"Амшынеиқәафымцамч": Аԥсны 90 нызқь рҟынӡа фымцамчԥхьаӡага ықәыргылатәуп

8
(ирҿыцуп 13:44 10.03.2021)
Афымцамч ахархәара ҭазыҩуа ахархәагақәа раахәареи рықәыргылареи мҩаԥгахоит Аинвестпрограммеи "Амшынеиқәафымцамч" аԥарақәеи рыла.

АҞӘА, хәажәкыра 10 – Sputnik. Аԥсны 90 нызқь рҟынӡа фымцамчԥхьаӡага ықәыргылатәуп ҳәа арадио Sputnik иазеиҭеиҳәеит "Амшынеиқәафымцамч" адиректор хада ихаҭыԥуаҩ Зураб Багаԥшь.

Иара иажәақәа рыла, 2010 шықәсазы арҭ ахархәагақәа рықәыргылара апроцесс хацыркын. 2014 шықәсанӡа иаахәан 18 000 хархәага, 12 нызқь - Аҟәа ақалақь азы. Иахьазы урҭ рҟынтәи аус руеит 70 процент ҳәа иҳәеит иара.

"Иахьазы ареспубликаҿ 90 000 фымцамчԥхьаӡага ҿыц аахәатәуп, асовет аамҭақәа раан иаахәаз ахархәагақәа ахьажәхьо иахҟьаны. Ауааԥсыра аԥара рымшәар алашара рымырхыр алзыршо ахархәагақәа рзықәгылазар, рхы иадырхәо афымцалашара ахәԥса ршәалоит. 90 процент рҟынӡа аԥарашәара ҟалартә иалдыршоит. Атәылаз еиҳа актуалра рыланы иҟоуп харантәи афымцамч шаҟа рхы иадырхәаз гәазҭо аппаратқәа", - ҳәа иҳәеит иара.

Багаԥшь иажәақәа рыла, Аԥсны асоциал-економикатә ҿиараз Аинвестпрограмма аҳәаақәа ирҭагӡаны аенергетика аусхк аиҭашьақәыргыларазы акомплекстә план еиҿкаауп. Абри аплан ала аремонт ззыруа аихшаратә ҳақәа ахылаԥшратә хархәагақәа рыла еиқәыршәахоит. Уажәы урҭ рықәыргылара мҩаԥыслоит Тҟәарчал, Гагра, Очамчыра араионқәа рҿы.

"Амшынеиқәафымцамч" акәзаргьы, арҭ ахархәагақәа рықәыргылара иаҿуп ахатә биуџьет ала, аха афинанстә ҭагылазаашьа иахҟьаны шықәсык ахь шәкы рҟынӡоуп иахьрылшо.

"Аилахәыра афинанстә уадаҩрақәа амоуп. Уи адагьы аенергетика аганахьала ҳзакәанԥҵара ауадаҩрақәа амоуп. Уаанӡа аҳәынҭқарра аенергетика азхьаԥшра ду анаҭозар, уажәы ахылаԥшратә хархәагақәагьы рзықәыргылом. Арахь дара рыхәқәа шьҭыҵуеит. Аилахәыра аԥарақәа реиҳарак егьырҭ зыда ԥсыхәа ыҟам амыругақәеи ахархәагақәеи ирыхҭыннаҵоит", - ҳәа иҳәеит Багаԥшь.

Багаԥшь игәаанагарала, Аԥсны иахьаҵанакуа зегьы ажәытә хархәагақәа ԥсахзар, ауааԥсыра хылаԥшрада афымцалашара ахархәара рзалмыршо ахылаԥшратә шьақәгылақәа ықәыргылазар аҭагылазаашьа аҽеиҭанакуан.

Хәажәкыра 1 азы аҳәынҭқарра зинтә политиказ аилак аилатәараҿы иахәаԥшуан аенергетика аусхк аҟны азинеилагарақәа зҵазкуаз Аԥсны АЗ ариашарақәа.

Ариашарақәа инарықәыршәаны закәаншьаҭада афымцамч ахархәара атәылауааи, аиурист хаҿқәеи, анаплакыҩцәеи хараԥсас ирыднаҵоит иреиҵаӡоу ауалафахәқәа 20 рыхә киловаттк азы. Амаҵзурауаа рзы ахараԥса иреиҵаӡоу ауалафахәқәа 1000 рыхә киловаттк азы. Арҭ ариашарақәа Апарламент аилатәараҿы ирылацәажәараны иҟоуп.

8

Аԥсуа боксиор Саир Качараа Европа Аԥхьахә агаразы алшара иоуит

3
(ирҿыцуп 09:29 18.04.2021)
15-16 шықәса зхыҵуа рыбжьара абокс ала Урыстәыла Аԥхьахә азы аиндаҭлара мҩаԥысуан мшыԥы 11 -17 рзы, Анапа.

АҞӘА, мшаԥы 18 - Sputnik. Бадри Есиава. Аԥсуа боксиор Саир Качараа 15-16 шықәса зхыҵуа рыбжьара абокс ала Урыстәыла Аԥхьахә азы аиндаҭлараҟны аиааира игеит, иигаз аиааира иалнаршоит Европа Аԥхьахә аҿы иқәгылара, абри атәы Sputnik акорреспондент изеиҭеиҳәеит аспортсмен иазыҟаҵаҩцәа руаӡәк Арнольд Гәыбаз.

"Атурнир аан Саир ԥшьы-еиԥыларак мҩаԥигеит, урҭ зегьы рҿы аиааира игеит. Афинал аҟны еиԥылеит Белгородтәи аспортсмени иареи (Родион Мытник-аред.). Саир иеиндаҭлоз даара иӷәӷәан. Иаԥхьаҟа иизыԥшуп Европа Аԥхьахә аҿы ақәгылара. Саир ҩынтәуп Урыстәыла Аԥхьахә азы аиндаҭлараҟны аиааира игоижьҭеи, аха усҟан урыстәылатәи акоманда Европа Аԥхьахә агаразы имцаӡеит", - иҳәеит Гәыбаз.

© Видео Арнольд Губаз
Аԥсуа боксиор Саир Качараа 15-16 шықәса зхыҵуа рыбжьара абокс ала Урыстәыла Аԥхьахә азы аиндаҭлараҟны аиааира игеит

Гәыбаз иазгәеиҭеит, ари атурнир ахь иколлегацәеи иареи Нальчикнтәи ишааз, уаҟа абокс азы Урыстәылазегьтәи атурнир мҩаԥыргон, уи иалахәын ԥшьҩык гәдоуҭатәи аспортсменцәа- ахԥатәи аҭыԥ ааникылеит Дамеи Чамагәуа, аҩбатәи-Соломон Папба, Аинар Малиеи Даут Хагәышьи актәи аҭыԥ.

Саир Качараа 15 шықәса ихыҵуеит. Анапа имҩаԥысуаз аицлабрақәа рҟны 60 кьыла рҟынӡа зыкапан наӡо дрыцықәгылон. Аспортсмен дазыҟарҵоит Арнольд Гәыбази Алиас Агрбеи.

3

COVID-19 зцәа иалаз апациент иԥсҭазаара далҵит Аҟәатәи аинфекциатә хәышәтәырҭаҿы

5
Иҳаҩсыз уахыки-ҽнаки рыла COVID-19 рылоу ирыламу аилкааразы 187-ҩык атестқәа рзыҟаҵан, урҭ рахьтә 42-ҩык акоронавирус рцәа ишалаз аадырԥшит.

АҞӘА, мшаԥы 17 – Sputnik.  Аҟәатәи аинфекциатә хәышәтәырҭаҿы иԥсҭазаара далҵит акоронавирустә инфекциа ҿыц ззышьақәыргылаз 67 шықәса зхыҵуаз апациент, ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 46-ҩык, урҭ рахьтә 36-ҩык акоронавирус адиагноз рзышьақәыргылоуп, рҭагылазаашьа бааԥсуп 12-ҩык, ибжьаратәуп - 25-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 36-ҩык апациентцәа, Очамчыра ирхәышәтәуеит ааҩык, Гагратәи ахәышәтәырҭаҿы - 12-ҩык, Тҟәарчалтәи ахәышәтәырҭаҿы - ҩыџьа апациентцәа.

Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 13924-ҩык ыҟоуп, ргәы бзиахеит 13338-ҩык, рыԥсҭазаара иалҵит 219-ҩык.

Акоронавирус иазку ажәабжьқәа зегьы шәрыԥхьар ҟалоит абра>>

5
Атемақәа:
Аҿкычымазара – акоронавирус Аԥсни адунеи аҿи: иалкаау

Адунеи аҿы иаарԥшу COVID-19 ахҭысқәа 140 миллион иреиҳахеит

2
(ирҿыцуп 09:32 18.04.2021)
Адунеи аҟны COVID-19 здырбалаз ауаа рхыԥхьаӡара 140 082 593 ирзааигәахоит, урҭ рахьтә 3 002 154 миллионҩык иреиҵамкәа рыԥсҭазаара иалҵит, ргәы бзиахеит 79 840 908 миллионҩык.

АҞӘА, мшаԥы 18 - Sputnik. Адунеи аҿы акоронавирустә инфекциа ҿыц здырбалаз рзеиԥш хыԥхьаӡара 140 миллион иреиҳахеит ҳәа адырра ҟанаҵоит Џьонс Хопкинс ихьӡ зху ауниверситет. Абри атәы аанацҳауеит РИА Новости.

Авирус реиҳаӡа алаҵәара ахьамоу тәылоуп Еиду Америкатәи аштатқәа-31,5 миллионҩык чмазцәахеит), аҩбатәи аҭыԥ аҟны игылоуп Индиа-14,5 миллионҩык), ахԥатәи аҿы Бразилиа 13,8 миллионҩык.

Мшаԥы 17 адыррақәа рыла аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 13924-ҩык ыҟоуп, ргәы бзиахеит 13338-ҩык, рыԥсҭазаара иалҵит 219-ҩык.

Хәажәкыра 11, 2020 шықәсазы Адунеизегьтәи агәабзиарахьчаратә еиҿкаара апандемиа рыланаҳәеит акоронавирустә инфекциа ҿыц COVID-19 алаҵәара инадҳәаланы.

Акоронавирус иазку ажәабжьқәа зегьы шәрыԥхьар ҟалоит абра>>

 

2
Атемақәа:
Аҿкычымазара – акоронавирус Аԥсни адунеи аҿи: иалкаау