Кристина Озганԥҳа еиҭалҳәеит "Аҽгәара" аҿы аремонт шымҩаԥгахо

14
(ирҿыцуп 19:22 15.02.2021)
Аԥсны аԥыза-министр ихаҭыԥуаҩ, аекономика аминистр Кристина Озганԥҳа Москваҟа лусутә ныҟәара аихшьалақәа ирызку абрифинг мҩаԥылгеит.

АҞӘА, жәабран 15 – Sputnik, Илана Амқәабԥҳа. Авольтҳаракцәаҳәа "Аҽгәара" аремонт хәажәкырамзазы иалагар ҟалоит ҳәа лҳәеит Аԥсны аԥыза-министр ихаҭыԥуаҩ, аекономика аминистр Кристина Озганԥҳа абрифинг аҿы.

Озганԥҳа еиҭалҳәеит Москва лыҟазаара аҳәаақәа ирҭагӡаны раԥхьатәи аусутә еиԥылара Урыстәыла аенергетика аминистр ихаҭыԥуаҩ Евгени Грабчаки лареи ишымҩаԥыргаз, ишалацәажәаз "Аҽгәара" аремонт азура.

"Ҳара авольтҳаракцәаҳәа "Аҽгәара" аремонт мҩаԥаагоит ЕгрыГЕС аремонт азураан, уи атехникатә ԥҟарала еиҳа иманшәалоуп. Убри инадҳәаланы аиҿкааратә уснагӡатәқәа мҩаԥгатәуп. Урыстәыла аенергетика аминистрра ацхыраара ҳнаҭоит иахәҭоу аматериалқәа раахәаразы, асиа еиҿнакаауеит "Амшынеиқәафымцамч", - лҳәоит Озганԥҳа.

Лара лажәақәа рыла, аматериалқәа рсиа заанаҵы аус аднаулеит урыстәылатәи аилахәыра "Россеть".

"Аиқәшаҳаҭрақәа рҳәаақәа ирҭагӡаны ҳазыԥшуп иаахәоу аматериалқәа хәажәкырамзазы раара, мызки бжаки рыла иахәҭоу аусурақәа мҩаԥгахарц азы. Ҳара уажәы Аинвестпрограмма акорректировка азааулоит", - ҳәа лҳәоит Озганԥҳа.

Ацәаҳәақәа рыԥсахра, ишәарҭоу ашьаҟақәа рыԥсахра уҳәа мҩаԥыргалоит "Амшынеиқәафымцамч" аусзуҩцәа.

Аԥсны аԥыза-министр ихаҭыԥуаҩ, аекономика аминистр Кристина Озганԥҳа Москва диԥылеит Урыстәыла аенергетика аминистр ихаҭыԥуаҩ Евгени Грабчак.

Иара убас шәаԥхьар ҟалоит:

14

Гыцба еиҭеиҳәеит Гәдоуҭатәи аветеринартә маҵзурахьы аҳақьымцәа усура изымнеиуа

15
(ирҿыцуп 20:14 26.02.2021)
Гәдоуҭатәи аветеринартә маҵзура аиҳабы Лавренти Гыцба арадио Sputnik аефир аҟны еиҭеиҳәеит рмаҵзура иахьа уадаҩрас иамоу атәы.
Раионк аԥсҭазаараҟынтә: Гыцба еиҭеиҳәеит Гәдоуҭатәи аветеринартә маҵзура аусушьа атәы

"Ҳраион аҟны 20 қыҭа ыҟоуп, ашьамаҟа хыԥхьаӡарала иугозар 45 нызқь рҟынӡа инаӡоит. Ачымазара бааԥсқәа узыцәшәаша ҳәа макьана акгьы ҳамам. Арахә ачымазара рыламҽырц ҳазҿу аусурақәа ыҟоуп, аха ҳазхьымӡогьы рацәоуп. Сара аусураҟны аҳақьым дсымаӡам. Афельдшер аӡәы апрактика дахысуеит, аӡәы еилзырго лоуп акәымзар, аҳақьым ҳара ҳҟны дааиӡом ауалафахәы амаҷра иахҟьаны. Ачымазарақәа рҟынтәи ахшәқәа ааҳгоит, ҳамч ахьынӡарықәхо. Араион аҟынтәигьы ацхыраара ҟарҵоит, аха уи жәаџьара ишаны хәҭак. Абиуџьет уажәы еиҵартәеит, 80 нызқь мааҭ шықәсык ҳәа иԥхьаӡан. Хык 350 мааҭ ақәӡоит иҟауҵозар (ахәшә). 45 нызқь хы арахә ахьыҟоу, ажәқәа мацара аагозар, хәҭак хыџьара- ԥшьыџьара ишаны иҟалоит. Ачымазара рыхьаанӡа апрофилактика аҳасабала алаҵа ҟауҵароуп", - иҳәеит Гыцба.

Шәазыӡырҩы аудио.

15

Аԥсны акоронавирус ҿыц издырбалаз 11-ҩык ыҟоуп, аӡәы иԥсҭазаара далҵит

10
(ирҿыцуп 19:01 26.02.2021)
Иҳаҩсыз уахыки-ҽнаки рыла COVID-19 рылоу ирыламу аилкааразы 161-ы атестқәа рзыҟаҵан, урҭ рахьтә 11-ҩык акоронавирус рцәа ишалаз аадырԥшит .

АҞӘА, жәабран 25 – Sputnik. Гәдоуҭатәи ахәышәтәырҭаҿы иԥсҭазаара далҵит 1958 шықәса рзы ииз апациент, ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Апациент иизықәыргылаз адиагноз хада акоронавирустә инфекциа ҿыц ауп. Ахаҵа иԥсҭазаара далҵит жәабран 25 рзы.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 44-ҩык, урҭ рахьтә 37-ҩык акоронавирус адиагноз рзышьақәыргылоуп, рҭагылазаашьа бааԥсуп 15-ҩык, ибжьаратәуп - 16-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 10-ҩык апациентцәа, Очамчыра ирхәышәтәуеит фҩык, Тҟәарчалтәи ахәышәтәырҭаҿы - хҩык, Гагратәи ахәышәтәырҭаҿы - 14-ҩык, Аҟәатәи амобилтә госпиталь аҟны ишьҭоуп акоронавирус зыдбалоу жәҩык апациентцәа.

Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 12788-ҩык ыҟоуп, ргәы бзиахеит 12169-ҩык, рыԥсҭазаара иалҵит 198-ҩык.

Акоронавирус иазку ажәабжьқәа зегьы шәрыԥхьар ҟалоит абра>>

10
Атемақәа:
Аҿкычымазара – акоронавирус Аԥсни адунеи аҿи: иалкаау