АҞӘА, хәажәкыра 7 - Sputnik. Аԥсны ААР аусура иалагеит автомҩатә ԥҟарақәа реилагара азгәаҭаразы аҳәынҭқарратә проект, абри атәы аанацҳауеит амчратә усбарҭа асаит.
Атехникатә хархәагақәеи, насгьы еизырҳаз аппараттә комплекси рыбзоурала иаҧҵан автотранспорт аныҟәара аҭагаларазы иакыу асистема, ҳәа азгәаҭоуп Аԥсны ААР аҟны.
ААР Аҳәынҭқарратә автоинспекциа аусбарҭа аиҳабы Баҭал Агрба иажәақәа рыла, зыӡбахә ыҟоу асистема ҳәынҭқарратә проектуп, ААР атехникатә лшарақәа ирыбзоураны еиҿкаау усуп, амҩатә-ҧҟарақәа реилагаразы ахараҧсақәа зегьы шеизакыу ареспублика аҳәынҭқарратә биуџьет ахь инеиуеит. Иазгәеиҭеит, уаанӡа автофиксациа акомплексқәа рыла еиқәзыршәоз акоммерциатә еилазаара "Трансбезопасности" дареи ирыбжьаз аиқәышаҳаҭратә еизыҟазаашьақәа шаԥыху.
Иахьатәи аамҭазы ареспубликатә мҩаду хада иаԥну Аԥсны араионқәа хәба рҟны, амҩақәа рҟны аҭагылазаашьа автомониторинг ҟазҵо асистемахь иаҿакыуп аа-комплекск.
Асистема апрограмматә хәҭа Аҧсны Аҩныҵҟатәи аусқәа рминистрра, аинформациа аус адулара ацентр абаза аҟны еиҿкаауп, уахыи-ҽныи аҭыҧ змоу амҩатә ныҟәарақәа зегьы рзы адыррақәа ишьақәыргылоу афоторадартә комплексқәа иҭаргалоит. 2020 шықәсазтәи аналитикатә еихшьаалақәа рхархәарала, арҭ алкаақәа ирыбзоурахеит амҩа-ныҟәаратә ԥҟарақәа реилагара ҭазгало автофиксациа асистема арҿыцрагьы.
Уахынла аусура арманшәаларазы амҩа- ныҟәаратә ԥҟарақәа реилагаразы автофиксациа ҟазҵо акамерақәа арлашагақәа рыла еиқәыршәоуп. Амашьынарныҟәцаҩцәа рзы афотои авидеои анызҵо амыругақәа ахьықәыргыло аҭыҧ ишазааигәахо дзырдыруа адыргақәа ықәыргылоуп, арҭқәа зегьы ареспублика амҩадуқәа рҟны азинеилагарақәа рпрофилактика, амҩа-траспорттә хҭысқәа рыҟамларазы цхыраагӡақәоуп.
Иара убас, амҩа- ныҟәаратә ҧҟарақәа реилагаразы ахараҧсатә ҧарахшәаара алыршахоит POS- терминалқәеи, абанктә кассақәеи рыла анаҩсгьы, амобилтә цҵа алагьы, ус еиҧш алшара ҟаҵоуп ахараҧса амазаара узырбо, ААР аофициалтә саит аҟны иҭагалоу иҿыцу амодультә информациатә маҵзура иабзоураны, ҳәа иҳәеит ААР аштаб аинформациа- техникатә ҟәша аиҳабы Едуард Сиргинаа.
