Ҭарашь Ҳагба Аԥсны ашьапылампыл азы Афедерациа ахадас далхуп

16
(ирҿыцуп 09:46 03.03.2021)
Аԥсны ашьапылампыл азы Афедерациа аҳасабырба-алхратә конференциа мҩаԥысит Аҟәа, хәажәкыра 2 рзы.

АҞӘА, хәажәкыра 3– Sputnik, Бадраҟ Аҩӡба. Ҭарашь Ҳагба Аԥсны ашьапылампыл азы Афедерациа ахадас далхуп Афедерациа аҳасабырба-алхратә конференциаҿ хәажәкыра 2 рзы.

Аԥсны ашьапылампыл азы Афедерациа ахадас иҟоу Џьума Кәарцхьиа аиԥылара аартны ажәахә ииҭеит аҳасабырба-алхратә конференциа ахантәаҩы Рафаель Амԥар.

Рафаель Амԥар инаҵшьны иазгәеиҭеит ахада ҿыц, ихаҭыԥуаҩ, анагӡаратә еилакы аусутә рацәа раԥхьа ишьҭоуп ҳәа аспорт аҿиаразы. Уи азы атәыла араионтә спорттә еилакқәа ирымоу апроблемақәа ӡбалатәуп.

Аконференциахь инаԥхьан 48 делегат – уаанӡатәи Афедерациа аиҳабцәа, ашьапылампыл аветеранцәа, аклубқәа рхаҭарнакцәа. Урҭ рҟынтәи 25 рыҟазаара иалнаршеит ААА ахада иалхра.

Аиҿкаара аиҳабы Џьума Кәарацхьелиа иқәгылараан иазгәеиҭеит ауадаҩрақәа шыҟоугьы аиҿкаара анапхгара атәылаҿ ашьапылампыл аҿиараз ирылшо зегь шыҟарҵоз. Иара аиҳаб ҿыц изеиӷьеишьеит иусураҿы ақәҿиара дуқәа.

Аделегатцәа еицҿакрыла Ҭарашь Ҳагба икандидатура адгылара арҭеит.

Ҭарашь Ҳагба иқәгылараҿы ҭабуп ҳәа ахиҳәааит ирҭаз агәрагаразы, иҳәеит илшо азы ихы дшамеигӡо.

Кандидатцәас рыӡбахә ҳәан ҩыџьа: ашьапылампылтә клуб "Нарҭ" ахада Геннади Ҵнариа, ConIFA-2016 аверсиала адунеи ачемпион, ашьапылампыласыҩ Ҭарашь Ҳагба. Геннади Ҵнариа 2004-2005 шықәсқәа рзы Афедерациа анапхгара аиҭон.

Геннади Ҵнариа алаҳәара ҟаиҵеит икандидатура шықәиго азы.

Геннади Ҵнариа иҳәеит Ҭарашь Ҳагба аԥсуа шьапылампыл аиҭакра илшоны ишибо. Ақәыԥшреи алшареи абри аусхк аҟны ақәҿиарақәа ааргап ҳәа дгәыӷуеит Ҵнариа.

Афедерациа аԥҟаԥҵәа инақәыршәаны Афедерациа аиҳабы ԥшьышықәса ҳәа далырхуеит.

Ҭарашь Ҳагба диит 1991 шықәсазы, раԥхьатәи ишьаҿақәа ашьапылампыл ахь "Нарҭ" аҿы иеихигеит, нас "Гагра" ахьӡала дықәгылон, анаҩс "Нарҭ" ахь деиҭахынҳәит. Уи ашьҭахь аҟәатәи "Динамо" аҿы дыхәмаруан. Уажәы гагратәи акоманда ахьӡала дықәгылоит. Ҭарашь Ҳагба аспорт азҟаза, аорден "Ахьӡ-аԥша" III аҩаӡара ианашьоуп амилаҭтә команда ConIFA-2016 аверсиала адунеи ианачемпионхаз.

Еиуеиԥшым ааиҭақәа рзы Аԥсны ашьапылампыл азы Афедерациа напхгара арҭон: Владимир Мқанба, Валери Аршба, Рафаель Амԥар, Геннади Ҵнариа, Артур Амқәаб, Леонид Ӡаԥшьба, Џьамал Гәбаз, Руслан Аџьынџьал. 2017 -2020 шықәсқәа рзы Афедерациа дахагылан Џьума Кәарцхьиа.

16

Ахра Аҩӡба лаҵара 5 рҟынӡа дшыбаандаҩыц даанхоит

3
(ирҿыцуп 13:20 14.04.2021)
Мшаԥы 2 рзы Аҟәатәи ақалақьтә ӡбарҭа Ахра Аҩӡба лаҵара 5 рҟынӡа ибаандаҩра аҿҳәара иацнаҵеит.

АҞӘА, мшаԥы 14– Sputnik, Асмаҭ Ҵәыџьԥҳа. Аԥсны Иреиҳаӡоу аӡбарҭа ахашшааратә коллегиа Аҟәатәи ақалақьтә еизара Ахра Аҩӡба лаҵара 5 рҟынӡа ибаандаҩра аҿҳәара иахьацнаҵаз азы ахьчаратә ган Иреиҳаӡоу аӡбарҭахь инанашьҭыз ашшыԥхьыӡ иақәшаҳаҭымхеит.

Ахра Аҩӡба даанкылан хәажәкыра 4 рзы. Азинхьчаратә усбарҭақәа русзуҩцәа хәажәкыра 4 рзы Ахра Аҩӡба дахьынхоз аҩнаҟны иаадырԥшит иҵәахыз абџьар, аџьаԥҳаны, ахархәага ҷыдақәа, арадиодырраҭара мҩаԥызго ашьақәгылақәа. Ашьаус хацыркын уаанӡа еиқәшаҳаҭханы абџьари аџьаԥҳани азакәаншьаҭа рымамкәа раахәара, рыҵәахра, рымҩангара, рныҟәгара ахьымҩаԥыргоз азы.

Хәажәкыра 7 рзы Аҟәатәи ақалақьтә ӡбарҭа Ахра Аҩӡбеи ихьчаҩцәа: Талех Гасанов, Аслана Гуатижев, Андреи Локтионов, Станислав Культа мызкы – мшаԥы 5 рҟынӡа ҭакрала ирхыргарц аӡбамҭа аднакылеит.

Мшаԥы 1 азы Аҟәатәи ақалақьтә ӡбарҭа Станислав Культа, Андреи Локтионов, Аслан Гуатижев рырбаандаҩратә ҿҳәара аҽа мызкы ацнаҵеит, 2021 шықәса лаҵара 4 аҟынӡа. Убри аан аус аҽа лахәылак – Талех Гасанов иганахь ала Апрокуратура хада азыҳәа иақәшаҳаҭымхеит.

Мшаԥы 2 рзы Аҟәатәи ақалақьтә ӡбарҭа Ахра Аҩӡба лаҵара 5 рҟынӡа ибаандаҩра аҿҳәара иацнаҵеит.

3
Атемақәа:
Ахра Аҩӡба иаанкылара

Аԥсны афымцарцәара аграфик ԥсахуп

3
(ирҿыцуп 12:43 14.04.2021)
Аԥсны Урыстәылантәи алашара аиуеи 2020 шықәса ԥхынҷкәынаахыс, ЕгрыГЕС аремонт азы иааныркылаанӡа.

АҞӘА, мшаԥы 14 - Sputnik. Иахьазы Аԥсны аҵакыраҿы иалагалоу алашара арцәара аграфик ԥсахуп абзазаратә обиектқәа еиҳа иҭышәынтәаланы русуразы ҳәа аанацҳауеит "Амшынеиқәафымцамч".

Аԥкыратә схема шыҟаз иаанхоит: сааҭк ҽынла, ҩ-сааҭк – уахынла идырцәалоит.

  • Астанциа маҷқәа: Аҟәа-2, Афон, Мҵара, Дәрыԥшь, Гәдоуҭа-ахара Т-2, Гал-110, Гал-35, Барӷьаԥ, Отобаиа, Тҟәарчал ГРЕС, Аҟәа-220 - 01:00 - 03:00; 13:00 - 14:00;
  • Астанциа маҷқәа: Очамчыра-ахара, Очамчыра-2, Мықә, Кәачара, Уарча, Дранда, Агәыӡера, Синоп, Баслаҭ, Ҵабал, Гәдоуҭа-ахара Т-1, Гәдоуҭа-110, Лыхны, Мысра-ахара, Мысра - 03:00 - 05:00; 14:00 - 15:00;
  • Астанциа маҷқәа: Аҟәа-1, ИЕПит, Пицунда, Алаҳаӡы, Бзыԥ-220, Чегал, Переброска, Рухски Карьер - 05:00 - 07:00; 15:00 - 16:00;
  • Астанциа маҷқәа: Гагра-1, Гагра-2, Гагра-3, Цандрыԥшь-ахара, Гьиачрыԥшь - 03:00 - 05:00; 15:00 - 16:00.

Мшаԥы 8рзы урыстәылатәи аган Аԥсныҟа иаауа алашарамчра алимит ҳәаақәнаҵеит 7 миллион киловатт-сааҭ ҳәа. Убри аан ареспублика иаҭахны иҟоуп 9,6 миллион киловатт-сааҭ ҳәа азгәарҭоит "Амшынеиқәафымцамч" аҿы.

3
Атемақәа:
Аԥсны аенергетика апроблемақәа