Аслан Бжьаниеи Алхас Тхагушеви амҩақәа рҿы ашәарҭадара азҵаара иалацәажәеит

15
(ирҿыцуп 14:35 19.02.2021)
Астатистикатә дыррақәа рыла Аԥсны амҩатә машәырқәа ирыхҟьаны 2020 шықәсазы иҭахеит 57-ҩык, 2019 шықәсазы – 56-ҩык.

АҞӘА, жәабран 19 - Sputnik, Бадраҟ Аҩӡба. Аԥсны ахада Аслан Бжьаниа дидикылеит Аинвацхыраара Ассоциациа ахантәаҩы Алхас Тхагушев.

"Ари ашықәс ҳара амҩаҿ ашәарҭадара атема иазаҳкыр ҳҭахуп. Ҳаиҿкаараҿы иааиԥмырҟьаӡакәа аусурақәа мҩаԥысуеит абри ахырхарҭала. Иԥсыз ртәы анаҳҳәо аахақәа змоу аваҳажьлоит. Ирацәаҩуп ҳцентр ахь инеиуа, ирацәаҩуп иинвалидны инхо", - ҳәа иҳәеит Тхагушев.

Иара иҳәеит ахада ишидигало апроблема аӡбаразы аидеиақәеи аконцепциеи.

"Цхыраара ҟазҵаша аидеиақәа ҳамоуп", - ҳәа азгәеиҭеит иара.

© Sputnik / Бадрак Авидзба
Аслан Бжьаниеи Алхас Тхагушеви амҩақәа рҿы ашәарҭадара азҵаара иалацәажәеит

Хара имгакәа аусура иалагараны иҟоуп "амҩатә машәырқәа рыхсаала". Иара убас ииашаҵәҟьоу астатистика аҟамзаара – проблема дууп ҳәа иҳәоит Тхагушев.

Ахада иҳәеит ассоциациа аԥшьгамҭақәа зегьы адгылара шриҭо абри азҵаараҿы.

Ахада иҳәеит астатистикатә дыррақәа рыла Аԥсны амҩатә машәырқәа ирыхҟьаны 2020 шықәсазы иҭахеит 57-ҩык, 2019 шықәсазы – 56-ҩык ҳәа.

"2020 шықәса рзы аҳәаа аркын, ус анакәха аныҟәарақәагьы еиҵан, аха…", - ҳәа азгәеиҭеит Бжьаниа.

Бжьаниа иара убасгьы иазгәеиҭеит азҵаара ӡбамзар шыҟамло, Москва аиҳабыра апрограмма "Ишәарҭадоу ақалақь" анагӡара ишадгыло.

Ахада иажәақәа рыла, Аԥсны ААР ашьаустә закәанеидкылеи административтә зинеилагарақәа рзы азакәанеидкылеи ирылагалахо ажәадгалақәа шазнархио.

"Атәыла мраҭашәаратәи ахәҭаҿы Аҳәынҭавтоинспекциа еиҳа еиҿкааны ишьақәыргылоуп, мрагыларатәи ахәҭаҿы макьаназ агхақәа рацәоуп", - ҳәа азгәеиҭеит Бжьаниа.

Иара убасгьы иҳәеит амҩатә машәырқәа раан иҭахои ааха зауеи акыр еиҳауп ацәгьоурақәа ирыхҟьо раасҭа ҳәа.

Иара убас шәаԥхьар ҟалоит:

15

Аԥсны Аџьынџьтәылатә еибашьра аветеранцәа ргәыԥк ахада ԥхьатәара дцарц ааԥхьара ирҭеит

3
(ирҿыцуп 13:30 09.03.2021)
Ҩышәҩык инарзынаԥшуа Аԥсны Аџьынџьтәылатә еибашьра аветеранцәа атәыла ахада Аслан Бжьаниа иахь ааԥхьара рнапы аҵарҩит.

АҞӘА, хәажәкыра 9 - Sputnik. 1992-1993 шықәсқәа рызтәи Аԥсны Аџьынџьтәылатә еибашьра аветеранцәа ргәыԥк ахада Аслан Бжьаниа ԥхьатәара дцарц ааԥхьара ирҭеит.

Ааԥхьараҿы аветеранцәа иазгәарҭеит 2020 шықәсазтәи анапхгареиҭакреи уи ашьҭахьтәи алхрақәеи атәылаҿ аҭагылазаашьа шеиҭарымкыз, 2004 шықәса раахыстәи аполитикатә кризис еиҳагьы аҽшарҭбааз.

"Ақәԥара ахьӡала ақәԥара ҳарааԥсеит. Адәныҟатәи ашәарҭарақәа ракәӡам ҳазҿагылогьы, ҳара ҳара ҳаиҿагылоуп. Иахьа зегьы еилыркаахьеит иалху амҩа, аиаша уҳәозар амҩа аҟамзаара, хара имгакәа аҳәынҭқарра ацәыӡрахь ҳашкылнаго", - аҳәоит аԥшьгаратә гәыԥ ирыладырҵәаз ааԥхьара.

Аҳәынҭқарразы ишәарҭоу ахылҿиаақәа ралмыршаразы, амилаҭ ԥхьаҟатәи рыҿиараз аҭагылазаашьа бзиақәа раԥҵаразы аветеранцәа ааԥхьара руеит:

  • Аслан Бжьаниа ԥхьатәара ацаразы аӡбра идикыларц,
  • Хара имгакәа ахада иалхрақәеи аҭыԥантәи ахаланапхгараҭаратә усбарҭақәа рахь алхрақәеи еицымҩаԥгазарц,
  • Аполитикатә партиа "Амцахара", аветерантә еиҿкаара "Аруаа", егьырҭ аветерантә еиҿкаарақәа ахада иалхраан акандидат иқәыргылара ма акандидатцәа руаӡәк далкааны идгылара рҽацәхьаркырц,
  • Аполитикатә партиа "Амцахара", аветерантә еиҿкаара "Аруаа", егьырҭ аветерантә еиҿкаарақәа алхрақәа раан алхратә закәанԥҵара анормақәа рықәныҟәашьеи аполитикатә етика азгәаҭашьеи хылаԥшра рыҭаразы акомиссиа (аринахыс – Акомиссиа) еицаԥырҵарц,
  • Акомиссиа иалнаршароуп ахадарахьы акандидатцәа рыбжьара аиқәшаҳаҭра анапаҵаҩра – иаиааиуа алхрақәа рышьҭахь ажәлар реидкылара аҭакԥхықәра рхахьы ишырго, аҿиаразы аҳәынҭқарратә программа аус шадыруло азы.

Аҩаша, хәажәкыра 9 рзы аветеранцәа атәылаҿ иҟоу аполитикатә ҭагылазаашьазы Аҟәа апресс-конференциа мҩаԥыргеит.

3

Аԥсны иҟоу Урыстәыла Ацҳаражәҳәарҭа Аҩӡба иаанкылара аҩныҵҟатә ус акәны иахәаԥшуеит

6
Хәажәкыра 4 рзы иааныркылаз Ахра Аҩӡбеи дзыхьчоз хәҩык иҩызцәеи Аԥсны Ашәарҭадаратә маҵзура аҳәамҭала Аԥсны аҳәынҭқарратә мчра аиҭакра аҽазышәара рыгәҭакын.

АҞӘА, жәабран 9 - Sputnik. Аԥсны иҟоу Урыстәыла Ацҳаражәҳәарҭа Ахра Аҩӡба иаанкылара Аԥсны аҩныҵҟатә ус акәны, азинхьчаратәи аӡбарҭатәи усбарҭақәа ркомпетенциа иаҵанакуа усны иахәаԥшуеит. Абри азы Ацҳаражәҳәарҭа Facebook аҿтәи адаҟьаҿы аҳәамҭа ҟаҵоуп.

"Аҭагылазаашьа амилаҭтә закәанԥҵара инақәыршәаны аҭышәныртәалара мҩаԥысып ҳәа агәыӷра ҳаманы ааԥхьара ҟаҳҵоит, ауаажәларра-политикатә еиҿкаарақәа рахь азиндырратә аспектқәа рхы рыларымгалаларц, аҳәынҭқарра аҩныҵҟа аҭынчра аиқәырхаразы", - азгәаҭоуп аҳәамҭаҿы.

Агәыԥ "Пятнашка" акомандир, Аԥсны ахада уаанӡатәи ицхырааҩ Ахра Аҩӡба даанкылан хәажәкыра 4 рзы. Азинхьчаратә усбарҭақәа русзуҩцәа хәажәкыра 4 рзы Ахра Аҩӡба дахьынхоз аҩнаҟны иаадырԥшит иҵәахыз абџьар, аџьаԥҳаны, ахархәага ҷыдақәа, арадиодырраҭара мҩаԥызго ашьақәгылақәа.

Ахра Аҩӡбеи дзыхьчоз иҩызцәа хәҩыки рганахьала ашьаус хацыркуп уаанӡа еиқәшаҳаҭханы абџьари аџьаԥҳани азакәаншьаҭа рымамкәа раахәара, рыҵәахра, рымҩангара, рныҟәгара ахьымҩаԥыргоз азы.

Хәажәкыра 7 рзы Аҟәатәи ақалақьтә ӡбарҭа Ахра Аҩӡбеи ихьчаҩцәа: Талех Гасанов, Аслана Гуатижев, Андреи Локтионов, Станислав Культа мызкы ҭакрала ирхыргарц аӡбамҭа аднакылеит.

Владимир Шьербаков, административтә зинеилагара мҩаԥигеит ҳәа даанкылоуп хәажәкыра 9-нӡа.

Иара убас шәаԥхьар ҟалоит:

6