҵеит. Урҭ аштабқәа реилазаара иалоуп араион ахада (аштаб анапхгаҩы), амилициа аҟәша аиҳабы, апрокурор, аенергетик.

Мчыбжьык иалагӡаны араионқәа рҟны афымцамч ахархәара лаҟәымхар, араионқәа рхадацәа, амилициа аҟәшақәа реиҳабацәа, апрокурорцәа, аенергетикцәа - зегьы лахь рыҭахоит, иааиуа ашәахьаҽны - русура иамххоит иҳәеит усҟан ахада.

16
Атемақәа:
Аԥсны аенергетика апроблемақәа (228)

Миқаа Гал аус зуа агәрагаратә кәалаԥқәа рзы: иарбанзаалак қьаадк иамыԥхьаӡакәа иаанымхацт

11
Гал араион ахадара апресс-маҵзура аиҳабы Ерик Миқаа арадио Sputnik аефир аҿы еиҭеиҳәеит ақалақь аҩныҵҟа иқәшыргылоу агәрагаратә кәалаԥқәа аус шыруа атәы.
Раионк аԥсҭазаараҟынтә: Миқаа Гал иҟоу агәрагаратә кәалаԥқәа рзы

"Хымз раԥхьа Кәасҭа Ԥлиеи уи ихаҭыԥуаҩ Игорь Аҩӡбеи ражәалагалала ақалақь аҿы иқәыргылан акәалаԥқәа. Аилибамкаара ҟамларцаз, ажәла мҳәакәа, ахьӡ азгәамҭакәа, акәалаԥқәа кнаҳҳаит аџьармыкьа уахьынҭало, Гал араион ахадара аҩналарҭа аԥхьа. Аинформациатә дырраҭарақәа рыла ажәлар ирылаҳҳәоит агәрагаратә кәалаԥқәа шыҟоу, дарбанзаалакгьы џьара ажәалагалак змоу, араион аҿы иҳахәаша, ма дара иргәамԥхо, ргәы еихьызшьуа акыр ыҟазар, ражәалагала азыӡырҩра, ҳшазыхиоу. Мчыбжьык ахь знык араион ахадеи сареи ҳцаны ақьаадқәа ҭганы иааҳгоит, Кәасҭа Ԥлиа даԥхьоит, анаҩс доусы инаигӡаша аусмҩаԥгатәқәа риҭоит. Иарбанзаалакгьы қьаадк аанымхацт иамыԥхьаӡакәа. Акәалаԥқәа русура иабзоураны галтәи аџьармыкьа аусқәа ҳаӡбахьеит. Амҩақәа рыҟаҵара, абаҳчақәа рҿы атәарҭақәа ахьыргылатәу уҳәа иҟаҳҵахьо маҷым. Иҳәатәуп, ари аус адгылара шаиуз ауааԥсыра рҟынтә, даара ибзиан аус ауеит аимадара", - ҳәа еиҭеиҳәеит Миқаа.

Иаҳа инеиҵыху аиҿцәажәара шәазыӡырҩыр шәылшоит аудио аҿы.

Иара убас шәаԥхьар ҟалоит:

11

Аԥсны акоронавирус даҽа 28-ҩык ирыдырбалеит иҳаҩсыз уахыки-ҽнаки рыла

12
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 12842-ҩык ыҟоуп, ргәы бзиахеит 12387-ҩык, рыԥсҭазаара иалҵит 202-ҩык.

АҞӘА, хәажәкыра 1 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 199-ҩык атестқәа рзыҟаҵан, урҭ рахьтә 28-ҩык акоронавирус рцәа ишалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 49-ҩык, урҭ рахьтә 28-ҩык акоронавирус адиагноз рзышьақәыргылоуп, рҭагылазаашьа бааԥсуп 7-ҩык, ибжьаратәуп - 21-ы.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 15-ҩык апациентцәа, Очамчыра ирхәышәтәуеит фҩык, Тҟәарчалтәи ахәышәтәырҭаҿы - хҩык, Гагратәи ахәышәтәырҭаҿы - 13-ҩык.

Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 12842-ҩык ыҟоуп, ргәы бзиахеит 12387-ҩык, рыԥсҭазаара иалҵит 202-ҩык.

Акоронавирус иазку ажәабжьқәа зегьы шәрыԥхьар ҟалоит абра>>

12
Атемақәа:
Аҿкычымазара – акоронавирус Аԥсни адунеи аҿи: иалкаау