Алада Ешыра Шыцкәара аҳаблан иҭабгаз амҩа уажәыгьы иҟаҵаӡам

16
(ирҿыцуп 19:32 25.02.2021)
Ииасыз ашықәс хәажәкырамзазы Шыцкәара аҳаблан адгьылҳәазара иахҟьаны амҩа ахәҭак ҭабгеит. Уи апроблема иахьа уажәраанӡагьы иӡбамкәа иаанханы иҟоуп. Абри атәы Sputnik аматериал аҿы.

Ишеилкаахаз ала, Аԥсны асеиԥшқәа имаҷымкәа иҟалахьеит. Бедиа ду иҟалаз арыцҳара ашьҭахь Sputnik ахь адыррақәа аауа иалагеит Ҟәланырхәа, Анхәа, Алада Ешырантә. Ауааԥсыра еиҭарҳәон аԥсабаратә рыцҳарақәа рыхҟьаԥҟьақәа ӡбамкәа ишрымоу.

Асмаҭ Ҵәыџьԥҳа, Sputnik

Аҳәара мацара азхом

Аҭыхырҭатә гәыԥ ҳацны аладаешыратәи аҳабла Шыцкәара ҳаҭааит. Ара ииасыз ашықәс хәажәкырамзазы Шыцкәара аҳаблан адгьылҳәазара иахҟьаны жәа-метрак инеиҳаны амҩа ахәҭак ҭабгеит. Амашьына агеит, анцәа иџьшьаны арныҟәаҩ ԥырхага имоуит. Уи апроблема иахьа уажәраанӡагьы иӡбамкәа иаанханы иҟоуп.

Ҳоператор аҭаҳара ҭиҵаауанаҵы ҳа ҳахь дааит аҭыԥантәи анхаҩы Гәырам Ҭарба. Иара иажәақәа рыла ачынуаа иаӡәымкәа ирызнеихьеит, аус аҭыԥ иқәҵахоит ҳәа агәыӷра рырҭахьеит, аха зегь цәажәараны иаанханы иҟоуп.

"Ақыҭанхаҩ аума иҭахума?! Алашара, амҩа. Ҳара аӡгьы ҳамам, еиҳарак аԥхынразы, уажәы алашарагьы амаинингқәа ирыхьҟьаны иҳамам, амҩагьы иара убас", - ҳәа иҳәеит Ҭарба.

Ари аҭыԥ аҿы 200 ҭаацәара рҟынӡа нхоит. Урҭ акаҭран зқәым, знысра уадаҩу ақыҭамҩала иахыкәшаны иныҟәалароуп.

Ауаажәларратә транспорт акрааҵуеит арахь имныҟәоижьҭеи. Арныҟәцаҩ адгьылҳәазара ашьҭахь аныҟәара даҟәыҵит. Иныҟәо ашколтә автобус заҵәык ауп.

Зхатә транспорт змам ианаамҭоу аусурахь рнеира атәы уадаҩуп, еиҳаракгьы амшцәгьақәа раан.

  • Алада Ешыра Шыцкәара аҳаблан иҭабгаз амҩа ауааԥсыра ахыкәшаны ишныҟәац иныҟәоит
    © Sputnik / Акоп Кущян
  • Алада Ешыра Шыцкәара аҳаблан иҭабгаз амҩа ауааԥсыра ахыкәшаны ишныҟәац иныҟәоит
    © Sputnik / Акоп Кущян
  • Алада Ешыра Шыцкәара аҳаблан иҭабгаз амҩа ауааԥсыра ахыкәшаны ишныҟәац иныҟәоит
    © Sputnik / Акоп Кущян
1 / 3
© Sputnik / Акоп Кущян
Алада Ешыра Шыцкәара аҳаблан иҭабгаз амҩа ауааԥсыра ахыкәшаны ишныҟәац иныҟәоит

Аҭыԥантәи анхаҩы Едуард Аҩӡба иҳәоит ааигәанӡа ари аҭыԥ инахыкәшашәа ишныҟәалоз.

"Сгәылаԥҳәыс еиҭалҳәон ааигәа ажра дҭаҳарц ак шлыгымхаз", - ҳәа иҳәоит иара.

2020 шықәса абҵара-ԥхынҷкәын рзы ажра ахаҳә ҭарыԥсарц иалагеит, аха ирзалмыршеит.

"Аус зуаз ирасҳәеит ас аҟаҵара шамуаз. Зегь бзиахоит рҳәан, 50-60 машьына ахаҳә ҭарԥсеит. Жәабаҟа мшы амашьынақәа ныҟәон, нас еиҭа иҭабгеит", - ҳәа иҳәеит Аҩӡба.

Ахьы иаԥсоу аҭабгара

Алада Ешыра ақыҭа ахада Ҭамара Езыгәбаиаԥҳа лажәақәа рыла, аҟазауаа аиҭашьақәыргыларатә усурақәа ҩ-миллионк рҟынӡа иаԥсаны рыхә ршьеит. Ариаҟара аԥара араион абиуџьет иалшом.

"Аҟәа араион ахада Алхас Ҷыҭанаа ашәҟәы изааҩит. Акы иалагақәеит, ахаҳә ҭарԥсеит, аха акгьы иамыхәеит. 2020 шықәса абҵара-ԥхынҷкәын рзы акәын, уиижьҭеи ҟаҵа ыҟам", - ҳәа лҳәеит лара.

Аҟәа араион ахада Алхас Ҷыҭанаа иакәзар, аремонт ахәԥса жәа-миллионк рҟынӡа инаӡоит ҳәа адырра ҳаиҭеит. УКС ишьақәнаргылаз асмета аекспертизаҿ ишьҭоуп. Араион ари аҩыза алшара амам, ареспубликатә биуџьет амыцхраакәа.

Макьаназы шыцкәараа рымҩа ишахыкәшац иахыкәшоит.

Абри иазку авидеонҵамҭа шәахәаԥш абра>> Ишахыкәшац иахыкәшоит: шықәсык ҵит Шыцкәара ибгаз амҩа ус иҟоуижьҭеи

16

Ажьиԥҳа аҭыԥантәи адепутатцәа рзы: рҵарагьы ыҟазароуп, аԥсшәагьы рдыруазароуп

5
Тҟәарчал араион алхратә комиссиа алахәыла Рита Ажьиԥҳа арадио Sputnik арубрика "Раионк аԥсҭазаараҟынтә" аҳәаақәа ирҭагӡаны аҭыԥантәи ахаланапхгараҭаратә усбарҭақәа рахь алхрақәа реихшьаала ҟалҵеит.
Раионк аԥсҭазаараҟынтә: Ажьиԥҳа ахаланапхгараҭарақәа рахь алхрақәа ирызкны

Аԥсны аҭыԥантәи ахаланапхгараҭарахь алхрақәа мҩаԥысит мшаԥы 11 рзы.

"Адепутатрахь иқәгылаз акандидатцәа ҩажәаҩык рахьынтә 15-ҩык алхын. Иманшәаланы еилагарада имҩаԥысит алхрақәа. 5196- ҩык ашәҟәы иҭагалаз алхыҩцәа рҟынтәи 2052 -ҩык алхрақәа рхы рыладырхәит. Уи аԥхьа иҟаз ас еиԥш алхрақәеи дареи еиҿурԥшуазар, усҟан 2800-ҩык ыҟан алхыҩцәа. Актәи аилатәара мҩаԥысраны иҟоуп иааиуа ашәахьаҽны мшаԥы 19 рзы. 15-ҩык адепутатцәа рахьынтә ҩыџьа аҳәса ыҟоуп. Уи аԥхьа иҟаз адепутатцәа рахьынтә ҩыџьа ықәгылан, руаӡәк ҩаԥхьа далырхит, уи Тҟәарчалтәи араионтә хәышәтәырҭа аиҳабы Лали Гаргәылиа лоуп", - лҳәеит Ажьиԥҳа.

Ажьиԥҳа лгәаанагара лҳәеит аҭыԥантәи ахаланапхгараҭарақәа рахь инеиуа адепутатцәа зеиԥшразар акәу.

5

Аԥсны Атәанчахәытә фонд аҿы ашәарақәа зеиԥҟьо атәы рҳәеит

3
(ирҿыцуп 20:14 14.04.2021)
Аԥсны Атәанчахәытә фонд Аԥсны атәылауаа рҿаԥхьа руал 55 миллион мааҭ ыҟоуп. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы.

АҞӘА, мшаԥы 14 - Sputnik. Аԥсуа тәанчахәқәа ршәара апандемиа аамҭа иахҟьеит, избанзар 2020 шықәсазы Атәанчахәытә фонд 130 миллион мааҭ амоуӡеит. Абри атәы радио Sputnik иазеиҭеиҳәеит Аԥсны Атәанчахәытә фонд ахантәаҩы Денис Гәылариа.

2020 шықәсазы акоммерциатә еиҿкаарақәа ашәахтәқәа рықәырхит апандемиа инадҳәаланы. Ари афонд ахь аԥаранашьҭра анырра анаҭеит.

Ахантәаҩы иажәақәа рыла Атәанчахәытә фонд ахь аԥара назмышьҭуаз акоммерциатә еиҿкаарақәа рымацара ракәым, аҳәынҭқарратә еиҿкаарақәагьы рыдҵақәа нарыгӡомызт.

Убас ауал ду ақәны иҟоуп АУН "Амшынеиқәафымцамч", иҳәеит Гәылариа.

"Аха дара ишьақәырӷәӷәоу аграфик ҳзаарышьҭит, ирҳәеит ЕгрыГЕС аусура ишалагалак Атәанчахәытә фонд ахь ахыԥхьаӡаларақәа ишрылаго", - иҳәеит Гәылариа.

Иахьазы реиҳа ауал ду зықәны иҟоу еиҿкаароуп АУН "Амшынеиқәафымцамч".

Ашәарақәа еиҵахоит иара убасгьы ареспубликаҿы аԥсуа тәанчахәы зауа рхыԥхьаӡара иацло иахьалагаз ҳәа иҳәоит Гәылариа.

2020 шықәса алагамҭаз ари ахыԥхьаӡара 6656-ҩык инаӡозар, шықәса анҵәамҭазы 8592-ҩык ҟалеит.

Иахьа Атәанчахәытә фонд аамҭа-аамҭала ашәарақәа мҩаԥнагоит. Аԥхьа иззыршәо категорианы иҟоу Аԥсны жәлар реибашьра аинвалидцәа роуп.

"56 миллион мааҭ ауал ҳақәуп. Ари хәажәкырамза иатәуп. Аха иара есыҽны еиҵахоит. Раион-раионла аԥарақәа ҳшәоит. Аибашьра иадҳәало акатегориақәа рҿаԥхьа Аҟәа, Аҟәа араион, Очамчыратәии Тҟәарчалтәии араионқәа рҟны ҳуал ҳшәеит, иаанханы иҟоуп Гагреи Гәылрыԥшьи араионқәа", - иҳәеит афонд ахантәаҩы.

Гәылариа иажәақәа рыла Афонд ахь аԥаралагалара адинамика аныԥшуа иалагеит. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы ҳәа иҳәоит иара.

3