Ҭарашь Ҳагба Аԥсны ашьапылампыл азы: аҿиарамҩа ианылароуп

11
(ирҿыцуп 12:42 05.03.2021)
Ҭарашь Ҳагба Аԥсны ашьапылампыл азы Афедерациа ахадас далхын Афедерациа аҳасабырба-алхратә конференциаҿ хәажәкыра 2 рзы.

АҞӘА, хәажәкыра 5 – Sputnik. Аԥсны ашьапылампыл етап-етапла аҿиара амҩа ианылароуп ҳәа иҳәеит Sputnik арадиодырраҭара "Аамҭа-цҵа" аефир аҿы Аԥсны ашьапылампыл азы Афедерациа ахада ҿыц Ҭарашь Ҳагба.

"Ҳара иаԥаҳҵеит астратегиатә документ ҿыц – аԥснытәи ашьапылампыл аҿиара аплан. Уа иарбоуп иахьа иҳамоуи иҳамами, иҟаҳҵашеит. Апрограмма анагӡаразы аиҳабыра афинанстә цхыраара ҳарҭароуп. Аусура аганахь ала Афедерациа аштат аҿы аус рулароуп апрофессионалцәа", - иҳәеит иара.

Ҳагба иҳәеит ихаҭыԥуаҩыс Анри Ашәба дшыҟало, ConIFA аҿы Аԥсны ашьапылампыл азы Афедерациа ахаҭарнакс – Гиви Ҭодуа.

"Ашьапылампыл закәу бзианы идыруеит", - иҳәеит Ҳагба.

Аҩныҵҟатә чемпионатқәа рзы Ҭарашь Ҳагба иҳәеит урҭ рымҩаԥгаразы иалшоны иҟоу зегь шыҟаҵахо.

"Афедерациа ахаҭарнак иҳасабала акомандақәа ацхыраара шроу здыруазароуп уаанӡеиԥш – араионқәа рбиуџьетқәа рҟынтәи. Агәра ганы сыҟазароуп ԥхьаҟагьы усеиԥш шыҟало. Афинанс цхыраара шыҟало агәра анызгалак акомандақәа рхаҭарнакцәа сырԥылоит, аҽазыҟаҵаратә процесс ҳалагоит",- иҳәеит иара.

Иара убасгьы ахәмарратә мзар шьақәыргылатәуп атәыла аҩныҵҟатәи ахәмаррақәа рзы.

"Иҟаҵатәу рацәаӡоуп. Аинфраструктура аганахь ала ашьапылампылтә дәқәа рҭагылазаашьа бзиоуп ҳәа узҳәом. Ари апроблемагьы ӡбтәуп. Еилыскаауеит шықәсык аҩныҵҟала иҟоу апроблемақәа зегьы рыӡбра шзалымшо, аха уи амҩа ҳақәлароуп. Иахьазы ибзиоуп ҳәа ззуҳәо иҳамоу "Динамо" заҵәык ауп", - иҳәеит Ҳагба.

Ауадаҩрақәа шыҟоугьы Ҭарашь Ҳагба аҭагылазаашьа уаиааиртә еиԥш дахәаԥшуеит.

"2016 шықәсазы Аԥсны имҩаԥгаз ConIFA адунеитә чемпионат ҳажәлар рзы илакә-хҭысын. Ачемпионат ахаҭагьы аҩаӡара ҳарак аҭан имҩаԥган. Ажәлар реимак-реиҿак, рполитикатә усқәа рхаршҭны ҳкомандаз иаӡәыкын. Ари дара ашьапылампыласыҩцәагьы ирнырны рхы мҩаԥыргеит. Ари атәыла аӡыргара ду анаҭеит. Ус анакәха ашьапылампыл хымԥада арҿиара зҭаху усхкуп", - иҳәеит иара.

Афедерациа аԥҟаԥҵәа инақәыршәаны Афедерациа аиҳабы ԥшьышықәса ҳәа далырхуеит.

Ҭарашь Ҳагба диит 1991 шықәсазы, раԥхьатәи ишьаҿақәа ашьапылампыл ахь "Нарҭ" аҿы иеихигеит, нас "Гагра" ахьӡала дықәгылон, анаҩс "Нарҭ" ахь деиҭахынҳәит. Уи ашьҭахь аҟәатәи "Динамо" аҿы дыхәмаруан. Уажәы гагратәи акоманда ахьӡала дықәгылоит. Ҭарашь Ҳагба аспорт азҟаза, аорден "Ахьӡ-аԥша" III аҩаӡара ианашьоуп амилаҭтә команда ConIFA-2016 аверсиала адунеи ианачемпионхаз.

Еиуеиԥшым ааиҭақәа рзы Аԥсны ашьапылампыл азы Афедерациа напхгара арҭон: Владимир Мқанба, Валери Аршба, Рафаель Амԥар, Геннади Ҵнариа, Артур Амқәаб, Леонид Ӡаԥшьба, Џьамал Гәбаз, Руслан Аџьынџьал. 2017 -2020 шықәсқәа рзы Афедерациа дахагылан Џьума Кәарцхьиа.

11

Иҳаҩсыз уахыки-ҽнаки рыла даҽа 52-ҩык акоронавирус рыдырбалеит Аԥсны

4
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 14795-ы ыҟоуп, ргәы бзиахеит 13780-ҩык, рыԥсҭазаара иалҵит 222-ҩык.

АҞӘА, лаҵара 7 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 334-ҩык атестқәа рзыҟаҵан, урҭ рахьтә 52-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 51-ҩык, урҭ рахьтә 45-ҩык акоронавирус адиагноз рзышьақәыргылоуп, рҭагылазаашьа бааԥсуп 26-ҩык, ибжьаратәуп - 20-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 37-ҩык апациентцәа, Очамчыра ирхәышәтәуеит 13-ҩык, Гагратәи ахәышәтәырҭаҿы - 21-ҩык, Тҟәарчалтәи ахәышәтәырҭаҿы - хәҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

4
Атемақәа:
Аҿкычымазара – акоронавирус Аԥсни адунеи аҿи: иалкаау

Габуниа Дәрыԥшь имҩаԥысран иҟоу аҽырыҩрақәа рзы: ақыҭақәа зегьы рзы ныҳәа дууп

9
Аџьынџьтәылатә еибашьра Ду аҿы Аиааира 76 шықәса ахыҵра аҳаҭыраз Дәрыԥшь ақыҭан имҩаԥысуеит аҽырыҩрақәа. Урҭ шеиҿкаахо, насгьы иалахәхо акомандақәа ртәы арадио Sputnik аефир аҿы еиҭеиҳәеит аҽырыҩраҿы аӡбаҩ хада имаӡаныҟәгаҩ Џьума Габуниа.
Раионк аԥсҭазаараҟынтә: Габуниа Дәрыԥшь имҩаԥысран иҟоу аҽырыҩрақәа ирызкны

"Маи 8-9 Гәдоуҭа араион ф-қыҭак злахәу аныҳәа дуӡӡа амҩаԥгара ҳазыхиоуп, ашҭа маншәлоуп, аҽқәа уахь инаргаран иҟаз зегьы иахьа инагоуп. Аҽқәа рҭыԥ дара ақыҭақәа рхала, рџьабаала иҟарҵеит. Араион аҟынтә ф-командак 50-50 нызқь мааҭ рыҭоуп, ацхыраара ҳасабала. Иҟоуп раԥхьаӡа акәны ас еиԥш аҽырхәмаррақәа ирылахәу. Иҟоуп раԥхьаӡа акәны иҽыжәлазгьы, ус ҳара ҳҿы дыҟоуп 9 класск рҿы итәоу аҽыуаҩ қәыԥш. Ари аныҳәа ҳажәлар еиднакылоит, аԥсуа жәынгьы-ҿангьы ирымаз аспорт аихьӡарақәа аазырԥшуаз, аԥсҭазаара дуӡӡа ԥхьаҟа изгоз ажәларқәа ҳреиуоуп ҳара. Иҟан аамҭақәа 10 командак рҟынӡа ианыҟаз. Аԥсуа ҽыбӷаҟазаратә хәмаррақәа раԥхьа имҩаԥган Абгархықә, нас Аҷандара, Аацы, абарҭ ақыҭақәа зегьы рзы ари амш азы аныҳәа дуӡӡа ҟарҵон, иара усгьы иҟоуп иахьагьы", - ҳәа еиҭеиҳәеит Габуниа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.

Иара убас шәаԥхьар ҟалоит:

9