"Анапы ҳалал" иацәырӷьычыз амашьына Аԥсны ААР аусзуҩцәа ирыԥшааит

15
(ирҿыцуп 11:49 05.03.2021)
Агәыҳалалратә фонд амаҵзуратә машьына рӷьычит 2020 шықәса лаҵара 9 ауха. Амашьына иҭан адиректор ихатәы документқәеи амедицинатә цхыраара иазынархаз амаҭәашьарқәеи.

АҞӘА, хәажәкыра 5 – Sputnik, Бадраҟ Аҩӡба. Аԥсны Аҩныҵҟатәи аусқәа рминистрра ирыԥшааит шықәсык аԥхьа иӷьычыз Агәыҳалалратә фонд амаҵзуратә машьына ҳәа Sputnik иазеиҭалҳәеит афонд ашьаҭаркҩы Агнешка Филиппова.

"Хымчыбжь раԥхьа аҭел иаҳзасны иҳарҳәеит автомашьына Тҟәарчал араион аҿы ишырбаз. Абри ашьҭахь аусҭҵааратә уснагӡатәқәа мҩаԥысуан. Иахьа автомашьына ҳарҭеит", - лҳәеит лара.

Аусбарҭатә информациа инақәыршәаны, азарал иартәон 203 500 мааҭ, урҭ рахьтә 190 нызқь мааҭ – амашьына ахә ауп, 13 500 – ахатәы маҭәарқәеи агуманитартә еидареи.

"Амашьына аремонт аҭахуп. Ҭабуп ҳәа раҳҳәоит аминистр Дмитри Сергеи-иԥа Дбар раԥхьа днаргыланы амилициа аусзуҩцәа, Аҟәатәи ААР аусҭҵааҩ Милана Габлиаԥҳа, аусҭҵааҩцәеи. Жәымз шҵызгьы амашьына аԥшаара рылдыршеит", - лҳәеит Филиппова.

Афонд анапхгаҩы линформациала ацәгьоуцәа макьана иԥшаам.

Агәыҳалалратә фонд амаҵзуратә машьына рӷьычит 2020 шықәса лаҵара 9 ауха. Абри аганахь ала аусҭҵаара хацыркын.

Афонд аԥҵаҩы Агнешка Филиппова уаанӡа ишылҳәахьаз ала, ирӷьычыз амашьына иҭан афонд адиректор ихатә документқәа, иара убас Аҟәеи, Гагреи, Драндеи иҟоу абахҭақәа русзуҩцәеи иҭакуи рзы агуманитартә медицинатә цхыраара – анапҭарԥақәа, хә-литрак арзҩыдатәга, аинсулинтә гәырқәа 500.

Агәыҳалалратә фонд "Анапы ҳалал" Аԥсны аус ауеит 2017 шықәса раахыс. Афонд аусура ахырхарҭа хадақәа ируакуп – адоуҳатә еиҭашьақәыргылара, агуманитартә цхыраара аҟаҵара, зус ӡбоу рзы азиндырратә консультациақәа рымҩаԥгара. Афонд ацхыраара рнаҭоит иара убас иҭаку рҭаацәарақәеи, зматериалтә ҭагылазаашьа уашәшәыроу аҭаацәарақәеи.

15

COVID-19 злаз даҽа пациенткак лыԥсҭазаара далҵит Гәдоуҭатәи ахәышәтәырҭаҿы

14
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 15006-ҩык ыҟоуп, ргәы бзиахеит 14025-ҩык, рыԥсҭазаара иалҵит 226-ҩык.

АҞӘА, лаҵара 15 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 176-ҩык атестқәа рзыҟаҵан, урҭ рахьтә 22-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәышәтәырҭаҿы лаҵара 14 рзы лыԥсҭазаара далҵит 1939 шықәса рзы ииз акоронавирус злаз апациентка.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 51-ҩык, урҭ рахьтә 41-ҩык акоронавирус адиагноз рзышьақәыргылоуп, рҭагылазаашьа бааԥсуп 28-ҩык, ибжьаратәуп - 12-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 31-ҩык апациентцәа, рҭагылазаашьа бааԥсуп хәҩык. Очамчыра ирхәышәтәуеит 16-ҩык, Гагратәи ахәышәтәырҭаҿы - 17-ҩык, Тҟәарчалтәи ахәышәтәырҭаҿы - ԥшьҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

14
Атемақәа:
Аҿкычымазара – акоронавирус Аԥсни адунеи аҿи: иалкаау

Едуард Быҭәба Гәдоуҭатәи ахәышәтәырҭа даҭааны аусушьа гәеиҭеит

8
(ирҿыцуп 19:59 15.05.2021)
Едуард Быҭәба Аԥсны агәабзиарахьчара аминистрс дҟаҵан аҩаша лаҵара 11 рзы Аԥсны Аҳәынҭқарра ахада иусԥҟа инақәыршәаны.

АҞӘА, лаҵара 15 – Sputnik. Аԥсны агәабзиарахьчара аминистр Едуард Быҭәба Гәдоуҭатәи араионтә хәышәтәырҭа хада даҭааит ахәаша лаҵара 14 рзы ҳәа аҳәоит Аԥсуа телехәаԥшра адырраҭара.

Иара игәеиҭеит ахәышәтәырҭа ашҭаҿы игылоу акоронавирус азы анализқәа ахьрыдыркыло аҭыԥ, адкыларҭа, апалатақәа. Ахәышәтәырҭа аусзуҩцәа аминистр изеиҭарҳәеит акоронавирустә инфекциа злоу апациентцәа, убарҭ рхыԥхьаӡараҿы COVID-19 адиагноз ззықәыргылоу зцәазтәым аҳәсагьы, рыхәышәтәра шеиҿкаау.

Быҭәба иара убас игәеиҭеит аҵәыҵәри анашьҭразы еиқәыршәоу астанциа, уантәи ауп аковид-госпиталь апалатақәа рахь аҵәыҵәри зланеиуа. Игәеиҭеит аҳауеиҭарсра асистема шыҟам, уи азҵаара шыӡбатәугьы азгәеиҭеит.

Иҷыдоу ахыхьчага маҭәа ишәҵаны аминистр "азона ҟаԥшь" ахь днеит, хаҭала апациентцәа рҭагылазаашьа ибарц, драцәажәарц азы. Иара дразҵаауан иаҭаху зегьы рымоу ирымаму, иаарласны ргәабзиара шьақәгыларц рзеиӷьеишьеит.

"Анцәа иҳәааит иаарласны шәгәы бзиахо, уи ауп зегь реиҳа ихадоу. Шәҭаацәа рахь ԥшӡала шәхынҳәааит. Ҳара, ҳколлегацәа, аҳақьымцәа, ҳашәзыӡырҩлоит, ишәҭаху аҿы ҳшәывагылоит", - иҳәеит аминистр.

Аԥсуа телехәаԥшра анҵамҭаҿы иара убас иарбоуп Едуард Быҭәба амедицинатә усзуҩцәа рџьабаазы иҭабуп ҳәа шреиҳәаз, агоспитальгьы лассы-лассы даҭаалоит ҳәа ажәа шриҭаз, аҳақьымцәеи ахәышәтәырҭа анапхгареи иареи аусутә еиԥыларақәа мҩаԥаагалоит ҳәа шиҳәаз.

Гәдоуҭатәи араионтә хәышәтәырҭа аҳақьым хада Ҳаџьараҭ Шамба лаҵара 14 рзы иҟаиҵаз адыррала, аковид-госпиталь аҿы ишьҭоуп акоронавирустә инфекциа злоу апациентцәа 38-ҩык, урҭ рахьтә 16-ҩык рҭагылазаашьа бааԥсуп. Иара убас ара ареабилитациа иахысуеит COVID-19 иаиааихьоу 11-ҩык апациентцәа.

Аԥсуа телехәаԥшра аматериал аҿы иара убас иазгәаҭоуп агәабзиарахьчара аминистр атәыла амедусҳәарҭақәа зегьы дырҭааны рҭагылазаашьа гәеиҭарц игәы ишҭоу.

Аԥсны Аҳәынҭқарра ахада иусԥҟа инақәыршәаны Едуард Быҭәба Аԥсны агәабзиарахьчара аминистрс дҟаҵан аҩаша лаҵара 11 рзы. Иара диԥсахит зхатәгәаԥахарала змаҵура аанзыжьыз Ҭамаз Ҵахнакьиа.

8
Атемақәа:
Аҿкычымазара – акоронавирус Аԥсни адунеи аҿи: иалкаау