Апарламент аҵыхәтәантәи аԥхьарала амазаразы азакәан ахь аиҭакрақәа аднамкылеит

24
Апарламент адепутатцәа "Амаҵурауааи адепутатцәеи рхашәалақәеи, рныхрақәеи, рмазареи, амазаратә ҟазшьа змоу рхыдҵақәеи ашәҟәы рҭагаларазы" азакәан аҵыхәтәантәи ахԥатәи аԥхьарала ирыдыркылеит 2020 шықәса жәабранмзазы.

АҞӘА, хәажәкыра 12 – Sputnik, Бадраҟ Аҩӡба. Апарламент адепутатцәа "Амаҵурауааи адепутатцәеи рхашәалақәеи, рныхрақәеи, рмазареи, амазаратә ҟазшьа змоу рхыдҵақәеи ашәҟәы рҭагаларазы" азакәан ахь ариашарақәа аларымгалеит иахьа, хәажәкыра 12 рзы ҳәа аҭыԥ аҟынтәи иааицҳаит ҳкорреспондент.

Адокумент рыдигалеит адепутат Гиви Кәарҷиа. Иара иазгәеиҭеит азакәан шрыдыркылахьоу, аха амчра шамоуц, избанзар "Аҳәынҭқарратә маҵуразы" азакәан амчра анаиулак ашьҭахь акәхоит ҳәа иахьшьаз азы.

Ариашара хадақәа ирыҵаркуеит "адекларант иҭаацәа ахаҭарнакцәа" акатегориахь иаҵанакуа ахаҿқәа: ачынуаа рхаҭақәа рыдагьы урҭ рыҳәса/рхацәа, зықәра намӡац/зықәра наӡахьоу рыхшара, рашьцәа/раҳәшьцәа.

Ариашарақәа ируакхеит азакәан амч аиура азҵаара: ариашарақәа раԥшьгаҩцәа "Аҳәынҭқарратә маҵуразы" азакәан амчра аиура иазымԥшкәа 2021 шықәса мшаԥы 3 инаркны азакәан амчра аиуроуп ҳәа иршьоит.

Адепутат Алмас Џьапуа ажәалагала ҟаиҵеит ариашарақәа адгылара рырҭарц, иҳәеит азакәан апроект иадгылар, акыршықәса аус здырулоз ари адокумент аусура иалагоит ҳәа.

Апарламентари Валери Агрба иара убасгьы ариашарақәа рыдкылареи азакәан амчра аиура арыцхәи дрыдгылеит.

Апарламент аҿы ахада ихаҭарнак Саида Быҭәԥҳа иазгәалҭеит азакәан адкылара ашьҭахь иара ахархәара алшахароуп ҳәа. Лара инаҵшьны иазгәалҭеит азакәан аус аиҭадулара шаҭаху, амчра анаиулак ашьҭахьгьы.

Адепутат Баҭал Табаӷәуа иазиԥхьаӡоит азакәан амчра аиуроуп "Аҳәынҭқарратә маҵуразы" азакәан анрыдыркылалак ашьҭахь ҳәа.

Гиви Кәарҷиа иазгәеиҭеит макьана аамҭа шыҟоу аҳәынҭмаҵзуразы азакәан адкыларазы, убри азы уажәы уи азыԥшра аҭахны ишимбо.

Актәи аԥхьараан адепутатцәа рыбжьы рҭиит иалагалаз ариашарақәа рзы, аха аҩбатәи, аҵыхәтәантәи аԥхьараантәи абжьыҭираан иазхоз абжьқәа амоуит.

Апарламент адепутатцәа "Амаҵурауааи адепутатцәеи рхашәалақәеи, рныхрақәеи, рмазареи, амазаратә ҟазшьа змоу рхыдҵақәеи ашәҟәы рҭагаларазы" азакәан аҵыхәтәантәи ахԥатәи аԥхьарала ирыдыркылеит 2020 шықәса жәабранмзазы.

Ԥхьаҟазы ахадарахьы акандидатцәеи адепутатцәеи рдекларациақәа нарышьҭлароуп алхратә комиссиахь еиԥш ашәахтәқәеи аизгақәеи рминистррахьгьы, аусбарҭа асаит аҿы иӡыргазарц. Убри аан ачынуаҩ имаҵзура данахагыла ашьҭахь, 30 мшы рыҩнуҵҟа адекларациа хаирҭәаароуп. Уи адагьы, аԥсахрақәа мҩаԥгоуп ахәҭаҷ 6 актәи ахәҭаҿы. Уи инақәыршәаны ахадарахьы акандидатцәеи адепутатцәеи рдекларациақәа нарышьҭлароуп алхратә комиссиахь еиԥш, ашәахтәқәеи аизгақәеи рминистррахьгьы.

Ариашарақәа инарықәыршәаны адекларациақәа рдыррақәа аофициалтә саитқәа рҟны икьыԥхьхоит, АИХқәа ирзынарышьҭуеит.

Уаанӡа асаит аҿы адекларант иҭаацәа рзы адыррақәа ркьыԥхьра ҟаломызт, аха азакәан иаларгало ариашарақәа иазԥхьагәарҭоит уи азы аинформациа, дара ахьынхо аҭыӡҭыԥгьы убрахь иналаҵаны, аларҵәара.

24
Милиция

Аԥсны арепатриациазы уаанӡатәи аминистр Беслан Дбар иԥшаара рылаҳәоуп

1
(ирҿыцуп 16:26 23.04.2021)
Аԥсны Апрокуратура хада ашьаусԥшааратә усбарҭа ашьаус хацнаркит Арепатриациа уаанӡатәи аминистр Беслан Дбар иганахьала Аԥсны азакәанԥҵара анагӡашьа ахылаԥшразы аусбарҭа Апрокуратура хадахь инанашьҭыз аматериалқәа рҵаҵӷәала.

АҞӘА, мшаԥы 23 - Sputnik. Аԥсны арепатриациазы уаанӡатәи аминистр Беслан Дбар иԥшаара рылаҳәоуп ҳәа аанацҳауеит Апрокуратура хада апресс-маҵзура.

Апрокуратура хада аусҭҵааратә усбарҭа иара убасгьы ирыланаҳәоит ИАЕ ИАЕ "РемСтрой2012" адиректор Амиран Лакербаиагьы иԥшаара рылаҳәоуп ҳәа.

Ашьаусԥшаара адыррақәа рыла, Дбар амаҵзуратә ԥаршеитә усмҩаԥгатәқәа ҟаиҵеит, гәыԥҩык ауаа - ЗҲәА "РемСтрой 2012" адиректор Амиран Лакербаиеи Арепатриациазы афонд атехникатә хылаԥшра анџьныр Денис Ақаҩбеи иареи - заанаҵ еицәажәаны мҽхакы ҭбаала абиуџьеттә ԥарақәа рӷьычра хықәкыс иҟаҵаны мцҳәарала, ишԥаршеиз заанаҵ идырны ишьақәиргылеит амаҵзуратә документқәа.

Аԥсны Апрокуратура хада ашьаусԥшааратә усбарҭа ашьаус хацнаркит хәажәкыра 23 рзы. Аҟәатәи ақалақьтә ӡбарҭа Арепатриациаз уаанӡатәи аусзуҩ Денис Ақаҩба иганахьала аҩнтәы рбаандаҩра иқәнаҵеит лаҵара 23 рҟынӡа.

Иара убас шәаԥхьар ҟалоит:

1

Урыстәылатәи агранатаршәыҩцәа ацәҟьарақәа ирықәкны ихысуан

4
(ирҿыцуп 14:32 23.04.2021)
Аԥсны иҟоу Аладатәи арратә округ арратә ҟәшақәа аӡынразтәи рҵара-гәаҭаратә уснагӡатәқәа мҩаԥыргоит. Амчыбжь анҵәамҭазы арратә база адырра ахәшьара ықәдыргылоит. Ауснагӡатәқәа ирыдыԥхьалоуп 1,5 нызқьҩык аруаа, 500 ак арратә техника.

АҞӘА, мшаԥы 23 - Sputnik. Аԥсны иҟоу Урыстәылатәи Аладатәи арратә округ агранатаршәыҩцәа еиҭаҵуази еиҭамҵуази ацәҟьарақәа ирықәкны ихысуан агәаҭара аҳәаақәа ирҭагӡаны. Абри атәы аанацҳауеит аокруг апресс-маҵзура.

Аполигонқәа Нагвалоуи Ҵабали рҟны аррамаҵзурауаа "аӷа" иеибашьыга машьынақәа рсахьа змаз ацәҟьарақәа иреихсуан 350 метра набжьаны. Ацәҟьарақәа секундк 10 метрак рҟынӡа ирццакын.

Абри аан ахархәара рыҭан: анапылатә гранатаршәгақәа РПГ-7, акәылӡы кылызжәо агранатақәа ПГ-7ВЛ, агранатаршәга АГС-17.

Амшын аԥшаҳәаҿы ауснагӡатәқәа рымҩаԥгараан аԥша аӷьеы иасуан, секундк ала 20 метра инаӡон. Аруаа рхысраан ари азгәаҭара рыман.

Урыстәыла ар ргәаҭара мҩаԥысуеит Аладатәи арратә округ ар ркомандаҟаҵаҩ Александр Дворников инапхгарала. Аҽазыҟаҵарақәа мҩаԥысуеит 2021 шықәсазтәи аплан инақәыршәаны. Аҽазыҟаҵарақәа ирылархәуп Амшынеиқәатә флоти Каспитәи афлоти. Аҽазыҟаҵарақәа рыхәшьара мҩаԥыргоит арратә усбарҭа анапхгаҩцәа рыла ишьақәгылоу акомиссиа. Игәарҭоит ар реиҿкаашьа, анормативқәа рынагӡашьа, роперативтә зыҟаҵара аҩаӡара.

4