АҞӘА, хәажәкыра 3 - Sputnik, Сариа Кәарцхьиаԥҳа. Аҟәеи Москвеи 2021-2022 шықәсқәа рызтәи аконсультациақәа рыплан рнапы аҵарҩит Аԥсни Урыстәылеи адәныҟатәи аусқәа рминистрцәа Даур Ақаҩбеи Сергеи Лаврови.
Урыстәыла адәныҟатәи аусқәа рминистр Сергеи Лавров аԥснытәи иколлега аԥсшәа иаҳәо иазгәеиҭеит, иӡбтәу азҵаарақәа рацәаны ишыҟоу.
"Ҳара системала ҳаиныруеит, ҳтәылақәа реиҳабырақәа, аминистррақәа, аусбарҭақәа рыбжьара ишьақәгылан иҟоу аимадарақәа еиҳа-еиҳа рыҽдырҭбаауеит", - иҳәеит Лавров.
Урыстәыла адәныҟатәи аусқәа рминистр Сергеи Лавров иҳәеит акоронавирустә инфекциа аҿагылараҟынгьы аинырреи аицхыраареи шрымоу.
"Ибзиан иаҳбарҭан Аԥсныҟа ацхырааразы инеиз ҳмедусзуҩцәа заҟа ибзианы ишәыдышәкылаз", - иҳәеит Сергеи Лавров.
Аԥсны адәныҟатәи аусқәа рминистр Даур Ақаҩба ҭабуп ҳәа иеиҳәеит урыстәылатәи иколлега еиуеиԥшым азҵаарақәа рыӡбартә еиԥш аҭагылазаашьа ахьыҟоу азы.
"Ҳусеицура аиҩызара шьаҭас иамоуп. Ҩ-ганктәи аизыҟазаашьақәа хра рыманы имҩаԥысуеит. Ҳтәылақәа рыбжьара активла имҩаԥысуеит аполитикатә диалог, атәылақәа рнапхгаҩцәа реиԥш аминистррақәеи аусбарҭақәеи рыбжьарагьы", - иҳәеит Ақаҩба.
Иара иазгәеиҭеит 2020 шықәса Аԥсны жәлар рзы акыр ишыуадаҩыз. Убри аан Урыстәыла ацхыраара еснагь ишаныруаз.
Аԥсны адәныҟатәи аусқәа рминистр ахәшьара ҳарак аиҭеит акоронавирустә инфекциа аҿагылараҿы Урыстәыла иҟанаҵаз ацхыраара ду.
Аԥсны адәныҟатәи аусқәа рминистр Даур Ақаҩба Москваҟа усутә ныҟәарыла дцеит хәажәкыра 2 рзы.
