АҶА аҿы идырҵабыргит Гәдоуҭа ҩыџьа ахәыҷқәа амца ишалаблыз

46
(ирҿыцуп 21:23 19.02.2021)
Гәдоуҭа ақалақь аҿы жәабран 19 ахәылԥаз зымҽхак ҭбааз абылра ҟалеит, уи иахҟьаны аԥсыҭбарақәа ҟалеит.

АҞӘА, жәабран 19 - Sputnik. Гәдоуҭа амца зкыз асасааирҭа арцәараан иалыргеит 2018 шықәсази 2020 шықәсази ииз ахәыҷқәа рыԥсыбаҩқәа ҳәа аанацҳауеит Аԥсны АҶА.

Адырраҭараҿы иазгәаҭоуп Гәдоуҭа ақалақь Очамчыратәи амҩаҿы игылоу асасааирҭа амца шакыз азы АҶАхь адырра шыҟалаз 17 сааҭ 10 минуҭ рзы.

Амцарцәаҩцәа анааиз аамҭазы ахыбра аихагылақәа реиҳарак амца ркхьан ҳәа аҳәоит аусбарҭа иҟанаҵаз аинформациаҿы.

Амцарцәара иалахәын Гәдоуҭа ақалақь амцарцәаратә ҟәша агәыԥқәа хԥа.

Зыӡбахә ҳәоу асасааирҭаҿы инхон ахәыҷқәа змаз аҭаацәарақәа.

Уаанӡа амца ҩыџьа ахәыҷқәа шалаблыз атәы Sputnik иазеиҭеиҳәеит агәылара инхо аӡәы.

46

Ахада уаанӡатәи ицхырааҩ Бенур Қәираиа еиҭеиҳәеит Қырҭтәылаҟа дызцаз

6
(ирҿыцуп 17:17 02.03.2021)
Аҩаша, хәажәкыра 2 рзы Аҟәа, Ахақәиҭра ашҭаҿы ауаажәларратә еиҿкаара "Аруаа" ааԥхьара ҟанаҵеит ачынуаа Қырҭтәыла рцара агәҭынчымра зызцәырҵуа зегьы еизарц азы.

АҞӘА, хәажәкыра 2 - Sputnik, Бадраҟ Аҩӡба. Аԥсны ахада уаанӡатәи ицхырааҩ Бенур Қәираиа еиҭеиҳәеит Қырҭтәылаҟа дызцаз Sputnik аинтервиу анеиҭоз.

"Сара иарбанызаалак сажәа, схымҩаԥгашьа рзы аҭакԥхықәра саҵагылар сылшоит. Сара ИАЕ "Шәқәырча", зых иақәиҭу аекономикатә зона напхгара асҭон. Қырҭтәылаҟагь ахада инапынҵала акәӡам сышцаз. Жәабран 18 рзы ахада иасҳәеит ихьӡала сцар шысҭаху, аха мап сцәикит, ицхырааҩыс сыҟанаҵы Қырҭтәылаҟа сшымцо атәгьы иҳәеит. Жәабран 19 рзы аршаҳаҭга шьҭасҵеит. Сара Қырҭтәылаҟа сцеит хатәхаҿык иҳасабала, атәылахь аинвестициақәа радыԥхьалараз. Абаӷәаза сыргылар сҭахуп, асасааирҭақәагьы. Исҭахуп ара инхо ажәлар рбеиара, Аԥсныҟа аԥара ҭазгалар сҭахуп. 1989 шықәса раахыс ахақәиҭратә қәԥара агәҭа сгылоуп, аибашьра зегь схызгеит, аибашьра ашьҭахьгьы исылшо зегь ҟасҵоит стәыла аизырҳаразы", - иҳәеит Қәираиа.

Қәираиа иҳәеит Қырҭтәылаҟа ицара агәҭынчымра зызцәырҵуа зегьы хаҭала иара иҿы инеины иҟоу шыҟоу еилыркаарц.

"Ацәажәара хзыртлаз апартиақәа сразҵаарц сҭахуп, ирымоума ҳекономика шьҭызхыша программак, ҳаҳәсеи ҳхәыҷқәеи ирыцхрааша социалтә программак. Еснагь Урыстәыла анапы ҳаныԥшылалома?" ҳәа дҵаауеит иара.

Иара иҳәеит Қырҭтәылаҟа дызцаз Урыстәыла инхо иҩыза, абизнесуаҩ дибарц шакәу.

"Сара уахь сцара иахықәкыз зых иақәиҭу аекономикатә зонаҿы аинвистициақәа аҭыԥ роурц ауп. Ара ахы иақәиҭны ахәаахәҭра мҩаԥысуазароуп, адунеитә хәаахәҭратә центр ыҟазароуп. Убри азоуп сара сзеибашьуаз", - иҳәеит Қәираиа.

Иара убри аан иазгәеиҭеит партиак дшалам, иусқәагьы апартиақәеи аиҿкаарақәеи рақәшаҳаҭра аҭахны ишимбо.

"Сара исҭахуп Аԥсны инхо зегьы бзианы инхаларц, рыбзазара еиӷьхарц, ҳхәыҷқәа аҵара бзиа роурц, ҳарҵаҩцәа аулафахә бзиа роурц", - иҳәеит иара.

Аҩаша, хәажәкыра 2 рзы Аҟәа, Аԥсны Апарламент ахь инеит ауаажәларра, аоппозициа, апартиақәа рхаҭарнакцәа ахада уаанӡатәи иабжьгаҩ иумҭа иақәыӡбарц.

6

Аҭыԥантәи ахаланапхгараҭаратә усбарҭақәа рахь алхрақәа рахь акандидатцәа рҭаҩра иалагеит

3
(ирҿыцуп 16:58 02.03.2021)
Ареспубликаҿы аҭыԥантәи ахаланапхгараҭаратә усбарҭақәа рахь алхрақәа мҩаԥысраны иҟан 2020 шықәса абҵара 1 азы, аха акоронавирус ҭагылазаашьа иахырҟьаны ииаган 2021 шықәса мшаԥы 11 ахь.

АҞӘА, хәажәкыра 2 – Sputnik. Хәажәкыра ҩба рзы Аԥсны аҭыԥантәи ахаланапхгараҭаратә усбарҭақәа рахь алхрақәа рахь акандидатцәа рҭаҩра иалагеит. Азакәан инақәыршәаны апроцедура алхрақәа рымш 40 мшы шагу иалагароуп, абжьыҭара амш 20 мшы шагу ихыркәшахароуп.

2020 шықәса цәыббра 24 рзы Аԥсны Апарламент адепутатцәа ареспубликаҿы аҭыԥантәи ахаланапхгараҭаратә усбарҭақәа рахь алхрақәа 2020 шықәса абҵара 1 азы имҩаԥысраны иҟаз ииаргеит акоронавирус ҭагылазаашьа иахырҟьаны 2021 шықәса мшаԥы 11 ахь.

"Аԥсны Аҳәынҭқарра аҭыԥантәи ахаланапхгараҭаратә усбарҭақәа рахь алхрақәа рымҩаԥгаразы" азакәан инақәыршәаны алхратә еиҿкаара азин амоуп кандидатк алхратә округ аҟынтәи иқәыргылара.

Алхыҩцәа ргәыԥ аҟынтәи акандидат иқәыргылараан хәҩык иреиҵамкәа излахәу аԥшьгаратә гәыԥ аԥырҵароуп.

"Иарбо агәыԥ ашәҟәы иҭаргалоит ақалақь, араион, аҳабла, ақыҭа рҟны иҟоу алхратә комиссиаҿы. Ақалақь, араион реизарахь адепутатрахь акандидат иқәгыларазы алхыҩцәа ргәыԥ 50 иреиҵамкәа 70 иреиҳамкәа напынҵамҭа еизыргароуп, ақыҭа, аҳабла реизарахь – 10 напынҵамҭак иреиҵамкәа" ҳәа аҳәоит азакәан.

Алхыҩ ижәла, ихьӡ, иабхьӡ, даниз арыцхә, иҭыӡҭыԥ, итәылауаҩшәҟә ма уи зыԥсахуа адокумент аномер ахьарбоу анапынҵаратә бӷьыц аҟны инапы аниҵоит.

Анапынҵаратә бӷьыц шьақәирӷәӷәоит анапынҵамҭақәа реизгара азин змоу ахаҿы (ижәла, ихьӡ, иабхьӡ, даниз арыцхә, иҭыӡҭыԥ, итәылауаҩшәҟә ма уи зыԥсахуа адокумент аномер арбаны).

"Аԥсны Аҳәынҭқарра аҭыԥантәи ахаланапхгараҭаратә усбарҭақәа рахь алхрақәа рымҩаԥгаразы" азакәан ахәҭаҷ 2 инақәыршәаны депутатс далххар ҟалоит Аԥсны атәылауаҩ, алхрақәа рымш азы 25 шықәса зхыҵхьоу.

Аҭыԥантәи аӡбарҭақәа рахь адепутатцәа ԥшьышықәса ҳәа ҿҳәарас ирыҭаны иалырхуеит.

Аԥсны Аҳәынҭқарра аҭыԥантәи ахаланапхгараҭаратә усбарҭақәа рахь алхрақәа раԥхьаӡа акәны имҩаԥысит 1998 шықәсазы.

Иара убас шәаԥхьар ҟалоит:

3